Иоан 2

Кана карын кӧлысь

1Кык лун мысти Канаын, галилеяса карын, вӧлі кӧлысь. Сэні вӧлі Исуслӧн мамыс. 2Исусӧс да велӧдчысьяссӧ тшӧтш вӧлі корӧмаӧсь тайӧ кӧлысь вылас. 3Кор винаыс помасис, Исуслӧн мамыс шуис Сылы: «Налӧн винаыс бырӧма». 4Исус вочавидзис: «Аньӧй, мый Меным таӧдз, ӧд Менам кадыс эз на во». 5Сэки мамыс шуис кесйӧгъяслы: «Ставсӧ вӧчӧй Сылӧн шуӧм серти».

6Сэні вӧлі изйысь вӧчӧм квайт ва доз, быд дозйӧ ваыс вӧлі тӧрӧ сё литра гӧгӧр. Тайӧ дозъяснас иудейяс вӧдитчисны сӧстӧммӧдчӧм могысь. 7Исус шуис кесйӧгъяслы: «Тыртӧй дозъяссӧ ваӧн». Найӧ тырысӧдзыс кисьталісны васӧ дозъясас. 8Сэсся шуис налы: «Ӧні гумовтӧй васӧ да мыччӧй сійӧс кӧлысь нуӧдысьлы». Найӧ мыччисны. 9Кӧлысь нуӧдысь видліс ваысь артмӧм винасӧ, но сійӧ эз тӧд, кытысь тайӧ винаыс. Та йылысь тӧдісны сӧмын ва дозъяссӧ тыртысьяс. Сэки кӧлысь нуӧдысь корис верӧспусӧ 10да шуис сылы: «Ставныс медводз бур винанас юктасьӧны, сэсся йӧз коддзӧм бӧрас лёкджыкнас. А тэ ӧнӧдз бур винасӧ видзӧмыд».

11Тайӧ медводдза шензьӧданаторсӧ Исус вӧчис Канаын, галилеяса карын. Тадзи петкӧдліс Сійӧ Ассьыс дзирдлунсӧ, и велӧдчысьясыс кутісны эскыны Сылы.

12Та бӧрти Исус мамыскӧд, вокъясыскӧд да велӧдчысьясыскӧд мунісны Капернаум карӧ. Сэтчӧ найӧ кольччисны лун-мӧд кежлӧ.

Крамысь вузасьысьясӧс вӧтлалӧм

(Мт. 21:12-13; Мк. 11:15-17; Лк. 19:45-46)

13Матыстчис иудейяслӧн Ыджыд лун. Исус локтіс Ерусалимӧ. 14Сійӧ аддзис, мый крамын вузалӧны ӧшъясӧс, ыжъясӧс, гулюясӧс да вежлалӧны сьӧм. 15Исус кӧвъясысь кыыштіс орс да кутіс вӧтлавны сыӧн крамысь вузасьысьясӧс, налысь ыжъяссӧ да ӧшъяссӧ. Сійӧ пӧрлӧдліс сьӧм вежысьяслысь пызанъяссӧ да шыблаліс налысь сьӧмнысӧ. 16Гулюӧн вузасьысьяслы Сійӧ шуис: «Петкӧдӧй гулюястӧ татысь! Энӧ пӧртӧй Менам Батьлысь керкасӧ вузасянінӧ!» 17Сэки Исуслӧн велӧдчысьяслы тӧд выланыс уси Гижӧдас висьталӧмыс: «Тэнад керка вӧсна вежӧгтӧмыс топӧдӧ менсьым сьӧлӧмӧс».

18Иудейяслӧн веськӧдлысьяс шуисны Исуслы: «Кутшӧм ногӧн Тэ эскӧдан миянӧс, мый Тэныд позьӧ тадзи вӧчнысӧ?» 19Исус вочавидзис: «Жугӧдӧй тайӧ крамсӧ, и Ме куим лунӧн выльысь лэпта сійӧс». 20Найӧ воча шуисны Исуслы: «Тайӧ крамсӧ лэптісны нелямын квайт во чӧж, а Тэ куим лунӧн кӧсъян лэптыны сійӧс?» 21Крам йылысь сёрнитігӧн збыльвылас Исус висьталіс Аслас вир-яй йылысь. 22Исуслӧн ловзьӧм бӧрын велӧдчысьясыслы тӧд выланыс усины Сылӧн кывъясыс. Сэки найӧ эскисны Гижӧдӧ да Исуслӧн кывъясӧ.

23Ерусалимын Ыджыд лун дырйи унаӧн аддзылісны Исуслысь шензьӧданаторъяс вӧчӧмсӧ да эскисны Сылы. 24Но Исус эз эскы налы, ӧд Сійӧ тӧдіс найӧс ставнысӧ. 25Сылы эз ковны йӧз йылысь висьталысьяс, ӧд Сійӧ тӧдіс быд мортлысь сьӧлӧмсӧ.

Currently Selected:

Иоан 2: КБ

Highlight

Copy