Марк 16

1Шоччисян лун бӧрын Магдала Мария, Яковлӧн Мария мамыс да Саломия небисӧ чӧскыт руа мавтассэз, медбы мавтны Исуссӧ. 2Шоччисян лун бӧрын асъяпоннас, шонді петан коста, нія локтісӧ дзебсянін дынас. 3Инькаэс баитісӧ ас коласаныс: «Кин миянлӧ вештас пыранінсис изсӧ?» 4Нія видзӧт-керисӧ да казялісӧ: изыс вештӧм ни. А изыс вӧлі ӧддьӧн ыджыт.

5Инькаэс пырисӧ дзебсянінас да казялісӧ чочком паськӧма зонкаӧс, кӧда пукаліс веськытланяс. Инькаэс шардісӧ. 6Зонкаыс нылӧ висьталіс: «Эд полӧ. Тійӧ кошшат Назаретісь Исуссӧ, Кӧда вӧлі дорӧм крест вылӧ. Сія ловзис. Сія татӧн абу. Видзӧтӧ куйланінсӧ, кытчӧ Сійӧ пуктылісӧ. 7Мунӧ, висьталӧ Петраыслӧ да мӧд велӧтчиссеслӧ: "Исусыс тіянся одзжык муніс Галилеяӧ. Сійӧ адззатӧ сэтчин, кыдз и висьтавліс Сія тіянлӧ"».

8Инькаэс петісӧ да котӧртісӧ дзебсянін дынсис. Нія повзьӧмувьяныс некинлӧ нем эзӧ висьталӧ.

Исуслӧн мыччасьӧм

(Мт. 28:9-10,16-20; Лк. 24:13-53; Ин. 20:11-23; Ап.кер. 1:6-11)

9Шоччисян лун бӧрын асъяпоннас Исусыс ловзис. Сія медодз мыччасис Магдала Мариялӧ, кӧда пытшкись вашӧтіс сизим сэрпӧсь лов. 10Инькаыс муніс да юӧртіс Исусыс йылісь Сыкӧт ветлӧтіссезлӧ, кӧдна ӧні тӧждісӧ да горзісӧ. 11Кӧр нія кылісӧ, Исусыс пӧ ловья и Марияыс Сійӧ адззылӧм, нія эзӧ веритӧ.

12Сыбӧрын Исусыс мыччасис мӧдік морт моз кык велӧтчисьлӧ, кӧр нія мунісӧ кар сайӧ. 13Нія бӧр бертісӧ да висьталісӧ Исуслӧн ловзьӧм йылісь мӧдіккезлӧ, но и нылӧ эзӧ веритӧ.

14Медбӧрын Исусыс мыччасис дасӧтік велӧтчисьлӧ сёйтӧнняныс. Сія ӧмаліс нійӧ чорыт сьӧлӧммезныс понда, мыля нія эзӧ веритӧ отирлӧ, кӧдна адззылісӧ Сійӧ ловзьӧм бӧрас. 15Исусыс нылӧ висьталіс: «Мунӧ быдсӧн му пасьта, быдӧнныслӧ висьтасьӧ Бур Юӧрсӧ. 16Кин пондас веритны да пыртчас, сія мезмас. Кин оз понды веритны, сія сюрас суд вылӧ мыжйыны. 17Веритіссесӧ пондасӧ тӧдны этна пассэз сьӧрті: Менам нимӧн пондасӧ вашӧтлыны сэрпӧсь ловвесӧ да пондасӧ баитны виль кыввез вылын. 18Кутасӧ кӧ кыйезӧс али мыйкӧ юасӧ, мыйсянь вермасӧ кувны, ныкӧт умӧльыс нем оз ло. Нія пуктасӧ киэзнысӧ шогаліссез вылӧ, и мӧддэс веськаласӧ».

19Сідз висьталӧм бӧрын Дӧсвидзисьыс лэбтісис енӧжӧ да пуксис Енкӧт веськыт ладорас. 20Исуслӧн велӧтчиссес мунісӧ да быдлаын висьтасисӧ Бур Юӧрсӧ. Дӧсвидзисьыс отсаліс нылӧ, висьтасьӧмнысӧ вынсьӧтіс быдкодь адззывлытӧммесӧ мыччалӧмӧн. Аминь#16:20 аминь ─ кылыс аркмӧм еврей кылісь «амэн», сія лоӧ «сідз и эм, былись».

Currently Selected:

Марк 16: БЮ19

Highlight

Copy