Матвей 21
21
1Ерусалимӧ мунӧм коста Исус велӧтчиссескӧт сибӧтчис Виффагия посад дынӧ, кӧда сулаліс Виягӧд#21:1 Виягӧд ─ (Оливка) эта кылыс грек кыв вылын «Елеон» керӧс увтын. Исусыс кык велӧтчисьӧс ыстіс одзлань. 2Нылӧ висьталіс: «Мунӧ паныт сулалан посадӧ. Сэтчӧ пырикӧ тійӧ адззат дом йылын иньпӧв осёлӧс чаньнас. Домӧтсӧ пӧрччалӧ да вайӧтӧ нійӧ Ме дынӧ. 3Тіянлӧ мыйкӧ шуасӧ кӧ, висьталӧ, нія пӧ колӧны Дӧсвидзисьнымлӧ. Нійӧ тіянлӧ бӧр вайӧтасӧ».
4Быдӧс аркмис Енсянь юӧртісьлӧн висьталӧм сьӧрті:
5─ Висьталӧ Сион нывлӧ#21:5 Сион ныв ─ Ерусалим карын оліссез:
Видзӧт, Ӧксуыт локтӧ тэ дынӧ!
Рам Сія, верзьӧмӧн осёл вылын локтӧ,
сийӧсалӧм#21:5 сийӧсавны ─ захомутать осёллӧн чань вылын.
6Велӧтчиссес мунісӧ да керисӧ тшӧктӧмыс сьӧрті. 7Иньпӧв осёлсӧ чаньнас нія вайӧтісӧ, ны вылӧ пуктісӧ ассиныс паськӧмнысӧ. Сэсся Исусыс пуксис. 8Отирыс коласісь унаӧн ассиныс паськӧмнысӧ ольсалісӧ туй вылас. Мукӧдыс чеглалісӧ пу уввез да тэчисӧ туй вылас. 9Сы бӧрын да одзас мунісь отирыс горӧтлісӧ:
Осанна#21:9 осанна ─ Енсӧ ошкан кыв, сія лоас «мездӧт миянӧс»! Ошкӧм Давид Зонлӧ!
Бласлӧвитӧм Дӧсвидзись нимӧн Локтісьыс!
Ошкам Медвылісь Енсӧ!
10Исуслӧн Ерусалимӧ пырӧм бӧрын быдсӧн карыс вӧрзис. Быдӧнныс юасисӧ: «Кин Сія?» 11Отирыс висьтавлісӧ: «Сія Галилея муись, Назарет карись Енсянь юӧртісь Исус».
Вежа Керкуись вузасиссезӧс вашӧтӧм
(Мк. 11:15-19; Лк. 19:45-48; Ин. 2:13-17)
12Исусыс пырис Вежа Керкуас да пондіс сэтчинісь вашӧтны вузасиссесӧ да небиссесӧ. Сія пӧрлаліс сьӧм вежиссеслісь пызаннэсӧ да дуді вузаліссеслісь лабиччесӧ. 13Сэсся нылӧ висьталіс: «Гижӧм тай: "Менчим керкуӧс пондасӧ шуны кейман керку". А тійӧ сійӧ лёк кериссеслӧ позӧ пӧртіт!» 14Вежа Керкуас Исуссӧ гӧгӧртісӧ синтӧммез да чотіссез. Сія нійӧ веськӧтіс.
15Аркирейез да Туйдӧтӧ велӧтіссез син одзын Исусыс керис адззывлытӧмсӧ. Ны син одзын Вежа Керкуас челядьыс горӧтлісӧ: «Ошкӧм Давид Зонлӧ!» Сысянь нія лӧгасисӧ. 16Нія Исусыслӧ висьталісӧ: «Кылан, мый челядьыс горӧтлӧны?» Исусыс нылӧ висьталіс: «Кыла. Тійӧ разь некӧр эдӧ лыддьӧтлӧ этнӧ кыввесӧ: "Тэ Аслыт ошкӧмсӧ лӧсьӧтін кагаэзсянь да челядьсянь"?» 17Исусыс нійӧ колис да муніс карсис. Сія локтіс Вифания посадӧ. Сэтчин чулӧтіс ойсӧ.
Инжир пу ёрдӧм
(Мк. 11:12-14,20-24)
18Асъяпоннас карас бертӧм коста Исуслӧн пондӧм симавны кынӧмыс. 19Туй дорсис Сія казяліс инжир пу да сибӧтчис. Но сы вылісь ӧтік воӧм эз адззы. Сія пуыслӧ висьталіс: «Тэ вылын сэсся некӧр оз ло воӧмыс». Инжир пуыс сэтӧн жӧ косьмис.
20Сійӧ адззӧмсянь велӧтчиссесӧ диво кутіс. Нія шуисӧ: «Кыдз сэтшӧм чожа косьмис пуыс?» 21Исусыс нылӧ висьталіс: «Веськыта тіянлӧ висьтала: лоас кӧ тіян веритӧмныт да одӧ кӧ падмӧ, тійӧ керат эта пуыскӧт керӧмся унажык. Тійӧ эта керӧслӧ висьталат кӧ: "Лэбтісь да уськӧтчы саридзӧ" ─ лоас сідз. 22Мый корат кеймиканыт веритӧмӧн, босьтатӧ».
Исуслӧн вын йылісь юасьӧм
(Мк. 11:27-33; Лк. 20:1-8)
23Исусыс локтіс Вежа Керкуӧ да велӧтіс. Сы дынӧ сибӧтчисӧ аркирейез бӧрйӧм пӧриссезкӧт. Нія юалісӧ Исуслісь: «Кытшӧм вынӧн Тэ быдӧс керан? Кин Тэнӧ сувтӧтіс сійӧ быдӧс керны?» 24Исусыс нылӧ шуис: «Ме и Ачым юала тіянлісь. Висьталат кӧ Меным юалӧмӧс, сэк и Ме висьтала, кытшӧм вынӧн быдӧс кера. 25Кытісь локтіс Иоанлӧн пыртчӧмыс? Енӧжсянь али мортсянь?» Нія ас коласаныс пондісӧ баитны: «Висьталам кӧ, енӧжсянь пӧ, Сія шуас: "Мыля нӧ тійӧ сылӧ эдӧ веритӧ?" 26Висьталам кӧ, мортсянь пӧ, отирсис полӧм петӧ, быдӧнныс эд Иоансӧ Енсянь юӧртісьӧ пуктӧны». 27Сэк нія висьталісӧ: «Огӧ тӧдӧ». Сэк Исусыс шуис: «И Ме тіянлӧ ог висьтав, кытшӧм вынӧн быдӧс кера».
Кык зон йылісь велӧтан висьт
28«Мый тійӧ этчӧ висьталат? Ӧтік мортлӧн вӧлӧмась кык зон. Сія локтӧм ӧт зоныс дынӧ да шуӧм: "Зонӧ, мун талун уджавны менам виноград йӧрын". 29Зоныс висьталас: "Ме ог мун". Сэсся сылӧ умӧль лоас сьӧлӧм вылас и сія мунас уджавны. 30Айыс сибӧтчас мӧд зоныс дынӧ да сідз жӧ висьталас. Зоныс шуас: "Муна, айӧ". Ачыс оз мун. 31Кӧда зоныс айныс тшӧктӧм сьӧрті керис?» Нія шуисӧ: «Одззаыс».
Исусыс нылӧ висьталіс: «Ме тіянлӧ быльсӧ висьтала: лэдзчисьӧм инькаэс да вот ӧктіссес Енлӧн Юраланінӧ тіянся одзжык мунӧны. 32Иоан локтіс тіянлӧ мыччавны Ен дынӧ туй. Тійӧ сылӧ эдӧ веритӧ. Лэдзчисьӧм инькаэс да вот ӧктіссес сылӧ веритісӧ. Нельки сійӧ быдӧс адззылӧм бӧрын тійӧ эдӧ бергӧтчӧ умӧльсӧ керӧммезныт дынісь да эдӧ веритӧ сылӧ».
Виноград вӧдитіссез йылісь велӧтан висьт
(Мк. 12:1-12; Лк. 20:9-19)
33«Кывзӧ мӧдік велӧтан висьт. Ӧтік морт аслас муӧ сюйыштас винограддэз да нійӧ йӧрьяс. Керас виноград пичканін. Вылына лэбтас виноград йӧр сьӧрын видзӧтланін. Сыбӧрын ассис йӧрсӧ виноград вӧдитіссезлӧ кӧртымӧ#21:33 кӧртым ─ аренда сетас. Ачыс мунас.
34Локтас виноград ӧктан кад. Сія иньдас ассис раббесӧ виноград вӧдитіссез дынӧ, медбы воӧм виноградсис босьтны ассис пайсӧ. 35Виноград вӧдитіссес раббесӧ кутасӧ: ӧтікӧс вартласӧ, мӧдікӧс ─ виясӧ, мукӧдсӧ ─ иззэзӧн шупкаласӧ. 36Мортыс бӧра ыстас ассис раббесӧ одззася унажык. И ныкӧт сідз керасӧ.
37Медбӧрын ны дынӧ ыстас ассис зонсӧ. Сія висьталас: "Менчим зонӧс нія озӧ лысьтӧ вӧрзьӧтны". 38Виноград вӧдитіссес казяласӧ зонсӧ да ӧтамӧдныслӧ шуасӧ: "Сылӧ быдӧс пажытьыс вуджас. Виям сійӧ. Сэк быдӧс миянлӧ дӧнзяс". 39Нія зонкасӧ кутасӧ, петкӧтасӧ виноград йӧрсис да виясӧ.
40Кӧзяиныс локтас да мый керас виноград вӧдитіссескӧт?» 41Нія шуисӧ: «Лёк йӧзсӧ сія сетас сьӧкыта вийны. Виноград йӧрсӧ сетас мӧдік виноград вӧдитіссезлӧ. Нія воӧм ягӧдсӧ сылӧ пондасӧ сетны аскадӧ».
42Исусыс нылӧ висьталіс: «Эдӧ я тійӧ некӧр лыддьӧтлӧ Вежа Гижӧтсис:
─ Изыс, кӧдӧ керку лэбтіссес
абутӧм туйӧ пуктісӧ,
лоис пельӧс изӧн#21:42 пельӧс из ─ краеугольный камень.
Сійӧ керис Дӧсвидзисьыс.
Миян синнэзлӧ сія диво.
43Сійӧн ме тіянлӧ висьтала: Енлісь Юралӧмсӧ тіянлісь мырддясӧ. Сійӧ сетасӧ отирлӧ, кӧдна вайӧны Ен Юралӧмлісь воӧмсӧ. 44Быдыс, кин усяс сія из вылӧ, лыэсӧ#21:44 лы ─ кость чеглалас. Кин вылӧ изыс усяс, сійӧ личкас».
45Этнӧ велӧтан висьттэсӧ кылӧм бӧрын аркирейес фарисейескӧт вежӧртӧмась, Исусыс пӧ ны йылісь висьталіс. 46Нія Исуссӧ мӧдӧмась кутны, но полӧмась отирсис. Отирыс эд Исуссӧ лыддисӧ Енсянь Юӧртісьӧн.
Гӧтрасянінӧ корӧммез йылісь велӧтан висьт
(Лк. 14:15-24)
Currently Selected:
Матвей 21: БЮ19
Highlight
Share
Copy
Want to have your highlights saved across all your devices? Sign up or sign in
