Байбихьи 18
18
Лъабго гьобол
1Бакъ бухӀараб къалъул гӀужалда, Мамрел миккил гъутӀби ругеб бакӀалда, жиндирго чадиралъул рагьдухъ гӀодов чӀун вукӀарав Ибрагьимие загьирлъана БЕТӀЕРГЬАН. 2БетӀер борхун валагьидал, Ибрагьимида вихьана лъабго чи. Гьезда дандеги вортун, ракьалда нодо чӀван гӀодовеги къулун, 3гьес абуна:
«Я БетӀергьан, бегьулеб батани, дур лагъасда рещтӀинчӀого унге. 4Нужер хӀатӀал чуризе гьабсагӀат лъимги бачӀина ва гьаб гъотӀода гъоркь нужеца хӀалхьиги гьабила. 5Дицайин абуни, нужее квен-тӀех хӀадурила, сапаралда нужер хӀал дагьлъичӀого букӀине. Дида – нужер лагъасда – аскӀосан унеллъидалха нуж ругел».
«ЛъикӀ буго, – ян абуна гьез гьесда. – Дуцаго абухъе гьабе».
6Векерун чадиралда жанивеги ун, Ибрагьимица Сарада абуна:
«Бищунго лъикӀаб ханждал цо къалиги буцун, хехго чед беже».
7Цинги гьев векерана жиндирго рехьед бугеб бакӀалде, ва кьарияб тӀаса бищун бечеги бачун, лагъасда лъазабуна, хехго гьебги хъун, гьан хӀадуреян. 8Хадуб Ибрагьимица жинцаго босун, гьалбадерида цебе лъуна хӀанги, рахьги, бачил гьанги ва, гьел кванан рахъинегӀан, гъотӀода гъоркь вахъун чӀана.
9«Дур лъади Сара кий йигей?» – ян гьикъана гьез Ибрагьимида.
«Гьаний чадиралъуй йиго», – ян жаваб кьуна гьес.
10«Дун ичӀго моцӀидасан тӀадвуссина гьаниве, – ян абуна гьезул цояс. – Гьебмехалда дур лъади Сарал вас вукӀине вуго».
Чадиралъул кӀалтӀа, гьесда нахъа чӀун, гӀенеккун йикӀана Сара.
11Гьел кӀиялго – Ибрагьимги Сараги – рукӀана церего гӀолохъанлъиялдаса арал, херал чагӀи. Руччабазул хӀайиз бачӀинги къотӀун букӀана Сарал. 12Гьединлъидал релъи бачӀун, гьелъ пикру гьабуна: «Гьанже дун тӀуян херлъараб мехалъ гьединаб рохел щвеларищха дие! Дир бетӀергьанчиги херлъун вугелъул», – абун.
13Амма БЕТӀЕРГЬАНАС Ибрагьимида абуна:
«Щай дур лъади Сара елъанхъулей йигей, жинца, херай гӀадамалъ, лъимер кин гьабулебиланги абун? 14БЕТӀЕРГЬАНАСДА хӀалкӀолареб щибниги жо бугебищ? Дица абураб заманалда, ичӀго моцӀидасан, тӀадвуссине вуго Дун духъе, гьебмехалда Сарал кодов вас вукӀине вуго».
15«Дун елъанхъичӀо», – ян гьереси бицана хӀинкъарай Сараца.
«Гуро, – ян абуна Гьес гьелда. – Мун елъанхъана».
Содомалда гурхӀайилан Ибрагьимица гьари
16Жидерго нухда ине тӀаде рахъана гьел чагӀи. Цинги гъоре расалъуде, Содомалъул рахъалдехун ралагьана. Ибрагьим гьел тӀоритӀизе гьезда цадахъ вилълъана. 17Цинги БЕТӀЕРГЬАНАС абуна:
«Дида ракӀалда бугеб жо Ибрагьимидаса балъго гьабилищ Дица? 18Ибрагьимидасан лъугьине бугелъулха кӀудияб ва гучаб халкъ. Дунялалъул киналго къавмазе баракатги щвезе бугелъул Ибрагьимидасан. 19Дица тӀаса вищана Ибрагьим, БЕТӀЕРГЬАНАСУЛ нухдасан хьвадейилан, ритӀухъго ва хӀалалго гӀумру гьабейилан жиндирго лъималазеги жиндасан лъугьарал наслабазеги гьес амру гьабизе; ва БЕТӀЕРГЬАНАСГИ тӀубазабила Ибрагьимие рагӀи кьун букӀарабщинаб».
20Цинги БЕТӀЕРГЬАНАС абуна:
«Содомалъул ва Гоморраялъул халкъалъул квешлъиялъул хӀакъалъулъ кутакал гьаркьал рагӀулел руго Дида – гӀасиял мунагьал гьарулел руго гьез. 21Гьеб кинабго Дихъе бачӀараб квешаб ахӀи битӀараб бугищали хал гьабизе гьезухъе рещтӀина Дун. Гьедин бугищ яги гьечӀищали гьелъул хал гьабила».
22Содомалъул рахъалдехун сверун ана гьел чагӀи. Амма БЕТӀЕРГЬАН Ибрагьимида аскӀов чӀовухъе вукӀана. 23Цинги, Гьесда аскӀовегӀан къан, Ибрагьимица абуна:
«Квешал чагӀазда цадахъго божи-иманалъул чагӀиги хвезарилищха Дуца? 24Нагагь гьеб шагьаралда ватани кӀикъоялда анцӀго муъминав чи, гьев кӀикъоялда анцӀгоясе гӀологӀаги гурхӀел-цӀоб гьабичӀого, гьеб шагьар тӀагӀине гьабилищха Дуца? 25Гьединаб жо Дуца гьабуларелъулха! Квешазда цадахъ лъикӀал чагӀиги хвезариларо, ритӀараздеги тӀекъаздеги цого жаза рещтӀинабиларо. Гьединаб жо букӀине рес гьечӀо! ТӀолабго дунялалъул Диванчияс ритӀухъаб диван къотӀиларищха».
26Цинги БЕТӀЕРГЬАНАС жаваб кьуна:
«Содомалда Дида кӀикъоялда анцӀго муъминчи ватани, гьезие гӀоло Дун гьеб шагьаралда гурхӀила».
27Гьебмехалда нахъеги Ибрагьимица абуна:
«Дун Дуда цеве зарра вуго, хӀур вуго, бугониги дир БетӀергьанасда кӀалъазе дица таваккал тӀамила: 28кӀикъоялда анцӀго гӀезе щуго камурав муъминчи гьенив ватани, гьев щугояв камунилан, Дуца тӀубараб шагьар пасалъизабилищха?»
Цинги БетӀергьанас абуна:
«КӀикъоялда щуго муъминчи гьенив ватани, Дица гьеб пасалъизабиларо».
29Ибрагьимица нахъеги гьикъана:
«Нагагь кӀикъого гурони муъминчи гьенив ватичӀони?»
Цинги БетӀергьанас жаваб кьуна:
«КӀикъого ватаниги, пасалъизабиларо Дица гьеб».
30Ибрагьимица абуна:
«Дица абуралда ццин бахъунгеха дир БетӀергьанасул: нагагь гьенив лъеберго гурони муъминчи ватичӀони?»
Цинги БетӀергьанас жаваб кьуна:
«Гьенив лъеберго муъминчи ватани, гьеб шагьаралда Дун гурхӀила».
31Ибрагьимица абуна:
«Гьале дица Дир БетӀергьанасда гьикъулеб буго: къого гурони ватичӀони?»
Цинги БетӀергьанас жаваб кьуна:
«Къогоясе гӀологи Дун гурхӀила гьеб шагьаралда».
32Ибрагьимица абуна:
«Дир БетӀергьанасул ццин бахъунгеха, ахирисеб нухалъги кӀалъалин: гьенив анцӀго гурони муъминчи ватичӀони?»
Цинги БетӀергьанас жаваб кьуна:
«АнцӀгоясе гӀологи гьеб шагьар тӀагӀинабиларо».
33Гьединги абун, БЕТӀЕРГЬАН гьесда цевеса нахъе ана. Ибрагьимги рокъове тӀад вуссана.
Currently Selected:
Байбихьи 18: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
