Luk 9
9
Jisɔs afong bɔ eriɔfɔ yi bafai ba alag ɔbɔ owu
(Mat 10:5-15; Mak 6:7-13)
1Epo yid Jisɔs ayen ba alag ɔbɔ owu aba ekpen yid: we ake bɔ ɔsa yi erug akeb feb bebe bi bɔnyɔganyɔ erɔng agban bekɔn, 2afong bɔ arɔ achag aka kwɔri abangang bɔlen bu Ɔsɔwɔ, agban bayɔgɔyɔ erɔng. 3We atɔ bɔ arɔ, “Kan kun anyɔng nyum kpeyid wa eken ayin. Kan kun esang, ebam, beliang, bakpoga, kpe nkwu yu ɔjɔdag. 4Kpeicha nju yu nyɔ ɔwen, kɛmi anyɔng afa tata nyɔ olo ɔchai mpam ayua. 5Ebu bane akan raming nyɔ, cha anyɔng mpam oyubɔ ka bog anyɔng bebubi wa bako amina nkeri ekɛmag ndeng yu atɔngag bɔ arɔ Ɔsɔwɔ ating areb mpem yi bɔ.” 6Bɔ alo achag mbɔnɔ mpam yudug yudug akwɔrag Nsidi yu Nnɔ yi egbanang bayɔg ba bekɔn wa feb bekpen.
Mbura yu Erɔd abangang Jisɔs
(Mat 14:1-12; Mak 6:14-29)
7Yi Erɔd mine eri wu Galili awoging abangang feb bi beli chag boso. We ahɔmai yi we alemag, wantag yu ebe bane ali chɔdag arɔ Jɔn Mipogag mmai anyimi wa eko. 8Bantad arɔ Elaija atɛb, erɔng bantad arɔ minrɔag eyammɛd yi Ɔsɔwɔ wud wu eken erab atisɛm aba wa ekwen. 9Ka Erɔd arɔ, “Me nsobing eri yi Jɔn. Nene, nyining, ale wufa wu me nli wogag nggom bifa abangang we?” Ka we anɔg arɔ we arɔ Jisɔs.
Jisɔs alei etɛm Ekakab
(Mat 14:13-21; Mak 6:30-44; Jɔn 6:1-14)
10Yi bɔ ba alag ɔbɔ owu atɛming nsɛm bɔ asidi Jisɔs yi bɔ amarɔ olem. We akun bɔ aloag mpam yu ayenag yu Betsaida bɔ bibi. 11Ka bane jugijugi amang abangang yi ka bɔ anyedi we. We arami bɔ achɔd yi bɔ abangang Bɔlen bu Ɔsɔwɔ, we erɔng agban ba aken egbanang.
12Yi eko enɔngɔ bosi ɔfɔ yi bafai ba alag ɔbɔ owu aba kpɔgi we arɔ, “Fong ekakab yi bane bafa abugag nkeri bɔ amanag awei bɔmpam yi nkwɔ yi ele kpedikpedi aka kei yi bɔ ayag yi bekpen bi bɔ anɛmag, wantagi ekpen yi sɔ ele la bane chang akɛmag oyi.”
13We abɔri bɔ arɔ, “Ke bɔ anyɔng nyum ali.” Bɔ abɔri we arɔ, “Sɔ ekwe bekpug bi bred berɔn yi nnsi efai kpɔd, ele wɔrɔ sɔ echag eka nam beliang bi bekɔnag bɔ feb wa ekakab yifa.” 14(Banine ale ala berɛm erɛm befai nsɛm ɔfɔ ba ale afa.)
Ka Jisɔs atɔ ba ali nyedag we arɔ, “Lem bɔ akɛmi nsi wa bekung ala bane erɛm befai nsɛm ɔfɔ wa ekung yid.” 15Ba alamag ɔbɔ owu alem ala, kpeicha mine akɛmi nged 16Jisɔs akun bekpug bi bred abin berɔn yi nnsi efai amɔn esɔ, we akob Ɔsɔwɔ abeg bi bebad ninsed ninsed. Nyining we ajog bi ake bɔ ba ali nyedag we arɔ akeni ake bane. 17Bɔ feb ali ayuri, ba anyedag we asang bi bechan besoi bekakagi ɔfɔ yi befai.
Pita atag Minyɔ arɔ Jisɔs ale Krais
(Mat 16:13-19; Mak 8:27-29)
18Nten yud yi Jisɔs ali soag nsɔm wa ewobi ka ba ali nyedag we ale yi we, we abeb bɔ arɔ, “Nene bane ali chɔdag arɔ Me nle?”
19Bɔ abɔri arɔ, “Ebe bane arɔ Jɔn Minpogag mmai. Bawag arɔ Elaija. Ebe bantad arɔ minrɔag eyammɛd yi Ɔsɔwɔ wu nten ayua ahɔtisɛm aba egweni.”
20Ka We abeb bɔ arɔ, “Ka nyɔ a? Nene nyɔ oli chɔdag nyɔ ɔrɔ Me nle?”
Pita abɔri arɔ, “We ole Krais wu arun ɔmɔ Ɔsɔwɔ.”
Jisɔs achɔd abangang bayig yi eko eyi
(Mat 16:20-28; Mak 8:30; Mak 9:1)
21Jisɔs asigi bɔ arɔ akan sidi mine kpewud abangang yifa. 22Ka we arɔ, “Mmɔni Mine ting arɔ bayig wa nggom jugijugi ka bakonang ba Ju, balen ba basingag ba besingi bi Ɔsɔwɔ yi bakɔag ba eben ating akeb we. Bɔ ting awoi we ka wa ɔyɔgɔ ndu isia Ɔsɔwɔ ting anyimi we wa eko.”
23Nyining Jisɔs asidi bɔ feb arɔ: “Kpewun owuna wu akeng arɔ we anyedag me, we arannen akeb lɔ akun erere yi baseni eyi kpe icha epo anyedi me.” 24Wantagi kpewun wu akeag anyangi ekwen eyi alɛmag yi, ka kpewun wu alɛming ekwen eyi wa ntag ama ting anyangi yi. 25Ye ele nching yu mine ebu afɔn nggom feb wa nggon, ka alɛmi lɔ? 26Kpewun wu akebing me yi balem angama, Mmɔni Mine ting akeb we wa nten yu we alaba wa bɔtɔ obu yi bɔtɔ bu Nsi yi bu bakamag ba befong bi Ɔsɔwɔ ba abadɔbad.
27“Me nsidi nyɔ ekonekon, ebe ba alag ala fa ahɔ kwɔ tata bɔ arɔ bɔlen bu Ɔsɔwɔ.”
Beke bi Jisɔs bejɔdi
(Mat 17:1-8; Mak 9:2-8)
28Eking ala ndu enyebenye yi Jisɔs achɔding yifa, we akun Pita, Jɔn yi Jems baloag esɔ mpub aka soi nsɔm. 29Nkeri we ali soag ala nsɔm, boso obu bokpedi, nfɔ eyi ekpedi kparang ala nwawang. 30Banine bafai, Mosis yi Elaija atɛb wa eyob yi bɔnɔ, achɔdag yi Jisɔs. 31Bɔ achɔd abangang ekwɔang eyi, yi yi enɔngɔ tɛb wa Jerusalim nkeri Ɔsɔwɔ areming.
32Pita yi bolom ba ale yi we achɔ elɔ, ka nteni bɔ ahɔnyimi, bɔ arɔ etɛmi bɔnɔ obu yi banine bafai ba alag yi we. 33Nkeri banine abin anɔngɔ bolo achai Jisɔs, Pita atɔ we arɔ, “Nsinju, enɔbɔnɔb arɔ sɔ ele fa. Nungi sɔ etɛb betonton bera, yid ekɛmi eya, yid ekɛmi yi Mosis ka yid ekɛmi yi Elaija.” (We amang yi we ali chɔdag.)
34Yi we anyinang achɔdag, elili yi esɔ etɛb efoi bɔ ka botig bɔkɔ bɔ nkeri bɔ awen wa elili ayia. 35Elem eba yi erun wa elili ayia, echɔdag erɔ, “Fa ale Mmɔn ama, wu me mmarɔ sang, wog anyɔng we.”
36Nteni elem amarɔ chɔd, bɔ arɔ arɔ Jisɔs ale bibi. Ba anyedag we anungi yifa ake lɔ, bɔ asiding mine kpewud nten ayua yi bɔ arɔn.
Jisɔs agban Mmɔni Minine wu akwe ebe nyɔganyɔ
(Mat 17:14-18; Mak 9:14-27)
37Nsɛm epo, nteni bɔ arun esɔ mpub abi aba eboi, etɛmi ekakab yi bane aba kpogi we Jisɔs. 38Minine wud wa ekakab ayia ayen elem esɔ arɔ, “Minkɔkɔi! Me nledi we ndɔ ɔmmɔn mmɔn ama, wantagi we bibi me nkwei. 39Ebe nyɔganyɔ ela fom we ebuyid anɔngɔ obeg, erobag we nsi ato onig ta mpipi atɛbag we wa minyɔ. Echang akerag we efed, erɔng eterag we belem jugijugi. 40Me nledi ba ali nyedag we akeb yi etɛb ka bɔ amaning.”
41Jisɔs abɔri arɔ, “Nyɔ bane ba nggon yufa, nyɔ obebobeb ka ekamang chang yi nyɔ! Nkɛmag yi nyɔ eken erab lan ka ntɔ nted yi nyɔ?” Atɔ minine awun arɔ, “Bag yi mmɔn ɔwa fa.”
42Kpe yi mmɔn awun ali bag, ebe nyɔganyɔ arob we nsi we ato onig. Ka Jisɔs anyan ebe nyɔganyɔ, agban mmɔn awun ajog we ake nsi eyi. 43Feb bane beke beman bɔ wa etɛm ɔsa wu Ɔsɔwɔ.
Jisɔs ahɔchɔd abangang ekwɔag Eyi
(Mat 17:22-23; Mak 9:30-32)
Yi beke benyinang bemanag bane wa nggom feb bi Jisɔs ali lemag, nyining we atɔ ba ali nyedag we arɔ, 44“Kan yidi anyɔng wa yi me nnɔngɔ bɔ nsidi nyɔ: Mmɔni Mine anɔngɔ bɔ jog we ake bane.” 45Ka erebing bɔ yi yifa etɛbing. Awobing wu bɔ aka mmai eri eyi, wantagi botig abua bɔ abebing we abangang wu.
Nene atɔn aking
(Mat 18:1-5; Mak 9:33-37)
46Ntang achɔ wa erɔng yi ba anyedag we abangang wun wa erɔng eyibɔ atɔrag aking. 47Jisɔs amai yi bɔ ali kerag, we akun ni mmɔn alami nkpɔgi oyu. 48Ka we atɔ bɔ arɔ, “Kpenene wu araming ni nɛminke wufa wa mpi ama arami me, erɔng kpenene wu araming me arami we wu afonging me. Wantag we wu akebing aking wa erɔng eyina feb ale mine wu atɔn aking.”
49Jɔn arɔ, “Nsinju, sɔ erɔn minine wud akebag bebe bi bɔnyɔganyɔ betɛbag wa mpi oya, sɔ enɔg ekpani we agɔ, wantagi we owuda wud ased.”
50Jisɔs arɔ, “Ka nkpani anyɔng we, wantagi kpewun wu chang anɔgag we ale yi we.”
Eri mpam yid yi ele wa Sameria akebing eramang Jisɔs
51Nkeri nten anɔngɔ bosi yu we Jisɔs atɛmag nsɛm wa mpam esɔ, we alem nted oyu arɔ we alo Jerusalim. 52Ka we afong bakamag ba befong bara we nnen, bɔ alon eri mpam yid yi Sameria aka loni nggom awori we. 53Ka bane bale afa akeb eramag we, wantagi we ali mmɔnag yi achag yu Jerusalim. 54Nteni bɔ ba ali nyedag we Jems yi Jɔn arɔn yifa, bɔ abeb arɔ, “Minfɔni, ɔken ɔrɔ sɔ eyen minkod ɔru esɔ obi ɔjɔgi bɔ a?” 55Ka Jisɔs akpedi anyan bɔ. 56Nyining we yi bɔ ba anyedag we aloag eri mpam yintad.
Efɛn yi enyedang Jisɔs
57Nkeri bɔ ali kenag nnen achag, mine wud atɔ Jisɔs arɔ, “Me ting nyedi we nchag kpewan yi we ɔchag.”
58Jisɔs abɔri arɔ, “Bagbɔnkang akwe bopog yi bɔnɔnɔn bu esɔ bɔkwei boju, ka Mmɔni Mine akwe ekpen yi anɛmag eri eyi.”
59We atɔ minine wuntad arɔ, “Nyedi me.”
Ka minine awun abɔri arɔ, “Minfɔni, nungi me nranen nchag nka kɛn nsi ema.”
60Jisɔs atɔ we arɔ, “Nungi bakoko akɛn bakoko abibɔ, ka we chog ɔka kwɔri abangang bɔlen bu Ɔsɔwɔ.”
61Ka wuntad arɔ, “Minfɔni, me ting nyedi we. Ka nraneni nyum ale arɔ nungi me ntisɛm nka tɔ enudi nju ema ndɔ epo anyɔng.”
62Jisɔs abɔri arɔ, “Kpe wud chang wu akɔring bɔpɔng akwangang babum ka anwegag nsɛm akɔning wa erom yi bɔlen bu Ɔsɔwɔ.”
Currently Selected:
Luk 9: NBB
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
