Лука 1
1
1-3Пыдди пуктана Феофил! Унаӧн нин босьтчылісны гижны миянын вӧвлӧмторъяс йылысь. Та йылысь миянлы юӧртісны найӧ, кодъяс ставсӧ аддзылісны да лоисны Ен кывлы кесъялысьясӧн. Водзысяньыс ставсӧ лючки-бура туялӧм бӧрын ме тшӧтш шуи гижны тэныд став йывсьыс сьӧрсьӧн-бӧрсьӧн. 4Тэныд вӧлі висьталӧма тайӧ вӧвлӧмторъяс йывсьыс, но ме кӧсъя подулалӧмӧн петкӧдлыны тэныд Бур Юӧрлысь збыльсӧ.
Андел юӧртӧ Иоанлӧн чужӧм йылысь
5Ирӧд ӧксыалан лунъясӧ Иудея муын оліс Закар нима поп, сійӧ вӧлі Авий поп котырысь. Закарлӧн Елизавета гӧтырыс вӧлі Аарон чужанвужйысь. 6Найӧ кыкнанныс олісны Ен водзын веськыда, ставсӧ вӧчисны Господьлӧн тшӧктӧм серти. 7Челядьыс налӧн эз вӧв, ӧд Елизавета эз вермы вайны кагасӧ, да и кыкнанныс вӧліны нин ыджыд арлыдаӧсь.
8Воис кад Закар котырлы кесъявны Ен водзын. 9Попъяслӧн лӧсьӧдӧм серти пудъясисны, и Закар пырис Господьлӧн крамӧ тшынӧдчыны. 10Закарлӧн тшынӧдчигкості став йӧзыс кевмысисны крам ортсыас. 11Та дырйи Закарлы петкӧдчис Господьлӧн андел, коді сулаліс тшынӧдчан висьпуктанін веськыдладорын. 12Анделӧс аддзӧмысь Закар шӧйӧвошис, сійӧс полӧм босьтіс. 13Андел шуис: «Эн пов, Закар! Енмыс кылӧма тэнсьыд кевмӧмтӧ. Елизавета гӧтырыд чужтас тэныд пи. Пукты сылы Иоан ним. 14Долыд гажӧн тырас тэнад сьӧлӧмыд, уна йӧзлы нимкодьлун ваяс сылӧн чужӧмыс. 15Господь водзын сійӧ лоас ыджыд мортӧн, вина-сур оз кут юны, мам кынӧмас на сійӧ тырас Вежа Лолӧн. 16Израиль войтырысь сійӧ унаӧс бергӧдас налӧн Господь Енлань. 17Сійӧ мунас Господь водзын Илля лов-вынӧн, бергӧдас батьяслысь сьӧлӧмсӧ ныв-пиланьыс, кывзысьтӧмъясӧс – веськыда олысьлӧн мывкыдлунӧ, медым дасьтыны войтырсӧ Господьлы».
18Закар юаліс анделлысь: «Кыдзи ме тӧдмала тайӧс? Ачым пӧрысь, дай гӧтырӧй абу нин том». 19Андел вочавидзис: «Ме, Гавриил, сулала Ен водзын. Менӧ мӧдӧдӧма сёрнитны тэкӧд, висьтавны тайӧ Бур Юӧрсӧ тэныд. 20Но меным эскытӧмыдла тэ воштан кыв-вортӧ, менам кывъяслӧн ас кадӧ интӧдз он вермы сёрнитнытӧ».
21Сэккості йӧзыс виччысисны Закарӧс да шензисны крамын сылӧн нюжмасьӧмысь. 22Крамысь петӧм бӧрын Закар эз вермы сёрнитнысӧ. Йӧзыс гӧгӧрвоисны, мый сійӧ аддзылӧма Енсянь петкӧдчылӧм. Закар сёрнитіс йӧзыскӧд пасъясӧн.
23Кесъялан лунъяс бӧрын Закар локтіс гортас. 24Елизавета гӧтырыс регыд пондіс нӧбасьны. Вит тӧлысь чӧж сійӧ эз петкӧдчыв йӧз син водзӧ, оліс татшӧм мӧвпъясӧн: 25«Господь вӧчис тайӧс. Сійӧ бергӧдчис мелань да вештіс менсьым йӧз водзын яналӧмӧс».
Андел юӧртӧ Исуслӧн чужӧм йылысь
26Елизаветалӧн нӧбасигас квайтӧд тӧлысьнас Ен мӧдӧдіс Гавриил анделӧс Назаретӧ, галилеяса карӧ, 27Мария нима ныв дінӧ. Мария вӧлі кикутӧма Давид чужанвужйысь Ӧсип нима морткӧд. 28Мария дінӧ пырӧм бӧрын андел шуис: «Нимкодясь, бурсиӧм аньӧй! Господь тэкӧд!» 29Мария чуймис анделӧс аддзӧмысь да сылӧн кывъясысь. Сійӧ мӧвпаліс, мый водзын нӧ сылы татшӧм чолӧмалӧмыс. 30Андел шуис сылы: «Эн пов, Мария, тэныд вичмис Енсянь буралӧм. 31Тэ сьӧктан, чужтан пи да пуктан Сылы Исус ним. 32Ыджыд морт Сыысь петас, Сійӧс шуасны Медвылыссалӧн Пиӧн. Господь Ен сетас Сылы Давид батьыслысь юралан пуклӧссӧ. 33Сійӧ кутас ыджыдавны Яков котырын нэмъяс чӧж, да Сылӧн Юралӧмлы оз ло помыс». 34Мария юаліс анделлысь: «Вермас ӧмӧй тадзисӧ лоны, ме ӧд ныв на?» 35Андел вочавидзис: «Вежа Лов лэччас тэ вылӧ, Медвылыссалӧн выныс вевттяс тэнӧ. Та вӧсна тайӧ чужысьыс вежа, Сійӧс шуасны Ен Пиӧн. 36Тэнад рӧдвужыд, ныв-питӧм Елизавета, пӧрысьӧ-нэмӧ квайтӧд тӧлысь нин пиӧн нӧбасьӧ. 37Енлы нинӧм вермытӧмыс абу». 38Сэки Мария шуис: «Ме Господьлӧн кесйӧг, мед лоас тэнад висьталӧм серти». Сэсся андел муніс.
Мария Елизавета ордын
39Кымынкӧ лун мысти Мария тэрмасьӧмӧн мӧдӧдчис керӧсвыв муӧ, Иуда карӧ. 40Закар керкаӧ пыригӧн сійӧ чолӧмаліс Елизаветаӧс. 41Мариялӧн чолӧмалӧмысь Елизаветалӧн кынӧмас кагаыс чеччыштліс. Елизавета тырис Вежа Лолӧн 42да гораа шыасис: «Бурсиӧма тэнӧ аньяс пиысь, бурсиӧма сьӧлӧмув кагатӧ! 43Коді нӧ ме сэтшӧмыс, мый Господьӧйлӧн мамыс локтӧ ме ордӧ? 44Мыйӧн сӧмын кылі чолӧмасьӧмтӧ, кагаӧй нимкодьысла чеччыштліс кынӧмын. 45Тэ шуда, эскин да, ӧд Господьлӧн тэныд шуӧмыс инас».
Мариялӧн ошкӧм
46Мария шуис:
– Ошкӧ сьӧлӧмӧй Господьӧс,
47нимкодясьӧ лолӧй Ен вӧсна,
Мездысьӧй вӧсна,
48ӧд Сійӧ видзӧдліс Аслас коньӧр кесйӧглань.
Ӧнісянь став чужысьыс шуас менӧ шудаӧн,
49ӧд татшӧм ыджыдтор вӧчис меным Вынаыс.
Сылӧн нимыс вежа!
50Чужысьяссянь чужысьясӧдз
Сылӧн буралӧмыс вуджӧ Сыысь полысьяс дінӧ.
51Сылӧн киыс вӧчис ыджыдсьыс-ыджыд уджъяс:
ыкша сьӧлӧмаясӧс разӧдіс,
52юралан пуклӧсысь юралысьясӧс чӧвтіс,
улӧ пуктӧмаясӧс кыпӧдіс,
53тшыгъялысьясӧс пӧттӧдзныс вердіс,
озыръясӧс куш киӧн мӧдӧдіс.
54Сійӧ сибӧдіс Израильӧс, Ассьыс кесъялысьсӧ,
эз вунӧд Ассьыс буралӧмсӧ, 55мый кӧсйысис сетны нэмъяс кежлӧ
Ӧвраамлы да сысянь чужысьяслы.
Тадзи Сійӧ висьталіс миян батьяслы.
56Мария оліс Елизавета ордын тӧлысь куим, сэсся бӧр муніс гортас.
Пыртысь Иоанлӧн чужӧм
57Елизаветалы воис кад чужтыны, да сійӧ чужтіс пи. 58Матігӧгӧр олысьяс да рӧдвужыс тӧдмалісны Господьлысь буралӧмсӧ Елизавета дінӧ да тшӧтш нимкодясисны сыкӧд. 59Кӧкъямысӧд луннас локтісны вундыштны кагасӧ да кӧсйисны сетны сылы Закар батьыслысь нимсӧ. 60Мамыс шуис: «Энӧй. Пуктам сылы Иоан ним». 61Сылы шуисны: «Тэнад рӧдвужын татшӧм нимаыс некод абу». 62Сэсся пасъяс отсӧгӧн юалісны батьыслысь, кутшӧм ним сійӧ кӧсйӧ сетны кагаыслы. 63Закар корис пӧвтор да сэтчӧ гижис: «Иоан лоӧ нимыс». Ставныс чуймисны. 64Сэки воссис Закарлӧн кыв-ворыс, да сійӧ кутіс ошкыны Енмӧс.
65На гӧгӧр олысьясӧс полӧм босьтіс. Став тайӧ лоӧмтор йывсьыс сёрниыс паськаліс керӧсвыв Иудея му пасьтала. 66Тайӧс кывлысьяс чуймӧмӧн юасисны: «Кодӧн лоӧ тайӧ кагаыс?» Господьлӧн киыс збыльысь вӧлі сы вылын.
Закарлӧн ошкӧм
67Кагалӧн Закар батьыс тырис Вежа Лолӧн да пондіс пророкавны:
68– Ошка Господьӧс, Израильлысь Енсӧ!
Сійӧ бергӧдчис Аслас войтырлань,
дасьтіс сылы мездмӧм.
69Давид кесъялысьыслӧн чужанвужйысь
Сійӧ сетіс миянлы Вына Мездысьӧс.
70Тадзи важысянь Сійӧ кӧсйысьліс
Аслас вежа пророкъяс пыр.
71Сійӧ кӧсйысис мездыны миянӧс дзескӧдысьясысь,
дорйыны мустӧмтысьяс киысь,
72лоны бур сьӧлӧмаӧн миян батьяс дінӧ
да кутны тӧд вылас Ассьыс вежа йитӧдсӧ,
73Ӧвраам батьнымлы Ассьыс сетӧм кывсӧ.
74Мустӧмтысьясысь мездмӧм бӧрын
ми вермам повтӧг 75кесъявны Сылы
вежалунӧн да веськыда став олӧм чӧжным.
76Тэнӧ, кагаӧй, пуктасны Медвылыссалӧн пророкӧ.
Тэ мунан Господь водзын дасьтыны туйсӧ Сылы,
77юӧртны Сылӧн войтырлы мездмӧм йылысь
да налысь мыжъяссӧ прӧститӧм йылысь.
78Миян бур сьӧлӧма Ен
ыстас миянлы енэжсянь асъя кыа,
79сетас югыдсӧ пемыдын олысьяслы,
кулӧмыслӧн вуджӧр улын пукалысьяслы,
Сійӧ веськӧдас кокнымӧс лӧньлуна туй вылӧ.
80Кага быдмис да ловнас вынсяліс. Израильлы аслас петкӧдчан лунӧдз сійӧ оліс овтӧминын.
Currently Selected:
Лука 1: КБ
Highlight
Share
Copy
Want to have your highlights saved across all your devices? Sign up or sign in
(c) Institute for Bible Translation, Finland, amp Finnish Bible Society, 2023
