Лука 18

Отсӧг корысь дӧва да шогмытӧм ёрдысь йылысь велӧданвисьт

1Исус висьталіс велӧданвисьт, мый оз ков лигышмунны, а дугдывтӧг кевмысьны. 2Сійӧ висьталіс: «Ӧти карын вӧлі ёрдысь, сійӧ Енсьыс эз пов да йӧзысь эз яндысь. 3Сійӧ карас оліс дӧва, коді волывліс ёрдысь дінӧ да корис: ”Дорйы менӧ дзескӧдысьысь”. 4Ёрдысь дыр эз босьтчы дорйынысӧ. Сэсся шуис: ”Дерт, ме Енсьыс ог пов да йӧзысь ог яндысь. 5Но тайӧ дӧваыс дзикӧдз менӧ дӧзмӧдіс – ковмас дорйыны. Ог кӧ дорйы, бурӧн ог мын сыысь”».

6Господь шуис: «Кыланныд, мый шуӧ шогмытӧм ёрдысь? 7А Енмыс ӧмӧй оз дорйы Ассьыс бӧрйӧмаяссӧ, кодъяс лун и вой корӧны отсӧгсӧ Сылысь? Сёрмас ӧмӧй Сійӧ сетны отсӧгсӧ? 8Висьтала тіянлы: Сійӧ регыдӧн доръяс найӧс. Но аддзас-ӧ Морт Пи му вылысь татшӧм эскӧмсӧ локтӧм бӧрас?»

Фарисей да вот перйысь йылысь велӧданвисьт

9Асьнысӧ веськыда олысьӧ пуктысьяслы да мукӧдӧс увтыртысьяслы Исус висьталіс татшӧм велӧданвисьт:

10«Кык морт пырисны крамӧ кевмысьны: ӧтиыс вӧлі фарисей, мӧдыс – вот перйысь. 11Фарисей сувтӧмӧн кевмысис вомгорулас: ”Енмӧй, аттьӧала Тэнӧ, мый ме абу мукӧдыс кодь: ог горшась, ог пӧръясь, гозъякост олӧм ог пежав. Ме абу тайӧ вот перйысьыс кодь. 12Видзала вежоннас кыкысь, ставсьыс дасӧд юкӧнсӧ сета Енлы”. 13А вот перйысь сулаліс бокын да весиг синсӧ эз лысьт лэптывны енэжланьыс, сӧмын морӧсас кучкалӧмӧн шуаліс: ”Енмӧй, ло бур сьӧлӧма ме дінӧ, мыжа морт дінӧ!”

14Висьтала тіянлы: Ен водзын веськыдӧн муніс гортас вот перйысь, эз фарисей. Ӧд асьсӧ вылӧ пуктысьӧс лэдзасны, асьсӧ улӧ пуктысьӧс кыпӧдасны».

Челядьӧс бурсиӧм

(Мт. 19:13-15; Мк. 10:13-16)

15Исус дінӧ вайӧдісны посни челядьӧс, медым Сійӧ инмӧдчыліс на дінӧ. Велӧдчысьяс аддзисны тайӧс да пондісны шуасьны вайӧдысьяс вылӧ. 16Исус корис челядьӧс Ас дінас да шуис: «Лэдзӧй челядьсӧ локны Ме дінӧ. Энӧ кутӧй найӧс. Енлысь Юраланінсӧ ӧд на коддьӧмлы лӧсьӧдӧма. 17Веськыда висьтала тіянлы: коді оз сибӧд Енлысь Юралӧмсӧ кага моз, сійӧ оз пыр Енлӧн Юраланінӧ».

Озырлы сьӧкыд пырны Енлӧн Юраланінӧ

(Мт. 19:16-30; Мк. 10:17-31)

18Ӧти юралысь юаліс Исуслысь: «Бур Велӧдысьӧй, мый меным колӧ вӧчны, мед вичмис меным помтӧм олӧм?» 19Исус вочавидзис: «Мыйла тэ шуан Менӧ бурӧн? Некод абу бурыс, сӧмын Енмыс бур. 20Тэ ӧд тӧдан тшӧктӧмъяссӧ: гозъякост олӧм эн пежав, эн ви, эн гусясь, эн пӧръясь, пыдди пукты ассьыд бать-мамтӧ». 21Юралысь шуис: «Том кадсянь ме ола тайӧ тшӧктӧмъяс сертиыс». 22Тайӧс кылӧм бӧрын Исус шуис сылы: «Ӧтитор оз тырмы тэныд: вузав ставсӧ, мый тэнад эм, а сьӧмсӧ сет гӧльяслы. Сэки тэныд енэжын озырлуныс вичмас. Сэсся лок Ме бӧрся». 23Тайӧс кылӧм бӧрын юралысь шогӧ усис, ӧд сійӧ вӧлі зэв озыр.

24Исус аддзис юралысьлысь шогӧ усьӧмсӧ, сэсся шуис: «Кутшӧм сьӧкыд озырлы пырны Енлӧн Юраланінӧ! 25Озырлы Енлӧн Юраланінӧ пырӧм дорысь верблюдлы кокньыдджык мунны ем пысӧд». 26Тайӧс кылысьяс юалісны: «Коді нӧ вермас мездмынысӧ?» 27Исус шуис: «Мортлы вермытӧмыс – вермана Енлы».

28Сэки Петыр шуис: «Ми ставсӧ эновтім да мунім Тэ бӧрся». 29Исус шуис налы: «Веськыда висьтала тіянлы: коді Енлӧн Юралӧм вӧсна коляс керкасӧ, бать-мамсӧ, чой-воксӧ, гӧтырсӧ да ныв-писӧ, 30сылы тайӧ олӧмас на уна пӧвстӧн бӧр воас, нӧшта локтан нэмас сылы помтӧм олӧм вичмас».

Исус бара висьталӧ Аслас кулӧм йылысь

(Мт. 20:17-19; Мк. 10:32-34)

31Исус корис дас кыкнан велӧдчысьсӧ да шуис налы: «Ӧні ми мунам Ерусалимӧ. Сэні инас пророкъяслӧн Морт Пи йылысь став гижӧмаыс. 32Сійӧс сетасны ентӧдтӧмъяс киӧ. Найӧ сераласны-лёкӧдасны, янӧдасны да сьӧлаласны Сійӧс. 33Чорыда нӧйтасны, сэсся виасны, но коймӧд луннас Сійӧ ловзяс». 34Велӧдчысьяслы тайӧ вӧлі гӧгӧрвотӧм, кывъясыс вӧліны налы пӧдсаӧсь. Найӧ эз вермыны вежӧртны Исуслысь висьталӧмсӧ.

Синтӧмӧс бурдӧдӧм

(Мт. 20:29-34; Мк. 10:46-52)

35Исус матыстчис Ерикон карлань. Туй бокын пукаліс синтӧм корысь морт. 36Сійӧ кыліс йӧзлысь локтӧмсӧ да юаліс: «Мый тайӧ?» 37Сылы висьталісны, Назаретса Исус пӧ локтӧ. 38Сэки синтӧм пондіс горзыны: «Исус, Давид Пи! Ло бур сьӧлӧма ме дінӧ!» 39Исус водзвылын мунысьяс ӧлӧдісны синтӧмӧс горзӧмсьыс, но сійӧ ёнджыка на пондіс горзыны: «Давид Пи, ло бур сьӧлӧма!» 40Исус сувтіс да тшӧктіс вайӧдны синтӧм мортӧс, сэсся юаліс сылысь: 41«Мый тэ кӧсъян?» Сійӧ вочавидзис: «Господьӧй, кӧсъя аддзыны». 42Исус шуис: «Аддзы. Эскӧмыд мездіс тэнӧ». 43Синтӧм дзик пыр кутіс аддзыны да Енмӧс ошкигтыр муніс Исус бӧрся. Тайӧс аддзӧм бӧрын став йӧзыс аттьӧалісны-ошкисны Енмӧс.

Currently Selected:

Лука 18: КБ

Highlight

Copy