Апостолхнень тевсна 1

Надияфтомась Иняру Ваймопожфть колга

1Эсь васенце книгасон, Феофил, мон азондыне тейть семботь, мезе тиендсь и мезти тонафтсь Иисус ушетксста сявомок 2и ся шить самс, мзярда Сон кеподсь менели. Тяда инголе Сон Иняру Ваймопожфть вельде макссь кошаркст Эсь кочкаф апостолонзонды. 3Крёз лангса маятамдонза меле, Сон эвондазе тейст Эсь прянц и лама кемокстама вельде няфтезе – Сон шиса. Сон эвондакшнесь тейст нильгемонь шинь кувалма и азонкшнесь тейст Шкаень Оцязорксшить колга. 4Улемок синь мархтост, Иисус мярьгсь тейст: «Тяда тушенда Иерусалимста, но учесть Алязень эзда надияфтф казнеть, конань колга тинь куледе Монь эздон. 5Иоанн кстиндась ведьса, а тинь аф лама шида меле ульхтяда кстиндафт Иняру Ваймопожфса».

6Вов пуромфне кармасть кизефнемонза: «Азор! Лисенди, Тон тяни меки кеподьсак Израилень масторть?» 7Сон каршезост мярьгсь: «Аф тинне тевсь содамс пинкнень и ёткнень, конатнень Эсь азорксшисонза ладязень Алязе! 8Но мзярда лангозонт валги Иняру Ваймопожфсь, тейнть максови вий и карматада азондома ломаттненди семботь, мезе содатада колган – Иерусалимса и марнек Иудеяса, Самариясонга и мянь модать пенц самс».

Иисусонь менели кеподемац

9Ня валда меле синь сельме ингольдест Иисус кармась кеподема менели, и коволсь кяшезе Сонь ингольдест. 10Мзярда синь ванцть менели Сонь кеподемстонза, апак учт синь инголест эвондасть акша щамса кафта алят 11и мярьгсть: «Галилеянь эряйхть! Мезе тинь ащетяда и ваттада менели? Тя Иисуссь, кона кепотьф тинь эздонт менели, мрдай тяконь лаца, кода тусь тинь ингольдент менели!»

12Эста тонафниенза валгсть панда пряста, кона лемневсь Вайшуфта, и мрдасть Иерусалиму; а тя пандсь ошть эзда аф ичкозель, вайгяльбе кувалмошка#1:12 Ваймамань шиня ломанти мярьгондевсь ётнемс аньцек вайгяльбень кувалмошка ки.. 13Ошу самста тонафнихне кеподсть вярдень кудбяльксти, коса синь фалу пуромкшнесть. Нят ульсть Пётр и Иаков, Иоанн и Андрей, Филипп и Фома, Варфоломей и Матфей, Алфеень цёрац Иаков, Симон Зилот и Иаковонь цёрац Иуда. 14Сембе синь фкя мяльса пуромкшнесть марса озондома и эняльдема, мархтост ульсь мзярошка ава, Иисусонь тядяц Мария и Иисусонь брадонза.

Матфий кочкави апостолкс Иудань вастс

15-16И вов ся шитнень Пётр арась тонафнихнень инголе (а пуромфта ульсь сяда комозьшка ломань) и мярьгсь: «Кемай ялгат! Сёрматфксса Иняру Ваймопожфсь Давидонь вельде инголькиге азозе, мезе сатсы Иудань. Тянди эрявсь пяшкодевомс. Тя Иуда няфтезе кить сятненди, кит мольсть Иисусонь сявомонза, 17хуш и ульсь сон эздонк фкясь, мархтонк марса покодсь апостолонь тевса. 18Ярмакнень лангс, конатнень сявозень равжа тевонц инкса, Иуда рамась пакся, и тоса прась и тапавсь стане, нльне пекоц лопадсь и сембе потмонза лиссть. 19Тянь колга кульсть Иерусалимонь сембе эряйхне, и тя паксять лемдезь "Акелдама", синь кяльстост ётафневи "Веры пакся". 20Вдь Псалтирьса сёрматф:

"Катк эряма вастоц ляды шавокс,

Катк аф ули эсонза эряй"#1:20 Псалтирь 68:26.

И нинге:

"Катк лия ломань сявсы сонь ваныень тевонц"#1:20 Псалтирь 108:8.

21Сяс тейнек эряви вастозонза сувафтомс ёткозонк лия – фкять сятнень эзда, кие фалу ульсь мархтонк, сембе ся пингть, мзярда Иисус Азороньке ётксонколь, 22ушедомок ся пингста, мзярда Иоанн кстиндазе Сонь, и ся шити самс, мзярда Иисус сявфоль эздонк менели. Эздост фкясь катк ули минь мархтонк марса Сонь кулофнень эзда вельмаманц колга азондыкс».

23Азсть кафта ломатть: Иосифонь, конань лемнезь Варсава али Иуст, и Матфиень. 24Пуромфне ушедсть озондома, корхтасть: «Азор, Тейть содафт ломанень седихне! Няфтьк тейнек, кинь кафттнень ёткста Тон кочкайть 25апостолонь тевти, конань кадозе Иуда, мзярда тусь тов, коса сонь вастоц». 26Синь ёрдасть жерьба: конань эздост кочкамс, и жерьбась прась Матфиенди. Сон и арась кемгафтувоце апостолкс.

Currently Selected:

Апостолхнень тевсна 1: ОС16

Highlight

Copy