Лука 1
1
Феофиллӧ гижӧт
1Унаӧн пондісӧ ӧктыны миян коласын лоӧмсӧ гижӧттэзӧ. 2Лоӧмсӧ миянлӧ висьтасисӧ Ен Кывлӧ кысъяліссез#1:2 кысъялісь ─ служитель, одззасянь быдӧс адззыліссез. 3Сідз и меным юрам пырис быдӧс бура тӧдмавны лоӧмыс йылісь. Ӧні вӧлись быдӧс лоӧмсӧ сьӧрсьӧн-бӧрсьӧн ӧтамӧд дынӧ тэчӧмӧн гижа тэныт, Феофил, дона морт. 4Тэныт эд колӧ тӧдны: сія велӧтӧмыс, кӧдӧ тэныт юӧртісӧ, надейнӧй.
Иоанлӧн шогмӧм йылісь ангеллӧн юӧртӧм
5Иудея муын юраліс Ирод ӧксу. Сія кадӧ оліс Закар нима вежауджалісь#1:5 вежауджалісь ─ священник. Сія вӧлі Авия нима вежауджаліссез чукӧрись. Сылӧн Елизавета иньыс вӧлі Аарон увтырись. 6Нія кыкнанныс олісӧ Ен сьӧрті веськыта#1:6 Ен сьӧрті веськыта ─ праведно. Быдӧс керисӧ Дӧсвидзисьлӧн велӧтӧммез, тшӧктӧммез#1:6 тшӧктӧм ─ заповедь, повеление сьӧрті. 7Нія вӧлісӧ пӧрисьӧсь ни. Елизаветаыс эз вермы ваясьны. Сысянь нылӧн челядьныс эзӧ вӧлӧ.
8Кыдзкӧ Закарыс аслас кадӧ уджаліс Ен одзын. 9Вежауджаліссес пыравлісӧ Дӧсвидзисьлӧн Вежа Керкуӧ#1:9 Вежа Керку ─ храм сы сьӧрті, кинлӧ усяс пырны. Сэк Закарыслӧ усис пырны Вежа Керкуас тшынӧтчыны чӧскыт руа берсянас. 10Тшынӧтӧмыс коста ӧксьӧм отирыс кеймисӧ ӧтӧрас.
11Сэк тшынӧтчан пызан#1:11 тшынӧтчан пызан ─ стол для возжигания благовоний, кадильный жертвенник веськыт ладорас Закар одзӧ мыччисис Дӧсвидзисьлӧн ангел. 12Сійӧ казявтӧн Закарыс ӧшис, повзис. 13Ангелыс сылӧ висьталіс: «Эн пов, Закар, Еныс кыліс тэнчит кеймӧмтӧ. Елизавета иньыт ваяс тэныт зонӧс. Сылӧ нимсӧ сетан Иоан. 14Тэнат сьӧлӧм вылат лоас гаж, пондан гажӧтчыны. Уна отир сы шогмӧмсянь гажмасӧ. 15Ыджыт морт сія лоас Дӧсвидзись одзын. Оз понды юны вина да кодззӧтан юаннэз. Мам кынӧмсянь сія лоас тырӧм Вежа Лолӧн. 16Израиль зоннэз коласісь унаӧс бергӧтас Дӧсвидзись Енланьӧ. 17Иллялӧн кодь лолӧн да вынӧн мунас Дӧсвидзись одзын. Мунас айезлісь сьӧлӧммезнысӧ бергӧтны челядьланьӧ, кывзісьтӧммеслӧ сетны мывкыдсӧ Ен сьӧрті веськыта оліссезлісь#1:17 Ен сьӧрті веськыта олісь ─ праведный, медбы Дӧсвидзись одзӧ сувтӧтны туйдӧтӧм-лӧсьӧтӧм отирӧс».
18Ангелыслісь Закарыс юаліс: «Мый сьӧрті ме сійӧ тӧда? Ме эд пӧрись, и иньӧ абу ни том». 19Ангелыс висьталіс: «Ме Гавриил, сулала Ен одзын. Ме ыстӧм тэкӧт баитны, бур юӧр вайны тэныт. 20Менам кыввезӧ тэ эн верит, сійӧн тэ пондан чӧвны. Он понды вермыны баитны аскадӧ быдӧс лоӧмӧдз».
21Сы коста отирыс видзчисисӧ Закарыслісь Вежа Керкусис петӧмсӧ. Нія дивуйтчисӧ, мыля сія сёрмӧтчис петны. 22Петӧмыс бӧрсянь сія эз вермы баитны. Отирыс вежӧртісӧ, Вежа Керкуас сія пӧ адззыліс Енсянь мыччалӧм#1:22 мыччалӧм ─ видение. Закарыс баитӧмыс туйӧ отирыслӧ мыччаліс киэзнас.
23Уджалан луннэз чулалӧм бӧрсянь Закарыс бертіс гортас. 24Нія луннэз бӧрын сылӧн Елизавета иньыс сьӧктіс. Сія чӧліс, эз мыччав сьӧктӧмсӧ вит тӧлісь. Сія баитіс: 25«Эна луннэзӧ быдӧс лоӧмсӧ меным керис Дӧсвидзисьыс. Сія казяліс менӧ да петкӧтіс отирыс одзын рожа кулянсис».
Мариялӧ юӧр
26Елизаветаыс новйӧтчис кватьӧт тӧлісь. Сэк Еныс ыстӧм вӧлі Гавриил ангелсӧ Галилея муись Назарет карӧ 27Мария нима ныв дынӧ. Сія вӧлі корасьӧм Давид увтырись Ӧсип сайӧ. 28Ангелыс пырис Сы дынӧ да горӧтчис: «Лӧнь олан#1:28 лӧнь олан ─ мир Тэныт, Нылӧй! Дӧсвидзисьыс Тэкӧт! Иннез коласісь Сія Тэнӧ бласлӧвитіс!»
29Ангелсӧ казялӧмсянь, сы сёрнисянь Марияыс паймис. Нывкаыс юрас видзис, мый одзын пӧ сэтшӧм кыввесӧ сія висьталіс. 30Ангелыс горӧтчис: «Эн пов, Мария. Еныслӧн бурсетӧмыс#1:30 бурсетӧм ─ благодать дӧнзис Тэныт. 31Тэ сьӧктан да ваян Зонӧс. Нимсӧ Сылӧ сетан Исус. 32Ыджыт морт Сыись петас. Сійӧ пондасӧ шуны Медвылісьлӧн Зонӧн. Дӧсвидзись Ен Сылӧ сетас Давид айыслісь юралан пукӧссӧ#1:32 юралан пукӧс ─ престол, трон. 33Яков увтырлӧ Сія Ӧксуӧн лоас пыр кежӧ. Сылӧн Юралӧмыс пондас кыссьыны пырся-пыр». 34Марияыс юаліс ангелыслісь: «Ме эд нывка, кыдз сія лоас?» 35Ангелыс висьталіс Сылӧ: «Вежа Лов локтас Тэ вылӧ. Медвылісьыслӧн выныс вевттяс Тэнӧ. Сійӧн шогмӧм вежа Кагасӧ пондасӧ шуны Ен Зонӧн. 36Сідз и Тэнат увтырись Елизаветаыс пӧрисьувьяс сьӧктіс зонӧн. Отирыс тай сійӧ шуисӧ кагатӧмӧн. Сія новйӧтчӧ кватьӧт тӧлісь ни. 37Еныс эд быдӧс вермӧ керны». 38Сэк Марияыс горӧтчис: «Ме Дӧсвидзисьлӧн раб. Ась лоӧ Меным тэнат висьталӧм сьӧрті». Сэсся ангелыс Сы дынісь муніс.
Мария Елизавета ордын
39Кынымкӧ лун бӧрті Марияыс тэрмасьӧмӧн муніс карӧ, кӧда вӧлі керӧса Иудея муын. 40Марияыс пырис Закар керкуӧ. Сія пантасис Елизаветаыскӧт. 41Марияыслісь баитӧмсӧ кылікӧ Елизаветаыс кынӧмын кагаыс вӧрзьӧтчыштіс. Елизаветаыс тырис Вежа Лолӧн. 42Гажувьяс сія горӧн висьталіс: «Иннез коласісь Тэ медбура бласлӧвитӧм! Бласлӧвитӧм и Тэ пытшкись Кагаыс! 43Кин ме сэтшӧмыс, Дӧсвидзисьлӧн Мамыс эд локтіс ме дынӧ? 44Дзир кыліс Тэнат баитӧмыт, кынӧмам кагаыс гажӧн вӧрзьӧтчис. 45Тэ шуда#1:45 шуда ─ счастливый, блаженный, веритін да, Тэныт аркмас Дӧсвидзисьлӧн висьталӧмыс».
Мариялӧн Енсӧ ошкӧм
46Марияыс висьталіс:
─ Менам сьӧлӧмӧ лэбтӧ, сьылӧтӧ Дӧсвидзисьсӧ.
47Енӧ понда, Мездӧтісьӧ понда
гажмис Менам лолӧ.
48Ассис учӧтик рабсӧ Сія казяліс.
Ӧнісянь Менӧ пондас шуны шудаӧн
быд шогмӧм морт.
49Вынаыссянь Меным сэтшӧм ыджыт керӧмыс.
Сылӧн нимыс Вежа!
50Сыись поліссез дынӧ Сія небыт сьӧлӧма
увтырись увтырӧ.
51Аслас вына киӧн Сія ыджыт удж керис.
Асьнысӧ вылына лэбтіссесӧ
юраныс пыртӧмнаныс ӧтмӧдӧрӧ резіс.
52Вына юраліссесӧ пукӧссэз вывсиныс лэдзис,
лэбтіс абутӧм туйӧ пуктӧммесӧ.
53Тшыгьяліссесӧ тыртіс бурнас.
Аслыныс уна ӧктіссесӧ куш киӧн лэдзис.
54-55Локтіс отсавны Израильлӧ, Аслас кысъялісьлӧ#1:54-55 кысъялісь ─ слуга.
Сія тӧдвылас видзӧ небыт сьӧлӧмсянь айезнымлӧ кӧсйӧмсӧ,
Авраамыслӧ да сы увтырлӧ пыр кежӧ.
56Марияыс Елизаветаыс ордын оліс куим тӧлісь гӧгӧр да бертіс гортас.
Пыртісь Иоанлӧн шогмӧм
57Елизаветалӧн локтіс ваян кад. Сія вайис зонӧс. 58Увтырыс да матын оліссес кылісӧ Дӧсвидзисьлісь небыт сьӧлӧмсянь Елизаветаыслӧ вына керӧмсӧ да гажӧтчисӧ сыкӧт. 59Кыкьямысӧт лунас локтісӧ вундыштыштны#1:59 вундыштыштны ─ совершить обряд обрезания кагасӧ. Нимсӧ мӧдісӧ сетны айыслісь ─ Закар. 60Сэтчӧ сылӧн мамыс висьталіс: «Огӧ, сылӧ нимсӧ сетам Иоан». 61Сылӧ шуисӧ: «Сэтшӧм нимаыс тіян увтырын некин абу». 62Кинаныс ӧвтыштісӧ айыслань да юалісӧ, кыдз сія мӧдӧ шуны кагасӧ. 63Сія корис пӧвтор да гижис: «Сылӧн нимыс Иоан». Быдӧннысӧ диво кутіс. 64Сэтӧн Закарыс пондіс вермыны баитны. Сія пондіс ошкыны Енсӧ.
65Ны гӧгӧр быдӧс оліссесӧ полӧм кутіс. Лоӧмыс йылісь висьтасисӧ керӧса Иудея му пасьта. 66Быд кылісьыс эта лоӧм йылісь висьталӧмсӧ видзис аслас сьӧлӧмын. Отирыс баитісӧ: «Кин петас сія кагаись?» Дӧсвидзисьлӧн киыс эд вӧлі сы вылын.
Закарлӧн Енсянь юӧртӧм
67Кагаыслӧн Закар айыс тырис Вежа Лолӧн да пондіс Енсянь юӧртны:
68─ Ошка Дӧсвидзисьсӧ, Израильлісь Енсӧ!
Сія вовліс Аслас отир дынӧ.
Аркмӧтіс сылӧ мезмӧмсӧ.
69Аслас кысъялісь Давид увтырись
сувтӧтіс миянлӧ вына Мездӧтісьӧс.
70Еныс сідз кӧсйӧм вӧлі чулалӧм каддэзӧ
Аслас вежа юӧртіссес пыр.
71Сія кӧсйисьӧм миянӧс мездыны
миян вылӧ лэбтісиссез#1:71 кинкӧ вылӧ лэбтісись ─ враг дынісь,
ны киэзісь, кинлӧ мийӧ син вылӧ огӧ колӧ.
72Еныс кӧсйисьӧм лоны небыт сьӧлӧмаӧн миян айез дынӧ
да видзны тӧдвылас Ассис вежа йитӧтсӧ#1:72 йитӧт ─ союз, завет, договор.
73Миян Авраам айлӧ сетӧм кывсӧ Еныс видзас,
кӧсйӧмсӧ сетас миянлӧ.
74Миян вылӧ лэбтісиссезлӧн киэзісь
мездас миянӧс,
медбы вермим повтӧг кысъявны Сылӧ,
75медбы Сы одзын вӧлім вежаӧсь
да быд лун олім Сы сьӧрті веськыта.
76Тэнӧ, кага, пондасӧ шуны Медвылісьлӧн юӧртісьӧн.
Дӧсвидзисьыс одзын тэ мунан лӧсьӧтны Сылӧ туйесӧ.
77Енлӧн отирлӧ юӧртан мезмӧмныс йылісь
да умӧль керӧммезнысӧ проститӧм йылісь.
78Миян небыт сьӧлӧма Енным жалейтас миянӧс:
вылісянь ыстас миянлӧ асывся Югытсӧ.
79Сія югдӧтас пемытінын, кулан вуджӧрын пукаліссесӧ.
Иньдӧтас миянлісь коккезнымӧс лӧнь оланӧ.
80Кагаыс зорамис, вынсяліс ловнас. Израиль отир одзӧ петтӧдз сія оліс кушмуын.
Исуслӧн шогмӧм
(Мт. 1:18-25)
Currently Selected:
Лука 1: БЮ19
Highlight
Share
Copy
Want to have your highlights saved across all your devices? Sign up or sign in
