Mikolo ye'ndumwa 16

Timoteo áenda na Paulo na Sila mwa mulimo

1Paulo era kuika mwa musi we'Teribe no'mwa we'Lisitara. Mwo'yu musi we'Lisitara era kubuana mu'mwemeresi muuma mbu i'Timoteo. Oyu Timoteo, ábaa muala wa Muyutakasi muuma ola wáhubaa mwemeresi, ne'she ábaa Mukiriki. 2Ebemeresi be'Lisitara ne'be'Ikoniyo, béndee báteta kwa Timoteo atúsa myanya ibuya. 3Bushi no'ku, Paulo era kwire áhonda Timoteo énde ámwerekesa mwa nyibalamo sai. Paulo era kumurenza tanga mwa mwiya we'kumona, bushi eBayuta boshi ba bábaa batúla mwe'bi bitambi, bábaa banêshi kwe'she wa Timoteo atúla Mukiriki. 4Mwa misi era béndee básungula'mo, bábaa bénjire báenda bábalikisisa ebemeresi kwa myasi era endumwa* ala'uma ne'bangumwa be'luhu lwa Ongo lwe'Yerusalemu bàfunjikaa. Kanji ei myasi, bera kubabura kwa béndaa báikulikira kubuya. 5Bushi no'ku, ebemeresi bera kunaendekera básimika mwa bwemeresi bwabo, na kuendekera báluwa chira lusuku.

Besha Maketoniya bálalika Paulo

6Paulo na balikabo bera kurenga mwa chio che'Furikiya no'mwa che'Kalatiya, bushi eMuchima Mubuya-buya ângaa'bo mbu bàtahubanganyaa eChinwa cha Ongo mwa chio che'Asiya. 7Mango báikaa ofu ne'chio che'Misiya, bera kuata mianyisa ya kuya mwa musi we'Bitiniya, si eMuchima wa Yesu, era kwânga'bo kanji. 8Bushi no'ku, bera kwire bárenga mwa chio che'Misiya na bândalira mwa musi we'Torowa.

9Ábere bwera butufu, Paulo era kuya mu byabunya biroto. Era kulola ku mwesha Maketoniya muuma eménze era muhondo sai ámwema na bonjo bunene mbu: «Uréngeraa mwa chio chetu che'Maketoniya, utúase!» 10Era nyuma se'bi biroto, unao-unao twera kukunganya elubalamo lwe'kuya eMaketoniya, bushi twábaa twaményerere kanangana kwa Ongo iwàtwâmaere kuya kuhubanganyisa besha'yi eMwasi Mubuya-buya.

Lutiya êmerera Yesu

11Era nyuma se'bi, twera kutenga eTorowa mwa bwato, unao-unao na twáhabukira kwa chisimba che'Samotirake. Ábere mwe'i mishangya, twera kuika mwa musi we'Neyapoli. 12Twera kutenga eNeyapoli, na twáya mwa musi we'Firipi iwábaa musi munene we'chio che'Maketoniya. Oyu musi ábaa àli mwa bucha bwe'Baroma. Twera kumala'mo suku burebe.

13Mango elusuku lwe'Sabato* lwáikaa, twera kutenga mwo'yu musi, na twáya ofu ne'lwishi, bushi twáanyisaa kwa mwe'chi chisiki mwe'bandu béndee bémera Ongo. Twera kubuana bakasi bauma babúananyire'mo, twera kwekala na twátangirisa twábabura era luulu sa Yesu. 14Mwa'bu bakasi, mwábaa mùli muuma mbu i'Lutiya, mwesha mwa musi we'Tuwatera. Oyu Lutiya, ábaa atúla muchimbusi wa njimba sa bulimbi sa mwola, kanji ábaa atúla àtunjire Ongo. Na mango Paulo ábaa áhambala, Enawetu era kuboola emuchima wa Lutiya kuikira echihangi êmerera emyasi ya Paulo. 15Chasinda, era kubatisibwa ala'uma na besha mwa mwai boshi. Era kutwěma mbu: «Akaba mwalólire kwa nemérere Enawetu kanangana, mubáhaa mubere mwa mwanyi.» Era kunatwanjírira twěmerere.

Ebakulu-kulu be'Baroma báuma Paulo na Sila mwa buroko

16Lusuku luuma, twábaa twáya mwa chisiki che'kwemera'mo, twèra kubuanana na muandakasi muuma wa munyere. Oyu muandakasi, ábaa atúsa chihwasi cha chéndee chámuasa kulaula. Oku kulaula kwai, kwera kutuma be'nawabo kunde bábona bikulo binene. 17Era kunde ákulikira Paulo ala'uma netu áenda álakanga mbu: «Bano bandu, bàli bakosi ba Ongo wo'kwa Nguba. Bénjire ba báhambalira era luulu se'njira era mùngabona mwe'bununusi.» 18Era kunámala suku sinene énjire áira bacha. Chasinjire, Paulo ebute bwera kumusimba. Rero, lusuku luuma era kubinduka na ábura echi chihwasi mbu: «Nàtechire kwe'sina lya'Yesu Kirisito, uténgaa kwo'yu munyere.» Unao-unao, cha chihwasi kuna kumutenga'ko. 19Rero be'nawabo ola munyere, bálolire kwa emunyiiro wabo we'kubona emutoloke kurengera oyu munyere awére, bera kwire básimba Paulo na Sila. Bera kubakululira era muhondo se'baishi be'manja ala bandu béndee bábuanana. 20Mango ba baísaa era muhondo sa'bu baishi be'manja be'Baroma, bera kutangirisa báteta mbu: «Bano bandu bàli Bayuta, kanji bàrechire na lwayo lunene mwo'no musi wetu. 21Ne'myanya era bénjire bákangirisa ebandu, iri era tu Baroma tutúla tunányisibwe kwêmerera nesi kukulikira.»

22Eluamba lwe'bandu lómvire bacha, kuna kutabalira Paulo na Sila. Ebaishi be'manja bera kubura ebasula babo mbu: «Mubákongolaa enjimba, mubáhute etuchi.» 23Ábere bera babáhutaa busese, bera kwire bábauma mwa buroko. Bera kubura emulanzi wo'bu buroko mbu àbalangaa kubuya. 24Kukulikana no'yu mwasi, oyu mulanzi era kuuma'bo mwa chumba cho'mwa ndanda busese. Era kubaminyira emaulu mwa biito.

25Mango kábaa káhonda kuba kachi-kachi ka butufu, Paulo na Sila bábaa banáchiri béma ne'kwîmba enyimbo se'kutonga Ongo. Ebanji bandu be'mulisi nabo, bábaa bábomvirisa. 26Unao-unao, kwera kurenga musisi munene, era kulingitanya eburoko. Enyisi soshi sera kunachichungulanga, ne'mareure ma mábaa màminyire ebandu be'mulisi boshi, namo kuna kuchiboókaliranga. 27Emulanzi we'buroko era kusuka. Álolire kwa nyisi se'buroko sìbookere, era kuhohola ebômbo bwai àchite, bushi áchichingaa mbu ebandu be'mulisi bongólokire. 28Si Paulo era kuuma emurenge mbu: «Cha-cha! Ùtachîtaa, bushi tuboshi mu tunáli muno.» 29Oyu mulanzi, kukwera kwéma ekamore, era kulibichira mwe'cha chumba fuba, era kuchihunda mwa maulu ma Paulo na Sila, ákukumana ne'buba.

30Chasinda, era kubeka era butala, na ábusa'bo mbu: «E benawetu, chi němire kuira chasiya nyibóne ebununusi?» 31Nabo mbu: «Wěmereraa Enawetu Yesu, ubóne ebununusi ala'uma na besha mwa mwao.» 32Bera kumubalira eChinwa cha Enawetu, ala'uma na besha mwa mwai boshi. 33Unao-unao, mwo'bu butufu, oyu mulanzi era kutola Paulo na Sila, era kubalonga ebyuulu, chasinda bera kumubatisa ala'uma na besha mwa mwai boshi. 34Chasinjire, era kubabura mbu běrukiraa ala mwai, era kubasheera ebiryo. Yeine ala'uma na besha mwa mwai boshi bera kumowa busese bushi bemérere Ongo.

35Mango bwábaa bwera bwacháa, ebaishi be'manja be'Baroma bera kutumira oyu mulanzi endumwa mbu: «Ubóolaa ba bandu.» 36Oyu mulanzi nai era kuya kubura Paulo mbu: «Ebaishi be'manja banyítumirire emwasi kwa nyibáboolaa. Rero, mwiree mwáuluka, muchiéndere ne'bôlo.»

37Si Paulo era kubura ba báretaa oyu mwasi mbu: «Abu baishi be'manja batúhuchisaa changanama busira kututonganya tanga, no'ku netu tunáli Baroma! #16:37 eBaroma bábaa batéte loso lwa kupunda Muroma mulikabo. Paulo na Sila bábaa Bayuta, kanji emwaso we'Baroma ábaa abêmerere kuba Baroma. Bera kunálinda bátuuma na mwo'buno buroko. Rero, kute bera báhonda kutuboola mwa bubisho-bisho? Chìtangaalikana! Beine babáhaa batúboole.» 38Abu bandu ba bátumwaa bera kuya kubalira ebaishi be'manja kwe'i myasi. Abu baishi be'manja bômvire kwa kasi Paulo na Sila nabo bàli Baroma, bera kwôbaa busese. 39Bera kwire báya kuběma ebubabalire na kubakula mwa buroko. Chasinda, bera kubura Paulo na Sila mbu baténgaa mwo'yu musi.

40Mango Paulo na Sila bábaa bera bàtengaa mwa buroko, bera kuya ala mwa Lutiya. Bera kutangula ebemeresi na kubasesa emichima. Chasinjire, bera kwire bátenga mwo'yu musi.

Currently Selected:

Mikolo ye'ndumwa 16: tbt

Highlight

Copy