Лука 18

18 бетӀер

Къоролалъулги къадиясулги мисал

1Цинги ГӀисаца жиндирго муридазда, мисал бачун, бицана Аллагьасда гьардезе ккеялъул ва хьул къотӀизе бегьунгутӀиялъул хӀакъалъулъ хабар.

2– Цо шагьаралда вукӀун вуго Аллагьасукьаги хӀинкъуларев гӀадамазукьаги нечоларев цо къади. 3Гьебго шагьаралда йикӀун йиго цо къоролайги. Гьей щибаб къойил ячӀуней йикӀун йиго гьев къадиясухъе цо пуланав жиндир дагӀбадуласдаса жий цӀунеян. 4Амма къади гӀемераб мехалъ разилъун гьечӀо. Ахирги цо къоялъ гьес пикру гьабун буго: «Я Аллагьасукьа хӀинкъуларо дун, я гӀадамазукьа нечоларо. 5Амма гьадай къоролалъ дие рахӀат толеб гьечӀелъул, дица гьелъул къваригӀел тӀубан лъикӀ, гурони – гьелъ, нахъаса къотӀичӀого гьание хьвадун, дир бетӀер сверизабила».

6Бихьулищ Аллагь рикӀкӀунарев къадиясулгицин ккараб пикру? – ян абуна ГӀисаца гьезда. – 7Къасиги къадги жиндир цӀобалде хьул лъун, гьари-дугӀаялда жинде ахӀделел ругел тӀаса рищарал лагъзал Аллагьасги цӀуниларищ? Гьезул мурад тӀубазабизе кватӀилищ гьев? 8Дица нужеда абулеб буго: гьес гьел хеккого цӀунила. Амма ГӀадамил Лъимер вачӀараб мехалъ, божи-иман батиладай гьесда гьаб ракьалда?

Магъало бакӀарулев чиясулги фарисеясулги мисал

9Цоги ГӀисаца, мисал бачун, бицана жалго вализабийиланги чӀун, цогидал къабихӀ гьарулел цо-цо гӀадамазул хӀакъалъулъ гьадинаб хабар:

10– Аллагьасе дугӀаялъе Мукъадасаб Рокъове лъугьун вуго кӀиго чи: магъало бакӀарулев чиги фарисеявги. 11Жиндирго бакӀалда вахъун чӀун, фарисеяс рекӀелъ дугӀа гьабун буго: «Я, дир Аллагь! Дуе рецц буго дун цогидазда релълъарав вижичӀелъул; хъачагъазда, макручагӀазда, зиначагӀазда, хӀатта гьав магъало бакӀарулев чиясда релълъарав гьечӀелъул. 12Анкьида жаниб кӀиго къоялъ кӀал ккола дица, дие щварабщиналъул хайиралъул анцӀил бутӀа садакъаде кьола». 13Магъало бакӀарулев чийин абуни дова нахъегӀан чӀун вукӀун вуго, берал зодихъе руссинаризецин намуслъун. Амма, керенги бухулаго, абулеб букӀун буго гьес: «Я, дир Аллагь! Мунагьазул цӀурав дида гурхӀа!» – абун. 14Дица нужеда абулеб буго: дов фарисеясда данде ккуни, гьев магъало бакӀарулев чи Аллагьасда цеве цӀикӀкӀунго вацӀцӀалъун тӀадвуссана жиндирго рокъове. Жинцаго живго тӀадегӀанлъизавурав гӀодовегӀанлъула, живго гӀодовегӀанго чӀарав тӀадегӀанлъичӀого хутӀуларо.

ГӀисахъе лъимал рачун рачӀуна

15ГӀисинал лъималги рачун рачӀунаан ГӀисахъе, гьезда тӀад квер бахъеян гьарун. Муридазда гьеб бихьидал, гьез гьел риччалел рукӀинчӀо. 16Амма ГӀисаца, лъималги аскӀоре ахӀун, муридазда абуна:

– Риччанте лъимал дихъе рачӀине, гьезие квекӀен гьабуге. Гьединазейин Аллагьасул ПарччахӀлъи щун бугеб! 17ХӀакълъун абулеб буго дица нужеда: Аллагьасул ПарччахӀлъи лъимаца гӀадин къабул гьабичӀев чиясе гьенибе нух гьечӀо.

Аллагьасул ПарччахӀлъиги инсанасул бечелъиги

18Цо кӀудияв хӀакимас ГӀисада гьикъана:

– Я, лъикӀав МугӀалим! Абадияб рукъалъул бутӀа щвеялъе щиб дица гьабизе кколеб?

19ГӀисаца гьесда абуна:

– Щай дуца дида лъикӀавилан абулеб? Щивниги лъикӀав вукӀунаро, цохӀо Аллагь гурони! 20Дуда лъалагури Аллагьасул амруял: «зина гьабуге», «чи чӀваге», «цӀогьодуге», «гьересинугӀлъи гьабуге», «эбел-инсул адаб-хъатир гьабе».

21Гьес ГӀисада абуна:

– ГӀолохъанаб мехалдасаго тӀуразарулел руго дица гьел амруял.

22ГӀисаца абуна:

– Цо жо буго дуе камун. Дурго бугеб кинабго боцӀи-рикъзи биче ва мискин-пакъирасе садакъаде кье, гьелъухъ дуе насиблъила зобалазул хазина. Цинги дихъе вачӀа, дида цадахъ вилълъине.

23Гьеб рагӀидал, дов чи цӀакъ пашманлъана. Гьев вукӀун вуго кутакалда бечедав чи. 24Гьесухъ валагьун ГӀисаца абуна:

– Бечедав чиясе Аллагьасул ПарччахӀлъиялде лъугьине захӀмалъулеб куц! 25РукӀкӀадул ролъиялъусан лъугьине вараниялъего бигьа букӀина Аллагьасул ПарччахӀлъиялде ворчӀизе бечедав чиясеялдаса.

26Гьесухъ гӀенеккун рукӀараз гьикъана ГӀисада:

– Гьедин батани, хвасарлъизе кӀолев чигӀаги щивдайха?

27Гьес жаваб кьуна:

– Инсанасда кӀоларебги Аллагьасда кӀола, – ян.

28Пётрица абуна:

– Гьале нижерго бугебщинабги рехун тун, ниж дуда хадур рилълъана…

29ГӀисаца гьезда абуна:

– ХӀакълъун абулеб буго дица нужеда: Аллагьасул ПарччахӀлъиялъе гӀоло мина-рукъги, лъимал-хъизанги, вацал-яцалги, эбел-эменги рехун тарав цониги чи хутӀизе гьечӀо, 30гьелъухъ гьаб заманаялда гӀемерго цӀикӀкӀараб шапакъат щвечӀого, ва ахираталъул рокъоб абадияб гӀумру насиблъичӀого.

ГӀазаб-гӀакъубаялъул хӀакъалъулъ – лъабабизеги

31Жиндирго анцӀила кӀиявго муридги аскӀове ахӀун, ГӀисаца абуна:

– Гьале нилъ Иерусалималде унел руго. ГӀадамил Лъимадул хӀакъалъулъ цебеккунго Аллагьас аварагзабазда лъазабун букӀараб хӀукму тӀубала гьениб. 32Гьев цогидаб халкъалъул гӀадамазда кодове кьела, гьезги инжит-хӀакъир гьавила, тӀаде тударила, 33вухила-кьабила, цинги чӀвала ва хун лъабабилеб къоялъ гьев чӀаголъила.

34Амма гьезда щибниги бичӀчӀичӀо. Гьел рагӀабазул магӀна босизе бажаричӀо гьезухъа. Сундул хӀакъалъулъ бицунеб бугебали лъачӀо гьезда.

Иерихоналде щолаго, ГӀисаца цо бецав чи сахлъизавула

35Иерихон шагьаралде щолаго, цо бецав чи ватана нухлул ракьанда кӀусун гьарделев. 36ГӀадамазул руккел аскӀосан унеб рагӀидал, щиб ккарабилан гьикъана гьес. 37Гьесда бицана Назареталдаса ГӀиса вугин гьанисан вачӀунев. 38Гьебмехалъ гьардухъан ахӀдана:

– Я, Давудил вас ГӀиса! ГурхӀа мун дида!

39Гьесда цересан унел гӀадамазе бокьун букӀана гьардухъан вуцӀцӀун чӀезавизе. Амма гьес дагьабги гьаракь борхун ахӀана:

– Я, Давудил вас! ГурхӀа дида! – ян.

40Гьенив лъалхъун, ГӀисаца абуна гьев жинда аскӀове вачеян.

41– Дица щиб гьабизе дуе бокьун бугеб? – абун гьикъана гьесда ГӀисаца.

Дос абуна:

– Я, БетӀерчӀахъад! Беразда нахъеги канлъи бихьизе бокьун буго!

42ГӀисаца гьесда абуна:

– Валагье гьанже! Дурго божи-иманалъ сахлъизавуна мун.

43ГьебсагӀат канлъи бихьун, ГӀисада цадахъ вилълъана гьев, Аллагьасе реццги гьабулаго. Гьеб бихьун, киналго гӀадамалги Аллагьасе рецц гьабизе лъугьана.

Currently Selected:

Лука 18: АварАК

Highlight

Copy