Лука 10

Исус мӧдӧдӧ сизимдас велӧдчысьӧс

1Та бӧрын Господь бӧрйис нӧшта сизимдас велӧдчысьӧс, сэсся кыкӧн-кыкӧн мӧдӧдіс найӧс кар-сиктъясӧ, кытчӧ кӧсйис Ачыс мунны.

2Сійӧ шуис налы: «Вунданыс уна, а вундысьыс этша. Кевмӧй вунданінын Ыджыдыслы, мед ыстас Аслас вунданінӧ уджалысьясӧс.

3Мунӧй! Ме мӧдӧда тіянӧс баляпиянӧс моз кӧинъяс пӧвстӧ. 4Энӧ босьтӧй аскӧдныд сьӧм, ноп да кӧм. Туй выланыд энӧ сувтӧй чолӧмасьны йӧзкӧд. 5Керкаӧ пыриганыд медводз шуӧй: ”Лӧнь олӧм тайӧ керкаыслы!” 6Сэні кӧ олӧ бур сьӧлӧма морт, бурсиӧмныд коляс сылы. Оз кӧ, бурсиӧмныд бӧр бергӧдчас тіянлы. 7Кольччӧй сійӧ керкаас, сёйӧй-юӧй мый тіянлы сетасны, ӧд уджалысьлы мынтысьӧны уджыс серти. Энӧ вуджӧй мӧд керкаӧ.

8Карӧ пыриганыд кӧ тіянӧс сибӧдасны, сёйӧй мый тіянлы сетасны. 9Бурдӧдалӧй сэні висьысьясӧс да юӧртӧй: ”Енлӧн Юралӧмыс воис тіянӧдз”. 10Оз кӧ сибӧдны карас, туйяс кузя ветлӧмӧн юӧртӧй: 11”Буссӧ, мый кӧласис коканым тіян карын, ми бӧр пыркӧдам тіянлы. Тӧдӧй, мый Енлӧн Юралӧмыс матын”. 12Висьтала тіянлы: мыждан лунӧ Содом карлы лоас кокньыдджык сійӧ карыслы дорысь».

Эскытӧмъясӧс мыжалӧм

(Мт. 11:20-24)

13«Курыд шог тэныд, Коразин кар! Курыд шог тэныд, Випсаида кар! Тир да Сидон каръясын кӧ аддзылісны тіянын кодь вӧчӧм шензьӧданаторъяссӧ, сэки эськӧ сэтчӧс олысьясыс важӧн нин бергӧдчисны мыжъяссьыныс, шогалан паськӧм пасьталісны да юрнысӧ пӧимӧн коялісны. 14Мыждан лунӧ Тир да Сидон каръяслы лоас кокньыдджык тіянлы дорысь. 15Тэ, Капернаум кар, чайтан енэжӧдз кыпӧдчыны? Ад пыдӧсӧдз усян!

16Тіянӧс кывзысь Менӧ кывзӧ, тіянӧс ӧтдортысь Менӧ ӧтдортӧ, а Менӧ ӧтдортысь ӧтдортӧ Менӧ Мӧдӧдысьӧс».

Велӧдчысьяс воӧны бӧр

17Сизимдас велӧдчысь бӧр воисны нимкодясигтыр да шуисны: «Господьӧй, Тэнад нимӧн тшӧктігӧн весиг пеж ловъяс кывзысьӧны миянлысь». 18Исус шуис налы: «Ме аддзылі сӧтаналысь чардби моз енэжсянь усьӧмсӧ. 19Со, Ме сета тіянлы вын талявны змейясӧс, скорпионъясӧс да омӧльыслысь став вынсӧ, и тіянӧс нинӧм оз дойд. 20Энӧ нимкодясьӧй сыысь, мый пеж ловъяс кывзысьӧны тіянлысь, а нимкодясьӧй сыысь, мый тіянлысь нимъяснытӧ гижӧма енэжас».

Исус ошкӧ Ен Батьсӧ

(Мт. 11:25-27; 13:16-17)

21Сэки Исус тырис Вежа Ловсянь нимкодьлунӧн да шуис: «Ошка Тэнӧ, Батьӧй, енэжыс да муыс вылын Ыджыдалысьӧс! Тэ дзебин тайӧс сюсь вежӧраясысь да восьтін кага коддьӧмлы. Татшӧм вӧлі Тэнад бур кӧсйӧмыд, Батьӧй».

22Исус висьталіс велӧдчысьясыслы: «Ставсӧ сетіс Меным Батьӧй. Сӧмын Батьыс тӧдӧ, коді Пиыс, и сӧмын Пиыс тӧдӧ, коді Батьыс. Тӧдӧ нӧшта сійӧ, кодлы Пиыс кӧсйӧ восьтны Батьсӧ».

23Сэсся велӧдчысьясыс дінӧ бергӧдчӧмӧн Исус торйӧн шуис налы: «Шудаӧсь найӧ, кодъяслӧн синмыс аддзӧ, мый ті аддзанныд! 24Висьтала тіянлы: уна пророк да ӧксы кӧсйисны аддзывны, мый ті аддзанныд, но эз аддзывны. Кӧсйисны кывны, мый ті кыланныд, но эз кывлыны».

Самарияса бур сьӧлӧма морт

25Индӧдӧ велӧдысьясысь ӧти Исусӧс кыйӧм могысь юаліс: «Велӧдысь, мый меным колӧ вӧчны, мед вичмис меным помтӧм олӧм?» 26Исус юаліс сылысь: «Мый гижӧма Индӧдас? Мый сэтысь лыддян?» 27Индӧдӧ велӧдысь вочавидзис: «Радейт Господьӧс, ассьыд Ентӧ, став сьӧлӧмнад, став олӧмнад, став выннад да став мывкыднад, и матыссатӧ радейт асьтӧ моз». 28Исус шуис сылы: «Бура вочавидзин. Вӧч тадзи, сэки кутан овны».

29Асьсӧ дорйӧм могысь Индӧдӧ велӧдысь юаліс Исуслысь: «Коді меным матыссаыс?»

30Исус вочавидзис тадзи: «Ӧти морт ветлас Ерусалимысь Ерикон карӧ. Туяс сійӧ веськалас лёк вӧчысьяс киӧ. Найӧ пӧрччӧдасны сійӧс, вирӧдз нӧйтасны да колясны туй вылас куланвыйын. 31Сійӧ туйӧдыс мунас поп, казялас нӧйтӧм мортӧс да туй мӧдарас вуджас. 32Сы моз вӧчас тшӧтш левит: воас сэтчӧ, аддзас нӧйтӧм мортӧс да вуджас туй мӧдарас.

33Сэсся мунас сэті самарияса олысь. Нӧйтӧм мортӧс аддзас да, сьӧлӧмыс сылӧн нормас. 34Матыстчас сы дінӧ, дойяссӧ мыськалас винаӧн, мавтас выйӧн да кӧртавлас. Пуксьӧдас сійӧс аслас осёл вылӧ да ваяс туйморт керкаӧ, сэні тӧждысяс сы вӧсна. 35Аскинас самарияса морт сетас туйморт керка кутысьлы кык динар да шуас: ”Тӧждысь сы вӧсна. Оз кӧ тырмы, локтӧм бӧрын содтӧд мынтыся”. 36Тэ ногӧн, коді тайӧ куим письыс нӧйтӧм мортыслы матыссаыс?»

37Индӧдӧ велӧдысь вочавидзис: «Сылы бур вӧчысьыс». Исус шуис сылы: «Мун да тшӧтш тадзи вӧч».

Марпа да Марья

38Исус велӧдчысьясыскӧд муніс водзӧ да пырис ӧти сиктӧ. Сэні Марпа нима ань корис Исусӧс гортас. 39Марпалӧн вӧлі Марья нима чой. Сійӧ пуксис Господь Исуслӧн кок дорӧ да кутіс кывзыны Сылысь висьталӧмсӧ. 40Марпа унатор вӧсна котраліс-тӧждысис. Сэсся Исус дінӧ матыстчӧмӧн шуис: «Господьӧй, Тэныд ӧмӧй веськодь, мый чойӧй менӧ ӧтнамӧс колис тӧждысьнысӧ. Висьтав сылы, мед отсалас меным». 41Господь Исус вочавидзис: «Марпа, Марпа, тэ тӧждысян-мырсян унатор вӧсна, 42а коланаыс сӧмын ӧтитор. Марья бӧрйис бурджыксӧ, и тайӧс сылысь оз мырддьыны».

Currently Selected:

Лука 10: КБ

Highlight

Copy