San Mateo 9

Síndaꞌa Jesús iin taa ra küvi kaka

(Mr. 2:1-12; Lc. 5:17-26)

1Saa nda̱a Jesús sata barco, ndi̱yaꞌa ra inka ñaꞌñu yuꞌu nduta ñûꞌu, ndi̱xaa ra ñuu ra. 2Saa ndáka na iin taa ra küvi kaka, ínuu ra nuu xito ndi̱xaa ra nuu Jesús. Tá xi̱ni Jesús ya kándixa ni ñaꞌa nda ndíso ra ikán. Ta ndi̱kaꞌan ra xiꞌin ra kúꞌvi ikán, káchi ra saa:

―Seꞌe, kündiꞌi ini un, chi xa xa̱a kaꞌnu ini i xaꞌa kuachi un ―káchi Jesús xiꞌin ra.

3Saa ndóo sava nda sínaꞌa ley ya ta̱a ra Moisés, ndíkani ini nda, káchi nda saa: “Kánaꞌa va ra yóꞌó xiꞌin Ndioxi án Ndioxi ta ndása ra mií ra yakan vaꞌa káꞌan ra saa”, káchi nda ndíkani ini nda.

4Saa ku̱ndaa ini Jesús ya ndíkani ini nda, ñaa ndi̱kaꞌan ra xiꞌin nda, káchi ra saa:

―¿Ndachu ndíkani väꞌa ini ndo xíni ndo yeꞌe? 5¿Unkua uꞌvi ka kaꞌan i xiꞌin ra küvi kaka yóꞌó: “Án uꞌvi ka kaꞌan i xiꞌin ra ndíkata i kuachi ra, án uꞌvi ka kaꞌan i xiꞌin ra ndikoo ra kaka ra”? 6Ta vitin sindaꞌa i ra yóꞌó, ta saa kundaa ini ndo, yeꞌe ku Taa ra kúu mií ichí Ndioxi, ta xáa kaꞌnu ini i xaꞌa kuachi na ñuu ivi ―káchi Jesús xiꞌin nda.

Saa ndi̱kaꞌan ra xiꞌin ra kúꞌvi ikán, káchi ra saa:

―Kuándikoo, kuanuꞌu veꞌe un, ta ndikiꞌin xito un ná kuꞌun nu xiꞌin un ―káchi Jesús xiꞌin ra.

7Saa ndi̱koo ra, ndi̱kiꞌin ra xi̱to ra kuanuꞌu ra veꞌe ra. 8Tá xi̱ni naꞌa ya ndu̱vaꞌa ra ikán, saa ndi̱kanda ni ini na, ta xa̱a kaꞌnu na Ndioxi xaꞌa ya ta̱xi ra ndee ra ndaꞌa na ñuu ivi yóꞌó.

Ya ku̱u nuu ka̱na Jesús ra Mateo ya kundikun ñaꞌa ra

(Mr. 2:13-17; Lc. 5:27-32)

9Tá ndiꞌi ikán, saa ke̱e Jesús yáꞌa ra kuaꞌan ra, ta ikán xi̱ni ra iin taa, ra náni Mateo. Índuꞌu ra xáa chiñu ra, ndíkaya ra xuꞌun nuu gobierno ñuu Roma. Saa ndi̱kaꞌan Jesús xiꞌin ra, káchi ra saa:

―Naꞌa, kundikun un yeꞌe ―káchi ra xiꞌin ra.

Saa ndi̱kundichi ra Mateo ndi̱kiꞌin ra kuaꞌan ra xiꞌin Jesús.

10Ta suvi mií kivi ikán ke̱e Jesús kuaꞌan ra xiꞌin nda ítaꞌan xiꞌin ra, kuaꞌan nda kuxi nda veꞌe ra Mateo. Saa ndóo kuaꞌa ni ka mií nda ndíkaya xuꞌun nuu gobierno xiꞌin inka na íkan ya väꞌa. Ndóo na xíxi na xiꞌin Jesús. 11Tá xi̱ni nda fariseo na ndóo xíxi xiꞌin ra, saa ndi̱kaꞌan nda xiꞌin nda ítaꞌan xiꞌin ra, káchi nda saa:

―¿Ndachu índuꞌu ra maestro ndo xíxi ra xiꞌin nda ndíkaya xuꞌun tin na íkan ya väꞌa? ―káchi nda fariseo xiꞌin nda.

12Saa tá xi̱ni soꞌo Jesús ya ndi̱kaꞌan nda ikán, saa ndi̱kaꞌan ra xiꞌin nda, káchi ra saa:

―Na íyo vaꞌa ini, ta köo xíniñuꞌu na kuꞌun na nuu na xáa tatan naꞌa. Na kúꞌvi ku na xíniñuꞌu kuꞌun kutatan. 13Xíniñuꞌu ndo kundaa vaꞌa ini ndo unkua kúni kachi Ndioxi nuu tuꞌun ra, ya káchi saa: “Kúni i ná kundaꞌvi ni ini ndo kuni ndo inka naꞌa, chi ya ñaa ka kua ndee ni ndee nuu ñaꞌa ya sóko ndo nuu i”, káchi tuꞌun Ndioxi. Saa chi yeꞌe, ta växi i xaꞌa na vaꞌa, xaꞌa na väꞌa vaxi i, kaꞌan i xiꞌin na ya ná ndiko koo ini na kundikun na ichí Ndioxi ―káchi Jesús xiꞌin nda fariseo.

Káꞌan Jesús ndá xaꞌa kua köo xíxi suꞌun nda ítaꞌan xiꞌin ra

(Mr. 2:18-22; Lc. 5:33-39)

14Saa ndi̱xaa nda ítaꞌan xiꞌin ra Juan, ra síkuchi naꞌa, ndi̱xaa nda nuu Jesús ndákan tuꞌun nda ra, káchi nda saa:

―Xíxi suꞌun ni va ndeꞌe, ta saa tu nda fariseo va. ¿Ta ndachu köo xíxi suꞌun nda ítaꞌan xiꞌin yóꞌo̱? ―káchi nda xiꞌin Jesús.

15Saa ndi̱kuiin Jesús, káchi ra saa:

―Tá íyo iin viko tíndaꞌa, ta kúsini ni mií na migo mií ra tíndaꞌa ikán, köo naꞌa kúsuchi ini, chi viko kua. Sundi vaxi kivi tá ná ndikiꞌin na ra tíndaꞌa ikán kuꞌun ra xiꞌin na, saa kua kuxi suꞌun na.

16Tá kúu iin xiyo xa̱á ta köo na ndíkaꞌma ya xiꞌin toto yata, saa chi íyo nduloꞌo ya ta kaꞌnda yaa ya xiyo xa̱á, ta iin ndiꞌi vaꞌa xaꞌa ya. 17Ni vinu xa̱á ta köo naꞌa táan rá ini ñii yata, saa chi kuchiñu rá xa̱á kaꞌnda rá ñii yata ta ndiꞌi xaꞌa ya, ñaa kuita ndiꞌi rá. Xaꞌa ya ikán kua xíniñuꞌu naꞌa taan na vinu xa̱á ini ñii xa̱á, saa chi xaꞌa ya xa̱á ya ta kundee ya xiꞌin rá.

Síndaꞌa Jesús yá loꞌo seꞌe ra Jairo xiꞌin inka ñaꞌa yá ti̱in ndaa yuꞌu tikoto ra

(Mr. 5:21-43; Lc. 8:40-56)

18Tá íin Jesús káꞌan ka ra xiꞌin naꞌa, saa ndi̱xaa iin ra ínuu nuu na judío si̱kusiti ra nuu Jesús, káchi ra saa:

―Tata, sikan ndi̱xiꞌi yá loꞌo seꞌe i, tá tu ná kuꞌun un xiꞌin i chinuu ndaꞌa un xiní yá ta nditaku yá ―káchi ra xiꞌin Jesús.

19Saa ke̱e Jesús tin nda ítaꞌan xiꞌin ra kuaꞌan nda xiꞌin ra ikán. 20Ta tañu na kuaꞌan ikán ndíkaa iin ñaꞌa. Ta xa uxi uvi kuiya kúꞌvi yá, xíta nií yá. Saa xa̱a yá sata Jesús ti̱in ndaa yá yuꞌu tikoto ra, 21chi ndíkani ini yá, káchi yá saa: “Tá ná tiin ndaa loꞌo yo yuꞌu tikoto ra ta nduvaꞌa yo”, kaꞌán yá. 22Saa ndi̱ko koo Jesús ndi̱koto ra sata ra, ta xi̱ni ra yá, saa ndi̱kaꞌan ra xiꞌin yá, káchi ra saa:

―Nana kündiꞌi ini un, xa ndu̱vaꞌa un saa chi kándixa un Ndioxi ―káchi ra xiꞌin yá.

Nda kivi saa ndu̱vaꞌa vaꞌa yá.

23Saa tá ndi̱xaa Jesús veꞌe ra chiñu ikán, saa xi̱ni ra ndóo na tívi tilali nuu ndi̱xiꞌi yá, ta iin ndá síso xáku na. 24Saa ndi̱kaꞌan Jesús xiꞌin na, káchi ra saa:

―Vaꞌa kana koo ndiꞌi ndo keꞌe, saa chi köo ndi̱xiꞌi vi yá loꞌo yóꞌó, yá kíxi va ku yá ―káchi ra xiꞌin na.

Saa ndi̱xaku ndaa ndiꞌi na ra. 25Ñaa ta̱va ndiꞌi ra na, ka̱na koo na keꞌe, saa ndi̱kiꞌvi ra nuu índuꞌu yá, ti̱in ra ndaꞌa yá, ta ndi̱koo yá. 26Saa ndi̱xita tuꞌun xaꞌa ra ndiꞌi ni kúu ñuu, ya si̱taku ra yá loꞌo ikán.

Síndaꞌa Jesús uvi nda kuáa̱

27Saa ke̱e Jesús kuaꞌan ra, ta ndi̱kundikun uvi nda kuáa̱ kuaꞌan nda sata ra, ndáꞌi koꞌo nda, káchi nda saa:

―Tata, seꞌe ra David, kundaꞌvi ini un kuni un ndeꞌe ―káchi nda. #9:27 Seꞌe ra David kúni kachi ya, “Taa ra ti̱ꞌvi Ndioxi sikaku na ñuu ivi yóꞌó”, ta köo káꞌan ya seꞌe mií ra David, sundi kúni kachi ya seꞌe sikua ra David.

28Saa tá ndi̱kiꞌvi Jesús ini veꞌe ta ndi̱xaa uvi saa nda kuáa̱ nuu ra, saa ndi̱kaꞌan ra xiꞌin nda, káchi ra saa:

―¿Án kándixa ndo yeꞌe kuchiñu i sindaꞌa i ndóꞌo̱?

―Uun, kándixa va nde yóꞌo̱, Tata ―káchi uvi saa nda xiꞌin ra.

29Saa ti̱in ndaa ra nduchi nuu nda kuáa̱ ikán, ta ndi̱kaꞌan ra xiꞌin nda, káchi ra saa:

―Xaꞌa ya kándixa ndo yeꞌe ta nduvaꞌa ndo vitin ―káchi ra xiꞌin nda.

30Ñaa ndu̱vaꞌa uvi saa nda, ndi̱xuna nuu nda. Saa ndi̱kaꞌan Jesús xiꞌin nda, káchi ra saa:

―Kuenta ni koo ndo ndïtuꞌun ndo xiꞌin nda iin naꞌa ndá kuꞌva ndu̱vaꞌa ndo ―káchi ra xiꞌin nda.

31Tá sikan ka̱na koo nda kuaꞌan nda, ta ndikun xa̱ta ndiꞌi nda tuꞌun xaꞌa Jesús ndá kuꞌva si̱ndaꞌa ra nda.

Si̱ndaꞌa Jesús iin ra meꞌme

32Tá ka̱na koo nda kuáa̱ ikán kuaꞌan nda, saa ndi̱xaa na xiꞌin iin ra meꞌme, ra kúu mií tachi nduvaꞌa. 33Saa ta̱va Jesús tachi nduvaꞌa ku̱u mií ra ikán, tá ke̱ta soꞌva ya ta ndikun xa̱á vaꞌa káꞌan ra. Saa ndi̱kanda ni ini naꞌa, ñaa xa̱á na káꞌan na, káchi na saa:

―Nda iin ichí köo taꞌan ya yóꞌó xíni yo ñuu Israel ―káchi na.

34Saa tu nda fariseo, nda xi̱ni ya ndu̱vaꞌa ra meꞌme ikán káchi nda saa:

―Xiꞌin ndee kiti nǎꞌa, kiti ínuu nuu ndiꞌi tachi nduvaꞌa va ta̱va ra tachi kúu mií ra yóꞌó ―káchi nda.

Kúndaꞌvi ni ini Jesús xíni ra naꞌa

35Saa xíka Jesús ñuu naꞌnu tin ñuu vali, xíniꞌni ra xíka ra sínaꞌa ra naꞌa, tá veꞌe ñuꞌu sinagoga, tá veꞌe ñuu xíka ra. Sínaꞌa ra na tuꞌun vaꞌa xaꞌa ichí ya xáꞌnda chiñu Ndioxi. Ndíkani ra nuu na, saa síndaꞌa ra na ndóꞌo ndiꞌi nuu kueꞌe. 36Tá xíto ra nuu ndiꞌi na, saa ku̱ndaꞌvi ni ini ra xi̱ni ra na, saa chi ndóꞌo ni na. Ta ni köo naꞌa chindee ñaꞌa, tá íin na ndee ni ku̱naa saa íin na. Nda tá íin levo kiti köo xitoꞌo, saa íyo na. 37Saa ndi̱kaꞌan ra xiꞌin nda ítaꞌan xiꞌin ra, káchi ra saa:

―Tá káa ñaꞌa ya xa ndi̱xinu ni sikee yo, saa íin na yóꞌó, chi xa íyo ndúvi ni na kundikun na yeꞌe. Sundi loꞌo ni ku na xáa chiñu nuu i. 38Xaꞌa ya ñaa kua xíniñuꞌu ni ndo kaꞌan ndo xiꞌin Ndioxi, ya ná tiꞌvi ka ra naꞌa, na xaa chiñu ndikuiso na ñaꞌa, ya xa ndi̱xinu ni ―káchi Jesús xiꞌin nda ítaꞌan xiꞌin ra.

Currently Selected:

San Mateo 9: xta

Highlight

Copy