मर्कुस 15
15
इसु पिलातसका अगाडि
(मत्ति २७:१-२,११-१४; लुका २३:१-५; युहन्ना १८:२८-३८)
1भोल्या प्रभातइ मुख्य पुजारि, धर्म-गुरु, अगुवा रे जम्माइ माहासभाले आपसमि सल्ला अरि इसुलाइ बादिबर लइग्या, रे पिलातसका वाँ सुउपिदियो। 2पिलातसले उनुलाइ सोध्यो, “क्या तु यहुदिको राजा होइ?”
इसुले तिनुलाइ भुन्यो, “तमइ तसो भुन्नाछउ।”
3मुख्य पुजारिले इसुलाइ भउतइ कुराको दोस लायो। 4पिलातसले इसुलाइ अज यसो भनिबर सोध्यो, “क्या तुइले भुन्नु पड्या केइ आथिन्? हेर्, तिनुले तुइलाइ कति कुराको दोस लाया छन्।”
5तर इसुले अज केइ जबाफ नदिया धेकिबर पिलातसले अचम्म मान्यो।
6निस्तार चाडका बेला मान्सले माग्या एक जना कइदिलाइ तिनरि निउति पिलातसले छाडि दिन्या अरन्थ्या। 7तइ बेला बारब्बा नाउँ भया एक जनो मान्स थुनामि पड्या थ्यो। तइले अउरसित मिलिबर आन्दोलनमि मान्स लइ मार्या थ्यो। 8पइ मान्सका भिडले पिलातसका वाँ आइबर अउर बर्सकि जसेरि एइ बर्स लइ एक जना कइदि छाडिदिय भनिबर बिन्ति अद्द लाग्या। 9पिलातसले यसो भनिबर तिनुलाइ सोध्यो, “क्या मु तमरि निउति यहुदिका राजालाइ छाडिदिउ भन्न्या तमु चाहान्छउ पइ?” 10क्यालाइकि मुख्य पुजारिले इसुका रिसइले उनुलाइ पिलातसका वाँ सउपिया हो भन्न्या था थ्यो।
11तर बारब्बालाइ तिनरि निउति छाडिदिय भनिबर मुख्य पुजारिले भिडलाइ सुर्यायो। 12पिलातसले अज तिनुलाइ सोध्यो, “तसो भया जइलाइ तमु यहुदिका राजा भन्नाछउ, तइलाइ मु क्या अरु पइ?”
13तिनुले अज चिच्च्याइबर भुन्यो, “तइलाइ क्रुसमि टाङ।”
14पिलातसले तिनुलाइ भुन्यो, “क्यालाइ? उइले क्या अपराध अर्या छ?”
तिनुले झिग चिच्च्याइबर भुन्न लाग्या, “तइलाइ क्रुसमि टाङ।” 15तबइ पिलातसले भिडलाइ सन्तुस्टि पाड्या इछ्याले तिनरि निउति बारब्बालाइ छाडिदिय, रे इसुलाइ कोर्राले हान्नलाइबर क्रुसमि टाङदाइलाइ सुम्पिदियो।
सिपाइले इसुलाइ गिल्ला अर्या
(मत्ति २७:२७-३१; युहन्ना १९:२-३)
16सिपाइले इसुलाइ ठुला हाकिमका प्रेटोरियन भन्न्या दरबारभित्तर लइग्यो रे अउर सप्पइ सिपाइलाइ बोलाइबर लेयो। 17तिनुले उनुलाइ बइजनि रङका लत्ता लाइदियो रे काँणा भया बेलाको मुकुट बनाइबर मुन्डामि पइराइदियो। 18तइपाछा तिनुले इसुलाइ “यहुदिका राजाको जय होस!” भुनि सलाम अद्दइ गिल्ला अर्यो। 19पइ तिनुले उनरा मुन्डामि निङालाले हान्नइ थुक्यो, रे घुडा टेकिबर उनुलाइ दण्डबत अर्यो। 20यसेरि गिल्ला अरिसक्यापाछा तिनुले बइजनि रङका लत्ता फुकाइबर उनराइ लत्ता लाइदियो। तइपाछा तिनुले उनुलाइ क्रुसमि टाङदाइलाइ बाइर लइग्या।
इसुलाइ क्रुसमि टाङ्या
(मत्ति २७:३२-४४; लुका २३:३३-४३; युहन्ना १९:१७-२७)
21बाटामणा जानाजानाइ तिनुले कुरेनि देसका सिमोनलाइ गाउँबटहइ सहरतिर आउन्नारया भिट्यो, उन अलेक्जेन्डर रे रुफसका बा थ्या। सिपाइले तइलाइ जबरजस्ति इसुको क्रुस बोक्द लायो। 22रे तइपाछा तिनुले इसुलाइ गलगथा भन्न्या ठउँर लइग्यो, गलगथाको अर्थ खोपडिको ठउँर हो। 23ताँ पुगिबर तिनुले इसुलाइ मुर्र भन्न्या ओखतो मिसाया दाखमध्य दियो। रे उनुले त्यो खाएइन्। 24तिनुले उनुलाइ क्रुसमि टाङ्यो। रे कइकइले क्या क्या भाग पाउन्या भनि चिठ्ठा हालिबर तिनुले उनरा लत्ता एक आपसमि बाण्यो। 25तिनुले उनुलाइ क्रुसमि टाङद्याबेला प्रभातको नउ बज्या थ्यो। 26उनुलाइ दोस लाइबर लेख्या पत्तरमि “यहुदिका राजा” भन्न्या लेख्याथ्यो। 27तिनुले इसुसंङइ दुइ जना डाँकुलाइ लइ क्रुसमि टाङ्यो। एकलाइ उनरा दाइनतिर, रे अर्कालाइ उनरा बायातिर क्रुसमि टाङ्यो। 28[धर्म-सास्त्तरमि, “उन अपराधिसित गनिया।” भनि लेखिया बचन यसेरि पुरा भयो।] 29तइ बाटा हिट्या मान्सले आफनो मुन्डो हल्लाइबर यसो भन्यो, “लउ हेर! मन्धिर भत्काइबर अज तेसरा दिनमि बनाउन्याछु भन्न्या मान्स, 30तु आफुइलाइ बचाइबर क्रुसबटहइ ओल।”
31तसोइ अरिबर मुख्य पुजारिले लइ धर्म-गुरुसित यसो भन्नइ एक आपसमि उनरो ठट्टा अर्यो, “यइले अउरलाइ त बचायो, तर आफुलाइ बचाउन सकेइन्। 32ए, इस्राएलका मुक्ति दिन्या ख्रिस्ट राजा, आब तु क्रुसबटहइ ओलिबर आ रे हामु त्यो धेकिबर बिस्वास अर्ला।” उनसित क्रुसमि टाङिया तिनु डाँकुले लइ उनरो निन्दा अर्यो।
इसु मर्या
(मत्ति २७:४५-५६; लुका २३:४४-४९; युहन्ना १९:२८-३०)
33दिनका बार बजेबटहइ तिन बजेसम्म सारा देसमि अन्यारो भयो। 34तिन बजेतिर इसुले यसो भुनिबर ठुला स्वरले भुन्यो हाल्यो, “इलोइ, इलोइ, लामा सबखथनि?” जइको अर्थ हो, “हे मेरा परमेस्वर, हे मेरा परमेस्वर, तमले मुइलाइ क्यालाइ त्याग्या?”
35वल्तिर पल्तिर कल्लिन्यामध्ये कसइ कसइले यो सुनिबर भुन्यो, “सुन, त्यो त एलियालाइ बोलाउन्नाछ।” 36पइ एक जनो दउडिबर गइ चुकिलो अंगुरका रसइनु टालो चोप्यो रे निङालाका टुपामि बेडिबर उनुलाइ खान दिनइ भुन्यो, “हेद्दाउ कि काँइ एलिया आइबर तइलाइ क्रुसबटहइ ओराल्लाहान कि!”
37तबइ इसुले ठुलो सोर निकालिबर परान छाड्यो।
38रे मन्धिर भित्तरको पर्दा टुपाबटहइ फेदसम्म दुइ भाग होइबर चिरियो। 39इसुले यसेरि परान त्याग्या धेकिबर उनरा अगाडि कल्लिया कप्तानले भुन्यो, “साँच्चि यिनु मान्स त परमेस्वरकाइ चेला रइछन्।”
40ताँ टाडाबटहइ हेद्दारया केइ स्वाइनि मान्स लइ थिन्। तिनुमध्ये मरियम मग्दलिनि रे नानो याकुब रे योसेफकि इजा मरियम रे सलोमि थिइन्। 41इसु गालिलमि हुन्याबेला तिनुले उनुलाइ पछ्याउन्थ्या, रे उनरो सेबा टहल अरन्थ्या। इसुसित यरुसलेममि आयइ अउर लइ भउतइ स्वाइनि मान्स लइ ताँ थिइन्।
इसुका लासलाइ च्याहान राख्यो
(मत्ति २७:५७-६१; लुका २३:५०-५६; युहन्ना १९:३८-४२)
42-43त्यो दिन तयारिको दिन भन्न्या बिस्राम दिनको अगाडिको दिनथ्यो। अरिमाथिया सहरका योसेफ तसइ दिन बसाइतिक साहाससित पिलातसका अगाडि गइबर इसुको लास माग्यो। योसेफ माहासभाका माननिया सदस्य थ्या। उनु परमेस्वरको राज्य पखिरइथ्या। 44इसु अगाडि मरिसक्या भन्न्या सुनिबर पिलातस अचम्म पड्या। रे कप्तानलाइ आफना वाँ बोलाइबर उनु मर्या कि मरेइन भनिबर सोदपुछ अर्यो। 45उनु मरिसक्या भनिबर कप्तानबटहइ था पायापाछा पिलातसले इसुको मर्या लास योसेफलाइ लइजान्या अनुमति दियो। 46रे योसेफले मलमलका लत्ता किनिबर लेयो। पइ इसुको लास क्रुसबटहइ निकाल्यो रे लत्ताले बेड्यो। तइपाछा चट्टानमि खोपिबर बनाया एक च्याहानमि राख्यो। पइ तिनुले च्याहानका मुखमि एक ठुलो ढुङो राख्यो। 47मरियम मग्दलिनि रे योसेफकि इजा मरियमले उनुलाइ राख्या ठउँर हेरिरइथिइन्।
Currently Selected:
मर्कुस 15: DOTY
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
