Лука 17

Пежес вяти мялень саламатнень колга и пежень нолдамать колга

(Матф. 18:6,7,21,22; Марк 9:42)

1Иисус мярьгсь тонафниензонды: «Пежес вяти мялень саламатне сякокс сайхть, но кальдяв ули сянди, кинь вельде синь сайхть. 2Кие вяти пежес хуш фкя лафча ломань – сянди сяда пара улель, кда кргазонза повфтальхть яжама кев и ёрдалезь оцюведьс. 3Ванода эсь мельгант.

Тиендяряй малавиксце каршезт пеже, азк тянь тейнза, каендандяряй, нолдак пеженц. 4Шити сисемксть тиендяряй тейть кальдяв и сисемксть эняльдезь мярьги: "Каендан", – нолдак пеженц».

Кемамать колга

5Апостолхне мярьгсть Азорти: «Касфтк кемаманьконь!» 6Азорсь мярьгсь: «Кда тинь кемаманте улель хуш горчицань видьмоняшка и тинь мярьголеде тя оцю шуфтти: "Таргак эсь пряцень юрнек и озафтк оцюведьс", эста сон кулхцондоледязь».

Покодити тиема ся, мезе тейнза максф тиемс

7«Мярьктяма, ёткстонт киньге ули покодиец, кона сокай пакся али ваны учат. Паксяста мрдамстонза кали мярьктяда тейнза: "Куроконе озак шра ваксс"? 8Меколанкт, афоли мярьгат тейнза: "Аноклак тейне илядень ярхцама и перьфцень карксазь, якак мельган, мзярс симан-ярхцан, а тонць симат-ярхцат меле". 9Тон вдь аф азат покодицти сюконяма сянкса, мезенди сон кошартфоль? 10Тяфта тиньге, мзярда пяшкодьсасть семботь, мезьс кошардодязь, мярьгода: "Минь аньцек покодихтяма, и тиеськ сянь, мезе тейнек эрявсь тиемс"».

Иисус пчкафты наксафты урмаса сяряди кемонь алят

11Иерусалиму молемста Иисус ётась Самариять и Галилеять ёткова. 12Фкя вели сувамста каршезонза повсть наксафты урмаса кемонь сярядихть, конат лоткасть эздонза ичкозиня. 13Синь ювадсть: «Иисус, Тонафты, ужяльдемасть!» 14Няемстост Иисус мярьгсь тейст: «Арда, няфтеда пря озксвятихненди». Молембачк синь аруясть урмадост.

15Ёткстост фкясь, пчкаманц няемста, мрдась и вярьгак вайгяльхть шназе Шкайть. 16Сон прась Иисусонь пильгс и кармась сюконямань азондома. Тя ульсь Самариянь эряй. 17Эста Иисус мярьгсь: «Дяряй аф кемонненть пчкяде? А косот лядыкс вейхксотне? 18Дяряй конацка эздост ашезь мрда Шкайть шнама, Самариянь эряйда башка?» 19Иисус мярьгсь тейнза: «Стяк, архт, кемамаце пчкафтонзе тонь#17:19 Тя валсь греконь кяльста нинге ётафневи кода: идензе.».

Шкаень Оцязорксшить самац

(Матф. 24:23-28,37-41)

20Фарисейхне кизефтезь Иисусонь: «Мзярда сай Шкаень Оцязорксшись?» Сон каршезост мярьгсь: «Шкаень Оцязорксшить саманц аш кода няемс. 21Сяс кивок аф мярьги: "Вов сон, тяса" али "Вов тоса". Вдь Шкаень Оцязорксшись ни тинь ётксонт#17:21 Шарьхкодеви тяфтанга: тинь потмосонт.».

Ломанень Цёрать сама шиц

22Сяльде Иисус мярьгсь тонафниензонды: «Сай стама пинге, мзярда тинь кармай оцю мяленте няемс Ломанень Цёрать хуш фкя шинц, но аф няйсасть. 23Мярьгихть тейнть: "Сон тяса" али "Сон тоса" – ащеда вастсонт, тяда лаське корхтайть мельге. 24Кода ёндолсь кфчядемста валдоптсы менельть педа-пес, тяфтамкс ули Ломанень Цёраське сама шистонза. 25Но Тейнза тяда инголе сави кирдемс лама маятамада, и тяниень пингонь ломаттне аердыхть эздонза.

26Кода ульсь Ноень пингста, стане ули Ломанень Цёрать пингстонга. 27Ломаттне ярхцесть, симондсть, рьвяйсесть, лисендсть рьвакс – и тяфта ульсь ся шить самс, мзярс Ной изь сува оцю венчезонза, а сяльде сась оцюдонга оцю шадось и юмафтозе семботь. 28Стане ульсь Лотонь пингстонга; ярхцасть, симсть, рамсесть, мишендсть, видесть, путнесть кутт. 29Но ся шиня, мзярда Лот лиссь Содомста, тусь менельста толонь и палыкандоронь#17:29 палыкандор – сера пизем и машфтозень сембонь.

30Тяфта ули ся шистонга, мзярда эвондай Ломанень Цёрась. 31Ся шиня, кие ули кудбряса, а паршиц кудса, ся тяза яка сявомост; кие ули паксяса, тяза мртце меки. 32Лятфтасть Лотонь рьванц! 33Кие ёрай ванфтомс эсь эряфонц, ся юмафтсы сонь; а кие юмафтсы эряфонц, ся ванфтсы сонь. 34Азондса тейнть: ся веня кафта ломаттне улихть фкя удома вастса: фкясь сявови, омбоцесь кадови. 35Кафта ават кармайхть марса яжама: фкясь сявови, а омбоцесь кадови. 36Кафта алят улихть паксяса: фкясь сявови, омбоцесь кадови». 37Эста тонафниенза кизефтезь Сонь: «Азор, коса тя ули?» Сон мярьгсь тейст: «Коса кулофсь, тоза пуромихть ловажада ярхцай нармоттневок».

Currently Selected:

Лука 17: ОС16

Highlight

Copy