Mikolo ye'ndumwa 6

Ebemeresi bálondola bandu balinda kwa kuasa endumwa

1Mwesi suku, emuanjo we'bemeresi era kuendekera áluwa. Mwa kachi-kachi kabo, mwábaa mùli bahumba-kasi banene. Chira lusuku mango béndee báaba ebiryo, eBayuta ba béndee báteta eChikiriki bera kuyongwa bushi ebáhumbakasi ba béndee báteta eChieburaniya, béndee bêresibwa mwango munene kurenza ebáhumbakasi babo. 2Bushi no'ku, esi ndumwa ekumi ne'biri kukwera kubuanyanya ebemeresi boshi, na sábura'bo mbu: «Emulimo we'kwêshibira twáabira ebandu ebiryo, àtangatuma tubano twárekerera ekuhubanganya eChinwa cha Ongo. 3Rero banyaketu, mulóndolaa balume balinda mwa kachi-kachi kenyu. Abu balume babáa ba bète ngulu ibuya, kanji ba bákoresibwa ne'Muchima Mubuya-buya, kanji ba bète bwenge. Abola, bu tungêresa oyu mulimo, 4netu tungére twáchana mwa memo no'mwa mulimo we'kuhubanganyisa ebandu eChinwa cha Ongo.»

5Ebandu boshi bera kumoera oyu mwasi. Bera kulondola tanga Sitefano. Oyu Sitefano ábaa atúsa bwemeresi bunene, kanji ábaa ákoresibwa ne'Muchima Mubuya-buya. Bera kulondola na Firipo, na Porokoro, na Nikanora, na Timoni, na Parimena, na Nikolao. Oyu Nikolao, ábaa atúla mwesha mwa musi we'Andiyokiya, si era kwêmerera Ongo we'Bayuta. 6Chasinda, abu bandu balinda, ebemeresi bera kubemanza era muhondo se'ndumwa, nasi sera kuběmera mwa kubabika kwe'mino.

7Bushi no'ku, bandu banene bera kumva eChinwa cha Ongo. Ebemeresi nabo, bera kunaendekera báluwa busese mwa musi we'Yerusalemu. Na luamba lunene lwa bakuhanyi nalo, lwera kunêmerera Yesu.

Ebakulu-kulu be'Bayuta báminyisa Sitefano

8Sitefano ábaa áahanyirwe busese na Ongo, kanji ábaa éte na buashi bunene. Bushi no'ku, era kunde áira bisomerano na bimenyeso binene mwa bandu. 9Si bandu bauma bera kususa bwaka nai. Bauma mubo bábaa Bayuta ba béndee bábuanana mu bushenge buuma bwa bwěrikirwe mbu Bushenge bwe'ba bátengire mwa bucha. Mwa'bu bandu, mwábaa mùli ba bátengeraa mwa musi we'Kurene, ne'we'Alesanduriya, no'mwa chio che'Kirikiya, ne'banji mwa che'Asiya. 10Si bushi éndee áteta na bwenge bunene, kanji bushi eMuchima Mubuya-buya iwéndee wámweresa ebinwa, baténdee báala kumuima. 11Bushi no'ku, bera kushíirisa bandu bauma, mbu batétaa kwa bàchûmviraa kwa Sitefano áteta myasi ya kukamba Ongo na Musa. 12Chasinda, abu Bayuta bera kushíirisa ebandu, ne'bashamuka, ala'uma ne'bakangirisi be'Mwaso* mbu basímbaa Sitefano. Bera kunamutelula na bámweka era muhondo se'Karubanda ke'Bayuta*. 13Bera kureta babei ba bisha. Abu babei bera kuteta mbu: «Ono mundu aténjire áreka kuteta bulio era luulu so'luno Luhu lubuya-buya lwa Ongo, ne'ra luulu se'Mwaso wa Musa. 14Kanji tubeine twanáchumviraa kwa áteta mbu oyu mwesha Nasareti mbu i'Yesu angáhandula olu Luhu, ne'kubindula emyanya era Musa áturekeraa.» 15Ebandu boshi ba bábaa bàli mwa'ku Karubanda*, kutumbikisa ku bábaa bera banátumbikisa Sitefano. Bera kulola kwa ebuso bwai bwanábere pe-pe-pe nga bwa malaika*.

Currently Selected:

Mikolo ye'ndumwa 6: tbt

Highlight

Copy