Camba 7

Masma ɗumbee kehƴi

1Wa ineem raak, Nikiɗi woosa Noohin ne : « Aasa ŋ ɗooƴ gaali, fu na ɓi kahan fu laam, ŋ hot ɗa dong yurhiɗ ngaŋ ɓooɓiŋ jamanooniŋ ɗa. 2Ɓayndoha ŋ ɗoopaat ci hooliɗ ci#7:2 ɗoopaat hooliɗ : a yi ɗoopti min seeƴkohu te a minnda ñamu ngaŋ Heber ci., riɓ yasna-kanak na naar yasna-kanak, na ci hoolaaɗiici, riɓ yino na naar yino, 3na sel ci, riɓ yasna-kanak na naar yasna-kanak ; ne cuuɓ ciŋ ca min ris ŋ kehƴi. 4Laam, ndii na neeh yasna-kanak, ŋ hey toɓe toɓ yakak, ini ree neeh ndaŋkiyaah-nikiis (40). Ŋ ɗumb in ci ŋ fer na iike ŋ kehƴi jen. » 5Noohin tumohhaa ɗaa, findi Nikiɗi nakohee ɗe wa.

6Wa Noohin raak kiis teemet-yasna-yino (600), weɗ masuɓ riifɗoh kehƴi. 7A aaseen ŋ ɗooƴ gaala, a yi na ɓitiice na kuɓuuciŋ ɗe kaahay ci na ɓitiɓ ciŋ ɓa, ne ɓa muc ŋ masma. 8Ɗoopaat ci hooliɗ ci na ci hoolaaɗiici, sel ci na in ci ƴin ƴin ci na iike ŋ kehƴi jen, 9ca raakeen Noohin ŋ gaala kanak kanak, naar na riɓ, findi Kooh woyohee wa.

10Wa neeh ca yasna-kanak ca coot, masma cammba naaf kehƴi. 11Weɗ kiis ka Noohin raakoh kiis teemet-yasna-yino (600), wa caɓna kanakɗoha raak neeh ndaŋkiyaah na neeh yasna-kanak (17). Mbaɗi, masma laayohngaana nikee ŋ ɗooƴ kehƴi, pookkaa ŋ ɗisik laayiɗ, wa baliɗta. Eel ci rangsukka, ca nameeɗa juur masuɓ ŋ kehƴi. 12A toɓeeɗa noha na weka, ini ree neeh ndaŋkiyaah-nikiis (40). 13Mbaɗi, raak Noohin ŋ ɗooƴ gaala, na kuɓuuciŋ ɗe ƴaar ci Sem, Haam na Yaafet, na ɓitiice na ɓitiɓ ciŋ kuɓuuciŋ ɗe. 14Ɓa nikka ŋ ɗooƴ gaala na cuuɓ ciŋ ɗoopaat ci jen ; ciŋ bilaf fi na ciŋ kahan ci, in ci ƴin ƴin ci na iike ŋ kehƴi na sel ci. 15In ci na iike jen raakka Noohin ŋ gaala kanak kanak, 16naar na riɓ, findi Kooh woyohee wa. Ƴutta, Nikiɗi rannga buntaanaŋ gaala.

17Toɓa yuurkeeɗa noha na weka ini ree neeh ndaŋkiyaah-nikiis (40). Masma uupeeɗa nga rap po, wa meeɓpa gaala. 18Wa ɓaatkeeɗa po, gaala teembeerra ŋ jola. 19Wa uupeeɗa nga ɓaatuk po, wa onnda tangooca uupee ɗafuk jen. 20Masma mirndohha kaɗ po, wa onnda tangooca ini ree saangal yasna-kanak. 21In nu nik ne a iikeen ŋ kehƴi suyɗi ɗah, a kaaniɗ nga ; sel ca, ɗoopaat caŋ kahan ca na caŋ bilaf fa na in ca ƴin ƴin ca iikee ŋ kehƴi jen, kaaniɗ na ɓooɓa. 22In nu nik ne a heɗ kiñin ŋ kehƴi suyɗi ɗah, a kaaniɗ. 23In ca iikee ŋ kehƴi jen ceɗ Nikiɗi ambsoh, a ɗumbiɗta ca ; ɓo', ɗoopaat, in ca ƴin ƴin ca na sel ca. A faɗee Noohin dong na ɓa nikee na ɗe ŋ ɗooƴ gaala. 24Wa ineem raak, masma rissa oniɗ kehƴi ini ree neeh teemet na neeh ndaŋkiyaah-yatuus (150).

Currently Selected:

Camba 7: YM

Highlight

Copy