Acak 16

Agar ëka Icimael

1Carai dhakö ka Abram ba önywölö nïnë ëthïnö mörö. Ëntö onwongo tye k'atic mërë n'obedo nya jö Ejip na nyïngë Agar. 2Carai okobo both Abram nï, “Rwoth öjüka ökö më nwongo ëthïnö, cïdhï ibed k'aticna gwök onyo abino nwongo athïn mörö kï bothe.”

Abram oyeo ngö na Carai okobo. 3Cë kinge na dong Abram obedo ï Kanaan pï mwaka apar, Carai ökwanyö atic mërë Agar n'obedo nya jö Ejip ëka ömïö both Abram më bedo dhakö mërë. 4Abram obedo k'Agar, ëka öyac.

Ï karë n'Agar ongeo nï dong ëyac, ën öcakö caö adit mërë Carai. 5Cë Carai okobo both Abram nï, “Can na an atye ka nwongo myero obed ï wi. An amïö aticna ï cingi ëka kobedini ën ongeo nï ën dong ëyac, cë öcakö caöna. Ëk Rwoth öngöl ï kin ön nga na rac.”

6Abram ögamö nï, “Aticni tye ï cingi, tïm gin mörö këkën na in ïthamö nï bër ï kome.” Cë Carai öcakö yelo Agar rwök naka ömïö öngwëcö ökö kï bothe.

7Malaika ka Rwoth onwongo Agar ï nget kulo na tye ï thim na cïdhö yo Cur. 8Malaika okobo nïnë nï, “Agar, atic ka Carai, in ibino kï kwene, ëka ïcïdhö yo kwene?”

Ën ögamö nï, “An atye ka ngwëc ökö kï both Carai.”

9Cë Malaika ka Rwoth okobo nïnë nï, “Dök cen both Carai ëka ibed ï thë löc mërë.” 10Cë malaika ömëdërë më kobo nïnë nï, “An abino mëdö ëkwaëni bedo na pol na ba kwanërë.”

11Malaika ka Rwoth okobo nïnë thon nï,

“In kobedini dong ï yac

ëka ibino nywölö athïn n'ëcwö.

Ibino cakö nyïngë Icimael,#16:11 Icimael gönyö nï Obanga winyo.

pïën Obanga owinyo koko më cwer cwinyi.

12Ën bino bedo calö kana na ger,

ën bino bedo na ger nakun lwënyö ï kom jö kïbëc

ëka jö kïbëc bino lwëny ï kome,

ëka ën bino bedo kënë

kï both utmego mërë kïbëc.”

13Agar ömïö nyïng ni both Rwoth n'ötwak ködë nï, “In ibedo Obanga na nëna,” pïën okobo nï, “An dong anënö Obanga na nëna.” 14Ënë ömïö kulo nön ecwodo nï Beer Lakai Roi.#16:14 Beer Lakai Roi gönyö nï Kulo ka ngat na kwö n'önëna. Kulo nön nwongere ï dyere Kadec ëka Bered.

15Agar önywölö n'Abram athïn n'ëcwö ëka Abram öcakö nyïngë Icimael. 16Abram onwongo dong tye kï mwaka 86 ï karë na Agar önywölö nïnë Icimael.

Currently Selected:

Acak 16: ThurM

Highlight

Copy