التكوين 24
24
بركة النبي إبراهيم
أعيال إسحاق اُباركت بسبب أهلها اياك تجبر ياسر من الذرية
1وعاڮب فترة من الزمن إستكهل النبي إبراهيم حته وباركو الله تعالى فكل شي. 2وڮال النبي إبراهيم لشيخ اعبيدو واللي هو مسؤول عن كل شي فدار النبي إبراهيم: دير ايدك تحت ڮايمتي، 3واحلفلي اعلى الله تعالى إله السما ولارض اعلنك ما اتعرس لولي أي امرة من أهل كنعان اللي آنا عايش امبيناتهم. 4وتمشي شور بلدي وفخظي وتڮبظ امرة منهم لولي إسحاق. 5وڮال لعبد للنبي إبراهيم: وإلى عادت لمرة اللي لاهي نڮبظ لإسحاق ما تبغي تمشي شور هاذي لارض ، وفذي الحالة مندرا يكانك تبغيني انجيب إسحاق للبليدة اللي انتا جاي منها؟ 6وڮالّو النبي إبراهيم: عسك من اترجع ولي لفم. 7الله تعالى إله السما اللي اڮبظني من دار بويَ ومن وطني وتكلم امعايَ واحلفلي وڮالّي: اندور نعطي هاذي لارض لنسلك. يدور يمشي ڮدامك ملاك اياك تڮبظ امرة لولي من ارض أهلي. 8وإلين ترفض لمرة تمشي امعاك، اتعود انتا فهاذي الحالة عدلت اللي احلفتلي اعليه. يغير لا اترجع ولي لذيك لارض. 9ودار لعبد ايدو تحت ڮايمة النبي إبراهيم واحلف لشيخو اعلنو لاهي يعدل ذا اللي احلفلو اعليه.
10واڮبظ لعبد 10 اجمال من حيوان النبي إبراهيم ورفّد اجمال من كل الخير اللي عند شيخو. وامشا واعد أرام النهرين لبليدة اللي فيها ناحور. 11وإلين ڮرب، برك اجمال خارج لمدينة احذا حاسي من الماء. وكان هاذا امع مغرب الشمس، وذا كان وقت وخيظ لعليات اياك يوردو فالحاسي. 12واطلب لعبد وڮال: يا الله تعالى إله شيخي النبي إبراهيم، يسرلي امري اليوم واحسن اعلى شيخي النبي إبراهيم . 13آنا اراعيني واڮف عند الحاسي ولعليات هاذي لمدينة لاهي يوخظو يوردو. 14ولمرة اللي انڮولّها: نزلي ڮدرتك اياك نشرب، وتسڮيني وتسڮي اجمالي، اتعود هي لمرة اللي اخترت لعبدك إسحاق. وبهاذي الطريقة انعود اعرفت اعلنك احسنت اعلى شيخي النبي إبراهيم.
15وسابڮ يوفي عبد النبي إبراهيم دعاؤو، جات رفقة منت بتؤئيل ول مِلْكَةُ أعيال ناحور خو النبي إبراهيم وڮدرتها اعلى اكتفها. 16وكانت اشويبة ازوينة حته واعزيبة ما ڮط مسها راجل. وڮاست ظاية الماء واملات ڮدرتها وڮيمت ماشة. 17وادفع عبد النبي إبراهيم شورها وڮالها: اسڮيني اشوي من الماء من ڮدرتك. 18وڮالتلو رفقة: اشرب يا شيخي ونزلت ڮدرتها بالعجلة اعلى ايديها واسڮاتو. 19وعاڮب يلين اسڮاتو ڮالتلو: لاهي انجيب املي الماء لاجمالك اياك نسڮيهم. 20وصبت ڮدرتها بالعجلة فحوظ الماء ودفعت شور حاسي وتورد الماء يلين اسڮات اجمالو كاملين. 21وكان عبد النبي إبراهيم امراقبها فذا كامل اللي اتعدل من دون كلام اياك يعرف يكانها هي اللي اختار الله تعالى لإسحاق وللا ابدي.
22وإلين شربت اجمال، اڮبظ لعبد ووخظ حزمة من الذهب وزنها اڮريب من 6 اڮرامات ووخظ املي أسوارين من الذهب وزنهم 120 اڮرام. 23وسول لعبد رفقة وڮالها: انتي منت من؟ ڮوليلي مندرا يكانا انڮدو نجبرو ابليدة انباتو فيها فدار بوك؟ 24وڮالتلو رفقة: آنا بويَ هو بتؤئيل ول مِلْكَةُ وناحور. 25وڮالتلو املي: عندنا لحشيش وياسر من لعلف وعندنا املي بل امنين اتباتو فيه. 26وفذا اركع واسجد لعبد لله تعالى يشكرو. 27وڮال: اتبارك الله تعالى إله شيخي النبي إبراهيم اللي ما امنع كرمه ونزاهتو عن النبي إبراهيم. وڮال لعبد: الله تعالى سهداني اعلى دار اخوت شيخي النبي إبراهيم. 28ودفعت رفقة شور دار أمها وردت اعليها اللي اخلڮ.
29وكان عند رفقة خو ينڮالو لابان. وڮام لابان وامشا واخظ شور لعبد اللي عند الظاية 30بيهلي فات شاف حزمة الذهب وأسوارين فايدين اختو رفقة، واسمع املي اكلام رفقة عن لعبد اللي اجبرت، واجبر لابان لعبد واڮف احذا اجمالو اڮريب من الظاية. 31وڮال لابان للعبد: اتفضل انتا امباركك الله تعالى. اعلاش انتا واڮف الڮدام ؟ آنا جهزت الدار وجهزت املي ابليدة يستراحو فيها اجمالك. 32وڮاس لعبد الدار وانزل لابان وعبيدو اللي كانو رافدين اجمالو واعطاو لاجمال لعبد لحشيش ولعلف، وجابولو شي من الماء هو واللي كان امعاه اياك يغسلو ڮرعيهم. 33وطرحو ڮدامو اطعام اياك يوكل ، يغير سابڮ يوكل ڮال: ماني لاهي نوكل سابڮ ما ڮتلكم اللي عندي. وڮال لابان لعبد النبي إبراهيم: اتفضل ڮول اللي عندك.
34وڮال للابان: آنا عبد للنبي إبراهيم. 35والله تعالى بارك حته شيخي النبي إبراهيم وعاد زعيم. والله تعالى اعطاه لغنم ولبڮر والفظة والذهب ولعبيد ولخدم والبل ولحمير. 36وخلاتلو سارة اطفيل عاڮب ما إستكهلت واعطاه بوه النبي إبراهيم كل أملاكو. 37واحلفلي شيخي النبي إبراهيم وڮالّي: لا اتعرس لولي إسحاق أي امرة من الكنعانيين اللي آنا ساكن فبلادهم. 38وڮالّي: ڮيس أهل بويَ وعايلتي واڮبظ امرة لولي. 39وڮلت لشيخي النبي إبراهيم: وفحالة لمرة اللي لاهي نجبر ابات تمشي امعايَ شور كنعان؟ 40وڮالّي النبي إبراهيم: الله تعالى اللي امشيت آنا اعلى اطريڮو يدور يمشي ملاكو ويوفقك فمهمتك اياك تڮبظ أعيال لولي إسحاق من عائلتي ومن أهل بويَ. 41وڮالّي شيخي النبي إبراهيم: وإلى جيت لأهلي ورفضو يعطوهالك، فهاذي الحالة نطلصك من الحلفة اللي احلفتلي اعليها.
42وڮست اليوم الحاسي وإلين الحڮتها اطلبت الله تعالى وڮتلو: يا الله تعالى إله شيخي النبي إبراهيم، آنا طالبك اتوفقني فاللي اعلى أساسو آنا سافرت. 43آنا اراعيني واڮف ڮدام الحاسي. اندورك تجعل الشويبة اللي لاهي اتجي اياك تورد الماء واللي يلين نطلب منها: تسڮيني من الماء، 44واتڮولّي: اشرب انتا وآنا لاهي نسڮي اجمالك املي. اتعود هي الشويبة اللي اختارها الله تعالى لإسحاق ول شيخي.
45والوقت اللي كنت نطلب فيه مولانا واناجي فيه نفسي، فذا شفت رفقة جاية ورافدة ڮدرة اعلى اكتافها ، وڮاست الحاسي تورد الماء وڮتلها: طالبك تسڮيني. 46ودفعت وطرحت ڮدرتها وڮاتلي: اشرب انتا ولاهي نسڮي املي اجمالك. 47وسولتها: منت من انتي؟ وڮاتلي اعلنها منت بتؤئيل ول ناحور اللي خلاتلو مِلْكَةُ. واڮبظت ودرت الخاتم فاخنافرها والسوار فايديها. 48وڮمت واسجدت وباركت الله تعالى إله شيخي النبي إبراهيم اللي سهداني شور الطريڮ لمسڮمة اياك نڮبظ منت خو النبي إبراهيم لولو إسحاق. 49وظرك ڮولولي إلى عدتو لاهي اتعدلو ذي الغاية لشيخي النبي إبراهيم ، وللا طلصوني وخلوني انڮيم واعد ابليدة اخرا.
50وڮالولو لابان هو وبتؤئيل: ذي لمردة جات من عند الله تعالى ونحنا ما انڮدو انڮولولك اهيه وللا ابدي. 51رفقة اراعيها ڮدامك. اڮبظها وامشي بيها اياك اتعود أعيال لول شيخك النبي إبراهيم كيفت ماراد الله تعالى. 52وإلين اسمع عبد النبي إبراهيم اكلامهم، ابرك اعلى التراب ساجد لله تعالى. 53ووخظ لعبد اديار من الفظة والذهب ولباس واعطاهم لرفقة واعطا املي لخوها وأمها هدايا غالية. 54وكال واشرب هو ورجالتو وباتو ليلتهم فم. وإلين اوعاو امع الصباح ڮالّهم: اعطوني اطريڮ اياك نرجع شور شيخي النبي إبراهيم. 55وڮالولو خو رفقة وأمها: خلي رفقة تبڮي امعانا 10 أيام وللا ذاك ومن فم تمشي. 56وڮالّهم لعبد: لا تحصروني ، الله تعالى سڮملي اطريڮي ، خلوني نمشي شور شيخي النبي إبراهيم. 57وڮالولو: لاهي انعيطو لرفقة وانسولوها عن رأيها. 58وعيطو لرفقة وسولوها: تبغي تمشي امع ذا الراجل؟ وڮالتلهم: اهيه نبغي نمشي. 59وخلاو رفقة تمشي وامشات امعاها امرظعتها وعبد النبي إبراهيم ورجالتو. 60وباركو رفقة وڮالولها: اعليك بركة مولانا. انتي ختنا عدلي ياسر من الذرية اياك اتعود ألاف مؤلفة وتورث ذريتك مدن اعدائها.
61وڮامت رفقة واخدمها وركبو اجمال وامشاو اورا عبد النبي إبراهيم. وڮيم لعبد برفقة ماشي بيها. 62وفذاك الوقت كان إسحاق اللي ساكن فالنقب ارجع من الطريڮ اللي ينڮالها حاسي الحي اللي يراعي فيَّ. 63وفدحميساية امشا واعد لخلوات اياك يتخمم . فذا شاف اجمال جاية . 64ورفعت رفقة هي املي عينها وشافت إسحاق، ونڮزت عن اجملها. 65وسولت عبد النبي إبراهيم وڮاتلو: منهو هاذا الراجل اللي ماشي فالحرث اياك يتلڮالنا ؟ وڮالها لعبد: هاذا شيخي إسحاق. وڮبظت حوليها واتحجبت عنو. 66وعاڮب ذاك رد لعبد اعلى إسحاق ذا كامل اللي اخلڮ. 67ودخل إسحاق رفقة شور خيمة أمو سارة واتعرس امعاها وابغاها حته واتعزا بيها عاڮب موت أمو سارة.
Currently Selected:
التكوين 24: الحسانية
Highlight
Share
Copy
Want to have your highlights saved across all your devices? Sign up or sign in
© 2024 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/
