Лука 10

10-тӥ ЛЮКЕТ

1Та бере Кузё-Инмар мукетъёссэ сизьымдон дышетскисьёссэ бырйиз но кыкен-кыкен Аслаз азьтӥз пӧртэм городъёсы но интыосы ыстӥз, кытчы Солэн Аслаз мынэмез потӥз. 2Соослы шуиз: «Аран трос, нош ужасьёс ӧжыт; соин ик аранлэн Кузёезлэсь вӧсяськыса куре, Аслаз аран дораз ужасьёсты мед ыстоз шуыса. 3Мынэлэ! Мон тӥледыз, кызьы кионъёс пӧлы ыжпиосты ысто, озьы ыстӥсько. 4Пуйы но, сумка но, пыдкутчан но эн басьтэ, сюрес вылысен нокинэн но ӟечъяськыса эн улэ. 5Кыӵе ке корка пыриды, нырысь ик шуэлэ: ”Каньыллык та коркалы!” 6Отын каньыллык улонэз кулэ карись вань ке, соку со вылэ тӥляд каньыллыкты васькоз; ӧвӧл ке, соку тӥ доры ик берыктӥськоз. 7Со коркан ик улэ, марзы вань, сие, юэ: уго ужась мурт ужамез понна кӧттыр басьтыны кулэ. Коркась корка потаса эн ветлэ. 8Кыӵе ке городэ лыктӥды но, пыртӥзы ке, мар ӵектӥзы, сиелэ. 9Отын кыллись висисьёсты бурмытъялэ но шуэлэ: ”Инмар Эксэйлык тӥледлы матэктӥз”. 10Кыӵе ке городэ лыктӥды но, ӧз ке пыртэ тӥледыз, ульчае потыса шуэлэ: 11”Городысьтыды ми борды лякиськем сюез тӥледлы курткиськом; но тодэлэ, Инмар Эксэйлык тӥледлы матэктӥз шуыса”. 12Тӥледлы верасько: самой со нуналэ Содомлы сярысь но та городлы секытгес луоз. 13Кайгу тыныд, Хоразин! Кайгу тыныд, Вифсаида! Тӥ дорын возьматэм паймымон ужъёс Тирын но Сӥдонын возьматэмын луысалзы ке, соос кемалась ини, вылазы чурыт бышкись дӥсь дӥсяса, пень вылын пукыса, сьӧлыкъёссы понна ӧпкельысалзы. 14Тирлы но, Сӥдонлы но, тӥледлы сярысь, судын капчигес луоз. 15Тон но, инбамозь ӝутӥськем Капернаум, адэ куштӥськод. 16Тӥледыз кылзӥськись мурт – Монэ кылзӥське; тӥлесьтыд куштӥськись мурт – Мынэсьтым куштӥське. Нош Мынэсьтым куштӥськись мурт – Монэ Ыстӥсьлэсь куштӥське».

17Сизьымдон дышетскисьёс шумпотыса берытскизы но шуизы: «Кузё-Инмармы! Тынад нимыныд периос но милесьтым кылзӥсько». 18Нош Иисус соослы шуиз: «Чилектэм кадь инмысь усись шайтанэз Мон адӟи. 19Тани, тӥледлы кыйёс вылэ, скорпионъёс, вань тушмон кужым вылэ лёгиськыны эрик сётӥсько, номыр но тӥледлы изъян уз лэсьты. 20Нош тӥ, периос тӥлесьтыд кылзӥсько шуыса, шум эн потэ, – шумпотэлэ, тӥляд нимъёсты Инмын гожтӥськемын шуыса». 21Со дыре ик Иисус духеныз шумпотыса шуиз: «Данъясько Тонэ, Атае, Инлэн но, музъемлэн но Кузё-Инмарез, таосты Тон визьмоослэсь, нодоослэсь ватэмед но нуныослы усьтэмед понна. Озьы, Атае! Сыӵе вылэм уго Тынад ӟеч эрикед». 22Дышетскисьёсыз пала берыктӥськыса шуиз: «Ваньзэ Мыным Атае сётӥз. Кин со Пи, Атай сяна, нокин но уг тоды, но кин со Атай, Пи сяна, нокин но уг тоды, – кинлы Пилэн усьтэмез потэ, со тодэ». 23Дышетскисьёсыз пала берыктӥськыса, соослы нимысьтыз вераз на: «Тӥлесьтыд адӟемдэс адӟись синъёс шудоесь! 24Тӥледлы верасько: трос пророкъёс но эксэйёс тӥлесьтыд адӟемдэс адӟемзы потэ вал, но ӧз адӟе, тӥлесьтыд кылэмдэс кылэмзы потэ вал, но ӧз кылэ».

25Тани, султыса одӥг закон тодӥсь Солэсь визьзэ сынаса шуиз: «Дышетӥсь! Быронтэм улонэз басьтон понна мон ма карыны кулэ?» 26Иисус солы шуиз: «Мар гожтэмын законын? Кызьы лыдӟиськод?» 27Ответ сётыса, со шуиз: «Инмардэ Кузё-Инмарез вань сюлмыныд, вань лулыныд, вань кужмыныд, вань визьмыныд яраты, матысьтэ но астэ ачид кадь ик». 28Иисус солы шуиз: «Шонер ответ тон сётӥд. Озьы лэсьты, улэп луод». 29Нош со, ассэ ачиз шонере поттыны турттыса, Иисуслы шуиз: «Нош кин бен мынам матысе?» 30Талы Иисус шуиз: «Кыӵе ке но адями Иерусалимысь Иерихонэ мынэ вылэм но адями таласьёс кие шедем, соос солэсь дӥськутсэ октыса, ассэ жугыса, мырдэм улэп кельтыса кошкиллям. 31Учырам озьы: со сюрес кузя священник мынэ вылэм но, сое адӟыса, вӧзтӥз кошкем. 32Озьы ик со интыын левит но вылэм, дораз мыныса учкем но вӧзтӥз кошкем. 33Кыӵе ке но Самария мурт кошкыкуз со шоры кемдэм, адӟем сое но жаль потэм. 34Дораз лыктыса, яраоссэ вӧйын зыраса, винаен гылтыса бинем. Ишак вылаз пуктыса, кунокуае ваем но со сярысь сюлмаськем. 35Мукет нуналаз кошкыкуз кунокуа кузёлы кык динарий коньдон поттыса сётэм но солы шуэм: ”Сюлмаськы со сярысь. Талэсь тросгес коньдон быдтӥд ке, берен вуи ке, тыныд тыро”. 36Кызьы малпаськод, кудӥз та куинь муртъёс пӧлысь адями таласьёс кие шедемлы матысь луэ?» 37Со шуиз: «Кин солы ӟеч кариз». Соку Иисус солы шуиз: «Мын, тон но озьы ик лэсьты».

38Сюрес кузя мынон сяменызы Иисус одӥгаз гуртэ вуиз. Татын Марфа нимо кышномурт Сое аслаз корказ ӧтиз. 39Солэн Мария нимо сузэрез вал, со Иисуслэн пыд выжыяз пуксиз но Солэсь верамзэ кылзӥськыса улӥз. 40Нош Марфа, трос сиён-юон дасяса, Сое куно карон сярысь сюлмаськиз. Собере Иисуслэн матаз лыктыса шуиз: «Кузё-Инмаре! Сузэре монэ огнаме ужаны кельтӥз шуыса, Тыныд нокыӵе но уг поты шат? Вера солы, мыным мед юрттоз». 41Нош Марфалы ответ сётыса, Иисус шуиз: «Марфа, Марфа! Тон тросэз сярысь сюлмаськиськод, шугъяськиськод, 42нош кулэ огез гинэ. Мария ӟечсэ люкетэз бырйиз, кудӥз солэсь уз басьтӥськы».

Currently Selected:

Лука 10: УДМБИБ

Highlight

Copy