Иоанн 4

4 бетӀер

ГӀисалги самариялъулги гара-чӀвари

1-3Фарисеязда рагӀана ЯхӀяхъеялдаса цӀикӀкӀун гӀадамал лъадалъ ччун рахъизе ГӀисахъе унел ругилан. (ХӀакъикъаталдайин абуни, жинцаго ГӀисаца гьабулароан гьеб иш, муридаз гьабулаан.) Гьеб лъайдал ГӀиса Ягьудиялдаса тӀадвуссун Галилеялде ана. 4Самариялъул ракьалдасан ине кколаан гьел. 5Якъуб аварагас жиндирго вас Юсупие кьураб хуралда аскӀоб бугеб Сихар абулеб Самариялъул цо шагьаралде щвана. 6Якъубилго букӀараб цо гъуялъухъе щведал, сапаралда свакарав ГӀиса гьенив гӀодов чӀана. Гьеб букӀана къалъул гӀуж. 7Цо самарияй ячӀана гъуялъуса лъел цӀезе.

– Гьекъезе лъим кье, – ян абуна гьелда ГӀисаца. 8(Гьесул муридал квен-тӀехалда хадур шагьаралде ун рукӀана.)

9Самариялъ гьесда абуна:

– Мун жугьутӀавлъидал, дуца дида – Самариялъул гӀаданалда – лъим гьаризе бегьилищ? (ЖугьутӀазги самариязги хӀатта цо гулгун-парччиялъусан лъимцин гьекъолароан.)

10ГӀисаца гьелда абуна:

– Аллагьасдасан насиблъулеб сайигъатги лъалебани ва лъим кьейилан дуда гьарулев вугев чи щивалиги лъалебани, дуцаго гьарилаан гьесда лъим кьейилан, ва гьес дуе кьелаан чӀаголъиялъул лъим.

11Гьей гӀаданалъ ГӀисада абуна:

– Я, бетӀерчӀахъад, духъ гел гьечӀогури, гьаб гъуйги гъваридаб буго. Киса дуе чӀаголъиялъул лъим щвезе бугеб? 12Нилъер кӀудияв эмен Якъубидасаги кутакав чийищха мун? Гьесдасан нижее ирсалъе хутӀараб гьаб гъуялъуса лъим гьесги гьекъолаан, гьесул лъималазги гьекъолаан, гьесул боцӀи-панзалъги гьекъолаан.

13ГӀисаца абуна:

– Гьаб гъуялъуса лъим гьекъарав чи нахъеги къечола. 14Амма дица кьураб лъим гьекъарав чи абадул абадиялъ къечезе гьечӀо. Дица кьураб лъим гьесул рекӀелъ иццлъун лъугьина. Гьеб иццул лъадал чвахиялъ абадияб гӀумру насиблъизабула.

15Гьей гӀаданалъ ГӀисада абуна:

– Дие кье, бетӀерчӀахъад, гьеб лъим. ТӀокӀай дун киданиги къечеларо ва гьание лъел цӀезе ячӀине ккеларо.

16Дурго росги вачун ячӀайилан абуна ГӀисаца гьелда. 17Жиндир рос гьечӀилан абуна гьелъ. ГӀисаца гьелда абуна рос гьечӀилан абураб рагӀи дур битӀараб бугилан. 18Щуго рос вукӀана дур. Амма гьанже вугев чи дур рос кколаро, гьеб цӀакъ битӀун абуна дуца. 19Гьей гӀаданалъ абуна:

– Мун авараг вукӀин бихьулеб буго, бетӀерчӀахъад, дида. 20Нижер умумул гьаб магӀарде рахунаан Аллагьасе тӀагӀат-гӀибадаталъе. Нужер жугьутӀаз абулеб буго тӀагӀат-гӀибадаталъе Иерусалималде рачӀине кколилан.

21– Мун дида божа, – ян абуна ГӀисаца гьелда. – Цо заман бачӀина Инсуе суждаялда чӀезе я гьаб магӀарде рахине кколареб, я Иерусалималде ине кколареб. 22Нужеда лъаларо лъие нужеца сужда гьабулеб бугебали. Нижер жугьутӀазда лъала лъие сужда гьабулеб бугебали, гӀаламалъе хвасарлъи жугьутӀазда гьоркьосан бачӀунелъул. 23Цо заман бачӀина хӀакълъунго Аллагьасда божулел гӀадамаз хӀакъаб нухдасан ун, Илагьияб РухӀалдалъун Инсуе сужда гьабулеб. БачӀунго буго гьединаб заман. Гьединал божулел чагӀи ралагьулел руго нилъер Инсуца. 24Аллагь – гьев ккола РухӀ. Гьединлъидал хӀакъаб нухдасан ун, РухӀалдалъун гьабизе ккола гьесие сужда.

25Гьей гӀаданалъ абуна:

– Дида лъала Христосилан абулев МасихӀ вачӀине вукӀин. Гьев вачӀараб мехалъ, гьес бицина нижеда кинабго.

26ГӀисаца гьелда абуна:

– Гьанив дуда кӀалъалев вугев дун ккола гьев.

27Гьебмехалъ тӀаде щварал ГӀисал муридал гӀажаиблъана самариялда гаргадилев гьев ватидал. Амма гьесда лъицаниги гьикъичӀо щиб дуе къваригӀун букӀарабилан, щиб бицун мун гьелда гаргадулев вугевилан. 28ГӀеретӀги гьениб тун, шагьаралдеги ун, дой гӀаданалъ гӀадамазда абуна:

29– Рилълъа, нужедаго цо чи вихьизе. Гьес бицана дир гӀумруялда жаниб ккарабщинаб жо. МасихӀцин гуродай дов?

30Гьев вихьизе ине къватӀире рахъана шагьаралъул гӀадамал.

31Гьел тӀаде щвелалде, муридаз ГӀисада абуна:

– Кванай, МугӀалим, – ан.

32Гьес гьезда абуна:

– Нужеда лъалареб квен буго дихъ, – ан.

33Цо лъицаниги квенциндай гьасие бачӀарабилан гаргадизе лъугьана гьел. 34ГӀисаца гьезда абуна:

– Дир квен ккола дун витӀарав Аллагьасул амру тӀубазаби ва гьесул иш рагӀалде бахъинаби. 35Нужеца абила хур лъилъизе жеги ункъониги моцӀ хутӀун бугилан. Гьале дица нужеда абулеб буго: лъикӀго бер щвезабе хурзабахъе, хӀалухъен тӀогьиллъун буго ва гьеб лъилъизе заман щун буго! 36Лъилъарухъанасе лъикӀаб мухьги щвела ва абадияб гӀумруялъе бачӀинги бакӀарила. Бекьаравги лъилъаравги – кӀиявго – вохила гьелдаса. 37ЦӀакъ битӀараб кици буго, цояс бекьулин, цогидас лъилъулин абураб. 38Дица нуж ритӀула нужецаго бекьичӀеб хур лъилъизе. Цогидаз захӀмат баччун гӀезабураб хӀалухъеналдаса пайда босула нужеца!

39Жиндир гӀумруялда жаниб ккарабщинаб жо лъанин гьесдайилан дой гӀаданалъ бициндал, гьеб шагьаралдаса гӀезегӀанго самариял божана ГӀисада. 40Гьесда тӀаде щведал, самарияз ГӀисада гьарана жидер шагьаралда чӀайилан. КӀиго къо бана гьес гьениб. 41ГӀисал рагӀабазухъ гӀенеккидал, дагьалги цӀикӀкӀана гьесда божулел гӀадамал. 42Гьез дой гӀаданалда абуна дуца бицаралдалъун гурин ниж гьанже божарал, нижедаго рагӀаралдалъун божанилан ва хӀакълъунго гӀалам хвасар гьабизе вачӀарав чи гьев вукӀиналда ракӀги чӀанилан.

ГӀисаца цо хӀакимасул вас сахлъизавула

43КӀиго къоялдасан ГӀиса гьениса Галилеялде ана. 44ГӀисаца абун букӀана жиндирго инсул ракьалда аварагасул къадру-къимат гьабуларилан. 45Амма Галилеялде щведал, роха-хинлъун къабул гьавуна ГӀиса гӀадамаз. Гьелги рукӀиндал дора Иерусалималда доб байрамалда, гьездаги рихьидал дора гьесдасан загьирлъарал мугӀжизатал.

46Нахъеги ГӀиса ана гьес лъим чагъиралде сверизабураб Галилеялъул доб Кана шагьаралде. Гьенив вукӀана парччахӀасул хӀакимлъун вугев цо чи. Гьесул вас вукӀана Капернаум шагьаралда захӀматго унтун. 47ГӀиса Ягьудиялдаса Галилеялде тӀадвуссун вугилан рагӀидал, гьесда аскӀове вачӀана дов чи, хвалде ккун унтун вугев жиндир вас сахлъизавизе жинда цадахъ Капернаумалде вилълъайилан гьаризе. 48ГӀисаца гьесда абуна:

– МугӀжизаталги гӀаламаталги рихьизаричӀони, божуларел гӀадамал руго нуж!

49ПарччахӀасул хӀакимас гьесда абуна:

– Я, бетӀерчӀахъад, дир вас хвелалде вилълъа.

50ГӀисаца гьесда абуна:

– Дурго рокъове а гьанже. Дур вас хвезе гьечӀо, – ян.

ГӀисал гьеб рагӀудаги божун, нахъе ана гьев чи. 51Нухдаго данде ккана вас сахлъанилан бицине рачӀунел рагьтӀателал. 52Кида гьев сахлъаравилан гьас гьикъидал, рагьтӀателаз абуна къалъудаса сагӀат араб мехалъ васасул цӀа-кан бичанилан. 53ХӀисаб гьабураб мехалъ, битӀун гьеб заманаялда абун батана ГӀисаца гьесда дур вас хвезе гьечӀилан. Гьелдаса нахъе гьесги гьесул рукъалъул агьлуялъги иман лъуна. 54ГӀиса Ягьудиялдаса Галилеялде тӀадвуссаралдаса хадуб загьирлъараб кӀиабилеб мугӀжизат букӀана гьеб.

Currently Selected:

Иоанн 4: АварАК

Highlight

Copy