Апостолхнень тевсна 21

Павел уи Кесарияв

1Явомда меле оцюведьге минь туме усиятненди: васенда Косу, омбоце шиня пачкодеме Родосу, тоста Патарав. 2Тоса муме Финикияв моли оцю венч. Минь озаме эзонза и туме сяда тов. 3Уеме Кипрать вакска, сон ляткшнесь кержи ширесонк, и пачкодеме Сирияв. Лоткаме Тир ошу, оцю венчста эрявсь шамдомс ускфть. 4Минь валгоме трвати и вешеськ Иисусонь мельге молихнень. Эряме синь ширесост сисем шит. Тонафнихне Ваймопожфть вятеманц коряс карнезь Павелонь Иерусалиму молемада. 5Ня шитнень меле минь поладоськ киньконь. Сембе кемайхне рьвянек-иднек ильхтемазь мянь ошть пес. Оцюведь трваса минь плманжа лангса озондоме. 6Меле ашкодоме фкя-фкянь мархта и явоме, минь озаме оцю венчти, а синь тусть куду.

7Тирста тумда меле минь аделаськ уеманьконь Птолемаидаса. Тоса суваме кемай ялганьконь варжама, ащеме ширесост фкя ши. 8Омбоце шиня минь Павелонь мархта туме кис, и Кесарияв пачкодемста суваме Пара кулянь азонкшнить, Филиппонь кудс. Тя алясь ульсь кемаень пуромксса сисем лездыхнень эзда фкясь. И вов минь лоткаме пялонза. 9Сонь ульсть ниле рьвакс апак тук стиренза, конатнень ульсь пророчествань валса корхтамань казнесна.

10Минь ащеме тоса аф кржа ши, и вов, тоза сась Иудеяста фкя пророк, лемоцоль Агав. 11Сон сувась ширезонк, сявозе Павелонь карксонц, сотозень эсь пильгонзон и кядензон, и мярьгсь: «Вов мезе корхтай Иняру Ваймопожфсь: Тяфта Иерусалимса еврейхне сотнесазь ся ломанть, кинне тя каркссь. И макссазь сонь лия ломаньтналоннетнень кядьс». 12Тянь кулемста минь и тястоконь кемайхне кармаме пяк эняльдема Павелонди – аф молемс Иерусалиму. 13Тянь каршес Павел мярьгсь: «Месенттяда? Мес аварттяда и сязендьсасть седиезень? Мон анокан аф аньцек кирдемс пякстамгудть, но и куломс Иерусалимса Иисус Азороньконь лемонц инкса». 14Сяс мес Павелонь мялец тейнек ашезь полафтов, минь сетьмолгодоме и мярьгоме: «Улеза Шкайть мяленц коряс!»

Павелонь пачкодемац Иерусалиму

15Ся шитнень меле минь срхкаме кис и туме Иерусалиму. 16Минь мархтонк мольсь мзярошка тонафни Кесарияста, синь вятемазь минь Мнасононь пяли. Тя алясь шачемас коре Кипрастоль, кунардонь тонафнихнень ёткста фкясь. Минь срхкаме лоткамс сонь пялонза.

17Вов минь пачкодеме Иерусалиму. Кемай ялгатне васьфтемазь пяк лямбоста. 18Омбоце шиня Павел минь мархтонок мольсь Иаковонди. Тоза пуромсть кемаень пуромксонь сембе оцюнятне. 19Шумбракстомда меле Павел педа-пес азондозе семботь, мезе Шкайсь тись лия ломаньтналхнень ёткса сонь покодеманц вельде.

20Тянь кулхцондомда меле, синь шназь Шкайть, а сяльде мярьгсть Павелонди: «Кемай ялга, тон няйсак, мзяра тёжянь еврейда кармась кемама, и сембе синь седи путыхть койть инкса. 21А тейст мярьгсть, кле, тон тонафнесайть лия масторга эряй еврейхнень аердомс Моисеень коенц эзда; корхнесайть синь аф керсемс цёраснон киськопеснон и аф ванфтомс минь коеньконь-иланьконь. 22Мезе тиемс? Ломаттне видекс пуромихть, сяс мес кульсазь тонь самацень колга.

23Тик сянь, мезе минь мярьктяма. Улихть тяса ниле ломаненьке, конат макссть варамань вал Шкайти. 24Архт и ётафтт мархтост аруяфтомань ила#21:24 аруяфтомань ила – улема, лама пинге эрямок лия тналонь масторса, Павелонди эрявсь ётафтомс аруяфтомань ила Шкаень куду сувамда инголе и Шкаень кудонь иласа улеманкса. и пандыть синь карьхцснон прянь нарафтомаснон инкса. Эста сембе содасазь: ся, мезе корхнихть колгат, аф виде, меколанкт – тон кемоста ванфтсак койть. 25Кда корхтамс лия ломаньтналста кемайхнень колга, минь сёрмадоськ тейст эсь ладяфксоньконь: катк синь мезевок тяфтама аф ванфтыхть, аньцек тязаст ярхца сяда, мезе канневсь озксказнекс аф афкуксонь шкайхненди, верда, поваф жуватань сивольда, кирдельхть пря усксевомада».

26Эста Павел сявозень ня алятнень и омбоце шиня ётафтсь мархтост аруяфтомань ила. Сяльде мольсь Шкаень куду азомонза озксвятити, мзярда аделавихть аруяфтомань шитне и мзярда эрть инкса максови озксказне.

Павелонь кундамац

27Ня сисем шитне ётама лангсотольхть ни, мзярда Асияста саф еврейхне няезь Павелонь Шкаень кудса. Синь кеподезь сембе ломаттнень и кундазь Павелонь. 28«Израилень ломатть, лездода! – юватькшнесть синь. – Вов тя алясь, кона эрь вастова тофнесыне сембонь молемс минь ломаньтналоньконь, коеньконь и тя вастть каршес. А тяни сон нльне вятсь Шкаень куду грект и тянь вельде гастязе тя иняру вастть!» 29Тевсь ва мезьсоль: тяда инголе синь няезь Павелонь ошса Ефесста Трофимть мархта и арьсесть Павел вятнезе сонь Шкаень куду. 30Марнек ошть сявозе таколдома, пуромсть ломатть. Павелонь кундазь и лихтезь Шкаень кудста. Шкаень кудть кенкшенза эстокиге пякставсть.

31Мзярда синь ёразь шавомс Павелонь, ся ёткть тёжянь ушманонь оцюняти пачфтсть куля, кле, марнек Иерусалимть сявозе таколдома. 32Тёжянень оцюнясь сявсь мархтонза ушматт и сядонь оцюнят и ёрдась пря ломаттнень ёткс. Ломаттне тёжянень оцюнять и ушматтнень няемстост лоткасть пикссемдонза Павелонь. 33Эста тёжянень оцюнясь маладсь и сявозе Павелонь, мярьгсь пинкстамда сонь кафта цинзерса. Сяльде кизефтезень: кие тя ломанць и мезе сон тись? 34Но финц ломаттне юватькшнесть фкя, а омбонцне – лия. Тёжянень оцюнясь жалфть потмоса мезевок ашезь шарьхкоде, сяс сон мярьгсь вятемда Павелонь ушманкудс. 35Тов вяти куцеманява кеподемста ломаттне сяшкава люпштасть эсост, нльне ушматтненди савсь Павелонь кандомс кядьсост. 36А ломаттне стаки ашесть ляткшне и пешкоткшнесть: «Кулома тейнза!»

Павел араласы эсь прянц

37Ушманкуду сувафтомстонза Павел пшкядсь тёжянень оцюняти: «Мярьгат тейне кой-мезе азомс тейть?» Ся дивандазевсь: «Тон корхтат грекокс? 38Дяряй тон аф Египетонь ся эряйсь, кона аф кунара кеподсь таколф и лихтсь шавмодав ниле тёжятть ломанень шави аля?» 39«Аф, – мярьгсь Павел, – Мон евреян, пяк лац содаф Тарс ошста, кона Киликияса. Эняльдян тейть, мярьк тейне пшкядемс ломаттненди». 40Мзярда ся мярьгсь, Павел арась куцема пряти и кядьса няфтсь ломаттненди, кле, мялезе корхтамс мархтонт. Кодак тиевсь сетьме, Павел ушедсь корхтама евреень кяльса:

Currently Selected:

Апостолхнень тевсна 21: ОС16

Highlight

Copy