ሜቴ ማጻፋ 3
3
ኣሲ ኣዛዜቶንታ ኢጾ
1ሾሻይ ጎዳ ጾሳይ ሜዳ ዶኣ ኡባፌ ኣዳ ጌናንቻ፤ ኢሲ ጋላስ ሾሻይ ሄ ማጫሳዮ፥ «ጾሲ ቱሙ ኢንቴና፥ ‹ኤዴኔን ዲዛ ሚ ኣይፌ ኡባፌካ ሞፒቴ› ጊዴ?» ጊ ኦይቺዴስ።#ኣጁ 12፡9፤ 20፡2
2-3ማጫሳያ ሾሻስ ዛራዳ፥ «ጊዴና! ጾሲ ሄሳ ጊቤና፤ ኑኒ ኤዴኔን ዲዛ ሚታ ኣይፌ ማናስ ዳንዳዮስ፤ ጊዶ ኣቲን ጾሲ ኑና፥ ‹ኤዴኔ ጊዶን ዲዛ ሚ ኣይፌ ሞፒቴ፤ ቦቾፍቴ፤ ሂስቶንታ ኣጊኮ ኢንቴ ሃይቃና› ጊዴስ» ጋዱስ።
4ሾሻይ ማጫሳዮ፥ «ጊዴና! ኢንቴ ቱማ ሃይቄኬታ፤ 5ጾሲ ሄሳ ጊዳይ ሄ ሚይ ኣይፌ ኢንቴ ሚኮ ኢንቴ ኣይፌይ ዶዬቲን፥ ጾሳ ማላ ኢንቴ ሎኦኔ ኢታ ሻኪ ኤራናይሳ ኢዚ ኤሪዛ ጊሻሳ» ጊዴስ።
6ማጫሳያ ሄ ሚ ኣይፌይ ማናስ ማልኢዛይሳ፥ ጼላናስ ሎኢዛይሳ፥ ቃሴ ኣሲ ኣ ኤራቴ ዴማናስ ኣሞሲዛዝ ጊዲዳይሳ ቤያዳ ሄ ሚ ኣይፌፔ ኤካዳ ማዱስ፤ ቃሴ ባናራ ዲዛ ባ ኣዚናስካ ሄሳፌ ኢሚን ኢዚካ ሚዴስ።
7ሚዳ ዎዴ ኢስታ ናምኣ ኣይፌይካ ዶዬቲን ኢስቲ ፓጻ ካሎ ዲዛይሳ ኤሪዲ ባላሴ#3፡7 ባላሴ ጌቴቲዛ ሚይ ቶጵያን ኢሲ ኢሲ ሶሆን ኤሬቲዛ ማላ ኤ ሚሳቲዛ ኢዛስ ሃይይ ኣጉን ባይንዳዝ ጊዲ ኡቲዲ ኢዛስ ኣይፌዚ ማልኢዛ ሚ። ጌቴቲዛ ሚ ሃይ ሲኪዲ ባ ጼሳን ጊጺዳ።
8ኦማርሳ ዎዴ፥ ኤዴኔ ጊዶን ጎዳ ጾሳይ ሄሜቲሺን፥ ኢዛ ጬንጉርሳ ኣዴዚኔ ኢዛ ማቼያ ሲዪዲ ጎዳ ጾሳፌ ኤዴኔ ሚ ጊዶን ቆቴቲዳ። 9ጊዶ ኣቲን ጎዳ ጾሳይ ኣዴዛ ጼይጊዲ፥ «ኣዳሜ ኣዋን ዳይ?» ጊዴስ።
10ኣዴዚካ፥ «ኤዴኔ ጊዶን ኔ ጬንጉርሳ ሲያዳ ታኒ ካሎ ዲዛ ጊሻስ ባባዳ ቆቴታዲስ» ጊዴስ።
11ጎዳ ጾሳይ ኢዛ፥ «ኔኒ ካሎ ዳሳ ጊዲ ኔስ ዮቲዳይ ኦኔ? ታኒ ኔና፥ ‹ሞፓ› ጋዳ ኣዛዚዳ ሚ ኣይፌፔ ማዲ?» ጊ ኦይቺዴስ።
12ኢዚካ፥ «ታናራ ዳና ማላ ኔ ኢሚዳ ማጫሳያ ሄ ሚ ኣይፌፔ ታስ ኢሚን ማዲስ» ጊዴስ።
13ጎዳ ጾሳይ ሄሳፌ ጉዬ ማጫሳዮ፥ «ኔኒ ሄሳ ኣይስ ኦዲ?» ጊ ኦይቺዴስ።
ማጫሳያካ፥ «ታና ሾሻይ ባሌን ማዲስ» ጋዱስ።#2ቆሮ 11፡3፤ 1ጺም 2፡14
ጾሳ ፒርዳ
14ጎዳ ጾሳይ ሄሳፌ ጉዬ ሾሻ፥
«ኔኒ ሃይሳ ኦዳ ጊሻስ፥
ሜሄ ኡባኔ
ዶኣ ኡባ ጋርሳን
ኔ ጻላይ ቃንጌቲዳዛ!
ኔኒ ኔ ኡሎን ቢታራ ጎሼታና፤
ኔ ዴኦ ላይ ኡባንካ
ቢታ ጉዱላ ላጫ።
15ታኒ ኔሲኔ ማጫሳይስ፥
ኔ ዜሬሲኔ
ኢዚ ዜሬስ ጊዶን
ሞርኬቴ ሜና፤
ኢዚ ኔ ሁኤ ቆጻና፤
ኔኒካ ኢዛ ቂርጴ
ዱካና» ጊዴስ።#ኣጁ 12፡17
16ማጫሳዮካ ጎዳ ጾሳይ፥
«ኔ ሻሪዛ#3፡16 ሻሪዛ፡ ሻሪዛ ጊዛይሳ ኢሲ ኢሲ ባጋ ጋሞ ቃላን ኣቤ ኢጼታ፥ ቃን ጌስ። ኣጊናን
ኔኒ ዳሮ ቱጋታና፤
ቃሴ ኔኒ ዎልቃማ ሚጻን
ናይታ ዬላና።
ጊዲኮካ ኔኒ ኔ ኣዚናራ
ኣቃናስ ኣሞታና፤
ኢዚካ ኔና ሃራና» ጊዴስ።
17ኣዳሜካ ጎዳ ጾሳይ፥ «ኔኒ ኔ ማቼይ ቃላ ሲዪዳ ጊሻስ ታኒ ኔና፥ ‹ሄ ሚ ኣይፌ ሞፓ› ጋዳ ኣዛዚዳ ሚ ኣይፌፔ ኔኒ ሚዳ ጊሻስ፥
«ኔ ጌዶን ቢታይ
ቃንጌቲዳዝ ጊዶ!
ኔኒ ኔ ዴኦ ላይ ኡባን
ጊታ ዳቡራን
ቢታ ኦዳ ማና።
18ቢታይ ኔስ ኣጉንኔ
ኪንዲቾ ሞኪሳና፤
ኔኒ ቢታፌ ሞኪዳይሳ ማና።#ኢብ 6፡8
19ኔኒ ቢታን ሲማና ጋካናስ
ዳቡራን ኔ ጫዋ ጉሳ
ኦዳ ማና፤
ኔኒ ቢታፌ ሜቲዳ ጊሻስ
ቢታን ሲማንዳሳ» ጊዴስ።
20ኣዳሜይ ባ ማቺዮ ሄዋኖ#3፡20 ሄዋኖ፡ ሄዋኖ ጉሲ ፓጻ ዱስ ጉሳ። ጊ ሱንዴስ፤ ኣይስ ጊኮ ኢዛ ኣሳ ኡባስ ኣዮ።
21ጎዳ ጾሳይ ኣዳሜሲኔ ኢዛ ማቼይስ ኢቴ ጊግሲዲ ኢስታ ማይዚዴስ።
22ሄሳፌ ጉዬ ጎዳ ጾሳይ፥ «ሂስቲን ኣሲ ኑፔ ኢሳዴ ማላ ሎኦኔ ኢታ ኤሪዛዴ ጊዲዴስ፤ ኢዚ ባ ኩሼ ዬዲዲ ዴኦ ኢሚዛ ሚፌ ኤኪዲ ቃሴ ሞንታ ማላኔ ሜርናስ ፓጻ ዴኦንታ ማላ ቴቄታናስ ኮሼስ» ጊዴስ።#ኣጁ 22፡14 23ሄሳ ጊሻስ ኢዚ ባ ሜቲዳ ቢታ ኦና ማላ፥ ጎዳ ጾሳይ ኤዴኔፔ ኢዛ ኬሲዴስ። 24ኢዛ ኬሲዲ፥ ዴኦ ሚኮ ኤፊዛ ኦጌ ናጋና ማላ፥ ኪሩቤ ጌቴቲዛ ኪታንቻታኔ ፖፖልኡ ጊ ኣ ኣ ዎዛ ታማ ላጮ ሚሳቲዛ ጊ ማሻ ኤዴኔፔ ኣርሼይ ሞኪዛ ባጋራ ዎዴስ።
Currently Selected:
ሜቴ ማጻፋ 3: ጋሞመጽቅበፊደል
Highlight
Share
Copy
Want to have your highlights saved across all your devices? Sign up or sign in
The Word for the World International amp The Word for the World Ethiopia
