1 Пачаби 28

1Гьеб заманалда ГӀизраилалда данде рагъизе пилистимазул аскарал ракӀарана. Ахишица Давудида абуна: «Гьайгьай, дуда лъала мунги дур чагӀиги дир аскаргун цадахъ рагъизе кколеблъи», – ян.

2«ЛъикӀ буго! Гьанже лъала дуда дур лагъасул гьунар», – ин жаваб кьуна Давудица.

«Гьедин батани, даимго дирго нукарлъун тела дица мун», – ин абуна Ахишица.

Шаулие ахирияб хӀукму къотӀи

3Шамуил хун вукӀана ва гӀизраилаз хадуб магӀуги бахъун, гьев гьесул гӀагараб шагьар Рамаялда вукъун вукӀана.

Хваразул рухӀазда кӀалъалел ва пал тӀамулел чагӀи гӀизраилазул ракь-мухъалдаса нахъе гъун рукӀана Шаулица.

4Пилистимал ракӀарун Шунемалде рачӀана ва гьениб къайи чӀван чӀана. Шаулицаги тӀолалго гӀизраилал данде ахӀана ва Гилбоа мегӀералъул борхалъиялда къайи чӀвана. 5Пилистимазул аскар бихьидал, гӀемер хӀинкъиялъ Шаулил чара къосана. 6БЕТӀЕРГЬАНАСДЕ ахӀи бан дугӀа гьабизе жувана Шаул, амма БЕТӀЕРГЬАНАС гьесие жаваб гьабичӀо – я макьилъ бицун, я Урималдалъун, я цо авараг гьоркьов ккун.

7Цинги Шаулица абуна: «Хваразул рухӀазда кӀалъалей гӀадан ялагье дие, гьелъ щибдай абулаян бихьизе дун гьелъухъе ине вукӀине», – ян.

«Эн-Доралда йиго цо гьединай гӀадан», – ин абуна гьесул чукъбуз.

8Живго лъачӀого вукӀине тӀад батӀияб ретӀелги ретӀун, кӀиго чиги цадахъ вачун нухде вахъана Шаул ва къаси сардилъ гьей гӀаданалъухъе щвана.

«РухӀазда кӀалъай дир цӀаралдасан, ва дица абурав чиясул рухӀ бачӀинабе гьанибе», – ян абуна Шаулица гьелда.

9Амма гьей гӀаданалъ абуна: «Вай, дуда лъалагури Шаулица гьабураб жо! Дос гьаб ракь тун нахъе тӀагӀинаруна хваразул рухӀазда кӀалъалелги палихъабиги. Щайха цинги дунги хваликье ккезайизе дие къор гъолеб дуца?» – ян.

10Цинги Шаул БЕТӀЕРГЬАНАСУЛ цӀарги бахъун гьедана гьелъие: «ХӀакъав БЕТӀЕРГЬАНАСУЛ цӀаралхӀа, гьаб сабаблъун щибго тамихӀ букӀине гьечӀо дуе», – ян.

11Гьебмехалъ гьей гӀаданалъ цӀехана: «Щив духъе ахӀилев?» – ин.

«Шамуил ахӀе дихъе», – ян абуна гьес.

12Шамуил вихьидал, кӀудияб гьаракь бахъун ккана гьей гӀаданалъул, ва гьелъ абуна: «Щай дуца дун махсароде ккурай? Мун Шаул вуго!» – ян.

13Пачаяс гьелда абуна: «ХӀинкъуге. Щиб дуда бихьулеб бугеб?»

Гьей гӀадамалъ абуна: «Ракьулъа тӀаде цо рухӀ бахъун бачӀунеб бихьулеб буго».

14«Куц-мухъ кинаб бугеб гьелъул?» – ин цӀехана гьес.

«ГӀабаги ретӀарав херав вахъун вачӀунев вуго», – ян абуна гьелъ.

Гьебмехалъ Шаулида бичӀчӀана гьев Шамуил вукӀин ва, гьев икрам гьабун гӀодоб гьумерги цун, гьесие къулана.

15Шамуил Шаулида кӀалъана: «Щай дуца дир рахӀат хвезабураб? Щиб гьабизе дуца дун ахӀарав?» – ин.

«Дун кӀудияб балагьалъукье ккун вуго. Дида данде рагъизе рахъун руго пилистимал, амма Аллагьас диде мугъ рехун буго. ТӀокӀаб дие щибго жаваб гьабулеб гьечӀо Гьес – я авараг гьоркьов ккун, я макьилъ бицун. Гьединлъидалин дица мун ахӀарав – щибдай гьабун лъикӀан дуца дида бицине букӀине», – ян абуна Шаулица.

16Шамуилица жаваб гьабуна:

«БЕТӀЕРГЬАНАС дуде мугъги рехун дургун тушманлъи ккун батани, дие щай дуца суалал кьолел? 17БЕТӀЕРГЬАНАС, дунги гьоркьов ккун, цебеккунго бицун букӀараб рагӀи тӀубазабулеб буго. БЕТӀЕРГЬАНАС дур хъатикьа нахъе бахъана пачалъи ва дур халкъалъул цоясе, ай Давудихъе кьуна. 18Аллагьасул гьелегьараб ццин дуца амалекиязда тӀаде гьулчичӀолъиялъ ва гьедин БЕТӀЕРГЬАНАСУЛ амру дуца тӀубазабичӀолъиялъ гьабураб буго БЕТӀЕРГЬАНАС дуе жакъа гьаб кинабго. 19ЦохӀо мун гуревги, ГӀизраилго цадахъ пилистимазухъе кьезе буго БЕТӀЕРГЬАНАС, ва мунги дур васалги метерго дида аскӀоре, хваразул дунялалде ккезе руго. Гьединго гӀизраилазул аскарги пилистимазухъе кверде кьезе буго БЕТӀЕРГЬАНАС».

20Гьеб параялъ, Шамуилил рагӀабаз кутакалда хӀинкъизавурав Шаулил къаркъала чвархъан гӀодоб речӀчӀана. ТӀубараб сордо-къоялъ кӀалдиб жоги лъун букӀинчӀелъул, черхалда рухӀ хутӀичӀо гьесул. 21Гьей гӀадан Шаулида аскӀоегӀан къана ва, гьесда чӀун бугеб къо бихьидал, гьелъ абуна:

«Дун, дур лагъ, духъ гӀенеккана. Дирго гӀумру бичун дуца абураб гьабуна. 22Гьанже, бегьулеб батани, мун дихъги гӀенекке, ва изну кье дуда цебе чадил мочӀу лъезе. Нухде вахъиналда цебе гьаб чед кванай дудего рухӀ бачӀине букӀине», – ян.

23Щибго кваназе гьечӀилан жаваб гьабуна гьес. Амма гьесул чагӀазги гьей гӀаданалъги гӀемер гьаридал, гьев, чӀарбидаса тӀаде вахъун, бусада гӀодов чӀана.

24Гьей гӀадамалъул букӀана цо кьарияб, рокъоб тун хьихьараб бече ва, хехлъи гьабун гьебги хъун, хьагинибе ккезабуна гьелъ. Гьединго ролъ босана ва гьебги буцун реччеб гъорлъ гьечӀел чадал режана. 25Хадуб гьеб кинабго Шаулида ва гьесул чагӀазда цебе лъуна, ва гьел квана-гьекъана. Гьебго сордоялъ гьел гьеб бакӀалдаса нахъе ана.

Currently Selected:

1 Пачаби 28: АварАК

Highlight

Copy