Марк 15
15
1Асъяпоннас аркирейес, бӧрйӧм пӧриссес, Туйдӧтӧ велӧтіссес да быдсӧн судитан чукӧрныс баитчӧмась Исусыс йылісь. Тшӧктӧмась Исуссӧ кӧрталӧмӧн нуӧтны Пилат дынӧ.
2Пилатыс Сылісь юаліс: «Тэ иудейезлӧн Ӧксу?» Исусыс шуис: «Тэ висьталін». 3Аркирейес уна мый висьтавлісӧ Сы вылӧ умӧльсӧ. 4Пилатыс бӧра юаліс Исусыслісь: «Тэ мый шы он сет? Адззан, мымда Тэ вылӧ висьтавлӧны умӧльсӧ!» 5Но Исусыс и этна кыввез вылӧ шы эз сет, сійӧн Пилатсӧ диво кутіс.
Исусӧс вийны сетӧм
6Быд Ыджыт лунӧ Пилатыс лэдзлӧм ӧтік пукалісьӧс, кӧдӧ корасӧ лэдзны отирыс. 7Сія кадӧ пукалісӧ зык#15:7 зык ─ шум, мятеж лэбтіссез. Нія зык лэбтӧм коста вийӧмась мортӧс. Ны коласын вӧлі Варавва нима морт. 8Чукӧртчӧм отирыс пондісӧ корны Пилатсӧ керны сідз, кыдз сія пыр керлывліс. 9Пилатыс висьталіс нылӧ: «Колӧ кӧ, лэдза тіянлӧ иудейезлісь Ӧксусӧ». 10Сія эд тӧдіс, аркирейес сетісӧ Исуссӧ сы киэзӧ завидныс кутӧм кузя. 11Но аркирейес ӧдззӧтісӧ отирсӧ корны лэдзны Вараввасӧ. 12Пилатыс бӧра шуис: «Мый тійӧ тшӧктат керны Сыкӧт, кӧдӧ шуат иудейезлӧн Ӧксуӧн?» 13Нія горӧтісӧ: «Дор Сійӧ крест вылӧ!» 14Пилатыс нылісь юаліс: «Мый Сія керис умӧльсӧ?» Отирыс ӧддьӧнжык горӧтісӧ: «Дор Сійӧ крест вылӧ!»
15Отирыс сьӧрті керӧм могись Пилатыс Вараввасӧ лэдзис. А Исуссӧ тшӧктіс виззьыны-шулявны да дорны крест вылӧ.
Исус вылын сералӧм
(Мт. 27:27-31; Ин. 19:2-3)
16Сыбӧрын воиннэс Исуссӧ нуӧтісӧ юралісьлӧн керку йӧрӧ, сэтчӧ ӧксьӧм быдӧс воин чукӧрныс. 17Исуссӧ пасьтӧтісӧ пемыт-гӧрд паськӧмӧ. Желля шатись кыйисӧ юркытш да пуктісӧ юр вылас. 18Нія пондісӧ копрасьны Сы одзын: «Дыр Тэныт юравны, иудейезлӧн Ӧксу!» 19Сылӧ юрас сӧталісӧ бедьӧн, сьӧлалісӧ да пидзӧссэз выланыс копрасисӧ Сы одзын. 20Исусыс вылын пӧттӧдз сералӧмныс бӧрын чӧвтісӧ гӧрд паськӧмсӧ да пасьтӧтісӧ Аслас паськӧмӧ. Сэсся нуӧтісӧ дорны крест вылас.
Крест вылӧ дорӧм
(Мт. 27:32-44; Лк. 23:26-43; Ин. 19:17-27)
21Исуслісь крестсӧ тшӧктісӧ нуӧтны Киринеяись Симонӧс, Александрлісь да Руфлісь айсӧ. Сія локтӧ вӧлі ыб вывсянь. 22Исуссӧ вайӧтісӧ Голгофа керӧс вылӧ. «Голгофа» нимсӧ позьӧ вуджӧтны «юр лы#15:22 юр лы ─ череп». 23Сылӧ сетісӧ юны смирнаӧн#15:23 смирна ─ пуись вийӧтӧм дона ви сорлалӧм вина, но Сія эз ю. 24Исуссӧ крест вылас дориссес янсӧтісӧ ас коласаныс Сылісь паськӧмсӧ кыскӧм сьӧрті#15:24 кыскӧм сьӧрті ─ по жребию.
25Сійӧ дорисӧ крест вылас ӧкмыс час асывнас. 26Крест вылас юр вевдӧрас вӧлі гижӧм, мый понда Сійӧ дорисӧ: «Иудейезлӧн Ӧксу». 27Сыкӧт дорисӧ кык лёк керись мортӧс, ӧтсӧ ─ веськытланяс, мӧдсӧ ─ шульгаланяс. 28Петіс Вежа Гижӧтын висьталӧм сьӧрті: «Сійӧ сувтӧтісӧ лёк кериссез лыдӧ#15:28 лыд ─ число».
29Сэті ветлӧтіссес гогинялісӧ юрнаныс да видісӧ Сійӧ. Нія шувлісӧ: «Ӧй, Тэ! Вежа Керкусӧ Разись да куим лунӧн сійӧ Сувтӧтісь! 30Мезды Ачыт Асьтӧ да лэдзчы крест вывсис». 31Сідз жӧ аркирейес да Туйдӧтӧ велӧтіссес сералісӧ Исусыс вылын да баитісӧ ӧтамӧдныслӧ: «Мӧдіккесӧ мездывліс, а Асьсӧ мездыны оз вермы! 32Кристос-Мездӧтісьыс, Израильлӧн Ӧксуыс, ась ӧні лэдзчӧ крест вывсис миян син одзын! Сэк пондам Сылӧ веритны!» Сійӧ видісӧ и Сыкӧт ордчӧн дорӧммес.
Исуслӧн кулӧм
(Мт. 27:45-56; Лк. 23:44-49; Ин. 19:28-30)
33Луншӧрнас быдсӧн му пасьта пемдіс. Пемытыс сулаліс куим часӧдз. 34Куим час гӧгӧрын Исусыс горӧтіс: «Элои, Элои! Ламма савактани?» Вуджӧтӧмыс лоӧ: «Енӧ, Енӧ! Мыля Тэ Менӧ колин?» 35Сэтӧн сулаліссес этнӧ кыввесӧ кылӧм бӧрын шуисӧ, Сія пӧ Иллясӧ корӧ. 36Ӧтік ны коласісь котӧртіс, босьтіс губка#15:36 губка ─ саридз пыдӧсын быдмас кодь олісь, сійӧ косьтывлісӧ да видзисӧ, кытчӧ колӧ, боссьӧтіс сійӧ шӧма винаӧн да кышаліс бедь вылӧ. Сія нюжӧтіс губкасӧ Исусыслӧ кӧтӧтны ӧмсӧ да шуис: «Сулалӧ! Видзӧтам, локтас я Илляыс лэдзны сійӧ крест вывсис». 37Исусыс ӧддьӧн горӧтіс да лэдзис ловсӧ.
38Сы коста Вежа Керкуын Вежася-вежаинсӧ сайӧвтан дӧраыс вылісянь улӧдз косясьӧм кык тор вылӧ. 39Сё воинӧн веськӧтлісь сулаліс паныт Исусыслӧ. Сія адззыліс, кыдз Исусыс сідз горӧтіс да лэдзис ловсӧ. Сія горӧтчис: «Эта мортыс былись эд вӧлі Енлӧн Зон!»
40Сэтӧн вӧлісӧ инькаэз, кӧдна ылісянь видзӧтісӧ лоӧмыс сьӧрын. Сэтӧн вӧлісӧ Магдала Мария, томжык Яковлӧн да Иосиялӧн Мария мамныс да Саломия. 41Нія ветлӧтісӧ Исускӧт Галилеяӧт да отсалісӧ Сылӧ. Сэтӧн вӧлісӧ и уна мӧдік инькаэз, кӧдна Сыкӧт тшӧтш локтісӧ Ерусалимӧ.
Исусӧс дзебӧм
(Мт. 27:57-61; Лк. 23:50-56; Ин. 19:38-42)
42Вӧлі шоччисян лун одзын рыт. 43Локтіс Аримафея карись Ӧсип, кӧда вӧлі веськӧтліссес коласісь, быдӧнныслӧ тӧдса морт. Сія видзчисис Енлісь Юралӧмсӧ. Ӧсипыс повтӧг пырис Пилат дынӧ да корис Исуслісь шойсӧ. 44Пилатсӧ диво кутіс, кӧр кыліс Исуслӧн кулӧм йылісь. Сія корис сё воинӧн веськӧтлісьӧс да юаліс сылісь: «Важын я куліс?» 45Исуслӧн кулӧм йылісь тӧдӧм бӧрын Пилатыс тшӧктіс сетны шойсӧ Ӧсипыслӧ. 46Ӧсипыс небис дӧра, крест вывсис лэдзис Исуслісь шойсӧ, каттис дӧраас да пуктіс из керӧсӧ кералӧм дзебсянінӧ. Пыранінас тарӧвтіс из. 47Магдала Марияыс да Иосиялӧн Мария мамыс видзӧтісӧ, кытчӧ дзебисӧ Исуссӧ.
Исуслӧн ловзьӧм
(Мт. 28:1-8; Лк. 24:1-12; Ин. 20:1-10)
Currently Selected:
Марк 15: БЮ19
Highlight
Share
Copy
Want to have your highlights saved across all your devices? Sign up or sign in
