Ап. керӧммез 15

1Антиокия вичкуӧ кынымкӧ морт локтісӧ Иудея муись. Нія велӧтісӧ: одӧ кӧ лоӧ пӧ вудныштыштӧмӧсь Моисейлӧн Туйдӧт сьӧрті, сэк одӧ вермӧ мезмыны. 2Павел да Варнава сувтісӧ нылӧ паныт, уна вермасисӧ мӧдмоза велӧтӧмныс кузя. Сэк Павелсӧ Варнаваыскӧт да ас колассиныс мукӧдсӧ иньдісӧ Ерусалимӧ. Сэтчин тшӧктісӧ эта йылісь баитны апостоллэзкӧт да вичкуын веськӧтліссезкӧт. 3Антиокия вичкусис веритіссес нійӧ кольлалісӧ. Финикия да Самария муэзӧт мунтӧн Павел да Варнава висьтасисӧ мӧдік отирлісь Енлань бергӧтчӧмнысӧ. Сія юӧрсянь веритіссес быдӧнныс ёна гажмисӧ.

4Ерусалимӧ локтӧм бӧрын вичкусис апостоллэс, веритіссес да веськӧтліссес бура панталісӧ нійӧ. Локтіссес висьтасисӧ ны пыр Енлісь керӧмсӧ. Нія висьтасисӧ, кыдз мӧдік отирлӧ Еныс осьтіс ыбӧссӧ веритӧмас. 5Сэк лэбтісисӧ мукӧд воннэз, кӧдна вӧлісӧ фарисейез. Нія баитісӧ: мӧдік отир коласісь веритіссесӧ пӧ колӧ вундыштыштны да тшӧктыны овны Моисейлӧн Туйдӧт сьӧрті.

6Апостоллэз да вичкуын веськӧтліссез ӧксисӧ баитны эта йылісь. 7Нія дыркодь баитісӧ. Сэк Петраыс чеччис да висьталіс нылӧ: «Воннэзӧ, тійӧ тӧдат: миян коласісь важынсянь ни Еныс бӧрйис менӧ висьтасьны Бур Юӧрсӧ мӧдік отирлӧ, медбы и нія кылісӧ да пондісӧ веритны. 8Мортлісь сьӧлӧмсӧ тӧдісь Ен козьналіс нылӧ Вежа Ловсӧ миянлӧ моз. Сідз Еныс мыччаліс: мӧдік отирыс Сылӧ туянаӧсь. 9Сія миянӧс ны дынісь немӧн эз янсӧт. Нылісь сьӧлӧммезнысӧ сӧстӧмтіс веритӧмныс пыр. 10Мый тійӧ ӧні Енсӧ лӧгӧтлат? Мӧдат велӧтчиссес вылӧ пуктыны сьӧкыт сийӧссӧ#15:10 сийӧс ─ хомут. Сійӧ нӧбӧтны айезнымлӧн и миян вынным эз тырмы. 11Мийӧ эд веритам: Дӧсвидзись Кристос Исуслӧн бурсетӧмсянь мийӧ мезмам. Миян моз и мӧдік отирыс мезмас».

12Сэк ӧксьӧммес лӧньсисӧ. Пондісӧ кывзыны Павелсӧ да Варнавасӧ. Нія висьтасисӧ, кытшӧм пассэз да адззывлытӧммез аркмӧтіс Еныс ны пыр мӧдік отир коласын. 13Нія дугдісӧ баитны. Сэсся пондіс баитны Яков. Сія висьталіс: «Воннэз! Кывзӧ менӧ. 14Симоныс#15:14 Симон ─ апостол Петралӧн мӧдік ним вежӧртӧтіс: Еныс ӧні медодззаись видзӧтӧм мӧдік отирыс вылӧ, медбы ны коласісь ӧктыны Аслыс отирсӧ. 15Енсянь юӧртіссезлӧн кыввезныс сэтшӧмӧсь жӧ. Гижӧм сідз:

16─ Сыбӧрын Ме берта

да лэбта Давидлісь усьӧм керкусӧ.

Лӧсьӧта сійӧ,

сэтісь разьсьӧмсӧ вились кера.

17Сэк пондасӧ кошшыны Дӧсвидзисьсӧ и мӧдік отирыс,

быдпӧлӧс йӧзыс.

Ме нійӧ шуа Аслам отирӧн.

Сідз баитӧ быдӧс Аркмӧтісь Дӧсвидзисьыс,

18Кӧда висьталіс эта йылісь кӧркӧсянь ни.

19Сійӧн ме и баита: оз ков сьӧкытсӧ тэчны быдпӧлӧс отир коласісь Ен дынӧ локтӧммез вылӧ. 20Нылӧ гижам: Ась озӧ сёйӧ киӧн керӧм еннэзлӧ вайӧмсянь сэрпӧсьмӧм сёян, вирись керӧм сёян да джагалӧм подалісь яй. Ась озӧ лэдзчисьӧ кыскасьны да отирлӧ озӧ керӧ сійӧ, мый аслыныс оз ков. 21Моисейлісь Туйдӧтсӧ висьтасиссес кӧркӧсянь эд эмӧсь быд карын. Быд шоччисян лунӧ сійӧ Туйдӧтсӧ лыддьӧтӧны синагогаэзын».

Воннэзлӧ гижӧт

22Сэк апостоллэс вичкуын веськӧтліссескӧт да ӧксьӧммескӧт баитчисӧ Антиокия карӧ ыстыны воннэзнысӧ. Нія ас колассиныс бӧрйисӧ Иудаӧс, шуны мӧд нимнас кӧ, Варсаваӧс, да Силаӧс. Воннэз коласын нія вӧлісӧ веськӧтліссез. Нійӧ ыстісӧ ӧтлаын Павелкӧт да Варнавакӧт. 23Гижисӧ да иньдісӧ ныкӧт сэтшӧм гижӧт: «Пым юӧр тіянлӧ! Мийӧ ─ апостоллэз, вичкуын веськӧтліссез да веритіссез ─ гижам Антиокияись, Сирияись да Киликияись воннэзлӧ, быд отирись веритіссезлӧ. 24Мийӧ кылімӧ: миянсянь локтӧммес мукӧдыс асланыс баитӧмӧн тіянӧс ӧштӧтӧмась, тӧждісьӧмӧдз воштӧмась. Нія баитӧмась, быдӧннытлӧ колӧ пӧ керны вундыштыштан пас да овны Моисейлӧн Туйдӧт сьӧрті. Сідз баитны нылӧ мийӧ эгӧ тшӧктӧ. 25Сэк мийӧ ӧксимӧ да баитчимӧ: бӧрйӧм морттэсӧ ыстім тіян дынӧ ӧтлаын Павел да Варнава дона ёрттэзнымкӧт. 26Павелыс да Варнаваыс эд ловнысӧ пуктӧны миян Дӧсвидзись Кристос Исус ним понда. 27Мийӧ ыстім Иудаӧс да Силаӧс. Нія сійӧ жӧ висьталасӧ тіянлӧ асьныс. 28Вежа Лолыслӧ да и миянлӧ оз ков тіян вылӧ унажык сьӧкытсӧ пуктӧмыс. Дзир эта колана: 29эд сёйӧ киӧн керӧм еннэзлӧ вайӧмсянь сэрпӧсьмӧм сёян, вирись керӧм сёян да джагалӧм подалісь яй. Видзсьӧ лэдзчисьӧм-кыскасьӧмись. Мӧдіккезлӧ эд керӧ сійӧ, мый аслыныт оз ков. Сідз кӧ пондат керны, бур лоас. Быдӧс бурсӧ тіянлӧ!»

30Ыстӧммес локтісӧ Антиокия карӧ. Ӧктісӧ веритіссесӧ да сетісӧ гижӧтсӧ. 31Мӧддэс лыддьӧтісӧ да велӧтӧмсяняс гажмисӧ. 32Иудаыс да Силаыс вӧлісӧ Енсянь юӧртіссез. Нія уна баитісӧ: воннэзнысӧ вынсьӧтісӧ да сьӧлӧммезнысӧ бурмӧтісӧ#15:32 сьӧлӧм бурмӧтны ─ удолетвориться, успокоить сердце. 33Иудаыс да Силаыс мымдакӧ олыштісӧ сэтӧн. Сэсся веритіссес нійӧ лӧнь олан вылӧ бласлӧвитӧмӧн бӧр ыстісӧ апостоллэз дынӧ. 34Силалӧ юрас пырис кольччыны сэтчин, а Иуда бертіс Ерусалимӧ. 35Павел да Варнава олісӧ Антиокия карын. Нія мӧдік веритіссезкӧт унакӧт велӧтісӧ да висьтасисӧ Дӧсвидзисьлісь Кывсӧ.

Павеллӧн Варнавакӧт янсӧтчӧм

36Чулаліс мымдакӧ кад. Павелыс шуис Варнаваыслӧ: «Мунам каррезӧт, кытӧн висьтасим Дӧсвидзисьлісь Кывсӧ, пантасьлам воннэзнымкӧт да видзӧтам нылісь олансӧ». 37Варнаваыс сьӧрас мӧдіс босьтны Иоанӧс, шуны мӧд нимнас кӧ, Маркӧс. 38Сія кӧркӧ янсӧтчис ны дынісь Памфилияын, эз мун ӧтлаын сетӧм удж вылӧ. Сійӧн Павелыс Иоансӧ эз мӧд босьтны сьӧраныс. 39Сідз Иоаныс кузя Павел да Варнава лӧгасисӧ да янсӧтчисӧ. Варнаваыс босьтіс Марксӧ да сыкӧт уйис Кипрӧ. 40А Павелыс сьӧрас босьтіс Силаӧс. Воннэз сетісӧ Павелсӧ бурсӧ сетан Ен киӧ, и сія Силаыскӧт иньдӧтчис. 41Нія мунісӧ Сирия да Киликия муэзӧт. Сэтчин вичкуэзісь веритіссесӧ вынсьӧтісӧ-велӧтісӧ.

Павеллӧн Тимофейкӧт пантасьӧм

Currently Selected:

Ап. керӧммез 15: БЮ19

Highlight

Copy