Матвей 17
17
1Квать лун бӧрті Исус босьтіс сьӧрас Петраӧс, Яковӧс да сылісь Иоан вонсӧ. Сія ныкӧт ӧтнаныскӧт кайис вылын керӧсӧ. 2Велӧтчиссез син одзын Исусыс вежсис: чужӧмыс шонді моз пондіс югьявны, паськӧмыс лоис свиттялана чочком. 3Сэтӧн ны одзӧ мыччисисӧ Моисей да Илля. Нія баитісӧ Исусыскӧт. 4Сэк Петра шуис Исусыслӧ: «Дӧсвидзисьӧ, миянлӧ татӧн ӧддьӧн бур. Колӧ кӧ, керам татчӧ куим шалаш: ӧтікӧ Тэныт, ӧтікӧ Моисейлӧ да ӧтікӧ Иллялӧ».
5Петралӧн баитӧм коста нійӧ вевттис югыт кымӧр. Кымӧрсяняс кыліс баитан шы: «Сія Менам дона Зонӧ, сьӧлӧм гажӧ. Сійӧ кывзӧ!» 6Шысӧ кылӧм бӧрын велӧтчиссес шуч повзисӧ, кыминь уськӧтчисӧ му вылас. 7Исусыс сибӧтчис, павкӧтчис ны бердӧ да шуис: «Чеччӧ, эд полӧ!» 8Юрнысӧ лэбтӧм бӧрын нія казялісӧ Исуссӧ ӧтнассӧ, мӧддэс эзӧ ни вӧлӧ.
Илля йылісь юалӧм
9Керӧсісь лэдзчӧм коста Исусыс нылӧ висьталіс: «Морт Зон ловзьытӧдз адззылӧмныт йылісь некинлӧ эд висьтасьӧ». 10Велӧтчиссес Сылісь юалісӧ: «Мыля нӧ Туйдӧтӧ велӧтіссес шуӧны, Мездӧтісься одзжык Иллялӧ пӧ колӧ локны?» 11Сія нылӧ висьталіс: «Былись, одзжык колӧ локны Иллялӧ да быдӧс лӧсьӧтны. 12Висьтала тіянлӧ: Илляыс локтіс ни. Отирыс сійӧ эзӧ тӧдӧ. Сыкӧт керисӧ, кыдз нылӧ коліс. Сідз и Морт Зонлӧ уна умӧльсӧ керасӧ». 13Велӧтчиссес сэк вӧлись вежӧртісӧ: Сія нылӧ висьталіс Пыртісь Иоан йылісь.
Зонкаись сэрпӧсь лов вашӧтӧм
(Мк. 9:14-32; Лк. 9:37-45)
14Исус ӧтлаын велӧтчиссескӧт бертіс отир дынӧ. Сэк Исусыс дынӧ локтіс морт да сувтіс пидзӧс вылас. 15Сія корис: «Дӧсвидзись, небыт сьӧлӧмсянь отсав зонӧлӧ. Сія виль тӧлісьнас сьӧкыта мырсьӧ, унаись ни биӧ да ваӧ усьліс. 16Ме сійӧ вайӧтлі велӧтчиссет дынӧ, но нія веськӧтны эзӧ вермӧ». 17Сэк Исусыс шуис: «Вериттӧм, лэдзчисьӧм отир! Дыр я Меным овны тіянкӧт? Дыр я Меным тіян вылӧ видзӧтны? Вайӧтӧ зонкасӧ Ме дынӧ!» 18Исусыс сэрпӧсь ловсӧ ӧліс, тшӧктіс петны. Сэрпӧсь лолыс петіс. Зонкаыс сэтӧн жӧ веськаліс.
19Отирыс ны дынісь мунісӧ. Сэк велӧтчиссес сибӧтчисӧ Исусыс дынӧ да юалісӧ: «Мыля мийӧ эгӧ вермӧ вашӧтны сэрпӧсь ловсӧ?» 20Исусыс висьталіс: «Эдӧ веритӧ да. Ме тіянлӧ быльсӧ висьтала: лоас кӧ тіян веритӧмныт горчига тусь ыжда, сэк тійӧ висьталат сія керӧслӧ: "Татісь вешшы сэтчӧ". Сія вешшас. Сэк тійӧ быдӧс вермат керны! 21Кӧслунавтӧг да кеймытӧг сэтшӧм сэрпӧсь ловвесӧ вашӧтлыны оз позь».
22Галилея муӧ локтӧм бӧрын Исусыс велӧтчиссеслӧ висьталіс: «Морт Зонсӧ сетасӧ отир киэзӧ. 23Сійӧ виясӧ, но куимӧт лунас Сія ловзяс». Нія кыввезсянь велӧтчиссесӧ ӧддьӧн гажтӧмыс кутіс.
Вежа Керку понда вот вештӧм
(Мк. 9:14-32; Лк. 9:37-45)
24Исус велӧтчиссескӧт локтіс Капернаум карӧ. Сэтӧн Петра дынӧ локтісӧ Вежа Керкуись вот ӧктіссез. Нія юалісӧ: «Тіян Велӧтісьныт вештӧ вотсӧ?» 25Сія висьталіс: «Вештӧ». Петра пырис керкуӧ. Сія эз на ешты нем висьтавны, Исусыс сылісь юаліс: «Симон, кинлісь, тэ шуанӧн, му вылісь ӧксуэс вотсӧ ӧктӧны: асланыс зоннэзлісь али мӧдік йӧзлісь?» 26Сія шуис: «Мӧдік йӧзлісь». Сэк Исусыс шуис: «Сідзкӧ, зоннэз вотсӧ озӧ вештӧ. 27Огӧ пондӧ нійӧ лӧгӧтны. Мун ты дорӧ, чапкы вугыртӧ, одзза шедӧм черисӧ кыскы. Сы ӧмись адззан эзысь сьӧм. Вешты вотсӧ ас пондасит да Ме понда».
Челядь кодьӧн лоны тшӧктӧм
(Мк. 9:33-37; Лк. 9:46-48)
Currently Selected:
Матвей 17: БЮ19
Highlight
Share
Copy
Want to have your highlights saved across all your devices? Sign up or sign in
