लुका 9
9
येसुन बार चेलाल्काइ पर्चार गरइ पाठाइल
(मति १०:५-१५; मर्कुस ६:७-१३)
1येसुन बारेउटाइ चेलाल्काइ आफ्ने नजिक बालाइके होल्काइ सेब्बे किसिमकराइ भुत आत्मा निकाल्नार र बिरामिल्काइ बिसेक पार्नार सक्ति र अधिकार दिल्याक। 2येसुन होल्काइ परमेसोरकर राज्यकर बारेनाइ सुनाइ र बिरामिल्काइ बिसेक पारइ पाठाइल्याक। 3येसुन होल्काइ बल्-ल्याक, “तोरा बाट्कर लागि केइ पुनि जुनलाकाओ। लठ्ठि, झोला, खाइनार कुरो, पइसा र फेर्नार लुगा किछु पुनि जुनबोको। 4तोराल्काइ जुन घरकराइ मान्छेल्किन स्वागत गर्छत, ह्व सहर नछाडुन्जेल तोरा होइ घरनाइ ने बसइ। 5तर तोराल्काइ कुनइ सहरनाइ मान्छेल्किन स्वागत बइगर्ला भने ह्व मान्छेल्काइ परमेसोरिन गर्नार न्यायकर दिननाइ होल्को बिरुद्दनाइ साछि देइलाइ पइतलाकर धुलो टकटकाइकइ#९:५ पइतलाकर धुलो टकटकाइ हेक्र अर्थ येसुकर बारेनाइ सुनइ इन्कार गर्लाइ र येसुसिन होल्को सरोकार बइने बल्ल बुजाइछि, ह्व गाउँलाइ छाडो।”#लुक १०:४-११; पे १३:५१
6अनि चेलालत गाउँ-गाउँनाइ जाइला र सुसमचार सुनाइतिन बिरामिल्काइ बिसेक पार्ला।
येसुकर बारेनाइ सुनिके हेरोद छक्क पर्ल
(मति १४:१-१२; मर्कुस ६:१४-२९)
7येसुन गर्ल कामकर बारेनाइ सुनिके राजा हेरोद छक्क पर्ले किनारइभने कोइ-कोइकिन बप्तिस्मा दिनार युहन्ना जिउँते हकिके उठ्लाछ बाज्तेला। 8कोइकिन चाइ “एलिया अगमबक्ता देखा पर्लसइ” बाज्तेला। आनेल्किन बाज्तेला, “उइलेकर कुनइ अगमबक्ता जिउँते हकिके उठ्लसइ।”#मति १६:१४; मर्क ८:२८; लुक ९:१९ 9तर हेरोदिन बाज्ले, “युहन्नाकर कापाल ता मुइनिन ने काटइ लाइल हो, तर ह्य मानुस चाइ कुन हो, जुनकर बारेनाइ मुइ इन्खा अनउठो कुरो सुन्तिन आछु?” अनि होइनिन येसुलाइ भेट्टाइनार इछ्या गर्ले।
येसुन पाँच हजार मान्छेल्काइ ख्वाइल
(मति १४:१३-२१; मर्कुस ६:३०-४४; युहन्ना ६:१-१३)
10अनि पेरितलत पर्चार गरिके फर्किलपछि होल्किन आफिन गर्ल सेब्बे कुरो येसुलाइ सुनाइला। येसुन होल्काइ लिके बेथसेदा सहर नजिकइ सुटुक्क जाइले। 11तर ह्य कुरो था पाइके मान्छेल्को भिड येसुकर पछि लाग्ला। येसुन होल्काइ स्वागत गर्ल्याक र परमेसोरकर राज्यकर बारेनाइ सुनाइल्याक, अनि बिरामिल्काइ बिसेक पार्ले।
12घाम अस्ताइ लाग्ल बेलानाइ ह्व बारेउटाइ चेलालत आइके येसुलाइ बल्ला, “ह्य मान्छेल्काइ बिदा दिखन। होलत वरिपोरिकर गाउँदिस जाइके आफ्ने लागि खाइनार र बास बस्नार बन्दोबस्त गर्दिखन, किनारइभने इछि हाइ केइ बइहक्नार उजाड ठउँनाइ आछे।”
13तर येसुन होल्काइ बल्-ल्याक, “तोराल्किन ने हेल्काइ खाइ दिखन।”
होल्किन बाज्ला, “पर्भु, हाइसिन पाँचुटो पिठो र दुइटि माछ मात्र आछ। केति हाइनिन सेब्बाइ मान्छेल्को लागि खाइनार कुरो किनिकइ आनइ?”
14उछि अडेलत मात्र पाँच हजार जत्ता रइला।
येसुन चेलाल्काइ बल्-ल्याक, “होल्काइ पचास-पचासकर समुहनाइ बसइ लाखन।”
15अनि चेलाल्किन मान्छेल्काइ उन्खाए गरिके बसाइल्याक। 16ह्व पछि येसुन पाँचुटो पिठो र दुइटि माछ लिके स्वर्गदिस हेर्तिन परमेसोरलाइ धन्नेबाद दिल्ते, अनि येसुन पिठो र माछ टुक्रा पारिके मान्छेल्काइ बाड्देइ बाजिके चेलाल्काइ दिल्याक। 17सेब्बाल्किन आघाउन्जेल खाइला र उघ्रिल टुक्रालत चेलाल्किन जम्मा गर्तिन बार डालो हकल्ते।
येसु कुन हो?
(मति १६:१३-२३; मर्कुस ८:२७-३३)
18एक दिन येसु अस्करे पार्थना गरिधर्ल रइल, चेलालत पुनि येसुकर छेउनाइ रइला। येसुन होल्काइ सोद्ल्याक, “मान्छेल्किन मुइलाइ कुन हो बाज्छत?”
19होल्किन बाज्ला, “कुन्नुल्किन बप्तिस्मा दिनार युहन्ना हो बाज्छत, कुन्नुल्किन एलिया अगमबक्ता हो बाज्छत, अनि कुन्नुल्किन चाइ उइलेकर कोइ अगमबक्ता मर्लबान जिउँतिल हक्ति बाज्छत।”#मति १४:१-२; मर्क ६:१४-१५; लुक ९:७-८
20येसुन होल्काइ फेरि सोद्ल्याक, “तर तोराल्किन चाइ मुइलाइ कुन हो बाज्छो?”
पत्रुसिन जबाफ दिल्ते, “तुइ परमेसोरिन पाठाइल खिरिस्ट हो।”#युह ६:६८-६९
येसुन आफ्ने मर्नार बारेनाइ बाज्ल
(मति १६:२०-२८; मर्कुस ८:३०-३८;९:१)
21येसुन होल्काइ “ह्य कुरो कुनुल्काइ पुनि जुनबल्खन” बाजिके कडा चेतावनि दिल्याक। 22अनि येसुन होल्काइ बल्-ल्याक, “मानुसकर बेटाकिन धेरइ दुख भोगइपर्छि, र होलाइ मुख्य अगुवाल्किन, मुख्य पुजारिल्किन र धर्म-गुरुल्किन इन्कार गर्नारआछत र मार्नारआछत अनि ह्व तिन दिननाइ मर्लबान फेरि जिउँते हकिके उठ्नारआछ।”
23फेरि येसुन सेब्बाल्काइ बल्-ल्याक, “कोइ मोर चेला हकइ चाइछइ भने होइनिन आफ्ने सेब्बे इछ्या छाड्दिक अनि दिन्ने आफ्ने कुरुस बोकिके#९:२३ कुरुस बोकिके हेक्र अर्थ येसुकर लागि दुख भोगइ र मरइ पुनि तयार हकइ हो। मोर पछि लाग्दिक।#मति १०:३८; लुक १४:२७ 24किनारइभने जुनिन आफ्ने जिबन बाचाइ चाइछइ होइनिन ह्व गुमाइछइ, तर आफ्ने जिबन मोर लागि दिनारिन चाइ आफ्ने जिबन बाचाइनारआछ।#मति १०:३९; लुक १७:३३; युह १२:२५ 25मानुसिन सेब्बे सन्सारलाइ आफ्ने हात पारिके पुनि आफिलाइ चाइ गुमाइछइ भने होलाइ केति फाइदा हकल्ते र? 26जुन मानुस मुइसिन र मोर बचनसिन लाजाइछइ, मानुसकर बेटाक पुनि आफ्ने र आफ्ने ब्वाककर र पबित्र स्वर्गदुतकर महिमानाइ आइतिन होलाइ आफ्ने बलइलाइ लाजाइनारआछ। 27तर साँच्चि मुइ तोराल्काइ बल्छु, इछि ठडाइनाराइ मद्दे कत्ताल्किन चाइ परमेसोरकर राज्यलाइ नदेखुन्जेल सम्म मर्नाराइ बइनेत।”
येसुकर रुप परिबर्तन
(मति १७:१-८; मर्कुस ९:२-८)
28ह्य कुरो बाज्ल लगभग आठ दिनपछि पत्रुस, युहन्ना र याकुबलाइ लिके येसु डाँरानाइ पार्थना गरइ जाइले।#२प १:१७-१८ 29येसुन पार्थना गरिधर्ल बेलानाइ येसुकर अनुहार फेरल्ते र येसुन लाइल लुगा हिउँ जिन्खाए गोरो हकिके चम्कल्ते। 30अनि एक्कासि दुइटाइ मानुस देखा पर्ला र येसुसिन बात मारइ लाग्ला। होलत मोसा र एलिया रइला। 31होलत महिमित सरिरनाइ देखा पर्ला र येसु मरइपर्नार बारेनाइ बात मार्तिन रइला र ह्य कुरो येसुन यरुसलेमनाइ पुरा गरइ पर्नार रल्ति। 32पत्रुस र होक्र साथेकलत मस्त निदाइलाइ रइला। तर बिउँझितिन होल्किन येसुकर महिमानाइ ह्व दुइटाइ मान्छेलत येसुसिन ठडाइधर्ल देख्ला। 33ह्व दुइटाइ मान्छेलत येसुसिन बिदा हकिके जाइ आँट्तिन पत्रुसिन येसुलाइ बलल्ते, “गुरु, हाइ इछि बसइ मजार रल्तिसइ। इछि तिन्टो छाप्रो बानाउ, एउटो तुइलाइ, एउटो मोसालाइ र एउटो एलियालाइ।” आफिन बाज्ल कुरो पत्रुसलाइ ख्याल ने बइहकल्ते।
34पत्रुस बाज्तिन गर्तिन एउटो बादल आइके होल्काइ छोप्ल्याक, र ह्य देखिके चेलालत डाराइला। 35अनि बादलबान इन्खा आवाज आल्ते, “ह्य मोर बेटाक हो, ह्यलाइ मुइनिन छान्लाछु। हेइनिन बल्ल कुरो तोराल्किन मानो।”#यस ४२:१; मति ३:१७;१२:१८; मर्क १:११; लुक ३:२२
36ह्व आवाज रोक्किलपछि चेलाल्किन येसुलाइ मात्र देख्ला। चेलाल्किन आफिन देख्ल कुरो धेरइ पछिसम्म कुनुल्काइ पुनि बइबल्-ल्याक।
येसुन भुत आत्मा लाग्ल छोडारिलाइ बिसेक पार्ल
(मति १७:१४-१८; मर्कुस ९:१४-२७)
37अर्को दिन येसु चेलाल्कोसिन डाँराबान झर्लपछि मान्छेल्को बड्खो भिड येसुलाइ भेट्टाइ आइला। 38भिडबान एउटो मानुसिन साराइतिन बाज्ले, “गुरु, मुइ बिन्ति गर्छु मोर बेटाकलाइ हेर्देउ किनारइभने ह्य मोर एउटो मात्र बेटाक हो। 39ह्यलाइ भुत आत्मान एकतारइ छोप्छि र ह्व चिच्याइतिन मुर्छा पर्छइ, मुखबान फिँज काड्छइ। होलाइ लछारपछार पारिके बल्ल-बल्ल छाड्छि। 40मुइनिन तोर चेलाल्काइ भुत आत्मा निकालिदेओ बाजिके बिन्ति गर्नाइ, तर होल्किन बइसक्ला।”
41येसुन बाज्ले, “ए बिस्वास बइगर्नाराइ पुस्ता, मुइ तोराल्कोसिन कखनसम्म बस्छु र? मुइ तोराल्काइ कत्तासम्म सइधरइ?” ह्व पछि येसुन छोडारिकर ब्वाकलाइ बलल्ते, “तोर बेटारलाइ इतइ लिके आबे।”
42ब्वाकिन बेटाकलाइ आन्तिन-आन्तिन भुत आत्मान होलाइ पछारिकइ अइठन पारल्ते। तर येसुन भुत आत्मालाइ हाकारल्ते र ह्व छोडारिलाइ बिसेक पारिके होक्र ब्वाकलाइ दिल्ते। 43परमेसोरकर इन्खा बड्खो सक्ति देखिके सेब्बाइ मान्छेलत छक्क पर्ला।
येसुन फेरि आफ्ने मर्नार बारेनाइ बाज्ल
(मति १७:२२-२३; मर्कुस ९:३०-३२)
मान्छेल्किन येसुन गर्ल सेब्बे काम देखिके छक्क परिधर्ल बेला येसुन चेलाल्काइ बल्-ल्याक, 44“मुइ बल्ल ह्य कुरो तोराल्किन जुनबिर्साओ, किनारइभने मानुसकर बेटाकलाइ आठाइके मान्छेल्को हातनाइ जिम्मा लाइदिनारआछत।” 45तर चेलाल्किन ह्य कुरो बुजइ बइसक्ला। किनारइभने ह्य कुरो होल्कोबान नुकाइल रल्ति र केति बाज्ल हो बाजिके होल्किन येसुलाइ सोदइ आँट पुनि बइगर्ला।
सेब्बाइ भन्दा बड्खो कुन हो?
(मति १८:१-५; मर्कुस ९:३३-४०)
46बारुटाइ चेलालत “हाइ मद्दे कुन्टो चाइ सेब्बाइ भन्दा बड्खो हक्नार हो” बाजिके हानाथाप गरइ थाल्ला।#लुक २२:२४ 47येसुन होल्को मनकर बिचार था पाइके एउटो नानिलाइ आफ्ने छेउनाइ धरल्ते, 48अनि होल्काइ बल्-ल्याक, “जुनिन मोर नाउँनाइ ह्य नानिलाइ सुइकार गर्छइ, होइनिन मुइलाइ सुइकार गर्छइ, अनि जुनिन मुइलाइ सुइकार गर्छइ, होइनिन मुइलाइ पाठाइनारलाइ पुनि सुइकार गर्छइ। तोरा मद्दे जुन सेब्बाइभन्दा स्यान्खो हक्छइ, होइ ने सेब्बाइभन्दा बड्खो हक्नारआछ।”#मति १०:४०; लुक १०:१६; युह १३:२०
येसु नाउँकर सक्ति
(मर्कुस ९:३८-४०)
49युहन्नान येसुलाइ बलल्ते, “गुरु, हाइनिन एउटो मानुसलाइ तोर नाउँनाइ भुतकाइ निकालिधर्ल देख्ले अनि हाइनिन होलाइ इन्खा गरइ बइदिले किनारइभने ह्व हाम्रो समुहकर बया।”
50येसुन होलाइ बलल्ते, “होलाइ जुनरोको, तोराल्को बिरोद बइगर्नाराइ जत्ता तोराल्के पछ्यनाइ हक्छत।”
सामरिल्किन येसुलाइ मान बइगर्ला
51येसुकर स्वर्ग जाइनार दिन नजिकइ आइल हुदान येसु जिनिखे नि यरुसलेमदिस जाइनार मन गर्ले। 52येसुन खबर लाकाइनारकाइ पइला ने पाठाइल्याक। होलत जाइला, र येसुकर लागि सेब्बे कुरो ठिक पारइलाइ सामरिल्को एउटो गाउँनाइ पस्ला। 53तर येसु यरुसलेमदिस जाइतिन आछ बल्ल कुरो था पाइके कुन्नुल्किन पुनि येसुलाइ मान बइगर्ला। 54ह्य देखिके येसुकराइ चेलालत याकुब र युहन्नान बाज्ला, “पर्भु, तुइ चाइछस भने स्वर्गबान आगि झारिकइ होलत भस्म हक्दिखन बाजिके हाइ आग्या गरुँ?”#२रा १:९-१६
55तर फर्किके येसुन होल्काइ हाकार्ल्याक। 56ह्व पछि येसुन होल्काइ लिके अर्को गाउँनाइ जाइले।
चेलाल्किन त्यागइ पर्नार कुरो
(मति ८:१९-२२)
57येसु चेलाल्कोसिन जाइधर्तिन बाट्नाइ एउटो मानुसिन आइके येसुलाइ बलल्ते, “हे पर्भु, तुइ जछि जाइतिन पुनि मुइ तोर पछि जाइनारआछु।”
58येसुन होलाइ बलल्ते, “स्यालको नुक्नार दुलो आछि, आकासनाइ उड्नाराइ चरिल्को खोँदा आछि, तर मानुसकर बेटाककर ता कापाल नुकाइनार ठउँसम्म बइने।”
59अनि येसुन अर्को मानुसलाइ बलल्ते, “मोर पछि लाग।”
तर होइनिन बाज्ले, “पर्भु, पइले जाइके मोर ब्वाकर लासलाइ गड्काइ देउ।”
60येसुन होलाइ बलल्ते, “मुर्दाल्काइ मुर्दाल्किन ने गड्काइ दिखन#९:६० मुर्दाल्काइ मुर्दाल्किन ने गड्काइ दिखन येसुलाइ बिस्वास बइगर्नाकिन ने बिस्वास बइगर्नाकाइ गड्काइदिखन । तर तुइ चाइ जाइके परमेसोरकर राज्यकर पर्चार गर।”
61फेरि अर्को एउटो मानुसिन येसुलाइ बलल्ते, “पर्भु, मुइ तोर पछि लाग्नारआछु, तर पइले आफ्ने घरनाइ हक्नारकोसिन बिदा लेइ देउ।”#१रा १९:२०
62तर येसुन होलाइ बलल्ते, “हल जोत्तिन पछाडि फर्किके हेर्नार कोइ पुनि परमेसोरकर राज्यकर योग्य बइहक।”
Currently Selected:
लुका 9: MAJH
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
