San Mateo 22
22
Tuꞌun ndíchi xaꞌa na kuxi nuu viko tíndaꞌa xiꞌin Ndioxi
(Lc. 14:15-24)
1Saa xa̱á tuku Jesús káꞌan ra xiꞌin na xiꞌin tuꞌun ndíchi, káchi ra saa:
2―Tá kuꞌva xáa chiñu Ndioxi saa íkan iin ra rey ra íkan viko nuu sítindaꞌa ra seꞌe ra. 3Ka̱na ra rey ikán nda xáa chiñu nuu ra ya kuꞌun nda ndikuiso nda naꞌa xa ndi̱kaꞌan ra xiꞌin kuꞌun kuxi viko veꞌe ra, ta köo ndi̱xiin na kuꞌun na. 4Saa ti̱ꞌvi tuku ra inka nda xáa chiñu nuu ra kuaꞌan nda, ndi̱kaꞌan ra xiꞌin nda, káchi ra: “Kaꞌan ndo xiꞌin na xa ndi̱kaꞌan i xiꞌin kixi, xa íyo nduvi ndiꞌi ñaꞌa kuxi ndo. Xa xa̱ꞌnda ra rey chiñu xa̱ꞌni na sindiki sana ra xiꞌin inka kiti xaꞌan ni, ta xa íyo nduvi ndiꞌi ya, kuꞌun ndo kuxi ndo” che, kachi ndo xiꞌin na, káchi ra rey. 5Ta na ka̱na ra kuꞌun, köo ndi̱xiin na kuꞌun na. Iin ra ke̱e kuaꞌan nuu ñuꞌú ra, inka ra kuaꞌan nuu xíko ra, 6ta inka na ti̱in nda moso ra rey ikán, ka̱tun na nda ta xa̱a nduvaꞌa ni na xiꞌin nda, xa̱ꞌni na nda. 7Saa ndi̱saa ni mií ra rey ikán, ñaa ti̱ꞌvi ra nda lapa xáa chiñu nuu ra kuaꞌan nda kaꞌni nda naꞌa xa̱ꞌni moso ra, ta saa xa̱ꞌmi ndiꞌi nda ñuu na ikán. 8Saa ndi̱kaꞌan ra xiꞌin nda xáa chiñu nuu ra, káchi ra saa: “Xa íyo nduvi ndiꞌi ñaꞌa kuniñuꞌu yo kuxi na viko tíndaꞌa, ta na ka̱na i kixi kuxi, ta köo ndi̱xiin na kixi na chi köo ichí na kuxi na xiꞌin yo xaꞌa ya kini ni na. 9Ta vitin kuꞌun ndo ndiꞌi ichí nuu ndíkitaꞌan naꞌa, ta ndikaya ndiꞌi ndo na, ndá ka na ndítaꞌan ndo ta kundaka ndiꞌi ndo na ná kixi na koo viko,” káchi ra xiꞌin nda moso ra. 10Saa ka̱na koo nda xáa chiñu nuu ra kuaꞌan nda ichí ndíkaya ndiꞌi nda na ndítaꞌan nda. Na vaꞌa tin na väꞌa ta ndíkaya ndiꞌi ñaꞌa nda, saa chu̱tu ndaa na veꞌe ra nuu íyo viko ikán.
11’Saa ndi̱kiꞌvi mií ra rey ka̱na na ikán veꞌe nuu ndóo na, ñaa ndi̱koto ra nuu iin ra índuꞌu ikán, ta köo ndíxi ra tá kuꞌva ndíxi na kuaꞌan nuu viko tíndaꞌa. 12Saa ndi̱kaꞌan ra xiꞌin ra, káchi ra saa: “Tata, ¿unkua i̱kan un ndi̱kiꞌvi un yóꞌó, ta köo ndíxi un tá kuꞌva ndíxi na kuaꞌan nuu viko tíndaꞌa?” káchi ra xiꞌin ra. Ta ni köo ndíkuiin ra ikán. 13Saa ndi̱kaꞌan ra rey xiꞌin nda moso ra, káchi ra saa: “Tiin ndo ra katun ndo ndaꞌa ra tin xaꞌa ra, saa tava ndo ra keꞌe ta chikaa ndo ra nuu naá ni, nuu ndee ni kuaku ra, tixuꞌvi ni ra ndakua ndikaxi nuꞌu ra”, káchi ra rey ikán. 14Saa chi kuaꞌa ni naꞌa ka̱na Ndioxi ya kiꞌvi na koo na xiꞌin ra nuu xáꞌnda chiñu ra, ta loꞌo ni va ku na ndi̱kaxin ra ―káchi Jesús.
Xuꞌun ya cháꞌvi na nuu na chiñu
(Mr. 12:13-17; Lc. 20:20-26)
15Tá si̱ndiꞌi Jesús ndi̱kaꞌan ra tuꞌun ndíchi ikán, saa ka̱na koo nda fariseo kuaꞌan nda, ta chi̱taꞌan tuꞌun nda ya keꞌe nda Jesús, nuu kaꞌan ra ndá ka tuꞌun. Saa kuchiñu nda taxi nda kuachi xaꞌa ra. 16Ñaa ti̱ꞌvi nda ikán nda taꞌan nda, nda ítaꞌan xiꞌin nda ñúꞌu xiꞌin partido ra Herodes, saa ndi̱xaa nda nuu Jesús ndi̱kaꞌan nda xiꞌin ra, káchi nda saa:
―Tata Maestro, xíni nde ya káꞌan un ya ndaa. Ta ndinuꞌu ni ini un sínaꞌa un naꞌa xiꞌin ya ndaa xaꞌa ichí Ndioxi. Ta köo xáꞌni un mií un ya káꞌan naꞌa xaꞌa ya sínaꞌa un na, saa chi köo kíꞌin un kuꞌva xiꞌin na tá kuꞌva íin na, iin káchi íkan un xiꞌin ndiꞌi va na. 17Ta vitin kaꞌan un xiꞌin nde unkua ndíkani ini un. ¿Án vaꞌa chaꞌvi yo xuꞌun ya káku yo xaꞌa nuu na chiñu ya kuaꞌan ndaꞌa ra tata chiñu ra rey César ñuu Roma? ¿Án väꞌa chaꞌvi yo ya? ―káchi nda xiꞌin ra.
18Saa ku̱ndaa ini Jesús ya kéꞌe nda ra, ñaa ndi̱kaꞌan ra xiꞌin nda, káchi ra saa:
―¡Ndóꞌo̱ uvi yuꞌu ku ndo! ¿Ndachu kéꞌe ndo yeꞌe? 19Sinaꞌa ndo xuꞌun kàà ya cháꞌvi ndo nuu na chiñu, ná koto i nuu ya ―káchi ra xiꞌin nda.
Saa si̱naꞌa nda iin xuꞌun denario nuu ra. 20Saa ndi̱ndakan tuꞌun ra nda, káchi ra saa:
―¿Unku na xíin naꞌna ya, ta unku kivi kua ínuu nuu xuꞌun yóꞌó? ―káchi ra xiꞌin nda. 21Saa ndi̱kuiin nda, káꞌan nda:
―Naꞌna ra rey César kua, ta kivi ra ikán kua ínuu nuu ya ―káchi nda xiꞌin ra.
Saa ndi̱kaꞌan ra xiꞌin nda, káchi ra saa:
―Taxi ndo ya kúu ñaꞌa na chiñu ndaꞌa na chiñu, ta taxi tu ndo ya kúu ñaꞌa Ndioxi ndaꞌa Ndioxi ―káchi ra xiꞌin nda.
22Tá xi̱ni soꞌo nda ya ndi̱kaꞌan ra xiꞌin nda, saa ndi̱kanda ni ini nda. Ta ki̱ꞌin nda ra si̱ndoo nda, saa ka̱na koo nda kuaꞌan nda.
Ndákan tuꞌun nda saduceo Jesús án ya ndixa kua ndítaku na ndíi
(Mr. 12:18-27; Lc. 20:27-40)
23Ta suvi mií kivi ikán ndi̱xaa sava nda saduceo nuu Jesús, ta nda ikán ta köo kándixa nda ya ndítaku na xa ndi̱xiꞌi. Saa ndi̱kaꞌan nda xiꞌin ra, káchi nda saa:
24―Tata Maestro, soꞌva ndi̱kaꞌan ra Moisés xinaꞌa: “Tá ndi̱xiꞌi iin taa, ta köo seꞌe ra ndi̱kaku xiꞌin yá síꞌi ra, ta vaꞌa tindaꞌa ñani ra xiꞌin yá ya ná kaku seꞌe yá. Nda tá koo seꞌe ra ndi̱xiꞌi saa koo na yóꞌó”, káchi ya ta̱a ra Moisés. 25Ta ¿unkua káchi yóꞌo̱ xaꞌa ya yóꞌó? Chi saa ndo̱ꞌo na taꞌan nde: ndi̱xiyo uxa ñani nda. Ta ra núnu̱ú ti̱ndaꞌa ra xiꞌin iin ñaꞌa, saa ndi̱xiꞌi ra, ta köo seꞌe yá ndi̱xiyo xiꞌin ra, saa ti̱ndaꞌa ñani ra, ra uvi xiꞌin yá. 26Tá ndo̱ꞌo ra núnu̱ú saa ndo̱ꞌo tu ra uvi va. Ta köo seꞌe na ndíkaku, saa ti̱ndaꞌa tu ñani ra, ra uni xiꞌin yá ta saa ndo̱ꞌo tu ra ikán va, saa ndo̱ꞌo uxa saa nda xiꞌin yá, nda iin nda köo ndíkaku seꞌe xiꞌin yá. 27Saa ndi̱xiꞌi tu mií va yá. 28Tá ná nditaku na ndíi, ta ¿unku nda kuu ií yá ikán, saa chi uxa saa nda ndi̱xiyo xiꞌin yá? ―káchi nda xiꞌin Jesús.
29Saa ndi̱kuiin Jesús, káꞌan ra xiꞌin nda:
―Sïndaꞌvi ndo mií ndo, saa chi ni köo xíni ndo unkua káꞌan tuꞌun Ndioxi, ta ni köo xíni ndo ndee ya kúu mií ya. 30Tá ná ndi̱taku na ndíi, ta köo ka naꞌa tindaꞌa nuu ndivi, ni täxi ka na seꞌe síꞌi na tindaꞌa ná xiꞌin taa. Tá kuꞌva íin na tatun Ndioxi saa koo na koo xiꞌin Ndioxi. 31Ta ya káꞌan tu ndóꞌo̱ án ndixa kua ndítaku na xa ndi̱xiꞌi, káchi ndo, ta nuu mií ley Ndioxi ya si̱ndoo ra Moisés ndaꞌa yo kua sínaꞌa yoo. ¿Ta án täꞌan kaꞌvi ndo ya ndi̱kaꞌan Ndioxi xaꞌa ya yóꞌó, tá ndi̱kaꞌan ra káchi ra soꞌva? 32“Yeꞌe ku Ndioxi ra káñuꞌu ra Abraham, xiꞌin ra Isaac tin ra Jacob”, káchi Ndioxi. Ta xiꞌin tuꞌun yóꞌó kua kúndaa ini yo ya nditaku va nda xii yo yóꞌó, saa chi tá ná ndïtaku nda ta küvi xaa kaꞌnu nda Ndioxi ―káchi Jesús xiꞌin nda saduceo ikán.
33Saa xi̱ni soꞌo naꞌa ya ndi̱kaꞌan ra xiꞌin nda saduceo ta ndi̱kanda ni ini na xaꞌa ya sínaꞌa ra.
Káꞌan Jesús ndá ley kua ndee ni ka xíniñuꞌu yo ikan yo
(Mr. 12:28-34)
34Tá ku̱ndaa ini nda fariseo ya ku̱taxin yuꞌu nda saduceo i̱kan Jesús, ta saa ndi̱kitaꞌan nda kuaꞌan nda nuu ra. 35Tá ndi̱xaa nda nuu ra, ta saa ndi̱kaꞌan iin ra xíni ni ley Ndioxi, ya kéꞌe ra Jesús, káchi ra saa:
36―Tata Maestro, ¿ndá ley kua ndee ni ka xíniñuꞌu nuu ndiꞌi ya? ―káchi ra xiꞌin Jesús.
37Saa ndi̱kuiin Jesús, káchi ra saa:
―Ley ya xíniñuꞌu ni ka kua yóꞌó: “Kuꞌvi ini yo kuni yo Ndioxi xiꞌin ndiꞌi nima yo, xiꞌin ndiꞌi ya vaꞌa yo, xiꞌin ndiꞌi ya xínituni yo”. 38Ya yóꞌó ku ley ya núnu̱ú ya xíniñuꞌu ni ka. 39Tá kuꞌva káa ley ya núnu̱ú, saa káa tu ya uvi va, káchi ya saa: “Tá kuꞌva kúꞌvi ini yo xíni yo mií yo, saa xíniñuꞌu yo kuꞌvi ini yo kuni yo na taꞌan yo”. 40Uvi saa ley yóꞌó kua ndíso chiñu xiꞌin tá kúu nuu ndiꞌi ya ta̱a ra Moisés xiꞌin ya si̱naꞌa nda profeta, nda ndi̱kaꞌan tuꞌun yuꞌu Ndioxi ―káchi Jesús.
Na veꞌe Cristo
(Mr. 12:35-37; Lc. 20:41-44)
41Tá ndóo ka nda fariseo, saa ndi̱ndakan tuꞌun Jesús nda, 42káchi ra saa:
―¿Unkua ndíkani ini ndóꞌo̱ xaꞌa ra kúu Cristo, ra ti̱ꞌvi Ndioxi sikaku yoo? ¿Unku na veꞌe ra yóꞌó? ―káchi Jesús.
Saa ndi̱kuiin nda, káꞌan nda xiꞌin ra:
―Seꞌe sikua ra rey David ku ra ―káchi nda.
43Saa ndi̱kaꞌan ra xiꞌin nda, káchi ra saa:
―Tá tu ndixa seꞌe sikua ra rey David ku Cristo, ta ¿ndachu ndi̱kaꞌan ra David, tixin Tachi I̱í Ndioxi ndi̱kaꞌan ra xaꞌa Cristo kúu ra ra kaꞌnu nuu ra, káchi ra saa:
44Ndioxi ndi̱kaꞌan ra xiꞌin ra chee nuu i, káchi ra saa:
“Koo un xiꞌin i ñaꞌñu kuáꞌá i nuu tai toꞌo kaꞌnda chiñu un,
yóꞌó koo un xiꞌin i ndakua ná sindiꞌi xaꞌa ndiꞌi i na xïin kuni yóꞌo̱”,
káchi Ndioxi nuu ta̱a ra David xinaꞌa.
45Xiꞌin tuꞌun yóꞌó, ndi̱kaꞌan ra David ya kúu Cristo ra chee ka nuu ra. Ta ¿ndachu kua kúu Cristo seꞌe sikua ra tá tu saa? ―káchi Jesús xiꞌin nda.
46Saa ta nda iin nda köo ndíkuchiñu ndikuiin nda yuꞌu ra, nda kivi saa ta köo ndi̱keꞌe ka ñaꞌa nda, ya ndakan tuꞌun nda ra.
Currently Selected:
San Mateo 22: xta
Highlight
Share
Copy
Want to have your highlights saved across all your devices? Sign up or sign in
Active: ©Wycliffe Bible Translators, Inc. All rights reserved.
