Къанун 33
33
Мусал баракаталъул дугӀа
1Гьале Мусаца живго хвелалде цебе ГӀизраилил наслабазе гьабураб баракаталъул дугӀа.
2Гьес абуна:
«БЕТӀЕРГЬАН Синаялдаса загьирлъана,
Сеиралда тӀад Гьесул нур гвангъана,
Параналда Гьесул канлъи къалъана,
зобалазул анцӀ-анцӀ азарилал боялгун Гьев вачӀиндал;
Гьесул кваранаб рахъалдасан рурудулеб цӀаги!
3ХӀакъикъаталдаги Дуе Дурго халкъ (ГӀизраил) хирияб буго!
Божи-иманалъул агьлу Дур хъатикь буго!
Гьел киналго Дуда цере накабазда чӀола
Дур насихӀатазухъги гӀенеккулаго.
4Мусаца гьезухъе кьураб Къанун
Якъубил халкъалъул ирслъун ккола.
5ГӀизраилалъул тӀолабго халкъги гьезул къавмазул бутӀрулги
мажлисалде ракӀарараб мехалда,
Ешуруналъул ПарччахӀлъун лъугьана Гьев.
6Рувимил наслаби лъугӀугеги, гьезие гӀумру кьеги,
гьесул къавмалъул чагӀи дагьал рукӀаниги!»
7Ягьудал къавмалъул рахъалъ гьес гьадин абуна:
«Я БЕТӀЕРГЬАН, Ягьудал наслабазул ахӀи Дуда рагӀаги!
Гьел гьезул халкъгун цолъизаре.
Гьел жидерго къуваталдалъун тушманасда данде рагъула,
амма Дудасан буго гьезие кумек!»
8Левийил къавмалъул рахъалъ гьес гьадин абуна:
«Левийил наслаби – Дур божарал лагъзал,
Гьез цӀунула Туммимги Уримги.
Массаялда Дуца хӀалбихьана гьезул;
Мериваялъул иццухъ гьелгун вагъана#33:8 Масса ва Мерива – бал. Тархъ. 17:1-7 ва Тар. 20:1-13..
9Гьез эбел-инсул рахъалъ абула:
„Нижее кӀвар гьечӀо гьел эбел-эмен рукӀиналъул“, – ин;
вацазул гьурмахъ гьел ралагьуларо,
лъималазухъ гӀин тӀамуларо.
Щайин абуни, бищун кӀвар бугеблъун гьезие буго Дур амру тӀубазаби
ва Дур КъотӀи цӀуни.
10Гьез Якъубил наслабазда Дур нухалги,
ГӀизраилил халкъалда Дур Къанунги малъула.
Гьез Дуда цере гьуинмахӀал рухӀула,
Дур къурбан-бакӀалда тӀад цӀадул къурбанал лъола.
11Я БЕТӀЕРГЬАН, баракат лъе гьезда ва гьезул махщел-гьунар цӀикӀкӀинабе;
Гьез гьабулебщиналдаса Мун разилъаги!
Гьезул тушбабазул мугъ бекизабе,
ва гьел рихарал гӀодор ккезаре,
тӀокӀалъ тӀаде рахъунареб хӀалалъ!»
12Буняминил къавмалъул рахъалъ гьес гьадин абуна:
«Биччанте БЕТӀЕРГЬАНАСЕ хирияв
Гьесда аскӀов хӀинкъи гьечӀеб рахӀаталда вукӀине.
БЕТӀЕРГЬАНАС кидаго цӀунула гьев,
Жиндирго кӀигъуждузда тӀадеги вачун, хӀалхьи кьола гьесие».
13Юсупил къавмалъул рахъалъ гьес абуна:
«Я БЕТӀЕРГЬАН, Юсупил наслабазул ракьалде баракат рещтӀинабе:
тӀад зобалаздаса щуб базабе,
ракьулъа жанисан иццал чвахизаре,
14бакъ гӀун барщараб гьуинаб пихъ кье,
моцӀалдаса моцӀалде бугӀа-ролъ гьарзалъизабе!
15Гьезул некӀсиял мугӀруздаги батӀи-батӀияб хирияб нигӀмат бижаги,
гохӀал-щобаздаги пихъ гьарзалъаги,
16ракьалдаса хӀалухъен гьарзаго щваги,
зазил хъархъида гьоркьоса кӀалъарав БЕТӀЕРГЬАНАСУЛ цӀобалдалъун.
Гьеб кинабго кьеги Юсупил наслабазе,
вацазда гьоркьов жив тӀаса вищарасе.
17Гучаб оцода релълъуна Юсупил къуват,
гӀалхул бугъил лълъурдулин ккола гьесул васал.
Гьез халкъазда хӀункула,
дунялалъул рагӀалда ругездеги гӀунтӀула:
Ефраимил наслу – анцӀ-анцӀ азарго,
Манассил – аза-азарго».
18Зевулунил къавмалъул рахъалъ гьес абуна:
«Зевулунил наслаби, сапаралде рахъунелъул нуж разилъаги;
Иссахарил наслаби, нужерго чадразухъ нужги рохаги.
19Гьез магӀарде жидехъего къавмал ахӀула
ва гьенир рацӀцӀадал къурбанал гьарула.
Ралъдал бечелъиялъ хьихьула гьел,
ралъдал салудаса хайир босула».
20Гадил къавмалъул рахъалъ гьес гьадин абуна:
«Гадил наслабазул ракь гӀатӀид гьабурасе баракат щваги!
Гьел релълъуна парахатго гӀодоб бегараб гъалбацӀалда,
тохлъукье тӀадги речӀчӀун, бетӀерги кверги тӀезе къачӀараб.
21Гьез бищун лъикӀаб ракь тӀаса бищана –
халкъалъул бетӀерасе мустахӀикъаб ракь.
Халкъалъул бутӀрул данде ракӀарараб мехалъ,
гьез БЕТӀЕРГЬАНАСУЛ амруялда рекъон гьабуна,
ГӀизраилалъе БЕТӀЕРГЬАНАС къотӀараб хӀукму тӀубазабуна».
22Данил къавмалъул рахъалъ гьес абуна:
«Башаналъул мугӀруздаса жиб кӀанцӀулеб
гъалбацӀалъул тӀинчӀалда релълъуна Данил наслаби».
23Нафталил рахъалъ гьес абуна:
«Баракатал руго Нафталил наслаби,
БЕТӀЕРГЬАНАСДАСА баракат щварал руго гьел.
Гьезул ирслъун ккола [Галилеялъул] хӀорги къилбаялъул рахъги».
24Ашерил къавмалъул рахъалъ гьес абуна:
«Ашерил наслаби – киналго вацазда гьоркьор бищун баракатал!
Зайтуналъул нахул гӀорал чвахаги гьезие,
киналго къавмазе хиралъаги гьел.
25Нужер кавабазул рахаял маххулги мазгаралъулги гьарурал рукӀина,
нужер гӀумруялъул къоял гӀадин нужер бечелъиги цӀикӀкӀина».
26«Ешуруналъул Аллагьасда бащадав щивго гьечӀо!
Гьев зобалаздасан дуе кумекалъе воржуна,
Жиндирго кӀудияб къудратгун, накӀкӀул парчабаздаги рекӀун!
27Абадияв Аллагь – Гьев вуго мун вахчулеб хъала!
Абадиясул Квер – дуй мугъчӀваялъе!
Гьес дур тушбаби нахъе ахӀана,
ва гьел тӀагӀинареян буюрухъ кьуна.
28ГӀизраилил халкъ парахатго букӀина,
гӀицӀго Якъубил агьлуялъ гӀумру гьабила
чедги чагъирги гьарзаяб улкаялда,
зобалаз кидаго тӀаде щуб бецӀцӀулеб ракьалда.
29Баракатаб буго мун, ГӀизраилил халкъ!
Щал дуда релълъунел,
БЕТӀЕРГЬАНАС эркен гьабураб халкъ!
Дур хъалхъанги кумекчиги Гьев вуго,
Дур реццалъул хвалченги Гьев вуго!
Тушбаби дуе хӀелхӀедила,
дуцайин абуни, гьел хӀатӀикь мерхьина».
Currently Selected:
Къанун 33: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
