San Juan 8

Ñaꞌa yá ndi̱tuvi xiꞌin taa

1Saa ke̱e Jesús kuaꞌan ra iku náni itun Olivo. 2Ta xitaan, tá ndi̱tuvi inka kivi ndi̱ko koo ra yeꞌe veꞌe ñuꞌu. Saa ndi̱xaa iin tiꞌvi chee na ñuu nuu ra, saa índuꞌu koo ra sínaꞌa ra na. 3Saa kúu ta ndi̱xaa nda maestro nda sínaꞌa ley ya ta̱a ra Moisés xiꞌin nda fariseo, ndáka nda iin ñaꞌa yá ndi̱tuvi xiꞌin taa, ndi̱xaa nda xiꞌin yá nuu Jesús, ta ki̱ꞌin nda yá ka̱ndichi sava nda maꞌñu ndiꞌi na ikán. 4Saa ndi̱kaꞌan nda xiꞌin Jesús, káchi nda saa:

―Tata Maestro, yá yóꞌó ta ndi̱taꞌan nde yá ndíkaa yá xiꞌin taa, ta süvi ií yá ku ra. 5Ta ley Ndioxi ya ta̱a ra Moisés káchi ya saa: Ndiꞌi na íkan saa ta nduxa kaꞌni yo na xiꞌin yu̱ú. Ta ¿unkua káchi yóꞌo̱? ―káchi nda xiꞌin Jesús.

6Káꞌan nda saa xiꞌin ra ya xíto ndoso ñaꞌa nda, ta saa kuchiñu nda taxi nda kuachi xaꞌa ra. Ta saa ndi̱kuita ndee Jesús nuu ñuꞌú, xa̱á ra táa ra xiꞌin nduku ndaꞌa ra. 7Ta ndíkundee nda ndákan tuꞌun ñaꞌa nda, saa ndi̱kundichi ra ta ndi̱kaꞌan ra xiꞌin nda, káchi ra saa:

―Unku ndóꞌo̱ köo nda iin kuachi kúu mií, ta vaꞌa xiꞌna ndóꞌo̱ kiꞌin yu̱ú kakin ndo sata yá ―káchi ra xiꞌin nda.

8Saa ndi̱kuita ndee tuku ra, táa ra nuu ñuꞌú. 9Saa tá xi̱ni soꞌo nda ya ndi̱kaꞌan ra xiꞌin nda, ñaa ku̱kaꞌan nuu nda, tá iin tá iin nda ka̱na koo kuaꞌan, xiꞌna nda chee ka̱na koo kuaꞌan, ta saa ndíkun nda kuvali kuaꞌan nda. Saa tá ka̱na koo ndiꞌi nda kuaꞌan nda, ta ndi̱ndoo siindaa mií yá ndíchi yá nuu Jesús. 10Ta saa nda̱niꞌi nuu ra xíto ra, ta nda iin ka nda köo ndi̱xini ra, ñaa ndi̱kaꞌan ra xiꞌin yá, káchi ra saa:

―Nana, ¿maꞌa nda táxi kuachi xaꞌa un? ¿Án nda iin ka nda köo káꞌan kuvi un? ―káchi ra xiꞌin yá.

11Saa ndi̱kuiin yá káꞌan yá:

―Köo ka nda iin nda, Tata ―káchi yá.

Saa ndi̱kaꞌan Jesús xiꞌin yá káchi ra saa:

―Ni yeꞌe, ta köo táxi i kuachi xaꞌa un kuvi un. Vaꞌa, kuanuꞌu ta ïkan ka un ya väꞌa ―káchi ra xiꞌin yá.

Jesús ku ñu̱ꞌu̱ ya túun nuu na ñuu ivi,

12Saa xa̱á tuku ra káꞌan ra xiꞌin naꞌa, káchi ra saa:

―Yeꞌe ku ñu̱ꞌu̱ ya síndiyeꞌe nuu na ñuu ivi yóꞌó. Ta ndiꞌi na ndíkun yeꞌe ta käka na ichí ya naá, chi kúu mií na ñu̱ꞌu̱ ya táxi kutaku na ―káchi ra xiꞌin na.

13Saa ndi̱kaꞌan nda fariseo xiꞌin ra, káchi nda saa:

―Köo ndáa yaꞌvi ya káꞌan un, chi süvi inka naꞌa káꞌan xaꞌa un, mií va un káꞌan xaꞌa un, yakan süvi ya ndaa kua káꞌan un ―káchi nda xiꞌin ra.

14Saa ndi̱kuiin Jesús káꞌan ra:

―Ni káꞌan i xaꞌa mií i, ta ndáa yaꞌvi ya káꞌan i xaꞌa i, saa chi xíni i míí chí ki̱xi i, ta xíni i míí chí kuꞌun i, sundi ndóꞌo̱ ta köo xíni ndo míí chí ki̱xi i, ni köo xíni ndo míí chí kuꞌun i. 15Ndóꞌo̱ ta xáa nani ndo kuachi naꞌa tá kuꞌva xáꞌnda chiñu na ivi yóꞌó, sundi yeꞌe ta nda iin naꞌa köo xáa nani i kuachi xiꞌin. 16Sundi tá tu xáa nani i kuachi na, ta ndaku xáa nani i ya xiꞌin na, chi süvi iindaa mií i xáa nani ya xiꞌin na, Iva i Ndioxi ra ti̱ꞌvi yeꞌe vaxi i ku ra íyo xiꞌin i xáa nani i ya xiꞌin na. 17Ta ley mií ndo ya íyo ndaꞌa ndo káꞌan ya, tá íyo uvi na ndíkuiin xaꞌa iin taa, ta saa kua ndáa yaꞌvi ya káꞌan ra, káchi ya. 18Ta yeꞌe ndíkuiin i xaꞌa mií va i. Ta saa tu Iva i ra ti̱ꞌvi yeꞌe vaxi i, ndíkuiin ra xaꞌa i ―káchi Jesús xiꞌin nda.

19Saa ndi̱kaꞌan nda xiꞌin ra káchi nda saa:

―¿Míí íyo Iva un? ―káchi nda.

Saa ndi̱kuiin Jesús káꞌan ra xiꞌin nda:

―Ndóꞌo̱ ta köo xíni ndo yeꞌe, ta ni Iva i köo xíni ndo ra. Saa chi tá tu xíni ndo yeꞌe, ta kúni kachi ya xíni tu ndo Iva va i, ndíkuu ―káchi ra xiꞌin nda.

20Ndiꞌi tuꞌun yóꞌó ndi̱kaꞌan Jesús yeꞌe veꞌe ñuꞌu kaꞌnu. Ndi̱kaꞌan ra saa tá ndi̱xiyo ra yati nuu ndíchi ñaꞌa nuu táan na xuꞌun, ya sóko na nuu Ndioxi. Káꞌan ra saa ya sínaꞌa ra naꞌa. Ta nda iin nda köo ndi̱tiin ñaꞌa, chi täꞌan xinu koo kivi ya kundoꞌo ra saa.

Káꞌan Jesús küvi kuꞌun nda nuu kuꞌun ra

21Saa ndi̱kaꞌan tuku Jesús xiꞌin nda, káchi ra saa:

―Yeꞌe ta kuꞌun i, ta saa ndinduku ni ndo yeꞌe ta nïꞌi ndo yeꞌe. Ta ndóꞌo̱ ta kuvi ndo xaꞌa kuachi ndo. Chi nuu kuꞌun i ta küvi kuꞌun ndo ―káchi ra xiꞌin nda.

22Saa ndi̱kaꞌan nda naꞌnu nuu na judío, káchi nda saa:

―¿Míí kuꞌun ra kua, án kaꞌni ra mií va ra, ndachu káꞌan ra küvi kuꞌun yo nuu kuꞌun ra? ―káchi nda.

23Saa ndi̱kaꞌan Jesús xiꞌin nda, káchi ra saa:

―Ndóꞌo̱ ta ndo ivi nìnù yóꞌó va ku ndo, sundi yeꞌe, ta yeꞌe ki̱xi chí ni̱nu ku i. Ndóꞌo̱ ñuu ivi yóꞌó ku ndo, sundi yeꞌe ta süvi yeꞌe ñuu ivi yóꞌó ku i. 24Xaꞌa ya ñaa kua ndi̱kaꞌan i xiꞌin ndo, kuvi ndo xaꞌa kuachi ndo, chi tá tu köo xíin ndo kandixa ndo yeꞌe, ya kúu i taa, ra ndi̱kaꞌan i xiꞌin ndo ku i, ta kuvi ndo xaꞌa kuachi ndo ―káchi ra xiꞌin nda.

25Saa ndi̱kaꞌan nda xiꞌin ra, káchi nda saa:

―Ta ¿unku yóꞌo̱ kua? ―káchi nda xiꞌin ra.

Saa ndi̱kuiin ra káꞌan ra xiꞌin nda:

―Nda tá xaꞌa vi ndi̱kaꞌan i xiꞌin ndo unku i, ta ra ikán ku i. 26Íyo kuaꞌa ni ya kaꞌan i xiꞌin ndo xaꞌa ya väꞌa íkan ndo. Sundi ra ti̱ꞌvi yeꞌe vaxi i, ta ra ndaa ni ku ra, ta ndiꞌi ya káꞌan i ñuu ivi yóꞌó ta ya xi̱ni soꞌo i ndi̱kaꞌan ra kua káꞌan i ―káchi Jesús xiꞌin nda.

27Ta köo ndi̱kundaa ini nda ikán xaꞌa Iva yo Ndioxi kua ndi̱kaꞌan ra xiꞌin nda. 28Xaꞌa ya ikán kua ndi̱kaꞌan ra xiꞌin nda, káchi ra saa:

―Vaxi kivi ta iin ichí chinuu sukun ndo yeꞌe, Taa ra xa̱a ñuu ivi yóꞌó. Ta saa kundaa ini ndo ya ndixa kua kúu i taa, ra ndi̱kaꞌan i xiꞌin ndo kúu i. Ta nda iin chiñu köo íkan iindaa mií i, ndisaa ya si̱naꞌa Iva i yeꞌe kua káꞌan i xiꞌin naꞌa. 29Chi Iva i ra ti̱ꞌvi yeꞌe vaxi i ta íyo ra xiꞌin i, köo síndoo mituꞌun ra yeꞌe, íyo ra xiꞌin i ta nina ya kúni mií ra kua íkan i ―káchi Jesús xiꞌin nda.

30Tá ndi̱kaꞌan ra saa, ta kuaꞌa ni na ka̱ndixa ñaꞌa.

Ya ndaa kua táxi sáña ndika naꞌa

31Saa ndi̱kaꞌan Jesús xiꞌin na judío na kándixa ñaꞌa, káchi ra saa:

―Tá tu chíkaa soꞌo ni ndo tuꞌun ya sínaꞌa i ndóꞌo̱ iin iin kivi ta saa kua ndixa ni kúu ndo ndóꞌo̱ ndíkun yeꞌe. 32Ta saa kundaa vaꞌa ini ndo xaꞌa ya ndaa, ta ya ndaa yóꞌó kua taxi ichí ndaꞌa ndo saña ndíka ndo ―káchi ra xiꞌin na.

33Saa ndi̱kuiin na káꞌan na xiꞌin ra, káchi na saa:

―Ndeꞌe ta seꞌe sikua ra Abraham ku nde, ta nda iin ichí köo na sáta ndeꞌe ya koo nde moso nuu na. ¿Ta ndachu káꞌan un vaxi ichí ta saña nde koo ndíka nde, káchi un? ―káchi na xiꞌin ra.

34Saa ndi̱kaꞌan Jesús xiꞌin na, káchi ra saa:

―Ya ndaa kua káꞌan i xiꞌin ndo, tá kúu ndiꞌi na kuakiꞌvi kuachi, ta tá íin na núꞌni ndaa saa íin na ndaꞌa ya. 35Ta xa xíni yo iin moso ra sa̱ta na xáa chiñu nuu na, ta süvi ndiꞌi saa ichí íyo ra veꞌe na xáa chiñu ra nuu, sundi seꞌe na xáa chiñu ra nuu ta ndiꞌi saa ichí íyo ra veꞌe, chi seꞌe na ku ra. 36Yakan kua tá tu ná saña ndíka Seꞌe Ndioxi ndóꞌo̱, ta saa kua ndixa saña ndo kuꞌun ndíka ndo ikan ra. 37Xa xíni i kúu ndo seꞌe sikua ra Abraham, sundi kúni ndo kaꞌni ndo yeꞌe xaꞌa ya köo kíndoo ini ndo xiꞌin tuꞌun káꞌan i xiꞌin ndo. 38Yeꞌe ta káꞌan i xiꞌin ndo ndá kuꞌva íyo ya si̱naꞌa Iva i nuu i. Ta saa tu ndóꞌo̱ va ndisaa ya káꞌan iva ndo xiꞌin ndo kua xáa súvi ndo ―káchi Jesús xiꞌin na.

Seꞌe kiti nǎꞌa ku na káchi Jesús xiꞌin na

39Saa ndi̱kuiin na káꞌan na, káchi na saa:

―Ra Abraham ku iva nde ―káchi na.

Saa ndi̱kuiin Jesús káꞌan ra xiꞌin na:

―Tá tu ndixa seꞌe sikua ra Abraham ku ndóꞌo̱, ta xaa súvi ndo taꞌan ya i̱kan ra ikán, ndíkuu. 40Sundi ndóꞌo̱ ta kúni ndo kaꞌni ndo yeꞌe xaꞌa ya ndi̱tuꞌun i ya ndaa xiꞌin ndo, ya xi̱ni soꞌo i ndi̱kaꞌan Iva i. Chi ra Abraham ta nda iin ichí köo ndi̱kan ra tá kuꞌva íkan ndóꞌo̱. 41Ndóꞌo̱, ta tá káa ya íkan iva ndo saa íin ya íkan ndo ―káchi Jesús xiꞌin na.

Saa ndi̱kuiin na, káꞌan na:

―Ndeꞌe, ta süvi nde ndíkaku saka ku nde, iin va iva nde, Ndioxi ku iva nde ―káchi na xiꞌin Jesús.

42―Tá tu ndixa Ndioxi ku Iva ndo ta kuꞌvi ini ndo kuni ndo yeꞌe, ndikuu. Saa chi yeꞌe ta nuu Ndioxi ke̱e i xa̱a i ñuu ivi yóꞌó, süvi xaꞌa ya kúni mií i kua xa̱a i, chi Ndioxi ku ra ti̱ꞌvi yeꞌe vaxi i. 43¿Ta ndachu küvi kundaa ini ndo ya káꞌan i xiꞌin ndo? Xaꞌa ya köo xíin ndo ndikiꞌin ndo tuꞌun ya káꞌan i xiꞌin ndo kua küvi kundaa ini ndo tuꞌun i. 44Kiti nǎꞌa va ku iva ndo: Seꞌe ri ikán va ku ndóꞌo̱ yakan kúni ndo ikan ndo ya íkan ri ikán. Saa chi ri ikán ta nda tá xaꞌa vi xa̱á ri xáꞌni ri ndìì. Ta nda iin ichí köo íkan ri ya ndaa, ta ni köo káꞌan ri ya ndaa. Tá káꞌan ri ya siki ta ndínaꞌa ri mií ri ya saa íyo ri, ta ri ikán ku iva siꞌí ndiꞌi ya vata. 45Sundi yeꞌe ta xaꞌa ya káꞌan i ya ndaa xiꞌin ndo yakan köo kándixa ndo yeꞌe. 46¿Án ndá ndóꞌo̱ táxi kuachi i xaꞌa ndá ya väꞌa ikán i? Ya ndaa káꞌan i xiꞌin ndo, ta ¿ndachu köo xíin ndo kandixa ndo yeꞌe? 47Ndiꞌi na kúu kuenta Ndioxi ta xíni soꞌo na tuꞌun ra, ta ndóꞌo̱ ta süvi kuenta Ndioxi ku ndo, yakan köo xíin ndo kuni soꞌo ndo ya káꞌan i ―káchi Jesús xiꞌin na.

Yachi ka vi íyo Cristo saa ka̱ku ra Abraham

48Saa ndi̱kaꞌan nda naꞌnu nuu na judío xiꞌin ra káchi nda saa:

―Xíni vaꞌa nde ndi̱kaꞌan nde xiꞌin un ya ke̱e un ñuu Samaria, ta kúu mií un tachi nduvaꞌa ―káchi nda xiꞌin ra.

49Saa ndi̱kuiin ra káꞌan ra:

―Köo tachi nduvaꞌa kúu mií i. Iva i Ndioxi va ku ra xáa toꞌo i yakan kánaꞌa ndo xaꞌa i. 50Ta süvi mií i ku i kúni ya xaa toꞌo naꞌa yeꞌe, íyo inka ra kúni ya xaa toꞌo na yeꞌe, ta ra ikán ku ra xáa nani kuachi naꞌa. 51Ta ya ndaa ku tuꞌun káꞌan i xiꞌin ndo, ndiꞌi na xáa súvi tuꞌun ya káꞌan i, ta küvi na ―káchi Jesús.

52Saa ndi̱kuiin nda naꞌnu nuu na judío, káꞌan nda, káchi nda saa:

―Ya ndaa ni ndixa káꞌan nde xiꞌin un, kúu mií un tachi nduvaꞌa. Chi ra Abraham ta ndi̱xiꞌi ra, ta saa ndi̱xiꞌi ndiꞌi tu nda ndi̱kaꞌan ndoso tuꞌun yuꞌu Ndioxi va, ta yóꞌo̱ káꞌan un: “Ndiꞌi na xáa súvi tuꞌun ya káꞌan i ta küvi na”, káchi un. 53Ta ¿án ndee ni ka va yóꞌo̱ nuu iva nde ra Abraham kua? Chi ra ikán ta ndi̱xiꞌi ra, ta saa tu nda ndi̱kaꞌan ndoso tuꞌun yuꞌu Ndioxi, ndi̱xiꞌi tu nda ikán va. ¿Unku yóꞌo̱ yakan ndee ni ndása un mií un? ―káchi nda xiꞌin ra.

54Saa ndi̱kuiin Jesús káꞌan ra:

―Tá ná chinuu vaꞌa i tuꞌun i, ta köo ndá yaꞌvi ya káꞌan i xaꞌa i. Sundi Iva i ra káꞌan ndo kúu Ndioxi ndo, ra ikán ku ra chínuu vaꞌa tuꞌun i. 55Sundi ndóꞌo̱ ta köo xíni ndo ra, ta yeꞌe ta xíni vaꞌa i ra. Tá tu ná kaꞌan i xiꞌin ndo köo xíni i ra kachi i xiꞌin ndo, ta ndúu i iin ra vata taꞌan mií ndo. Sundi yeꞌe ta ya ndixa kua xíni i ra, ta xáa súvi i ya káꞌan ra. 56Ta ra Abraham ra káꞌan ndo kúu iva ndo, ta xi̱ni i ku̱sini ni ra tá ndi̱kaꞌan Ndioxi xiꞌin ra ya kixi i ñuu ivi yóꞌó ―káchi Jesús xiꞌin nda.

57Saa ndi̱kaꞌan nda chiñu ikán xiꞌin ra káchi nda saa:

―Ni täꞌan ka xinu un uvi xiko uxi kuiya un, ta káꞌan un xi̱ni un ra Abraham ―káchi nda.

58Saa ndi̱kuiin Jesús káꞌan ra, káchi ra saa:

―Ya ndaa ni káꞌan i xiꞌin ndo, tá täꞌan ka vi koo ra Abraham, ta yeꞌe ta xa íyo va i ―káchi ra xiꞌin nda.

59Tá xi̱ni soꞌo nda tuꞌun ikán, ta ndi̱saa ni nda, saa ti̱in nda yu̱ú kani ñaꞌa nda, saa ti̱seꞌe ra ta ke̱ta ra ini veꞌe ñuꞌu ndi̱yaꞌa sava ra maꞌñu na, kuaꞌan ra.

Currently Selected:

San Juan 8: xta

Highlight

Copy