Иоанн 7
7
Иисусонь брадонза аф кемайхть Тейнза
1Тяда меле Иисус якась Галилеява. Иудеява якамс Сонь ашель мялец, сяс мес еврейхнень оцюнясна вешендезь Сонь шавомс.
2Малаткшнесь еврейхнень кошень стяфтома иласна#7:2 Тя илась ётафневсь сянь лятфнеманкса, кода Израилень ломаттне эрясть шавмодаса Египетонь урешить эзда ворьгодемдост меле.. 3Иисусонь брадонза мярьгсть Тейнза: «Тук тяста и архт Иудеяв, эста Тонь тонафнихневок няйсазь тефнень, конатнень Тон тиендьсайть. 4Вдь кивок мезевок аф тиенди сёпозь, кда сонць вешенди арамс содавиксокс. Кда Тон тиендят тяфтама тефт, няфтьк пряцень сембе масторлангти». 5Брадонзовок ашесть кема Тейнза. 6Тянь каршес Иисус корхтась тейст: «Монь пингозе нинге ашезь са; а тейнть кодама повсь пингсь ладяй. 7Тя масторлангонь ломаттне тинь лангозонт кальдявста аф вановихть, а Монь сельмосостка афолемазь няе; сяс мес Мон няфнеса: синь тевсна кальдяфт. 8Тинь арда ся илать ётафтома, а Мон мзярс ся илати аф молян; сяс мес Монь пингозе нинге ашезь са». 9Тяфта мярьгсь тейст и лядсь Галилеяв.
Иисус моли Иерусалиму кошень стяфтома илас
10Но мзярда брадонза тусть, эста Иисусовок срхкась ся илати, аньцек аф сембонь ингольде, а салава. 11Илань ётафтомста еврейхнень оцюнясна вешендезь Иисусть и корхтасть: «Коса Сон?» 12И лама куля колганза якась ломаттнень ёткова; финцне корхтасть: «Сон пара»; а омбонцне: «Аф, аф, васькафни ломаттнень эса». 13Сембе сяка колганза кивок панжада ашезь корхта, пелендсть еврейхнень оцюняснон эзда.
14Ётнесь ни илать пялец, мзярда Иисус сувась Шкаень куду и кармась тонафтома. 15Еврейхне дивандасть и корхтасть: «Коста Сон содасыне Сёрматфкснень апак тонафнек?» 16Иисус каршезост мярьгсь: «Монь тонафтомазе – аф Монцень, а Монь Кучиезень. 17Кие ёрай тиендемс Сонь мяленц коряс, ся кармай содамонза: Шкайть эзда тя тонафтомась, али Мон Эсьстон корхтан. 18Эсьстонза корхтайсь вешенди эстейнза шнама. А кие вешенди шнама эсь кучиенцты, ся виде ломань, и аш эсонза аф видеши. 19Моисей макссь тейнть кой, стане? И кивок ёткстонт аф тиенди коряванза. Мезенкса ёрасамасть шавомс?»
20Ломаттне мярьгсть каршезонза: «Афоли кяжи ваймопожфсь эсот? Кинь мялец Тонь шавомс?» 21Иисус поладомок корхтаманц, азозе тейст: «Мон тиень фкя тев, и тинь сембе дивандакшнетяда. 22Моисей мярьгсь тейнть цёрашабатнень киськопеснон керомс [виде, тя аф Моисеень эзда, а атянь-атятнень], и тинь ваймамань шистовок тянь тиендьсасть. 23Моисеень коенц аф коламанкса ваймамань шистовок цёраняти тиихть киськопень керома. Мес ина кяжиякшнетяда Монь лангозон сянкса, мес Мон ломанть марнек пчкафтыне ваймамань шиня? 24Тяда суденда ланга ванозь, судендада виде судса».
Иисус – Христоссь али аф?
25Иерусалимонь кой-кона эряйхне корхтасть: «Тя афоли Ся, конань вешендьсазь шавомс? 26Вона Сон корхтай сембонь ингольде, и мезевок аф мярьгихть Тейнза. Улема, оцюнятне шарьхкодсть – Сон афкукс Христоссь? 27Но тя ломанть минь содасаськ, костонь Сон. А мзярда сай Христоссь, кивок аф содасы, костонь Сон».
28Иисус Шкаень кудса тонафтомста корхтась вярьгак вайгяльхть: «Тинь содасамасть Монь, и коста сань содасасть. Мон сань аф Эсь эздон, но Монь кучемань Ся, кона виде. Аньцек тинь аф содасасть Сонь. 29Мон содаса Сонь, сяс мес Мон сань Сонь ширденза, и Сон кучемань Монь». 30Синь мяльсноль кундамс Иисусть; но кивок ашезе кеподе лангозонза кяденц, сяс мес нинге ашезь са Сонь пингоц. 31Ломаттнень ёткста ламотне кемасть Тейнза и корхтасть: «Мзярда сай Христоссь, дяряй тии тянь коряс сяда лама тяштькс?»
Фарисейхне и озксвятиень оцюнятне срхкайхть кундамс Иисусонь
32Фарисейхне марязь Иисусонь колга корхнематнень, и синь марса озксвятиень оцюнятнень мархта кучсть Шкаень кудонь ваныхть Сонь кундамонза. 33Но Иисус мярьгсь тейст: «Нинге аф лама пинге лядонды Тейне улемс мархтонт, и туян Эсь Кучиезти. 34Карматада Монь вешендемон, и аф мусамасть; и коса Мон улян, тоза тинь аф сафтада».
35Еврейхнень оцюнясна корхнесть эсь ётковаст: «Коза Сон срхкай, коста афи муви тейнек? Кали ули мялец молемс тоза, коса минь ломаненьке срафнефт грекнень ёткова, и тонафнемс грекнень? 36Мезе Сон ёрась азомс ня валхнень мархта: "Карматада вешендемон Монь и аф мусамасть"; и "Коса Мон улян, тоза тинь аф сафтада"?»
Иисусти кемайхненди максови Иняру Ваймопожфсь
37Илань ётафтомань мекольдень и сембода оцю шиня Иисус стясь и вярьгак вайгяльхть корхтась: «Кинь сась симомац, катк сай ширезон и сими. 38Кие Тейне кемай, сянь потмоста, кода азф Сёрматфксса, шудезевихть эряфонь максы ляйхть». 39Тяфта Иисус мярьгсь Ваймопожфть колга, кона максови Иисусти кемайхненди. Аньцек Иняру Ваймопожфсь нинге апак макстоль, сяс мес Иисус нинге апак кепоттель Шкайть иневалдозонза.
40Марямок ня валхнень, ломаттнень ёткста ламотне корхтасть: «Видекс, Сон ся пророксь». 41Лиятне корхтасть: «Тя Христоссь». А конат-конат корхнесть: «Дяряй Христоссь сай Галилеяста? 42Дяряй апак аст Сёрматфксса: Христоссь лиси Давидонь юромста и Вифлеемста, ся вастста, костоннель Давид?» 43Тяфта Иисусть инкса лиссь ломаттнень ёткса пялькстома. 44Кой-конатне ёразь кундамс Сонь; но кивок ашезе кеподе лангозонза кяденц.
Евреень оцюнятнень аф кемамасна
45Тяфта Шкаень кудонь ваныхне мрдасть меки озксвятиень оцюнятненди и фарисейхненди, и сят мярьгсть тейст: «Мес ашесть вяте Сонь?» 46Ваныхне мярьгсть: «Мзярдонга кивок ашезь корхта Тя Ломанть лаца». 47Фарисейхне азозь тейст: «Дяряй тиньге васькафтоводе? 48Оцюнятнень али фарисейхнень ёткста кивок кемась Тейнза? 49Но ня аф шарьхкоди ломаттне, кит аф содасазь Моисеень коенц, – синь сюдофт!» 50Фарисейхнень ёткста фкясь ульсь Никодим, кона тяда инголе весть сашендсь Иисусти веньгучкать. Сон корхтай тейст: 51«Дяряй койса мярьгондеви судендамс ломанть, кда васенда аф кулхцондсазь и аф содасазь, мезе сон тиенди?» 52Тянь каршес мярьгсть тейнза: «Пади тонга Галилеяста? Лувк Сёрматфксть, и няйсак: Галилеяста пророк аф сай».
53И сембе сраткшнесть эсь кудгаст.
Currently Selected:
Иоанн 7: ОС16
Highlight
Share
Copy
Want to have your highlights saved across all your devices? Sign up or sign in
Библиянь ётафтома институтсь, 2016
