Иоанн 4
4
Иисус корхтай Самариянь авать мархта
1Фарисейхне марязь: Иисусонь тонафнидонза и кстиндафтонза сяда лама Иоаннонь коряс, 2хуш Иисус Сонць ашезь кстиндакшне, тянь тиендезь Сонь тонафниенза. 3Мзярда Иисус содазе, мезе кульсть колганза фарисейхне, Сон кадозе Иудеять и тусь меки Галилеяв. 4А Тейнза эрявсь ётамс Самария масторть пачк.
5Тяфта Сон сась Самариянь Сихарь ошу. Тя ошсь ащесь ся паксять ваксса, конань Иаков кунардонь пингоня максозе Иосиф цёранцты. 6Тоса ульсь Иаковонь эшиц. Иисус сизесь стака кить эзда, и сяс озась эшить ваксс. Тя ульсь котоце частть маласа.
7Самариянь фкя ава сась веденкса. Иисус корхтай тейнза: «Макст Тейне симомс». 8Ся пингть тонафниенза туфтольхть ошу ярхцамбялень рамама. 9Авась корхтай Тейнза: «Кода Тон, евреень ломань, анат симомс Самариянь ломанть кядьста?» Вдь еврейхне самарияннетнень мархта ашесть ладя.
10Иисус каршезонза мярьгсь: «Содандярялить Шкайть казненц и Кие корхтай тейть: "Макст Тейне симомс", эста тон тонць аналеть кядьстонза, и Сон максоль тейть эряфонь максы ведь». 11Авась корхтай Тейнза: «Пара ломань! Тейть аш мезьса амолдамска, а эшись крхка: коста Тейть таргави эряфонь максы ведсь? 12Дяряй Тон Иаков атянь-атядонк оцюват, Иаковда, кона максозе тейнек тя эшить, и эздонза сонцьке симондсь, цёранзовок, жуватанзовок?»
13Иисус корхтай тейнза: «Кие сими тя ведьта, сянь тага сай симомац; 14а кие сими ведьта, конань Мон максса, сянь симомац мзярдовок аф сай. И ведсь, конань Мон максса тейнза, потмосонза тиеви лихтибрякс, конань ведец максы пефтома эряф». 15Авась корхтай Тейнза: «Пара ломань! Макст тейне тяфтама ведь, эста симомазе аф сай и аф эряви тейне сашендомс тяза веденкса».
16Иисус корхтай авати: «Архт тертьк мирдценьге тяза». 17Авась мярьгсь: «Монь аш мирдезе». Иисус корхтай тейнза: «Видеть азыть: мирдце аш, 18вдь тонь ульсть вете мирттне, и ся, кона тяни эряй мархтот, аф мирдце; видеста корхтать». 19Авась корхтай Тейнза: «Пара ломань! Няйса, Тон пророкат. 20Вов минь атянь-атяньке сюконякшнесть Шкайти тя пандть пряса; а тинь, еврейхне, корхтатада: вастсь, коса эряви сюконякшнемс, аньцек Иерусалимса». 21Иисус мярьгсь: «Кемак Тейне, сашенды пингсь, мзярда афи тя пандть пряса, афи Иерусалимса карматада сюконякшнема Шкай Аляти. 22Тинь аф содасасть, кинди сюконякшнетяда; а минь содасаськ, кинди сюконякшнетяма, сяс мес еврейхнень ширде сай идемась. 23Но сай пинге, сась ни, мзярда афкуксонь сюконякшнихне кармайхть озондома Аляти Ваймопожфса и видешиса; вдь тяфтама сюконякшнихнень Алясь вешендьсыне Эстейнза. 24Шкайсь – Ваймопожф, и Тейнза озондыхненди эряви сюконякшнемс Ваймопожфса и видешиса».
25Авась корхтай Тейнза: «Содаса, сай Мессиясь, лиякс мярьгомс, Христоссь. Мзярда Сон сай, Сон азсы тейнек семботь». 26Иисус корхтай тейнза: «Тя Монан, Тя, кие корхтай мархтот».
27Тя ёткть састь Иисусть тонафниенза и таяскодсть, мес Сон корхтай ава мархта; но кивок эздост ашезе кизефте: «Мезе вешендят?» али «Мезень колга корхнят мархтонза?» 28Эста авась кадозе кукшененц, мрдась ошу и корхтай ломаттненди: 29«Арда ваность Ломанть, кона азондозе тейне семботь, мезе мон тиень. Пади Сон Христоссь?» 30Ломаттне лиссть ошста и тусть Иисусти.
Нуманди кенерьф паксят
31Сяка пингть тонафнихне эняльдсть Иисусти: «Равви! Ярхцак». 32Но Сон мярьгсь тейст: «Монь ули ярхцамбялезе, конань тинь аф содасасть». 33Тонафниенза корхтасть эсь ётковаст: «Дяряй кивок макссесь Тейнза ярхцамс?» 34Иисус мярьгсь тейст: «Монь ярхцамбялезе – ваномс Кучиезень мяленц и педа-пес тиемс Тейне максф тевонц. 35Дяряй тинь аф корхнетяда: "Тага ниле кофт, и сай нумась"? А Мон корхтан тейнть: панжесть сельмонтень и ванода видеф паксятнень лангс, кода синь акшелгодсть и кенерсть нумати. 36Нуйти пандыхть тяникиге, и сон урядасы сёроть пефтома пингонь эряфти; эста видиське и нуйське марса кенярдихть. 37Тяса ладяй азомс тяфтама валмуворкс: "Фкясь види, омбоцесь нуй". 38Мон кучедязь тинь сёронь урядама ся паксять лангста, конань тинь ашесть сока: лиятне покодсть, а тинь кочкасасть сёроснон».
Ламоц Самариянь эряйхне ушедсть кемама Иисусти
39И ся ошста лама Самариянь ломань кармась кемама Иисусти авать валонзон инкса, кона мярьгсь: «Сон азозе семботь, мезе мон тиендень». 40Сяс Самариянь эряйхне, мзярда састь Иисусти, эняльдсть Тейнза ащемс ширесост; и Сон ащесь тоса кафта шит. 41И нинге сяда лама ломань кармась кемама Иисусти, сяс мес марязь Сонь валонзон. 42А ся авати корхтасть: «Кематама ни аф тонь валхнень инкса; минць кулхцондоськ Иисусть и содасаськ: Сон афкукс масторлангть Идиец, Христоссь».
Иисус пчкафтсы оцюнять цёранц
(Матф. 8:5-13; Лук. 7:1-10)
43Ся кафта шида меле Иисус тусь Самарияста Галилеяв. 44Иисус Сонць азозе, пророкть эсь шачема масторсонза прорококс аф лувондсазь. 45Мзярда сась Галилеяв, тостонь эряйхне васьфтезь Сонь пара мяльса. Вдь синь якасть Иерусалиму Очижинь илати и няезь семботь, мезе Сон тись тоса.
46Вов Иисус тага сась Галилеянь Канав, коса тиезе ведть винакс. Капернаум ошса ульсь фкя аля, кона оцязорть ширеса ульсь оцюнякс, и сонь сярядсь цёрац. 47Мзярда оцюнясь марязе: Иисус Иудеяста сась Галилеяв, сон мольсь Тейнза и эняльдсь молемс пялонза и пчкафтомс цёранц, конац ульсь кулома лангса. 48Иисус мярьгсь тейнза: «Тинь аф кематада, кда аф няйхтяда тяштькст и дивань тефт». 49Оцюнясь корхтай Иисусти: «Азор! Сак, мзярс нинге ашезь кула цёразе». 50Иисус корхтай тейнза: «Архт, цёраце кармай эряма».
Оцюнясь кемась Иисусть валонцты и тусь. 51Ки лангса васьфтезь сонь покодиенза и мярьгсть: «Цёраце шумбра». 52Сон кизефтезе кядьстост: «Кона пингста тейнза арась сяда тёждя?» Тейнза мярьгсть: «Исяк сисемце частса псиц прась». 53Тянь коряс алясь содазе: ся ульсь сяка частоня, мзярда Иисус азозе тейнза: «Цёраце кармай эряма». Алясь кармась кемама Иисусти сонць и кудсонза сембе эряйхневок.
54Тя омбоце тяштьксть Иисус тиезе Иудеяста Галилеяв мрдамдонза меле.
Currently Selected:
Иоанн 4: ОС16
Highlight
Share
Copy
Want to have your highlights saved across all your devices? Sign up or sign in
Библиянь ётафтома институтсь, 2016
