Иоанн 17

17 бетӀер

ГӀисаца муридазе дугӀа гьабула

1Муридазе гьеб хабар бицун бахъарабго, зобалаздеги валагьун, ГӀисаца абуна:

– Я, дир Эмен! Дир болжал тӀаде щвана. Дурго Вас машгьурлъизаве, гьес мунги машгьурлъизавизе. 2ТӀолабго гӀаламалда тӀад ихтияр кьуна дуца гьесие, дуца жиндихъе кьуралщиназе Васас абадияб гӀумру насиблъизабизе. 3Абадияб гӀумру ккола ХӀакъав ва Цогояв Аллагь мунги ва дуца витӀарав МасихӀ ГӀисаги лъай. 4Дуца тӀадкъараб ишги тӀубазабун, дица гьаб ракьалда мун машгьурлъизавуна. 5Я, дир Эмен! Гьаб дуниял бижилелдего, дун дуда аскӀов вукӀараб мехалъ, дир букӀараб машгьурлъиялдалъун машгьурлъизаве гьанжеги дуца дун. 6ГӀаламалда гьоркьоса дуца дихъе кьурал гӀадамазе рагьана дица дур цӀаралъул хӀакъикъат. Гьел дур рукӀана, цинги гьел дуца дихъе кьуна ва гьел дур рагӀухъ гӀенеккана. 7Гьанже гьезда лъана дуца дие кьурабщинаб дудасан бугеблъи. 8Дуца дихъе кьурал рагӀаби дица гьезие кьуна, гьез гьел къабулги гьаруна. ХӀакълъунго гьезда бичӀчӀана дун дудасан вачӀарав вукӀин ва дун дуца витӀун вукӀиналдаги божана. 9Гьезие гӀоло гьарулеб буго дица дуда. Дуниялалда ругел киналго гӀадамазе гӀоло гуреб, дуца дихъе кьуразе гӀолойин, гьел дур ругелъул. 10Дир ругелщинал дур руго, дур ругелщинал дирги руго. Гьезулъги машгьурлъана дун. 11Дун гьанже гьаб дуниялалда вукӀинаро, амма гьалги гьаб дуниялалда тун вачӀунев вуго дун духъе. Я, дир Илагьияв Эмен! Нилъ цого ругел гӀадин, гьелги цого рукӀинаре, дуца дие кьураб дур цӀаралдалъун. 12Дун гьезда цадахъ вугеб мехалъ, дица гьел хвалде ине риччачӀого цӀунана дуца дие кьураб дур цӀаралдалъун. Цо чи хутӀизегӀан цӀунана. Гьев хвалде ана, гьелъул хӀакъалъулъ ТӀехьалда хъвараб ритӀухълъизе кколеб букӀиндал. 13Гьанже дун духъе вачӀунев вуго. Дун дуниялалда вугебгӀан заманаялъ дица гьаб гьазда бицунеб буго, дидаса бугеб гьазул рохел тӀаса камунгутӀизе. 14Дица дур рагӀи гьазухъе кьуна ва гьаб гӀаламалда рихана гьал, дун гьаб дуниялалъул чи гурев гӀадин, гьалги гьаб дуниялалъул чагӀи гурелъул. 15Гьаб гӀаламалда гьоркьоса гьал нахъе рачейилан гуро гьарулеб бугеб, гьанир гьал илбисалдаса цӀунеян гьарулеб буго дица. 16Дун гьаб дуниялалъул чи гурев гӀадин, гьалги гьаб дуниялалъул чагӀи гуро. 17ХӀакъаб къудраталдалъун дуца гьал дуе хъулухъалъе ратӀа гьаре. Дур рагӀи хӀакъаб буго. 18Дуца дун гӀаламалъухъе витӀарав гӀадин, дица гьалги гӀаламалъухъе ритӀулел руго. 19Дуе хъулухъалъе дуца дун ватӀа гьавуна, хӀакъаб къудраталдалъун гьалги ратӀа гьаре.

20ЦохӀо гьазул рахъалъ гуребги, гьазул рагӀудалъун диде иман лъезе бугелщиназул рахъалъги гьарулеб буго дица: 21Я, дир Эмен, гьал цолъун рукӀаги мун дилъ вугев гӀадин, – дун дулъ вугев гӀадин, гьалги нилъелъ рукӀине риччанте, – дун дуца витӀун вукӀиналда гӀалам божизе. 22Дуца дие кьураб машгьурлъи дица гьазиеги кьуна. Дунги Мунги гӀадин цолъун рукӀине риччанте гьалги. 23Дун гьазулъ вукӀина, мун дилъги вукӀина, риччанте гьал тӀубанго цоцалъ цолъун рукӀине ва гьелдалъун гӀаламалда лъазе дун дуца витӀун вукӀаравлъиги ва дун гӀадин дуе гьал рокьулеллъиги. 24Я, дир Эмен! Гьанир дуца дихъе кьурал гӀадамал гьенирги дида аскӀор рукӀине бокьун буго дие. Дуниял бижилелдего вокьулев вукӀиндалха дуе дун. Дуца дун машгьурлъизави гьазда бихьизе. 25Я, дир РитӀухъав Эмен! ГӀаламалда мун лъачӀо, амма дида лъала мун, гьаздаги лъана дун дуца витӀаравлъи. 26Дур хӀакъалъулъ рагьун бицана дица гьал гӀадамазда, хадубккунги бицина, дуца дие кьураб рокьи гьазиеги гӀахьалаб букӀине ва дун гьазулъ хутӀизе.

Currently Selected:

Иоанн 17: АварАК

Highlight

Copy