Luk 17
17
Bobe
(Mat 18:6-7,21-22; Mak 9:42)
1Epo yid Jisɔs atɔ ba anyedag we arɔ, “Nggom bi belemag bane alem bobe behɔ ri ebang, ka ebebag yi mine awua wu beruag ɔmɔ wu bebag! 2Enɔb eking asid we etɛmi ndinda yu alobolob#17:2 Rɔ foto yu ndinda wa emei arob we alang baya alɛm otoke yi we alemag ba nkeked bafa alem bobe. 3Kodi anyɔng lɔ!
“Ebu ninyen ɔwa minkani kpe minine aleming we bobe nyan bɔ; ebu ala wog we agɔ bobe, lo cha we. 4Kpe aleming we bobe nken enyibisia wa epo ka atɛming nsɛm aba nken enyibisia aba tɔ we arɔ, ‘Me nlem bobe,’ we oloag mkɛm ɔcha bɔ.”
Ochɔrekpo
5Ba alag ɔbɔ owu atɔ Minfɔni arɔ, “Lem ochorekpo owuda ɔtɔ.”
6Minfɔni Jisɔs abɔri bɔ arɔ, “Kpe ɔkwei ochorekpo ninsed wu ɔkebing ala mmuni mɔsad,#17:6 Mmuni mɔsad akebing ala mmuni ndugi nyɔ ɔmanag ɔtɔ etɛm erere yifa ɔrɔ, ‘Jibi yi barug ɔka fei lɔ wa baya,’ ka yi ting ewog we.
Erom yi Mingban
7“Ebu wud owuna akwe mingban wu ali kwangag ekwɔ lale ammɔnag bawɔng. We ting atɔ mingban awua wu ebu abuging ekwɔ arɔ, ‘Bag bakɛmi ngɛd oli beliang a’? 8Otuke we atɔrag mingban arɔ, ‘Chog ka lem beliang egama bi eko, erɔng loni beke otug me me nli nnyɔ; me nlaman ka we ɔmanag oli ɔyɔ.’ 9We ting akob mingban awua arɔ olem wantag we alem yi we atɔn we arɔ alem a? 10Kpe nyɔ erɔng, nteni nyɔ ɔla lem feb bi atɔn arɔ nyɔ olem, tɔ anyɔng lɔ ɔrɔ, ‘Sɔ ele bagban ba ekɔning; ekinging sɔ eleming erom eyida.’ ”
Jisɔs Agban Bayɔg Ba Bafon Eriɔfɔ
11Nkeri Jisɔs ale nnen achag Jerusalim, we aking minde wu Sameria yi Galili. 12Nkeri we anɔngɔ wei ni mpam banine eriɔfɔ ba ali yɔg bafon akpɔgi we. Bɔ alag eken era 13ka bɔ abeg balem esɔesɔ arɔ, “Jisɔs! Nsinju! Nungi sɔ ekɔ we nsɔn!”
14Yi we arɔn bɔ, atɔ bɔ arɔ, “Chog anyɔng nyɔ ɔka tɔngi lɔ ɔmɔ basingag ba besingi akerag Ɔsɔwɔ.” Nkeri bɔ ale nnen achag beke bekori bɔ, bafon aman.
15Nyining owu bɔ wud ahɔrɔ arɔ bafon aman beke bekori we, we atisɛm aba, akagag Ɔsɔwɔ yi elem esɔesɔ. 16We aba achɔ wa bako ma Jisɔs akob we. Ka we ale Minine wu arun Sameria.
17Nyining Jisɔs abeb arɔ, “Bɔ eriɔfɔ asid agbaning a, ka bawag barɔn yi bane mena? 18Ye ka minkenken wu fa bibi ale mine wu atɛming nsɛm aba kob Ɔsɔwɔ?” 19Nyining Jisɔs atɔ we arɔ, “Lo belag chog, ochorekpo ɔwa ɔgban we.”
Ebang Yi Bɔlen bu Ɔsɔwɔ
(Mat 24:23-28,37-41)
20Ebe bane ba Farisi abeb Jisɔs arɔ, “Icha nten Bɔlen bu Ɔsɔwɔ bɔbag?” Ka Jisɔs abɔri arɔ, “Bɔlen bu Ɔsɔwɔ bɔhɔ ba wa nnen yu ɔmanag ɔrɔ yi mmɛd anwa. 21Mine kpe wud ahɔ atɔ arɔ, ‘Mmɔn, da bole fa!’ lale, ‘Bole wai!,’ wantagi Bɔlen bu Ɔsɔwɔ bole wa erɔng eyina.”
22Nyining we atɔ ba anyedag we arɔ, “Nten ala bag yu nyɔ ɔkeag nyɔ ɔrɔ epo yid yi Mmɔn wu Mine, ka nyɔ ɔhɔ rɔ yi. 23Bane anɔngɔ tɔ nyɔ arɔ, ‘Mmɔn, da we wai!’ lale ‘Da we fa!’ We kan gbɛdi ɔnyedi bɔ. 24Ala nkeri ngwangwag agwagang anwɔi esɔ ebad to ebad yid asi abad yiwag, wa nkeri Mmɔn wu Mine akɛmag wa epo eyi. 25Ka ndanen nyum ale arɔ we ting arɔ bayig wa nggom jugijugi erɔng bane ba nggon yufa ba akebag we.
26“Ebu Mmɔn wu Mine ala tisɛm, ekɛmag ala nkeri ekɛming wa nten yu Noa. 27Bane ali yag, ayɔg, banine asɔdag bakani, bakani abai balom, ta epo yi Noa awen okpe. Nyining nyel awei awoi bɔ feb.
28“Ele erɔng erɔng ala wa nten yu Lɔd, bane ali yag, ayɔg, anamag, achɔg, akwangang, atɛbag erɔng. 29Ka wa epo yi Lɔd atɛbing wa mpam yu Sodom, minkod yi sɔfɔ#17:29 Sɔfɔ ale bara ma aroag oroi ɔnan nsi wu orun esɔ ɔwoi bɔ feb.
30“Wa nkeri ebag ɔkɛmi wa epo yi Mmɔn wu Mine ahɔba. 31Wa epo ayia mine wu ale esɔ ebunju eyi yi nggom ebi wa etingi nju akan bi arɔ we aba kpo bi. Erɔng mine wu ale ekwɔ akan tisɛm nju aka kun nyum kpeyid. 32Tedi minkai Lɔd. 33Kpewun wu anɔging arɔ we anyangi ekwen eyi ahɔkwen yibanya yi Ɔsɔwɔ; ka wu alɛming ekwen eyi ting akodi yi. 34Me nsidi nyɔ ndɔ, wa boru abua bane bafai anɛmag wa nnɔng yud: anɔngɔ ɔkun wud ka wud acha. 35Bakani bafai ting akɛmi akɔgag mbukpa ekpen yid: anɔngɔ ɔkun wud ka wud acha. [36Banine bafai ting akɛmi wa ekwɔ akunag wud ka wud acha.]”#17:36 Mat 24:40
37Ba ali nyedag we abeb we arɔ, “Minfɔni, Wan?” Ka Jisɔs abɔri bɔ arɔ, “Wa ekpen yi ekoko yi mine ele afa batere afoag.”
Currently Selected:
Luk 17: NBB
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
