Марк 10
10
1Капернаум карись мунӧм бӧрын Исусыс локтіс Иордан ю мӧдӧрись Иудея муӧ. Сы дынӧ бӧра ӧксисӧ отир. Кыдз пыр, Сія нійӧ пондіс велӧтны.
2Сибӧтчисӧ фарисейез да Сійӧ кутӧм могись юалісӧ: «Позьӧ я ай мортлӧ янсӧтчыны инькӧт?» 3Исусыс висьталіс нылӧ: «Мый тіянлӧ висьталӧм Моисейыс?» 4Нія шуисӧ: «Моисейыс лэдзис гижны янсӧтчан гижӧт да янсӧтчыны». 5Исусыс висьталіс нылӧ: «Тіян чорыт сьӧлӧммез кузя сія гижис тіянлӧ сэтшӧм тшӧктӧмсӧ. 6Быдӧс аркмӧтӧм#10:6 аркмӧтӧм ─ сотворение коста Еныс керис ай мортӧс да инькаӧс. 7Сійӧн мортыс коляс ассис ай-мамсӧ 8да ӧтлаасяс иньыскӧт. И кыкыс лоасӧ ӧтік вывтыр. Сідзкӧ, нія абу ни кык, а ӧтік вывтыр. 9И мый Еныс ӧтлаӧтіс, сійӧ мортыслӧ янсӧтны оз туй».
10Керкуас велӧтчиссес бӧра юалісӧ Исусыслісь сійӧ жӧ. 11Сія нылӧ висьталіс: «Кин янсӧтчас иньыскӧт да гӧтрасяс мӧдік вылын, сія иньыс сайсянь кыскасьӧ. 12Иньыс янсӧтчас кӧ аслас жӧниккӧт да петас мӧдік сайӧ, сія жӧникыс сайсянь кыскасьӧ».
Челядьӧс бласлӧвитӧм
(Мт. 19:13-15; Лк. 18:15-17)
13Исусыс дынӧ вайӧтісӧ челядьӧс, медбы Сія павкӧтчис ны бердӧ. А велӧтчиссес локтіссесӧ видісӧ. 14Сійӧ казялӧмсянь Исусыс лӧгасис да нылӧ висьталіс: «Лэдзӧ челядьсӧ локны Ме дынӧ, эд падмӧтӧ нійӧ. Ны коддеслӧ эд лӧсьӧтӧм Енлӧн Юраланіныс. 15Быльсӧ тіянлӧ висьтала: кин челядь моз оз босьт Енлісь Юралӧмсӧ, сія оз пыр Енлӧн Юраланінӧ». 16Исусыс кутыштіс челядьсӧ, пуктіс ны вылӧ киэсӧ да нійӧ бласлӧвитіс.
Бура олісьлӧ сьӧкыт пырны Енлӧн Юраланінӧ
(Мт. 19:16-30; Лк. 18:18-30)
17Туйӧ петікӧ Исусыс дынӧ кинкӧ котӧрӧн сибӧтчис. Сія усис Сы одзӧ пидзӧссэз вылас да юаліс: «Бур Велӧтісь, мый меным керны пырся оланӧ пырӧм понда?» 18Исусыс сылӧ висьталіс: «Мыля тэ менӧ шуан бурӧн? Ӧтік Енся бурыс некин абу. 19Тӧдан Енлісь тшӧктӧммесӧ: "эн вий", "гозйӧн овтӧн ӧтамӧдныт сайсянь эд ветлӧтӧ", "эн гусясь", "морт йылісь вӧвлытӧмсӧ эн баит", "эн мырддьы", "ай-мамтӧ бурӧ пукты"». 20Мортыс Исусыслӧ висьталіс: «Велӧтісь, ме томсянь ола этна тшӧктӧммез сьӧрті». 21Исусыс видзӧт-керис сы вылӧ. Мортыс вӧлі Сылӧ сьӧлӧмви. Исусыс шуис: «Дзир ӧтікыс тэныт оз тырмы: мун, и мый тэнат эм, быдӧс вузав да сьӧмсӧ сетав кориссезлӧ. Сэк лоас тэныт дона пажытьыс#10:21 пажыть ─ имущество енӧжас. Сыбӧрын босьт ассит кресттӧ да лок мунны Ме сьӧрӧ». 22Сылӧн кыввес мортсӧ ӧштӧтісӧ. Сія ӧшӧтіс юрсӧ да муніс, сылӧн эд вӧлӧм пажытьыс уна.
23Исусыс видзӧтіс Аслас велӧтчиссез вылӧ да висьталіс: «Кытшӧм сьӧкыт бура олісьлӧ пырны Енлӧн Юраланінӧ!» 24Велӧтчиссесӧ Сылӧн кыввес повзьӧтісӧ. Исусыс мӧдпырись висьталіс: «Челядь, уна пажыть вылӧ надейтчисьлӧ ӧддьӧн сьӧкыт пырны Енлӧн Юраланінӧ! 25Кокнитжык верблюдлӧ мунны ем пысӧт, нежели бура олісьлӧ пырны Енлӧн Юраланінӧ». 26Велӧтчиссесӧ диво кутіс. Нія баитісӧ ас коласаныс: «Кин нӧ сэк вермас мезмыны?» 27Исусыс ны вылӧ видзӧтӧмӧн шуис: «Мый морт оз вермы, сійӧ вермӧ Еныс. Сія эд быдӧс вермӧ».
28Петра пондіс баитны Исуслӧ: «Мийӧ быдӧс колим да мунім Тэ сьӧрӧ». 29Исусыс шуис: «Ме тіянлӧ быльсӧ висьтала: кин Ме понда да Бур Юӧр понда коляс керкусӧ, воннэсӧ, сойесӧ, мамсӧ, айсӧ, иньсӧ, челядьсӧ, муэсӧ, 30сылӧн ӧнняся вашӧтлан кадӧ сёись унажык лоасӧ керкуэс, воннэс, сойес, айес, маммес, челядьыс, муэс, а локтан кадӧ ─ пырся олан. 31Медодззаэс унаӧн лоасӧ медбӧрьяэзӧн, медбӧрьяэс ─ медодззаэзӧн».
Исус бӧра висьталӧ Аслас кулӧм йылісь
(Мт. 20:17-19; Лк. 18:31-34)
32Ерусалимӧ кайӧм коста Исусыс муніс одзас. Велӧтчиссес мунісӧ Сы бӧрсянь да ӧддьӧн тӧждісӧ. Ны бӧрсянь мунісь отирыслӧн полӧм петіс. Исусыс бӧра корис дынас даскыкнан велӧтчисьсӧ да пондіс баитны, мый лоас Сыкӧт: 33«Мийӧ каям Ерусалимӧ. Морт Зонсӧ вузаласӧ аркирейезлӧ да Туйдӧтӧ велӧтіссезлӧ. Нія шуасӧ Сійӧ вийны да сетасӧ ентӧдтӧммез#10:33 ентӧдтӧммез ─ язычники киӧ. 34Нія Сы вылын сераласӧ, сьӧлаласӧ, вартласӧ да виясӧ. Но куим лун бӧрті Сія ловзяс».
Яковлӧн да Иоанлӧн корӧм
(Мт. 20:20-28)
35Исусыс дынӧ сибӧтчисӧ Зеведейлӧн Яков да Иоан зоннэс. Нія шуисӧ: «Велӧтісь, кер миянлӧ, мый корам». 36Сія нылісь юаліс: «Мый тіянлӧ колӧ керны?» 37Нія Сылӧ висьталісӧ: «Лэдз миянлӧ пуксьыны Тэкӧт Аслат Юраланінын, ӧтнымлӧ ─ веськыт ладорат, мӧднымлӧ ─ шульга ладорат». 38Исусыс висьталіс нылӧ: «Одӧ тӧдӧ, мый корат. Вермат я юны дозсис, кӧдаись Ме понда юны? Вермат я пыртчыны Менам пыртчӧмӧн?» 39Нія шуисӧ: «Вермам». Исусыс висьталіс нылӧ: «Дозсис, кӧдаись Ме юа, и тійӧ пондат юны, да и Менам пыртчӧмӧн пыртчат. 40А пуксьӧтны веськыт ладорам да шульга ладорам Ме ог вермы. Сэтчӧ пуксяс сія, кинлӧ лӧсьӧтӧм».
41Дас велӧтчисьыс сэтшӧмсӧ кылӧмсянь Яков да Иоан вылӧ лӧгасисӧ. 42Исусыс корис велӧтчиссесӧ дынас да шуис: «Тійӧ тӧдат, ӧксуэз асланыс йӧз вылын юралӧны, веськӧтліссез отирсӧ видзӧны асланыс кипод увтын. 43Но тіян коласын сідз ась оз керсьы. Кин тіян коласын ыджытӧ бы пуксьӧ, сія ась ачыс быдӧнныслӧ кысъялӧ. 44Кин мӧдӧ лоны медодззаӧн, ась быдӧнныслӧ лоӧ раб туйӧ. 45Морт Зон эд эз лок, медбы Сылӧ кысъялісӧ. Сія локтіс кысъявны мӧдіккезлӧ да Аслас оланӧн вештісьны уна отирӧс небӧм понда».
Синтӧмӧс веськӧтӧм
(Мт. 20:29-34; Лк. 18:35-43)
46Нія локтісӧ Ерикон карӧ. Карсис петікӧ Исусыс сьӧрын мунісӧ уна отир. Туй дорас пукаліс да корис Тимейлӧн синтӧм Вартимей зоныс. 47Сія кылӧм, эта пӧ Назаретісь Исус локтӧ. Сія пондіс горӧтлыны: «Исус, Давид Зон! Небыт сьӧлӧмсянь отсав меным!» 48Отирыс тшӧктісӧ сійӧ чӧвны, но сія ӧддьӧнжык горӧтліс: «Давид Зон! Небыт сьӧлӧмсянь отсав меным!» 49Исусыс сувтчис да тшӧктіс сійӧ корны. Синтӧмсӧ корисӧ да висьталісӧ: «Эн пов, чеччы, Исусыс корӧ тэнӧ». 50Вартимейыс чапкис вывсис вевдӧрись паськӧмсӧ, чеччис да сибӧтчис Исусыс дынӧ. 51Исусыс юаліс: «Мый тэныт Месянь колӧ?» Синтӧмыс Сылӧ висьталіс: «Велӧтісь! Осьт менчим синнэзӧс». 52Исусыс висьталіс: «Мун, веритӧмыт тэнӧ мездіс». Мортыс сэк жӧ пондіс адззыны да муніс Исусыс сьӧрӧ.
Исуслӧн Ерусалимӧ пырӧм
(Мт. 21:1-11; Лк. 19:28-40; Ин. 12:12-19)
Currently Selected:
Марк 10: БЮ19
Highlight
Share
Copy
Want to have your highlights saved across all your devices? Sign up or sign in
