San Mateo 20

Tuꞌun ndíchi ya káꞌan xaꞌa na xáa chiñu xiꞌin kiti uva

1Saa ndi̱kaꞌan Jesús iin tuꞌun ndíchi ya sínaꞌa ra na, káchi ra:

―Tá káa iin ra kúu mií ñuꞌú, saa íyo ichí nuu xáꞌnda chiñu Ndioxi. Saa ku̱u iin kivi ke̱ta ra veꞌe ra, xitaan ke̱e ra kuaꞌan ra nduku ra naꞌa xaa chiñu nuu ñuꞌú ra, nuu ndi̱taan ra yoꞌó kiti uva. 2Saa ndi̱niꞌi ra naꞌa ta ki̱ndoo ra chaꞌvi ra na xiꞌin iin xuꞌun ya náni denario kiꞌin na xaꞌa iin kivi ya xaa chiñu na xiꞌin ra. Saa ti̱ꞌvi ra na kuaꞌan na xaa chiñu na nuu ñuꞌú ra. 3Sindiꞌi iin kuꞌva kàà i̱i̱n xitaan, saa ke̱e tuku ra xíin ñuꞌú ikán kuaꞌan ra nuu yaꞌvi, ta ndi̱taꞌan tuku ra naꞌa, na köo chiñu kúu mií. 4Saa ndi̱kaꞌan ra xiꞌin na, káchi ra saa: “Kuáꞌan ndo xaa chiñu ndo nuu íyo yoꞌó kiti uva i, ta chaꞌvi i ndóꞌo̱ tá yaꞌvi ndo”, káchi ra xiꞌin na. Saa ke̱e na kuaꞌan na. 5Ta kàà uxi uvi nduvi ke̱e tuku ra kuaꞌan ra nduku ra naꞌa, ñaa ndi̱xaꞌan tuku ra ndu̱ku ra na kàà uni xikuáa. Ta saa i̱kan tu ra xiꞌin na ikán va. 6Ta iin kuꞌva kàà uꞌun xikuáa ke̱e tuku ra ndi̱xaꞌan ra, ta ndi̱taꞌan ra na köo chiñu kúu mií. Saa ndi̱kaꞌan ra xiꞌin na, káchi ra saa: “¿Ndachu ndóo mií ndo nduvi ndaa, ta köo xáa chiñu ndo?”, káchi ra xiꞌin na. 7Saa ndi̱kaꞌan na xiꞌin ra, káchi na: “Nda iin naꞌa köo ndúku ndeꞌe xaa chiñu nde xiꞌin na”, káchi na. Saa ndi̱kaꞌan ra xiꞌin na: “Vaꞌa kuꞌun tu ndóꞌo̱ va xaa chiñu ndo nuu ñuꞌú i, nuu íyo kiti uva i, ta saa chaꞌvi i ndóꞌo̱ tá yaꞌvi ndo”, káchi ra xiꞌin na. 8Tá ku̱ñuu ta saa ka̱na ra xitoꞌo ñuꞌú ikán, ra ndíso chiñu xiꞌin ñaꞌa ra, ñaa ndi̱kaꞌan ra xiꞌin ra káchi ra: “Kana ndiꞌi na xáa chiñu nuu i ta chaꞌvi un na, tá kuꞌva ndi̱kee na saa xáa un chaꞌvi un na. Xiꞌna na ndi̱kee sindiꞌi chaꞌvi un, saa ndíkun un chaꞌvi un ndiꞌi na, ta nda sindiꞌi chaꞌvi un na ndi̱kee núnu̱ú”, káchi ra xiꞌin ra. 9Saa ndi̱xaa na ndi̱kee sindiꞌi, na ndi̱kee kàà uꞌun xikuáa ta ki̱ꞌin na yaꞌvi taꞌan ya kíꞌin na xáa chiñu iin nduvi ndaa. 10Saa ndi̱xaa tu na ndi̱kiꞌvi núnu̱ú, na ndi̱kiꞌvi xitaan. Ta kuaꞌa ni ka kiꞌin na ikán, ka̱ꞌán na. Ta saa cha̱ꞌvi tu ra na ikán va, iin káchi cha̱ꞌvi ra na xiꞌin ndiꞌi na ndi̱kee sindiꞌi. 11Tá ndi̱kiꞌin na yaꞌvi na saa xa̱á na kánaꞌa na xaꞌa ra xáa chiñu na nuu, 12káchi na: “Naꞌa, na xa̱a chiñu iin hora loꞌo, na ndi̱kiꞌvi sindiꞌi, ta cha̱ꞌvi un na tá kuꞌva cha̱ꞌvi un ndeꞌe xa̱a chiñu iin nduvi ndaa, ta niꞌni ka vi xa̱a chiñu nde, ta iin káchi cha̱ꞌvi un ndeꞌe, ni väꞌa kéta ya”, káchi na xiꞌin ra. 13Saa ndi̱kuiin ra káꞌan ra xiꞌin iin ra ikan, káchi ra: “Tata migo, säa ni un, chi köo ndi̱sindaꞌvi i yoꞌo̱. Tá kuꞌva ki̱ndoo i xiꞌin un cha̱ꞌvi i yóꞌo̱, saa kua ta̱xi i ndaꞌa va un”. 14Ta vaꞌa ndikiꞌin xuꞌun un ya xa̱a chiñu un, ta kuanuꞌu vitin. Ni tá kuꞌva ki̱ꞌin yóꞌo̱ saa ki̱ꞌin na ndi̱kee sindiꞌi, saa chi saa kúni mií i ikan i xiꞌin na. 15Mií i xíni va xaꞌa ya íkan i xiꞌin ñaꞌa i. ¿Án kûní ini un xaꞌa ya vaꞌa íkan i xiꞌin naꞌa?” káchi ra xíin ñuꞌú ikán xiꞌin ra xáa chiñu nuu ra.

16Saa sindiꞌi Jesús ndi̱kaꞌan ra, káchi ra saa:

―Ta vaꞌa ná kundaa ini ndo, chi na núnu̱ú ku na nduu na sindiꞌi, ta na sindiꞌi ku na nduu na núnu̱ú. Saa chi kuaꞌa ni naꞌa ka̱na Ndioxi, ta loꞌo ni ku na ndi̱kaxin ra ―káchi Jesús xiꞌin na.

Káꞌan tuku Jesús ya kuvi ra

(Mr. 10:32-34; Lc. 18:31-34)

17Tá kuandaa Jesús kuaꞌan ra ichí ya kuaꞌan ñuu Jerusalén, saa ka̱na síin ra uxi uvi saa nda ítaꞌan xiꞌin ra, ta ndi̱kaꞌan ra xiꞌin nda, káchi ra saa:

18―Vitin kuaꞌan yo ñuu Jerusalén, ta ikán ku nuu nditaxi na yeꞌe Taa ra xa̱a ñuu ivi yóꞌó ndaꞌa sutu nda naꞌnu nuu sutu, xiꞌin nda sínaꞌa ley Ndioxi, ta kaꞌnda nda ikán chiñu ya kaꞌni na yeꞌe. 19Saa nditaxi nda yeꞌe ndaꞌa naꞌa, na köo kúu judío ya kusiki ndaa na yeꞌe, kuaku ndaa ni na yeꞌe, saa kani ni na yeꞌe xiꞌin kuarta xaa nduvaꞌa ni na xiꞌin i. Ta sindiꞌi, saa kaꞌni na yeꞌe ndaꞌa cruzin. Sundi kivi uni nditaku i ―káchi Jesús xiꞌin nda.

Ya ndúku siꞌí ra Jacobo xiꞌin ra Juan xaꞌa uvi saa nda

(Mr. 10:35-45)

20Saa ku̱yati yá síꞌi ra Zebedeo xiꞌin uvi saa nda seꞌe na, ku̱yati yá xiꞌin nda nuu Jesús si̱kusiti yá nuu ra, ya ndúku yá ya mani nuu ra. 21Saa ndindakan tuꞌun ra yá, káchi ra:

―¿Unkua kúni un ikan i xiꞌin un, nana? ―káchi ra xiꞌin yá.

Saa ndi̱kuiin yá káꞌan yá xiꞌin ra:

―Tata, tá ná xáa un kaꞌnda chiñu un ra taxi loꞌo un ichí ná koo uvi saa nda seꞌe i xiꞌin un nuu tai toꞌo, iin ra ná koo ñaꞌñu kuáꞌá un, ta inka ra ná koo loꞌo ñaꞌñu ítín un ―káchi yá xiꞌin Jesús.

22Saa ndi̱kuiin Jesús káꞌan ra xiꞌin yá, káchi ra saa:

―Nana, ni köo kúndaa ini ndo unkua ndúku ndo nuu i. ¿Án kuchiñu ndo koꞌo ndo vaso nuu koꞌo i ta kuchi ndo tá kuꞌva kuchi i? ¿Án xáꞌa ndee ini ndo ndoꞌo ndo xiꞌin i? Chi yeꞌe ta yáꞌa ni vi ndee tixuꞌvi i? ―káchi ra xiꞌin nda.

Saa ndi̱kuiin nda, káꞌan nda:

―Kuchiñu va nde, Tata ―káchi nda xiꞌin ra.

23Ñaa ndi̱kaꞌan Jesús xiꞌin nda, káchi ra saa:

―Ya ndaa kua tixuꞌvi ni ndo tá kuꞌva tixuꞌvi i. Sundi ya kundoo iin ndo ñaꞌñu kuáꞌá i tin ñaꞌñu ítín i, ta küvi taxi i ya ndaꞌa ndo. Saa chi mií Iva i ku ra xíni unku na xa chi̱tuni mií ra kundoo ikán ―káchi Jesús xiꞌin nda.

24Saa tá ku̱ndaa ini inka uxi saa nda taꞌan ra Jacobo xiꞌin ra Juan, ñani ra, ta ndi̱saa nda xiꞌin nda ikán. 25Ñaa ka̱na Jesús ndiꞌi nda, ta ndi̱kaꞌan ra xiꞌin nda, káchi ra saa:

―Xíni mií ndo, na ñuu ivi yóꞌó, na kúu mií chiñu nuu na, ta íkan na ya kúni mií na xiꞌin naꞌa. Ta ndiꞌi na kúu mií chiñu ndee nuu na, ta köo táxi na ikan naꞌa ndá ka ñaꞌa, chi iin mií na kú na kúni kaꞌnda chiñu. 26Sundi ndóꞌo̱, ta ïkan ndo saa. Tá ndá iin ra kúni ra kuu ra ra chee, ra kaꞌnda chiñu nuu ndo, ta ra ikán xiꞌna xíniñuꞌu ra xaa chiñu ra nuu ndo. 27Tá ndá iin ra, kúni ra kuu ra iin ra núnuu nuu ndo, ta xiꞌna xíniñuꞌu ra nduu ra moso nuu ndo. 28Tá kuꞌva íkan yeꞌe Taa ra xa̱a ñuu ivi yóꞌó, chi yeꞌe ta köo vaxi i ya kaꞌnda i chiñu nuu naꞌa, sundi yeꞌe ta vaxi i ya koto vií i xiꞌin na saa xaa súvi i chiñu nuu na, ta saa kua kuchiñu na saña ndika na xaꞌa kuachi na ―káchi Jesús.

Si̱ndaꞌa Jesús uvi nda kuáa̱

(Mr. 10:46-52; Lc. 18:35-43)

29Saa tá ke̱e Jesús ñuu Jericó kuaꞌan ra ichí xiꞌin nda ítaꞌan xiꞌin ra, ta kuaꞌa ka vi naꞌa ndíkun kuaꞌan sata ra. 30Ta ndóo uvi nda kuáa̱ yuꞌu ichí ikán, saa xi̱ni soꞌo nda yáꞌa Jesús kuaꞌan ra, ta ndee ni ndee ndi̱kaꞌan nda ikán, káchi nda:

―¡Tata, Seꞌe ra David, kundaꞌvi ini un kuni un ndeꞌe! ―káchi nda xiꞌin Jesús.

31Ta na kuaꞌan xiꞌin Jesús ndi̱kaꞌan na xiꞌin nda ikán, ya ná kutaxin yuꞌu nda, ta iin ndáꞌi koꞌo vaꞌa ka nda, káchi nda saa: ¡Tata, Seꞌe ra David, kundaꞌvi ini un kuni un ndeꞌe! ―káchi nda xiꞌin Jesús.

32Saa ndi̱kundichi Jesús, ta ka̱na ra nda ndi̱xaa nda nuu ra, saa ndi̱kaꞌan ra xiꞌin nda, káchi ra:

―¿Unkua kúni ndo ikan i xiꞌin ndo? ―káchi ra xiꞌin nda.

33Saa ndi̱kuiin nda káꞌan nda:

―Tata, kúni nde sindaꞌa un ndeꞌe, ná ndikuna nuu nde ya vaꞌa ndikoto nde ―káchi nda xiꞌin ra.

34Saa ku̱ndaꞌvi ini Jesús xi̱ni ñaꞌa ra, ñaa ti̱in ndaa ra nduchi nuu nda. Ta ndikun ndu̱vaꞌa nduchi nuu nda, ndi̱koto vaꞌa nda, ta saa ndi̱kundikun nda sata ra, kuaꞌan nda.

Currently Selected:

San Mateo 20: xta

Highlight

Copy