Лука 6

Шойччан лун йылысь

(Мт. 12:1-8; Мк. 2:23-28)

1Ыджыд лун бӧрын медводдза шойччан лунӧ Исус мунӧ вӧлі нянь муяс вомӧн. Сылӧн велӧдчысьясыс мунігмозныс нетшкисны шепсӧ да кианыс ниртӧмӧн сёйисны тусьсӧ. 2Фарисейясысь кодсюрӧ шуисны: «Мый ті вӧчанныд! Тайӧс оз позь вӧчны шойччан лунӧ». 3Исус воча шуис: «Ті ӧмӧй энӧ лыддьылӧй, мый вӧчис Давид, кор тшыгъяліс аслас йӧзкӧд? 4Сійӧ пырис Ен керкаӧ, босьтіс вежа нянь да сёйис и сетіс тшӧтш аслас йӧзлы. Тайӧ няньсӧ сӧмын попъяслы позис сёйны». 5Исус шуис фарисейяслы: «Морт Пи шойччан лун вылын ыджыдыс».

Косьмӧм киаӧс бурдӧдӧм

(Мт. 12:9-14; Мк. 3:1-6)

6Мӧд шойччан лунӧ Исус пырис синагогаӧ да велӧдіс. Сэні вӧлі морт, кодлӧн веськыд киыс вӧлі косьмӧма. 7Индӧдӧ велӧдысьяс да фарисейяс сюся видзӧдісны Исус бӧрся, бурдӧдас-ӧ Сійӧ шойччан лунӧ, ӧд корсисны помка мыжавны Сійӧс. 8Налысь мӧвпъяссӧ тӧдӧмӧн Исус шуис косьмӧм киа мортлы: «Чеччы да пет шӧрас». Сійӧ чеччис да воськовтіс водзлань. 9Исус шуис: «Вочавидзӧй, мый позьӧ вӧчны шойччан лунӧ: бурсӧ али лёксӧ, мездыны мортӧс али вины сійӧс?» Найӧ чӧв олісны. 10Исус синнас кытшовтіс ставнысӧ, сэсся шуис висьысьлы: «Нюжӧд китӧ». Сійӧ нюжӧдіс, и киыс пырысь-пыр бурдіс, лои мӧдыс кодь. 11Фарисейяс да Индӧдӧ велӧдысьяс скӧрысла пузисны, ас костаныс пондісны сёрнитны, мый вӧчны Исускӧд.

Дас кык велӧдчысь

(Мт. 10:1-4; Мк. 3:13-19)

12Сійӧ лунъясӧ Исус кайис керӧсӧ кевмысьны да войбыд кевмысис сэні Енмыслы. 13Луннас Сійӧ корис Ассьыс велӧдчысьяссӧ да бӧрйис на пӧвстысь дас кыкӧс, кодъясӧс нимтіс апостолъясӧн. Тайӧ вӧліны: 14Симон, кодлы сетіс Петыр ним, сылӧн Ӧндрей вокыс, Яков, Иоан, Филип, Варфоломей, 15Матвей, Фома, Алфей Яков, Симон, кодӧс нимтісны Зилотӧн#6:15 Зилот – патриот; морт, коді ёна кӧсйӧ дорйыны ас войтырсӧ., 16Яков Иуда да Искариот Иуда, Исусӧс вузалысь.

Исус бурдӧдӧ висьысьясӧс

(Мт. 4:23-25)

17Велӧдчысьясыскӧд керӧсысь лэччӧм бӧрын Исус сувтіс шыльыдінӧ. Сэні вӧлі чукӧртчӧмаӧсь Сылӧн уна велӧдчысь, нӧшта став Иудея муысь, Ерусалим карысь, саридздорса Тир да Сидон каръясысь унасьыс-уна йӧз. 18Ставныс найӧ вӧлі локтӧмаӧсь кывзыны Исусӧс да бурдӧдчыны асланыс висьӧмъясысь. Весиг пеж лолӧн кутӧмаяс бурдалісны. 19Йӧз чукӧрысь быдӧн зілис инмӧдчывны Исус дінӧ, ӧд Сысянь петіс вын да тайӧ выныс бурдӧдіс быдӧнӧс.

Кодъяс шудаӧсь?

(Мт. 5:1-12)

20Аслас велӧдчысьяс вылӧ видзӧдӧмӧн Исус висьталіс:

«Шудаӧсь ті, ловныдлы корысьяс,

ӧд тіян эм Енлӧн Юралӧм.

21Шудаӧсь ті, ӧні тшыгъялысьяс,

ӧд ті пӧтанныд.

Шудаӧсь ті, ӧні бӧрдысьяс,

ӧд ті понданныд серавны.

22Ті шудаӧсь, Морт Пи вӧсна кӧ йӧзыс тіянӧс мустӧмтӧны, вӧтлӧны, лёкӧдӧны да няйтӧсьтӧны тіянлысь нимнытӧ. 23Налӧн батьясныс тадзи вӧчлісны пророкъяслы. Нимкодясьӧй да чеччалӧй долыда, ӧд ыджыд тырдон виччысьӧ тіянӧс енэжас.

24Курыд шог тіянлы, озыръяс!

Ті курыштінныд нин аслыныд олан гажсӧ.

25Курыд шог тіянлы, ӧні пӧтӧмаяс!

Ті кутанныд на пыкны тшыглунсӧ.

Курыд шог тіянлы, ӧні сералысьяс!

Ті понданныд на шогсьыны-бӧрдны.

26Курыд шог тіянлы, став йӧзыс кӧ сёрнитӧны тіян йылысь бура. Налӧн батьясныс тадзи жӧ сёрнитісны ылӧгпророкъяс йылысь».

Муслун йылысь

(Мт. 5:38-48; 7:12)

27«Тіянлы, Менӧ кывзысьяслы, шуа: радейтӧй тіянӧс мустӧмтысьясӧс, бурсӧ вӧчӧй тіянӧс дзескӧдысьяслы, 28бурсиӧй тіянӧс ёрысьясӧс да кевмысьӧй тіянӧс ӧтдортысьяс вӧсна. 29Чужӧмбанад кучкысьлы бергӧд тшӧтш мӧдарсӧ. Вылыс паськӧмтӧ мырддьысьлы лэдз босьтны тшӧтш дӧрӧмтӧ. 30Тэнсьыд корысьлы сет, тэнсьыд босьтысьлысь бӧр эн кор. 31Мый кӧсъянныд, медым йӧзыс вӧчисны тіянлы, сійӧс и ті вӧчӧй налы. 32Радейтанныд кӧ тіянӧс радейтысьясӧс, мыйсяма ошкӧм тіянлы таысь? Мыжаяс ӧд тшӧтш радейтӧны найӧс радейтысьясӧс. 33Вӧчанныд кӧ бурсӧ тіянлы бур вӧчысьяслы, мыйсяма ошкӧм тіянлы таысь? Тадзи вӧчӧны тшӧтш мыжаяс. 34Водзӧсаланныд кӧ бӧр виччысьӧмӧн, мыйсяма ошкӧм тіянлы таысь? Мыжаяс тшӧтш водзӧсалӧны мыжаяслы ставсӧ бӧр босьтӧм могысь. 35Ті, мӧдарӧ, радейтӧй тіянӧс мустӧмтысьясӧс, вӧчӧй бурсӧ да водзӧсӧн сетӧй, но энӧ виччысьӧй бӧрсӧ. Сэки вичмас тіянлы ыджыд тырдон. Ті лоанныд Медвылыссалы ныв-пиӧн, ӧд Сійӧ бур сьӧлӧма бурсӧ вунӧдысьяс дінӧ да лёкъяс дінӧ. 36Лоӧй Батьныд моз бур сьӧлӧмаӧсь».

Энӧ мыждӧй

(Мт. 7:1-5)

37«Энӧ мыждӧй, сэки тіянӧс оз мыждыны. Энӧ мыжалӧй, и тіянӧс оз мыжавны. Прӧститӧй, и тіянӧс прӧститасны. 38Сетӧй, сэки тіянлы сетасны. Сетасны бур муртӧсӧн, топыда тувкӧдӧмӧн, моздор тырныд сӧвтӧмӧн. Асланыд мурталӧм серти тіянлы мурталасны».

39Исус висьталіс налы нӧшта велӧданвисьт:

«Вермас-ӧ синтӧм нуӧдны синтӧмӧс? Оз-ӧ кыкнанныс усьны гуранӧ? 40Велӧдчысь абу ыджыдджык аслас велӧдысьысь. Но сӧмын велӧдчӧм бӧрас сійӧ лоас аслас велӧдысь кодьыс.

41Кыдзи тэ верман вокыдлӧн синмысь ёгторсӧ аддзыны, аслад синмысь кӧ керсӧ он казяв? 42Кыдзи тэ верман шуны вокыдлы: ”Вай перъя синсьыд ёгторсӧ”, аслад синмысь кӧ керсӧ он аддзы? Кык бана шаньга! Водзджык аслад синмысь керсӧ перйы, сэки вокыдлӧн синмысь ёгторсӧ верман перйыны».

Бур да лёк вотӧс

(Мт. 7:16-20; 12:33-35)

43«Бур пу оз вай лёк вотӧс, лёк пу – бур вотӧс. 44Путӧ донъялӧны вотӧс сертиыс. Лежнӧг вылысь ӧд оз чукӧртны инжир, тусяпу вылысь – виноград. 45Бур морт аслас бур сьӧлӧмысь бурсӧ петкӧдӧ, лёк морт аслас лёк сьӧлӧмысь лёксӧ петкӧдӧ. Ӧд мыйӧн тырӧма мортыслӧн сьӧлӧмыс, сійӧ вомсьыс и петӧ».

Кык керка йылысь велӧданвисьт

(Мт. 7:24-27)

46«Мыйла ті шуанныд Меным: ”Господьӧй, Господьӧй”, но онӧ вӧчӧй Менам висьталӧм серти? 47Висьтала тіянлы, кутшӧм сійӧ мортыс, коді локтӧ Ме дінӧ, кылӧ Менсьым кывъясӧс да олӧ на серти. 48Сійӧ керка лэптысь кодь, коді джуджыда кодйысяс да пуктас керка подувсӧ из вылӧ. Ытва дырйи ойдӧм ваыс оз вермы вӧрзьӧдны тайӧ керкасӧ, сійӧс ӧд из вылӧ лэптӧма. 49А коді кылӧ Менсьым кывъясӧс да оз ов на серти, сійӧ подувтӧм керка лэптысь кодь. Ытва дырйи сылӧн керкаыс дзик пыр ставнас киссяс».

Currently Selected:

Лука 6: КБ

Highlight

Copy