Camba 15
15
Kooh ambtiɗohiɗ na Ibrahiima
1Ŋ finho coha na buur ca, in hayɗohha Ibram findi heeƴ. A Nikiɗi woyee na ɗe an : « Ka neƴƴoh ali in Ibram, laam e ñam na hee ɗa ɗipe, te aafiŋ ɗa hey yake lool. » 2Ibram loffa ne : « An fu na hee so ye one Heɗ ɓoo Nikiɗi ? Te ŋ raakɗi kuɓu po Eliyeser yiŋ Damas yii, a yi laman raak-raak kiŋ ngo ! 3Fu onɗi so kuɓu po jaambri rimkoh ŋ kahan ndo a yi na hee so lame ! » 4Nikiɗi loffa ɗe ne : « Muk, a yi lamohiŋ ɗa haa, waaye a kuɓki fu rimoot ŋ ñif miŋ ɗa, a yi na hee ɗa lame. » 5Nikiɗi puliɗta ɗe ŋ hara, a woosa ɗe ne : « Taaknuka, fu kind hor ci ne fu miniɗa ɗah. Fu hotiɗ findi ca laayoh e ? Ɓi rimkohan nga ɗa hendan ɗaa. » 6Ibram kossa, weɗ tah Nikiɗi ammba ɗe ɓo' yurhiɗ.
7A woyissa ɗe ne : « E ñam Nikiɗi yi pulɗoh ɗa Uur ŋ Babilon, ne ŋ on ɗa kur kii, fu raakoota. » 8A loffa ɗe ne : « Heɗ ɓoo Nikiɗi ŋ min inhoh na ne kur kii e ñam raakana ? » 9Nikiɗi woosa ɗe ne : « Ɓayiɗ to inoh yu' na pe' yu' na mbaal naar, yaa nu nga ɗah raakaat kiis kaahay, na hoɗ na banuut ƴin. »
10Ibram ɓayya ɗoopaat ceem. A appa ca, yaa nu nga ɗah, a nguɗta ɗe ŋ leerni po tassa sel ca. A yurhiɗohha nguɗ nu nga ɗah na wa ɓaat nga. 11Suur ca yipkeeɗa ŋ fiɗaaf caŋ ca. Ibram aannja ca.
12Wa noha na muye, Ibram pani'uusa, pani nooɗiɗ. Neƴƴoh miskiɗ huniɗ na ñuus tuɗ aassa ɗe. 13Weɗi Kooh woyoh ɗe ne : « Inhaa ne set ciŋ ɗa hey nike jaambur ŋ kur ka ɓa raakɗi, ɓa tumu ñaam nga, ɓa torhiɗu kiis teemet-nikiis (400). 14Waaye ŋ hey atte'e ɓi kur ka ɓa tumohu ñaam, po ɓa puloh nga na raak-raak laayiɗ. 15Ŋ ini kaɗ nga ɗa nak, fu hey raake kipes hutiɗ, neɓiɗ, fu kuruk nga moɗoɗ, fu uumbu ŋ jam. 16E set ciŋ ɗa, ŋ finho kiis teemet-nikiis ceem (400), na hee dokkisse ŋ ndii ; laam aƴaarkiŋ Amoor ci uupɗi yaah ndoom. »
17Wa noha muy, wa ñuussa tuɗ, ɗekka po njahha ɗuukeeɗa hunnda na kocom kaɓiɗ, ca taammba ŋ harmban nguɗ caŋ sepet ca. 18Mbaɗi, Nikiɗi ambtiɗohha na Ibram. A woosa ɗe ne : « Ɓooɓi pulohan nga ɗa, ɓeɗ maa hee eɗe kur kii ; ina nguɗoh ŋ kalaŋ Misra po ŋ Ewfaraat, kala yakka. 19Wa nikka kur kiŋ Ken ci na Kenis ci na Kadmon ci 20na Hit ci na Peris ci na Refay ci 21na Amoor ci na Kanaan ci na Girgaas ci na Yebuus ci. »
Currently Selected:
Camba 15: YM
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc
