Mariko 8

Yesu êucha bandu byumbi bine

(Mat 15:32-39)

1Mwe'si suku, bandu banene busese bera kubuanana kanji. Mango bábaa bàtachete kalyo, Yesu era kwâmaala ebanafunzi* bai na ábura'bo mbu: 2«Bano bandu boshi, nàbafirire bonjo, bushi suku ehatu sine bamála ala'uma nanyi, bàtachete na kalyo kasibya. 3Rero, ndàngalaa'bo bàtanalire bangesha kurengukaliranga mwa njira ne'businya, bushi bauma mubo bàtengérangaa burerere.»

4Ebanafunzi* bai bera kumwǎkula mbu: «Enawetu! Si mwa buyeye* muno tùli! Rero, ngai u'tùngakula ebiryo bya bìngeucha bano bandu boshi?» 5Yesu era kubabusa mbu: «Mikati enga i'mwéte?» Nabo mbu: «Erinda.»

6Yesu era kubura ebandu mbu běkalaa ala'shi. Era kutola ei mikati erinda, na átonga Ongo. Chasinda, era kuishanga mui na êresa'i ebanafunzi* bai baábire'i abu bandu. Ebanafunzi* nabo, bera kunayǎbira ebandu boshi. 7Bábaa béte ne'fi sieke, kanji sieke-eke. Yesu era kutonga Ongo kanji bushi nasi, na ábura ebanafunzi* bai mbu nasi basiábaa. 8Abu bandu boshi bera kulya na bêuta. Chasinda, ebanafunzi* bera kutola-tola ebimbi-imbi bya byáshibaa, byera kwêhusa bitonga birinda. 9Ebandu ba bályaa ebi biryo, bábaa bàngaika ku byumbi bine.

Chasinda, Yesu era kubalaa. 10Unao-unao era kwérukira mwa bwato, ala'uma ne'banafunzi* bai. Bera kuya mwa chio che'Talimanuta.

Ebafarisayo béma Yesu echisomerano

(Mat 16:1-4)

11Era nyuma se'bi, eBafarisayo* bera kuikira Yesu na bátangirisa bámuenza ebwaka. Bera kumuereka mwa kumwěma mbu àbairira chisomerano chiuma, cha chilósise kanangana kwa ebuashi bwai bunátengire kwa nguba. 12Yesu era kutǒokala busese, na áteta mbu: «Chi chìngatuma ebandu be'sine suku báhonda kulola ku chisomerano? Kubinali, nábabura kwa kutáli chisomerano chisibya cha bangálosibwa!»

13Chasinda, era kureka abu bandu, era kuhuba kwérukira mwa bwato na áhabuka enyanja.

Echachu che'Bafarisayo ne'cha Heroti

(Mat 16:5-12)

14Ebanafunzi* ba Yesu bábaa bébirire kwêka emikati, si muuma pwere ibábaa banéte mwa bwato. 15Yesu era kubabura mbu: «Mundaa mwáchilanga kwa chachu* che'Bafarisayo* ne'cha Heroti.»

16Abu banafunzi* bera kutangirisa báburana mbu: «Àtechire bacha bushi tutéte emikati.»

17Ebi bábaa báburana bacha, Yesu era kubimenyerera. Bushi no'ku, era kubabura mbu: «Chi chátuma mwáburana mbu mutéte mikati? Mùtanasa kûmva? Nesi mùtanasa kumenyerera? Emichima yenyu ináchiri isibu? 18Mwéte meho, mùtanalola? Mwéte ne'matwi, mùtanômva?

«Mùtachikengere 19kwa mango nàishangangaa era mikati etano, era yèuchaa ba bandu byumbi bitano? Rero, mango mwàtola-tolaa ebimbi-imbi bya byàshibaa, mwêhusaa bitonga binga?» Nabo mbu: «Ekumi na bibiri.» 20Era kuhuba kubabusa mbu: «Kanji era mikati erinda nai, si yèuchaa bandu byumbi bine! Na mango mwàtola-tolaa ebimbi-imbi bya byàshibaa, mwêhusaa bitonga binga?» Nabo mbu: «Birinda.» 21Yesu kukwera kubabusa mbu: «Mùtanasa kûmva?»

Yesu álamya emuuta mwa musi we'Betesaita

22Era nyuma se'bi, Yesu ne'banafunzi* bai bera kuika mwa musi we'Betesaita. Ebandu bera kumuretera muuta muuma, na bámwěma busese mbu àmuumaa'ko. 23Yesu era kusimbira oyu muuta kwa mino, na ámukula mwa musi. Era kumuchira-chira mwa meho na ámubika kwe'mino. Chasinda, era kumubusa mbu: «Kuli kandu ka uséne'ko?» 24Nai mwa kwêmusa emeho, era kuteta mbu: «Nyiséne kwa bandu, bàli nga michi si báenda.» 25Yesu kanji era kumuuma kwa meho. Rero mera kulama, na átangirisa álola kwa bindu byoshi kubuya-buya. 26Chasinda, Yesu era kumubura mbu: «Wera ùngafuluka kwa wao, si ùtachihubaa mwa musi.»

Petero áteta mbu Yesu i'Kirisito

(Mat 16:13-20; Luk 9:18-21)

27Era nyuma se'bi, Yesu era kutenga mwe'chi chisiki ala'uma ne'banafunzi* bai. Era kuya mwa misi era itúla ofu ne'musi we'Kaisariya Firipi. Ábere banáchiri mwa luendo, Yesu era kubabusa mbu: «Ewashe! Ebandu bénjire báteta mbu nyi nde kasi?» 28Nabo mbu: «Bauma bénjire báteta mbu u'Yowani Mubatisayi, ne'banji mbu u'Eliya, ne'banji mbu ùli muuma mwa barebi.»

29Yesu era kuhuba kubabusa mbu: «Rero, nenyu mwénjire mwáteta mbu nyi nde?» Petero era kumwǎkula mbu: «Woyo u'Kirisito*!» 30Yesu era kubachichika mbu bàtaereresaa báfulira chiro na mundu asibya kwe'i myasi.

Yesu áteta era luulu se'kufa ne'kwômoka kwai

(Mat 16:21-28; Luk 9:22-27)

31Chasinda, Yesu era kutangirisa ákangirisa ebanafunzi* bai mbu: «Nyi Mwana we'Mundu, byěmire nyiríbusibwe mu njira sinene. Ebashamuka be'Bayuta*, ne'bakulu-kulu be'bakuhanyi* ala'uma ne'bakangirisi be'Mwaso* bangányinana. Chasinda nyingêchibwa, si kwa lusuku lwa kahatu nyingwômoka.» 32Ei myasi, Yesu áburaa'i ebanafunzi* bai changanama.

Bushi no'ku, Petero era kumweka ala musike na átangirisa ámubanda'ko mbu àtatetaa bacha! 33Si Yesu kuna kubinduka na ásindera ebanafunzi* bai. Era kukaliira Petero mbu: «Eu Musimu! Tèngaa mwa meho manyi, bushi ei mianyisa yao, atá era mwa Ongo yi yátenga, si ináli ya bandu!»

34Chasinda, Yesu era kwâmala lwa luamba lwe'bandu ala'uma ne'banafunzi* bai, era kubabura mbu: «Ola wáhonda kunyikulikira, arékaa kunde áanyisa era luulu sai yeine, ěke ne'musalaba wai, anányikulikire. 35Bushi ola wáhonda kulamya ekalamo kai, akákaesa. No'la ukáesa'ko bushi nanyi, na bushi ne'Mwasi Mubuya-buya, yeke akáhuba kukabona. 36Ola wàesise ekalamo kai, rero mutoloke muchiye àngachibona chiro àngaata ebindu byoshi byo'mwa butala? 37No'mwa kuhonda kununula aku kalamo kai, chiye chi àngana?

38«Muményereraa kwa bandu ba lwarero bàtatusa bwemeresi kanji bàtalaire ku Ongo. Bushi no'ku, akaba emundu ànganyifira honyi, áfira'si ne'myasi yanyi era muhondo sabo, nanyi nyi Mwana we'Mundu nyikámufira'si mango nyikábaha ala'uma ne'bamalaika* banyi babuya-buya mwa bulangare bwa Tata.»

Currently Selected:

Mariko 8: tbt

Highlight

Copy