Лука 14

Исус бурдӧдӧ висьысьӧс шойччан лунӧ

1Шойччан лунӧ Исус муніс фарисейяслӧн ӧти юралысь ордӧ сёйны. Сэні ставӧн сюся видзӧдісны Исус бӧрся. 2Сы дінӧ локтіс ва пыкталӧмӧн висьысь морт. 3Исус юаліс Индӧдӧ велӧдысьяслысь да фарисейяслысь: «Позьӧ-ӧ шойччан лунӧ бурдӧднысӧ?» 4Найӧ чӧв олісны. Исус инмӧдчылӧмӧн бурдӧдіс висьысьӧс да ыстіс сійӧс гортас. 5Исус бара юаліс: «Шойччан лунӧ кӧ тіян осёлныд либӧ ӧшныд усяс юкмӧсӧ, онӧ ӧмӧй пырысьтӧм-пыр лэптӧй сійӧс сэтысь?» 6Найӧ нинӧм эз вермыны воча шуны.

Асьтӧ вылӧ эн пукты

7Исус казяліс, мый пызан сайӧ пуксигӧн корӧмаяс корсисны бурджыкинсӧ. Сэки Сійӧ шыасис на дінӧ велӧданвисьтӧн: 8«Корасны кӧ тэнӧ кӧлысь вылӧ, эн пуксьы бурджыкинас. Корӧмаяс пӧвстын вермас лоны тэысь пыдди пуктанаджык. 9Сэки кӧлысь вылӧ корысь матыстчас тэ дінӧ да шуас: ”Тайӧ мортыс мед пуксяс татчӧ”. Тэ яналан, ӧд тэныд ковмас вуджны пызан помас. 10Кор тэ локтан кӧлысь вылӧ, пуксьы пызан помланьыс. Тэнӧ корысь кӧ матыстчас да шуас: ”Ёртӧй, пуксьы матӧджык”, сэки тэ лоан корӧмаяс водзын пыдди пуктӧмаӧн. 11Ӧд асьсӧ вылӧ пуктысьӧс лэдзасны, асьсӧ улӧ пуктысьӧс кыпӧдасны».

12Сэсся Исус шуис Сійӧс корысьлы: «Лӧсьӧдан кӧ пызан, эн корав ёртъястӧ, вокъястӧ, рӧдвужтӧ, орччӧн озыра олысьястӧ. Ӧд найӧ сэсся коркӧ асьтӧ корасны, тадзи мынтысясны тэныд. 13Мӧдарӧ, лӧсьӧдан кӧ пызан, кор гӧльясӧс, доймалӧмаясӧс, коктӧмъясӧс да синтӧмъясӧс. 14Тэ шуда лоан, ӧд найӧ оз вермыны тэныд мынтысьны. Тэныд лоӧ мынтӧма веськыда олысьяслӧн ловзьӧм дырйи».

Корӧмаяс йылысь велӧданвисьт

(Мт. 22:1-10)

15Тайӧс кылӧм бӧрын сёйысьясысь ӧти шуис: «Шуда Енлӧн Юраланінын пызан сайӧ пуксьысь!»

16Исус воча шуис: «Ӧти морт ыджыд пызан лӧсьӧдас да унаӧс корас. 17Пызан сайӧ пуксян кад матыстчигӧн сійӧ мӧдӧдас ассьыс кесйӧгсӧ юӧртны корӧмаяслы: ”Локтӧй, ставыс нин дась”. 18Водзвыв сёрнитчӧмӧн моз ставныс шуасны, огӧ пӧ вермӧй локнысӧ. Ӧти шуас: ”Ме му ньӧби, колӧ ветлыны видзӧдлыны сійӧс. Эн дӧзмы, ог эшты”. 19Мӧд шуас: ”Дас ӧш ньӧби, муна видлыны найӧс. Эн дӧзмы”. 20Коймӧд шуас: ”Ме гӧтраси да, ог вермы локнысӧ”.

21Кесйӧг бӧр локтас да висьталас та йылысь ыджыдыслы. Сійӧ ёна скӧрмас да шуас кесйӧгыслы: ”Ӧдйӧджык мун карса туйвежъясӧ да йӧзаинъясӧ, вайӧд татчӧ гӧльясӧс, доймалӧмаясӧс, коктӧмъясӧс да синтӧмъясӧс”. 22Локтӧм бӧрас кесйӧг шуас: ”Ыджыдӧй, тэнсьыд тшӧктӧмтӧ вӧчи, но пызан саяд эм на пуксяніныс”. 23Мӧдыс вочавидзас: ”Пет карсьыс, ветлы туйяс-потшӧсъяс пӧлӧн да тшӧкты локнысӧ, медым менам керкаӧй вӧлі тыр. 24Висьтала тіянлы: воддза корӧмаясысь весиг ӧти морт оз видлы менсьым пызанвыв сёянӧс”. Унаӧс корӧма, но этшаӧс бӧрйӧма».

Коді Менам велӧдчысьыс?

(Мт. 10:37-38)

25Уна йӧз муніс Исускӧд. Налань бергӧдчылӧмӧн Сійӧ шуис:

26«Ме дінӧ локтысьлы кӧ бать-мамыс, гӧтырыс, ныв-пиыс, чой-вокыс да аслас олӧмыс Ме дорысь мусаджык, сійӧ оз вермы лоны Менам велӧдчысьӧн. 27Коді оз ну ассьыс крестсӧ да оз мун Ме бӧрся, сійӧ оз вермы лоны Менам велӧдчысьӧн. 28Кодкӧ тіян пиысь кӧ мӧвпыштас ыджыд керка лэптыны, оз-ӧ сійӧ водзджык пуксьы да артышт, тырмас-ӧ сылӧн сьӧмыс керкасӧ лэптыны. 29Вермас артмыны, мый подувсӧ пуктас, а помавнысӧ оз вермы. Сэки пондасны серавны сійӧс: 30”Видзӧдлӧй, лэптынысӧ босьтчис, а помавнысӧ эз вермы!”

31Ӧксылы кӧ ковмас тышӧ петны мӧд ӧксылы паныд, оз-ӧ сійӧ водзджык пуксьы да бура мӧвпышт, вермас-ӧ сійӧ дас сюрса тышкайӧзнас водзсасьны кызь сюрса тышкайӧзкӧд. 32Оз кӧ вермы, сійӧ мӧдӧдас сёрнитчысьясӧс паныд локтысь ӧксы дінӧ, мед бурасьны сыкӧд.

33Ті кӧ онӧ кольӧй ставсӧ, мый тіян эм, онӧ вермӧй лоны Менам велӧдчысьясӧн».

Дуб сов

(Мт. 5:13; Мк. 9:50)

34«Солыд – буртор. Но воштас кӧ солыс ассьыс вынсӧ, кыдзи сійӧс бӧр соланас вӧчан? 35Сійӧс весиг оз шогмы муӧ сюйны, сӧмын кольӧ шыбитны. Кодлӧн эм пель, мед кылӧ!»

Currently Selected:

Лука 14: КБ

Highlight

Copy