Лука 23
23
1Ӧксьӧммес быдӧнныс чеччисӧ, Исуссӧ нуӧтісӧ Пилат дынӧ. 2Пондісӧ шувлыны Исусыс вылӧ: «Мийӧ адззам: Сія отирсӧ умӧляс велӧтӧ, Римись ӧксулӧ оз тшӧкты вештыны вотсӧ. Асьсӧ пуктӧ Кристос-Мездӧтісьӧ да Ӧксуӧ». 3Пилатыс юаліс Исусыслісь: «Тэ иудейезлӧн Ӧксу?» Исусыс горӧтчис: «Тэ висьталін». 4Пилатыс аркирейеслӧ да отирыслӧ висьталіс: «Нем умӧльсӧ ме эг адззы эта Мортісь». 5Мӧддэс бӧбись#23:5 бӧбись ─ неистово пондісӧ висьтавлыны: «Сія Иудеяыс пасьта Аслас велӧтӧмӧн гудыртӧ. Галилеясянь татчӧдз ни локтіс».
6Галилеясӧ кылікӧ Пилатыс юаліс: «Сія мый, Галилеяись?» 7Пилатыс кыліс, Сія пӧ Ирод кипод увтын муись, сэк ыстіс Исуссӧ Ирод дынӧ. Иродыс эд нія луннэзӧ вӧлі Ерусалимас.
Исус Ирод одзын
8Исуссӧ казялӧмсянь Иродыс гажмис. Сылӧ уна мый кывсьӧм Исусыс йылісь. Сійӧн сія важын ни мӧдӧм адззывны Исуссӧ. Иродыс видзчисис, Исусыс пӧ мыйкӧ адззывлытӧмӧ мыччалас. 9Иродыс уна мый юасис Исуслісь, но Сія шы эз сет. 10Аркирейес Туйдӧтӧ велӧтіссескӧт сулавтӧнняныс орӧттӧг висьтавлісӧ Сы вылӧ умӧльсӧ. 11Иродыс аслас воиннэзкӧт пӧттӧдз умӧльтіс Исуссӧ, Сійӧ абутӧм туйӧ пуктіс. Сэсся сія тшӧктіс Исуссӧ пасьтӧтны дона басӧк паськӧмӧ да бӧр ыстіс Пилатыс дынӧ. 12Одзжык Пилатыс Иродыскӧт лӧгалӧмась, но сія лунсянь нія лоӧмась ёрттэзӧн.
Исусӧс вийны сетӧм
(Мт. 27:15-26; Мк. 15:6-15; Ин. 18:39-19:16)
13Пилатыс корис дынас аркирейесӧ, веськӧтліссесӧ да отирсӧ. 14Сія нылӧ висьталіс: «Тійӧ вайӧтіт этӧ мортсӧ, кыдз отирсӧ умӧляс велӧтісьӧс. Уна мый умӧльсӧ Сы вылӧ висьтавліт. Ме тіян одзын Сылісь быдӧс юаси и нем умӧльсӧ эг адззы. 15Ме Исуссӧ ыстылі Ирод дынӧ. Сідз и сія нем Сыись эз адззы, мый понда Сійӧ коліс бы вийны. 16Сідзкӧ, тшӧкта Сійӧ виззьыны-шулявны да лэдза». 17Сылӧ и колӧм вӧлі Ыджыт лун коста пукаліссез коласісь ӧтікӧс лэдзны.
18Быдӧс отирыс пондісӧ горӧтлыны: «Вийны Сійӧ! Лэдз миянлӧ Вараввасӧ!» 19Вараввасӧ пуксьӧтӧмась вӧлі карас зык#23:19 зык ─ шум, мятеж лэбтӧм понда да морт вийӧм понда. 20Пилатыс бӧра баитіс отирыслӧ, сія Исуссӧ мӧдіс лэдзны. 21Отирыс горӧтлісӧ: «Дор Сійӧ крест вылӧ, дор!» 22Пилатыс куимӧтісь висьталіс нылӧ: «Мый Сія керис умӧльсӧ? Ме нем умӧльсӧ эг адззы Сыись, медбы сійӧ вийны. Сійӧн виззьӧм-шулялӧм бӧрсянь Сійӧ лэдза». 23Отирыс дугдывтӧг горӧтлісӧ, корисӧ Исуссӧ дорны.
Аркирейеслӧн да отирлӧн горӧтлӧмныс вермис. 24Пилатыс керис ны корӧм сьӧрті. 25Нылӧ лэдзис корӧмныс сьӧрті зык лэбтӧм да морт вийӧм понда пукалісьӧс, а Исуссӧ сетіс дорны крест вылӧ.
«Юр лы»#23:26 юр лы ─ череп керӧс вылӧ туй
(Мт. 27:32-44; Мк. 15:21-32; Ин. 19:17-27)
26Исуссӧ нуӧтісӧ дорны. Сійӧ нуӧтіссес кутісӧ Киринеяись Симон нима мортӧс. Сія локтӧ вӧлі ыб вывсянь. Сійӧ тшӧктісӧ нӧбӧтны крестсӧ Исусыс сьӧрын. 27Сы сьӧрын муніс ӧддьӧн уна отир. Инькаэс горзісӧ, герьялісӧ Сы понда. 28Исусыс ныланьӧ бергӧтчӧмӧн висьталіс: «Ерусалимись ныввез, эд горзӧ Ме понда, горзӧ ас пондасиныт да челядьныт понда. 29Локтасӧ луннэз, сэк висьталасӧ: "Шудаӧсь кагатӧммес, ваясьтӧм гырккес, нимӧттӧм мороссэс!" 30Сэк керӧссэзлӧ пондасӧ шуны: "Усьӧ миян вылӧ!" Мыссэзлӧ шуасӧ: "Вевттьӧ миянӧс!" 31Листа пуыскӧт кӧ сідз керӧны, мый сэк кӧсыскӧт лоас».
32Исусыскӧт тшӧтш нуӧтісӧ дорны кык лёк керисьӧс. 33Нійӧ вайӧтісӧ «Юр лы» нима керӧс вылӧ. Сэтӧн Исуссӧ дорисӧ крест вылӧ. Ӧт лёк керисьсӧ дорисӧ веськыт ладорас, мӧдсӧ ─ шульга ладорас.
34Исусыс висьталіс: «Айӧ, простит нійӧ. Нія эд озӧ тӧдӧ, мый керӧны». Исуссӧ крест вылас дориссес Сылісь паськӧмсӧ янсӧтісӧ ас коласаныс кыскӧм сьӧрті#23:34 кыскӧм сьӧрті ─ по жребию, кинлӧ мый шедіс.
35Отирыс сулалісӧ да видзӧтісӧ. Веськӧтліссес сералісӧ Исусыс вылын. Нія шувлісӧ: «Мӧдіккесӧ мездывліс, ӧні ась Ачыс Асьсӧ мездӧ, Сія кӧ Енлӧн бӧрйӧм Кристос-Мездӧтісь». 36Сідз и воиннэс сералісӧ Сы вылын. Нія сибӧтчисӧ удны Сылӧ шӧма вина 37да шувлісӧ: «Тэ кӧ иудейезлӧн Ӧксу, мезды Ачыт Асьтӧ». 38Исусыс юр вевдӧрын иудей, грек да латин кыввез вылын вӧлі гижӧм: «Сія иудейезлӧн ӧксу».
39Дорӧммес коласісь ӧт лёк керисьыс видіс Исуссӧ. Сія шувліс: «Тэ кӧ Кристос-Мездӧтісь, мезды Асьтӧ да и миянӧс». 40Мӧд дорӧм мортыс сійӧ ӧліс: «Он я пов Енсис, ачыт эд Сы моз жӧ дорӧм? 41Мийӧ асланым лёк керӧм понда дорӧмӧсь, шедтӧмнымӧс и босьтім, а Сія эд умӧльсӧ нем эз кер». 42Сэсся Исусыслӧ висьталіс: «Уськӧт менӧ тӧдвылат, кӧр локтан Аслат Юраланінӧ». 43Исусыс сылӧ висьталіс: «Быльсӧ тэныт висьтала: тэ талун жӧ лоан Мекӧт райын».
Исуслӧн кулӧм
(Мт. 27:45-56; Мк. 15:33-41; Ин. 19:28-30)
44Кадыс вӧлі луншӧр гӧгӧр. Сэк быдсӧн муыс пасьта лоис пемыт. Пемытыс сулаліс куим часӧдз. 45Шондіыс пемдіс, Вежа Керкуас Вежася-вежаинсӧ сайӧвтан дӧраыс косясьӧм вылісянь улӧдз кык тор вылӧ. 46Исусыс горӧн висьталіс: «Айӧ! Тэнат киӧ сета Ассим лолӧс». Сідз висьталӧм бӧрсянь Исуслӧн лолыс петіс.
47Сё воинӧн веськӧтлісьыс этӧ быдӧс адззылӧм бӧрсянь ошкис Енсӧ. Сія висьталіс: «Былись эд эта мортыс вӧлӧм Ен сьӧрті веськыта олісь». 48Быдӧс лоӧмсӧ адззылісь отирыс бертісӧ гортаныс моросаныс сӧталӧмӧн. 49Исуссӧ тӧдіссес да Галилеяись Сыкӧт локтӧм инькаэс ылісянь видзӧтісӧ быдӧс лоӧмсӧ.
Исусӧс дзебӧм
(Мт. 27:57-61; Мк. 15:42-47; Ин. 19:38-42)
50-51Сэтчин оліс Ӧсип нима морт, кӧда вӧлі Иудея муын Аримафея карись. Сія бур, Ен сьӧрті веськыта олісьыс видзчисис Енлісь Юралӧмсӧ. Ӧсипыс вӧлі судитан чукӧрись, но Исуссӧ кутіссес дор сія эз вӧв. 52Сія локтіс Пилат дынӧ да корис Исуслісь шойсӧ. 53Ӧсипыс лэдзис Исуссӧ крест вывсис, каттис дӧраэзӧ да пуктіс дзебсянінӧ, кӧда вӧлі кералӧм из керӧсын. Сэтӧн некин эз на куйлы. 54Сія вӧлі шоччисян лун одзын рытӧн.
55Ӧсипыс сьӧрын мунісӧ инькаэз, кӧдна локтісӧ Исускӧт Галилеясянь. Нія видзӧтісӧ, кыдз Исуслісь шойсӧ пуктісӧ дзебсянінас#23:55 дзебсянін ─ гробница, могила. 56Дзебсянінсис бертӧм бӧрсянь нія лӧсьӧтісӧ чӧскыт руа мавтассэз. Туйдӧтас тшӧктӧм сьӧрті шоччисян лунас шоччисисӧ.
Кристослӧн ловзьӧм
(Мт. 28:1-8; Мк. 16:1-8; Ин. 20:1-10)
Currently Selected:
Лука 23: БЮ19
Highlight
Share
Copy
Want to have your highlights saved across all your devices? Sign up or sign in
