Иоан 1

Кыв пӧртчис Мортӧ

1Медодз вӧлі Кыв.

Кылыс вӧлі Енкӧт.

Кылыс вӧлі Ен.

2Кылыс медодз вӧлі Енкӧт.

3Быдӧс, мый эм, керӧм Сы пыр.

Сытӧг нем эз вӧв керӧм.

4Сыын вӧлі олан.

Сія оланыс вӧлі отирсӧ Югдӧтан.

5Югытыс пемытсӧ югдӧтӧ.

Пемытыс югытсӧ эз пӧдты.

6Еныс ыстіс Иоан нима мортӧс. 7Иоаныс локтіс висьтасьны Югытыс йылісь, медбы быдӧнныс веритісӧ Югытыслӧ. 8Ачыс сія эз вӧв югытыс. Сія локтіс висьтасьны Югытыс йылісь.

9Сія вӧлі былись Югытыс,

быд мортсӧ Югдӧтісьыс,

Кӧда локтіс му вылас.

10Сія вӧлі му вылас.

Му вылісьыс быдӧс вӧлі керӧм Сы пыр,

но му вылісь отирыс Сійӧ эзӧ тӧдӧ.

11Сія локтіс Аслас отир дынӧ,

нія тай Сійӧ абутӧм туйӧ пуктісӧ.

12А нылӧ, кӧдна лэдзисӧ Сійӧ сьӧлӧманыс

да веритісӧ Сылӧ,

шуис лоны Енлӧн челядьӧн.

13Нія эзӧ шогмӧ вирсянь,

вывтырлӧ да мортлӧ колӧмсянь,

но шогмисӧ Еныссянь.

14Кылыс пӧртчис мортӧ, оліс миянкӧт.

Сія вӧлі тырӧм бурсетӧмнас#1:14 бурсетӧм ─ благодать да быльнас.

Мийӧ адззылім Сылісь югьялӧмсӧ,

ӧтка Зонлӧ сія югьялӧмыс сетӧм Айсянь.

15Сы йылісь висьтавліс Иоан. Сія горӧн юӧртіс: «То Сія, Кӧда йылісь ме и висьтавлі: ме бӧрсянь Локтісьыс месся ыджытжык. Сія месся одзжык эд вӧлӧм ни».

16Сылӧн быдӧс тырмӧмись#1:16 быдӧс тырмӧм ─ полнота мийӧ быдӧнным

босьтім бурсетӧм вылӧ бурсетӧм.

17Туйдӧтыс вӧлі сетӧм Моисей пыр.

Бурсетӧмыс да быльыс локтісӧ

Кристос Исус пыр.

18Енсӧ отирыс некӧр эзӧ адззывлӧ.

Сійӧ миянлӧ мыччаліс

Айыскӧт ӧтлаын олісь ӧтка Зоныс.

Пыртісь Иоан

19Ерусалимись иудейес ыстісӧ вежауджаліссезӧс#1:19 вежауджалісь ─ священник да левиттэзӧс#1:19 левит ─ Левий увтырись Вежа Керкуын уджалісь морт юавны Иоанлісь, кин сія. И Иоаныс нылӧ висьталіс ас йывсис. 20Сія веськыта шуис: «Ме абу Кристос-Мездӧтісь». 21Сэк сылісь юалісӧ: «Тэ сэк Илля?» Сія шуис: «Ме абу Илля». Бӧра юалісӧ: «Тэ сэк Енсянь юӧртісь?» Сія шуис: «Абу».

22Сэк сылісь юалісӧ: «Кин нӧ сэк тэ? Мый висьталам миянӧс ыстіссеслӧ? Мый тэ висьталан ас йывсит?» 23Иоаныс висьталіс: «Ме кушмуын горӧтлісьлӧн шы: "Лӧсьӧтӧ веськыт туй Дӧсвидзисьыслӧ!" Сідз тай висьтавлӧм вӧлі Енсянь юӧртісь Исай».

24Ыстӧммес вӧлісӧ фарисейез коласісь. 25Иоаныслісь нія юалісӧ: «Абу кӧ тэ Кристос-Мездӧтісь, абу Илля, абу Енсянь юӧртісь, мыля нӧ сэк тэ отирсӧ пыртан?» 26Иоаныс нылӧ висьталіс: «Ме пырта ваӧн, но коласаныт сулалӧ Сія, Кӧдӧ тійӧ одӧ тӧдӧ. 27Сія локтӧ ме бӧрын, но месся одзжык Сія вӧлӧм ни. Ме абу туяна#1:27 туяна ─ достойный морт нельки пӧрччавны Сы кӧмкӧтісь воньсӧ».

28Эта вӧлі Вифаварын, Иордан ю дорын. Сэтӧн Иоаныс пыртіс отирсӧ.

Енлӧн Дзель

29Мӧд лунас Иоаныс казяліс сы дынӧ локтісь Исуссӧ да шуис: «То Енлӧн Дзельыс! Сія босьтӧ отирлісь умӧль керӧммесӧ Ас вылас. 30Ме Сы йылісь и висьтавлі: "Ме бӧрсянь локтӧ Морт, Кӧда месся ыджытжык. Месся одзжык эд Сія вӧлӧм ни". 31Ме Сійӧ эг тӧдлы. Но локті пыртны ваӧн, медбы Израильыс пондіс тӧдны Сійӧ».

32Сэк Иоаныс висьтасис: «Ме адззылі, кыдз енӧжсянь дуді моз Сы вылӧ лэдзчисис Вежа Лов да кольччис Сы вылын. 33Ме эг тӧд Сійӧ. Отирсӧ ваӧн пыртны менӧ Ыстісьыс висьталіс: "Кӧр адззылан, Кин вылӧ лэдзчисяс Лов да кольччас Сы вылын, Сія пондас пыртны Вежа Лолӧн". 34И ме адззылі да висьтала: Сія ─ Енлӧн Зон».

Медодзза велӧтчиссез

35Мӧд лунас Иоаныс аслас кык велӧтчиськӧт бӧра сулаліс сэтчин. 36Сія казяліс мунісь Исуссӧ да шуис: «То Енлӧн Дзельыс!» 37Сылісь кыввесӧ кылӧм бӧрсянь кыкнан велӧтчисьыс мунісӧ Исусыс сьӧрӧ. 38Исусыс бергӧтчис, казяліс нійӧ да юаліс: «Мый тіянлӧ колӧ?» Мӧддэс юалісӧ Сылісь: «Велӧтісь, кытӧн Тэ олан?» 39Сія шуис: «Мунам, адззылат». Нія мунісӧ видзӧтны Сылісь оланінсӧ. Сэк вӧлі нёльӧт час гӧгӧр. Сійӧ лунсӧ нія чулӧтісӧ Сыкӧт.

40Ӧтыс, кӧда кыліс Иоансянь Исусыс йылісь висьталӧмсӧ да муніс Сы сьӧрӧ, вӧлі Ӧндрей, Симон-Петралӧн вон. 41Ӧндрейыс адззис ассис Симон вонсӧ да висьталіс: «Мийӧ адззим Мездӧтісьсӧ!» Мӧд моз кӧ шуны, сія лоӧ Кристос. 42Ӧндрейыс вонсӧ вайӧтіс Исусыс дынӧ. Исусыс видзӧтіс сы вылӧ да шуис: «Тэ Симон, Ионалӧн зон. Тэнӧ пондасӧ шуны Кифа». Кифа кывсӧ вуджӧтны кӧ, лоӧ «из», а мӧд моз «Петра».

Филипӧс Нафанаилкӧт корӧм

43Мӧд лунас Исус лӧсьӧтчис мунны Галилея муӧ. Сія панталіс Филипӧс да шуис: «Лок Ме сьӧрӧ». 44Филипыс вӧлі Вифсаида карись. Ӧндрей да Петра вӧлісӧ сэтчинісь жӧ. 45Филипыс адззис Нафанаилӧс да висьталіс: «Мийӧ адззим Сійӧ, Кӧда йылісь гижӧмась Моисейыс Туйдӧтас да Енсянь юӧртіссес. Сія Назарет карись Исус, Ӧсиплӧн зон». 46Нафанаилыс сылӧ шуис: «Вермас разь мыйкӧ бурыс петны Назаретісь?» Филип шуис: «Лок да видзӧт».

47Исусыс казяліс Сы дынӧ локтісь Нафанаилсӧ да висьталіс: «Эта былись Израились морт, оз ылӧтлы». 48Нафанаилыс юаліс Сылісь: «Кытісь Тэ менӧ тӧдан?» Исусыс сылӧ висьталіс: «Ме тэнӧ адззылі инжир пу увтісь. Сэтӧн тэ вӧлін Филипыс кортӧдз». 49Нафанаилыс Сылӧ шуис: «Велӧтісь! Тэ ─ Енлӧн Зон, Тэ ─ Израильлӧн Ӧксу#1:49 ӧксу ─ царь». 50Исусыс шуис сылӧ: «Тэ пондін веритны, кӧр Ме висьталі: "Ме тэнӧ адззылі инжир пу увтісь". Висьтала: тэ адззылан сысся унажык адззывлытӧм керӧммесӧ#1:50 адззывлытӧм керӧм ─ чудо». 51Сэтчӧ содтіс: «Тіянлӧ быльсӧ веськыта висьтала: ӧнісянь пондат адззыны осьта енӧжсӧ да Енлісь ангеллэсӧ, кӧдна лэдзчӧны Морт Зон дынӧ да кайӧны енӧжас».

Кана карын гӧтрасьӧм

Currently Selected:

Иоан 1: БЮ19

Highlight

Copy