1 Пачаби 26
26
Давудица нахъеги Шаулил гӀумру цӀуни
1Зифиял рачӀана Гивеаялде Шаулихъе, ва гьез абуна: «Давуд Ешимоналде балагьараб Хахилаялъул гохӀда вахчун гуревищ вугев?» – ин.
2Цадахъ лъабазарго тӀаса рищарал рагъухъабиги рачун, Давуд валагьизе Зиф авлахъалде къокъана Шаул. 3Шаул Ешимоналде балагьун бугеб Хахила гохӀда, нухда гӀагарлъухъ къайи чӀван чӀана. Давудги гьенив мегӀер-гӀалахалдаса гӀебеде вукӀана. Жив валагьизе авлахъалде Шаул вачӀун вугин рагӀидал, 4гъоркьанго хал-шал гьабизе чагӀи ритӀана Давудица ва хӀакъикъаталдаги Шаул вачӀун вукӀин баянлъана.
5Давуд нухде вахъана ва Шаулил рагъухъабазул къайи чӀвараб бакӀалде щвана. Шаул ва Нерил вас, аскаразул бетӀер, Авнер кьижараб бакӀ лъазабуна гьес. Къайи чӀвараб бакӀалъул бакьулъ вегун вукӀана Шаул ва хутӀараб халкъ гьесда сверун бегун букӀана.
6Хитияв Ахимелехида ва Церуягьил васлъун кколев Иоавил вац Авишайида цӀехана Давудица: «Шаулил къавулъе дида цадахъ щив вилълъинев?» – абун.
«Дун вилълъина дуда цадахъ», – ин абуна Авишайица.
7Давудги Авишайги рилълъана къаси сардилъ аскар бугеб бакӀалде, ва, жиндирго хечги къаданиб къазабун, кьижун вугев Шаул вихьана гьезда. Авнерги рагъухъабиги гьесда сверухъ кьижун рукӀана.
8Авишайица абуна Давудида: «Жакъа Аллагьас дур кверщаликье кьолев вуго дур тушман. Изну кье дие цо хьвагӀараб хечалъ гьев ракьулъ къазавизе. КӀицӀул кьабизе ккезе гьечӀо дица», – ян.
9Амма Давудица Авишайида абуна: «Гьев чӀваге! БЕТӀЕРГЬАНАС тӀаса вищарасде квер борхарав чи тамихӀалдаса ворчӀулевищ? 10ХӀакъав БЕТӀЕРГЬАНАЛХӀА, БЕТӀЕРГЬАНАС Жинцаго хъвала гьесие гӀажал, – яги къоял лъугӀун живго хвела, яги рагъде ун гьенив чӀвала, 11амма БЕТӀЕРГЬАНАС цӀунаги дун БЕТӀЕРГЬАНАС тӀаса вищарасде квер борхиялдаса. Гьанже гьесул къаданиса хечги лъадал парччиги босилин ва гьаниса нахъе рилълъинин».
12Давудица Шаулил къаданиса хечги лъадал парччиги босана, ва гьел гьениса нахъе рилълъана; лъидаго щибго бихьичӀо ва рагӀичӀо, цониги чи макьидасаги вигьинчӀо. БЕТӀЕРГЬАНАС гьезда тӀаде гъваридаб макьу бачӀинабун букӀиндал, гьел киналго кьижун ккун рукӀана.
13Давуд доб рахъалде вилълъана ва гохӀалъул тӀогьиве вахана. Гьезда гьоркьоб гӀезегӀан манзил букӀана. 14Цинги Давудица Шаулил рагъухъабазде ва Нерил вас Авнериде ахӀана: «Авнер! Дие жаваб кьун кӀалъаларищ цо?» – ян.
«Пачаясул рахӀат хвезабун ахӀдезе ккани мун щив кколев?» – ин жаваб кьуна Авнерица.
15Давудица абуна: «Мун бихьинчи гурищ? Дуда ващадав чи щив вугев ГӀизраилалда? Щайха цинги дурго пачаясул тӀалаб гьабулареб дуца? ГьабсагӀат цо чи вачӀун вукӀанагури гьениве пача чӀвазе! 16ЛъикӀаб иш гьабулеб гьечӀо дуца! ХӀакъав БЕТӀЕРГЬАНАСУЛ цӀаралхӀа, БЕТӀЕРГЬАНАС тӀаса вищарав нужерго пача цӀунуларел нуж хвалие мустахӀикъал руго! Гьанже берал ричӀе нужерго! Кибе араб пачаясул къаданиб букӀараб хеч ва лъадал парччи?»
17Шаулида лъана гьеб Давудил гьаракь букӀин. «Давуд, дир вас, дур гьаракьищ гьаб?» – ин цӀехана гьес.
«У, дир гьаракь буго, дир бетӀерчӀахъаяв пача», – ян жаваб кьуна Давудица. 18Гьес нахъго тӀадеги жубана:
«Щай дир пача жиндирго лагъасда хадув лъугьарав? Щиб дица гьабун бугеб, кинаб такъсиралъе дун гӀайибияв вугев? 19БетӀерчӀахъаяв пача, гӀенекке дир, дур лагъасул, рагӀабазухъ. Мун дида тӀаде БЕТӀЕРГЬАНАС тӀамурав чи ватани, махӀ гьуинаб кьеккенлъун букӀа абе гьеб дие. Амма гӀадамаз тӀамурав ватани, БЕТӀЕРГЬАНАСДА цебе нагӀана батаги гьезие; „чияр аллагьзабазе как-дин гьабизе а“#26:19 ГӀизраилаз жидерго Аллагьасе как-дин Гьесул КъотӀиялъул гъамас лъураб Гьесул мукъадасаб Рокъоб гурони гьабизе бегьулароан. , – янги абун БЕТӀЕРГЬАНАСУЛ ирсалдасаги тӀезавун, дун нахъе къотӀун вугелъул гьез. 20Амма гьаб чияр ракьалда, БЕТӀЕРГЬАНАСУЛ Рукъалдаса рикӀкӀада, дир би гӀодобе унгеги. Дида хадув лъугьун вугев ГӀизраилалъул пача чӀетӀалда хадув лъугьарав чиясда релълъуна; мугӀрул-щобазда мокъокъалда хадув чанахъан гӀадин векерахъдилев вуго гьев дида хадув».
21Цинги Шаулица абуна:
«Дида гӀайиб ккана. Давуд, дир вас, тӀадвусса рокъове. Жакъа дир гӀумру дуе хирияб батана, гьединлъидал дица тӀокӀалъ киданиги дуе зарал гьабиларо. Дун бетӀер сверарав чи гӀадин вукӀана ва кутакалда мекъи ккана».
22Давудица абуна:
«Гьале пачаясул хеч. Дурго гӀолохъабазул цояв витӀе гьаниве гьаб босизе. 23БЕТӀЕРГЬАНАС Жив-жив чиясе гьесул иман-яхӀалда ва ритӀухълъиялда рекъараб гьабула ажру-жаза. Жакъа БЕТӀЕРГЬАНАС мун дихъе кверде кьуна, амма БЕТӀЕРГЬАНАС тӀаса вищарасде квер борхизе дида кӀвечӀо. 24Жакъа дур гӀумру дие хиралъараб гӀадин, БЕТӀЕРГЬАНАСЕ дир гӀумруги хиралъаги, ва Гьес щибаб балагьалдаса цӀунаги дун».
25Шаулица абуна:
«Давуд, дир вас, баракат лъеги дуда, гьабулебщинаб битӀа-бишун ккаги ва кӀудияб даражаялдеги вахаги мун», – ин.
Цинги Давуд жиндирго нухда ана Шаулги рокъове тӀадвуссана.
Currently Selected:
1 Пачаби 26: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
