Апостолхнень тевсна 19

Павел Ефесса

1Мзярда Аполлос ульсь Коринфса, Павел ётазень пандолангонь масторхнень, сась Ефесу и васьфтсь тоса мзярошка тонафни. 2Сон кизефтезень: «Тинь лангозонт валгсь Иняру Ваймопожфсь, мзярда кармаде кемама?» Сят мярьгсть каршезонза: «Минь афи кулендеме Иняру Ваймопожфть колга». 3Эста Павел кизефтезень: «Кодама кстиндафтома тинь сяводе?» Сят мярьгсть каршезонза: «Иоаннонь кстиндаманц». 4Павел мярьгсь: «Иоанн кстиндазень сятнень, кит аердасть пежеснон эзда, тернемок ломаттнень кемамс Сянди, конанди самаль Иоаннда меле – Христос Иисусти». 5Тянь кулемда меле синь кстиндафтсть пря Иисус Азорть лемса. 6Мзярда Павел путозень лангозост кядензон, Иняру Ваймопожфсь валгсь синь лангозост, и синь кармасть корхтама лия кяльса и пророчендама. 7Эздост ульсь кемгафтувошка аля.

8Колма ковоньберьф Павел якась синагогав и апак пельхть тоса азондсь Шкаень Оцязорксшить колга и кемафтозень эсь кулхцондыензон. 9Но ёткстост кона-кона ломаттнень седисна калготкстомсть, и синь ашель мяльсна кемамс, сяс сембонь ингольде сялдозь Азорть кинц. Эста Павел сявозень тонафнихнень и тусь эздост. Сон эрь шиня кармась корхнема мархтост Тираннонь школаса. 10Тоса тя тевть Павел вятезе кафта кизот. Тяфта Асиянь марнек эряйхне, кода еврейхне, стане грекневок, кулезь Иисус Азорть колга кулять.

Скевань цёранза

11Шкайсь тись Павелонь кядензон вельде дивань тефт. 12Нльне мзярда сярядихнень лангс путнезь Павелонь покодемань руцянянзон и ингольксонзон, урмасна кадондозь синь и кяжи ваймопожфне лисендсть эздост.

13Тяконь лаца кона-кона якай-шяяй еврейхне, кяжи ваймопожфонь панцихне, кармасть тернемонза Иисус Азорть лемонц кяжи ваймопожфса колафнень вельхксса. «Лихттядязь тинь Иисусонь лемса, конань колга азонды Павел!» – корхтасть синь. 14Тяфта тиендсть евреень озксвятить Скевань сисем цёранзовок. 15Но кяжи ваймопожфсь каршезост мярьгсь: «Иисусонь содаса, Павелонь колгавок кулендень. Ина тинь китяда?» 16Эста ся ломанць, конань эса ульсь кяжи ваймопожфсь, пялязкс врьгятсь лангозост, сяськозень сембонь и стане пикссезень, нльне сят крхтапа и керсефста-тапафста ворьгодсть ся кудста.

17Тянь колга кармасть содама Ефесса эряй сембе еврейхне и грекне. Сембонь сявозень пелема и синь кармасть шнамонза Иисус Азорть лемонц. 18Ламотне, конат кармасть кемама, сашендсть и сембонь инголе виденцякшнесть эсь пежу тевсост. 19Тяфта жа ламотне, конат тяда инголе тиендсть колдувамань тефт, кандозь эсь книгаснон тя вастти и сембе ломаттнень ингольде плхтазь синь. Мзярда лувозь книгатнень питнеснон, лиссь ведьгемонь тёжянь драхмань питне. 20Вов тяфтама оцю вийса кассь-келемсь Шкайть валоц.

21Сембода тяда меле, Павел Ваймопожфть вятеманц коряс арьсесь тумс Македониять и Ахаиять пачк Иерусалиму. Сон мярьгсь: «Иерусалимда меле тейне эряви улемс Римса». 22Сон кучезень Македонияв кафта лездыензон, Тимофеень и Ерастонь, а сонць аф ламос кирдевсь Асияса.

Ефесса кеподи комболдома

23Тя пингть Ефесса кеподсь оцю комболдома Азорть кинц каршес. 24Тоса эрясь сиянь тевса покоди аля, Димитрий, кона тиендсь сияста Артемида шкайавати лемтьф налхкшень шкайгуднят, мезсь каннесь тейнза и мархтонза покодихненди оцю козяши. 25Димитрий кочказень нятнень и тяка тевса лия покодихнень и мярьгсь: «Ялгат, тинь содасасть, тя тевть эзда ащи минь козяшиньке. 26Но тинь тинць няйсасть и кульсасть, мезе тии тя Павелсь. Сон корхтай, кле, ломанень кядьса тиф шкайхне ёфси аф шкайхть. Тянди сон кемафтсь и аф кржа ломань васькафтсь Ефесса и пцтай марнек Асияса. 27Тя пелькс тейнек аф аньцек сяс, мес покодеманьконь мезькска аф кармайхть лувомонза, но и сяс, мес Артемидань, оцюдонга оцю шкайавать шкайгудоц юмафтсы эрявиксшинц. И тяза лисе стане: кири оцюдонга оцюшиц сянь, кинди сюконякшни марнек Асиясь и масторлангсь».

28Тянь кулемста синь лиссть эсьстост и ювадсть: «Ефесонь Артемидась оцюдонга оцю!» 29Марнек ошть сявозе таколдома, сембе уромсть театрав, мархтост ускозь Павелонь ки лангонь ялганзон, Македониянь Гаиень и Аристархонь. 30Павел ёрась лисемс ломаттнень инголи сонць, но тонафнихне ашезь нолда сонь. 31Тяда башка, Асиянь оцюнятнень эздовок кой-конат, Павелонь ялганза, эняльдсть тейнза ломань вельде: аф эряви эвондакшнемс тейнза театраса.

32Пуромксса тя ёткть мольсь кати-мезе: финцне юватькшнесть фкя, омбонцне омбоцеть, сяда ламотне афи содазь, мезенкса тяза кочкавсть. 33Еврейхне ломаттнень ёткста лихтезь Александронь. Александр яфодсь кядьса, ёрась азондомс ломаттненди, мезьса тевсь. 34Но кодак содазь – сон еврей, сембе фкя вайгяльса ювадсть: «Ефесонь Артемидась оцюдонга оцю!» И мянь кафта частт ашесть лотксе пешкоткшнемда.

35Меколи фкясь ошень оцюнятнень эзда сетьмофтезень ломаттнень. Сон мярьгсь: «Ефесонь ломатть, кие тянь аф содасы: Ефес ошсь ванфнесы инь оцю Артемида шкайавать шкайгудонц и менельста праф шамаликонц? 36Кивок тянь каршес вал аф азы. Сяс сетьмода и тяда срхкафне ёньфтома тефт. 37Тинь вятесть сей ня ломаттнень, но вдь синь аф муворуфт аф Артемидань шкайгудботмонц саламаса, аф шкайавантень сялдомаса. 38Тяфта, кда Димитрий фкя тевонь ялганзон мархта кинь-бди муворгофнесазь, тянкса улихть оцюнят и сутт, катк пшкядихть судти. 39А кда мяленте сатомс мезевок лия, эста тевсь ванови койс коре кочкаф пуромксса. 40Афток минь муворгофтсамазь таколфонь кеподеманкса, сяс мес тняра ломанень пуропнемс аш кодамонга туфтал; и тейнек аш мезьса араламс пря». Ня валда меле сон мярьгсь ломаттненди срадомда кудгаст.

Currently Selected:

Апостолхнень тевсна 19: ОС16

Highlight

Copy