Luk 12

Re Ɔsɔwɔ kan re Bane

(Mat 10:26-27)

1Yi bane jugijugi agbai, ta ali anyeag bolom, Jisɔs aton ɔchɔd kpa yi bɔ ba anyedag we, arɔ: “Mmɔnag anyɔng nkeri nyɔ ɔkan kɛmi ala yis#12:1 Yis ale nyum yi abodag wa ndoi yi akunag amɔng bred ka anud yu Farisi yu akwe baso afai 2Nyum chang yi afoag ka ehɔtɛb efi, lale awobag yi bane ahɔmai. 3Yi we ɔchɔding wa ejiri ting awog yi epen jai, ka yi we ɔchɔding wa oroi wa bemangɔng awogag wa bebunju.

4“Me nsidi nyɔ, erong ema, kan re anyɔng bɔ ba awoag beke ka ahɔman alem eking ala. 5Ka me nting ntɔngi nyɔ mine wu nyɔ oreag, re we wu, ebu ala woi beke ebina, akwe ɔsa wu arobag nyɔ alang ebebe yi minkod. Ee-ee, me nsidi nyɔ, re we. 6Achɔn ndundun esɔn wa bakpoga afai a? Ka Ɔsɔwɔ ayiding kpewud owubɔ. 7Kpe ndi wa eri eya afai yi feb. Ka kan re, we ɔtɔ oking bodundun jugijugi.

8“Me nsidi nyɔ, kpeicha mine wu akaming arɔ we ale yi me boso bu bane jai, Mmɔn wu Mine ting alem alafa erɔng wa boso bu bakamag ba befong bi Ɔsɔwɔ. 9Ka we wu akebing me jai, Me ting nkeb we erɔng wa boso bu bakamag ba befong bi Ɔsɔwɔ. 10Kpewun wu achɔding bobe abangang Mmɔn wu Mine amanag afɔ we; ka kpewun wu achibing Nyɔganyɔ yu Ɔsɔwɔ ahɔ fɔ we.

11“Ebu alaba yi we wa boju bu efugi bu bane ba Ju, boso bu balen yi boso bu bɔ ba ale ɔsa, kan yang abangang yi nkeri we ɔtangang lɔ yi yi we ɔkpeag. 12Wantagi Nyɔganyɔ yu Ɔsɔwɔ ting akɔi we nten ayua yi we ɔkpeag.”

Bokobi bu nchi efangane

13Minine wud wa ekakab atɔ Jisɔs arɔ, “Minkɔkɔi, tɔ ninyen ama akeni nggom bi sɔ elin eko yi nsi eyida ake me egama.”

14Jisɔs abɔri we arɔ, “Nnum ama, nene aken me ɔsa wu nrebag mpem lale wu nkenag nggom ebina nke nyɔ?” 15Ka we atɔ bɔ arɔ, “Mmɔnag anyɔng! Kan mmɔn anyɔng mmɛd wa nggom jugijugi; wantag, ekonekon ele arɔ ekwen yi mine chang wa nsɔgi nggom bi we akwe.”

16Nyining Jisɔs asidi bɔ bokobi bufa arɔ: “Efɔning efangane wu nsisi anɔbing we bewom we erengchang. 17We ato ɔkeri yi lɔ, ‘Me nkwe ekpen yi nnungang feb bi bewoming me la. Me nlemag lan?’

18“Nyining we arɔ, ‘Da yi me ting nlem. Me nting mmugi bebongi egama nrob nloni ntɛb bi betɔnɔtɔ, ekpen yi me nnɔngɔ onungi nggom bi nfun wa ekwɔ ema yi feb nggom egama bintad. 19Nyining me nnɔngɔ tɔ lɔ ndɔ, “We ɔfɔn pɔp bi be ekunag we wa nya jugijugi. Wei lɔ! Li, yɔ, chob nted!” ’

20“Ka Ɔsɔwɔ atɔ we arɔ, ‘We nchi! Boru bufa bu elei we ting oke ekwen eya, nyining nene anɔngɔ kun nggom bifa feb bi we ɔmarɔ nungi oke lɔ?’

21“Ka Jisɔs akuri minchɔd owu arɔ, Wa nkeri ele yi bɔ ba atobing efang yi nggom anungi lɔ ka bɔ afanging wa boso bu Ɔsɔwɔ.”

Kam yi Ɔsɔwɔ

(Mat 6:25-34)

22Nyining Jisɔs atɔ bɔ ba ali nyedag we arɔ, “Ka me nsidi nyɔ, kan yang abangang ekwen eyina, yi yi nyɔ ɔnɔngɔ oli; yi abangang beke ebina, yi nyɔ ɔlangang. 23Ekwen etɔn eking beliang, ka beke betɔn beking nfɔ. 24Mmɔn anyɔng bodundun. Bɔ chang afeag mbuni, chang afug, bɔ akwe ebongi, ka Ɔsɔwɔ aleag bɔ, Ka ɔba rɔ we wu okon efɛn oking bɔnɔnɔn! 25Nene owuna wu ayanging amanag abodi ninsed nten wa ekwen eyi? 26Ebu we ɔhɔman olem nkekedi nggom ala bifa, ye ka we ɔyangang abangang nggom bintad?

27“Mmɔn nkeri bechaba bi bonyug boli koag, bu chang bolemag erom erɔng chang bolemag nfɔ eyibɔ. Ka me nsidi nyɔ ndɔ kpe Mineni Sɔlɔmɔn yi efang eyi feb afɔning nfɔ yi enɔbing ala nyug yufa yud. 28Ɔsɔwɔ ale mine wu ali langang bakwukwɔ nfɔ, bakwukwɔ ma ale fa elei ka nkwɔsi asob mɔ alang minkod. Ɔkering ɔrɔ Ɔsɔwɔ alangag we nfɔ aking bakwukwɔ mafa? Nyɔ bane ba ninsed ochorekpo. 29Ka kɔngɔ ɔkeri anyɔng abangang yi yi nyɔ ɔyag yi yi nyɔ ɔyɔg. Kan keri anyɔng abangang nggom abia 30Bane ba nggon ba akan ji Ɔsɔwɔ acha akerag abangang nggom bifa, ka Nsi eya ajiji arɔ we ɔken nggom bifa. 31Otuke kei Bɔlen bu Ɔsɔwɔ, ka nggom bifa ting ake we erɔng.

32“Kan re anyɔng, mbɔn ba bawɔng angama, wantag Nsi eyina echob we nted ake nyɔ bɔlen obu. 33Chɔ nggom feb bi ɔkwe kun bakpoga ama oke bakpak. Lem oke lɔ mbɔn bebam ba ahɔ kwɔ mmai, ka otobi efang eya wa mpam esɔ, ekpen yi behɔ ri yibanya, ekpen yi minjijib kpewud ahɔ si obi, erɔng bɔkeke bohɔ li bi. 34Waoye ekpen yi efang eyina ele wa ekpen yi boted obuna kpɔkpɔg nten bɔkɛmag.

Loni Beke Wa Ebang Yi Minfɔni

35“Loni beke bi erom yi onɔngɔ lem, nungi benwɔi egwa beroag, 36ala bagban ali worag nsinju eyibɔ abug efɔg yi ebai yi we achin. Eru afa ebu we alaba akwud minyɔfu, bɔ ting arɛbi ebuyid ake we. 37Eting enɔb yi bagban aba ba nsinju eyibɔ abugag aba kpogi bɔ ale mbed aworag we! Wa ekonekon me nsidi nyɔ, nsinju eyibɔ atɔrag bɔ arɔ akɛmi nged ka we ajɔdi beke alang nkwu yu erom atug bɔ. 38Ting enɔb yi bagban aba ba nsinju eyibɔ alaba akpɔgi bɔ aloni beke akɛmi aworag we, kpe we aban yi etengante boru kpe yi bechenapo! 39Ka we mai yifa ɔrɔ, ebu minfɔni nju aji nten yu minjijib abag, we ka ahɔkam minjijib acheg awei nju oyu. 40Ka nyɔ erɔng nyɔ olonag beke, wantag Mmɔn wu mine ting aba wa nten yu nyɔ ɔkan nkering.”

Etingi Mingban lale Echaba Mingban

(Mat 6:25-34)

41Pita abeb arɔ, “Minfɔni, ekan yifa orobing oke sɔ ba eli nyedag we lale ale eke kpeicha mine?”

42Minfɔni abɔri arɔ, “Nene nyining ale mingban wu ale kɔng yi ɔmanyum? We ale mingban wu nsinju eyi akerag we ɔsa amɔn nju oyu ake bagban abi beliang wa nten yu akɔning. 43Eting enɔb yi mingban awua wu nsinju eyi ala bug abarɔ etingi erom yi we alem. 44Me nsidi nyɔ ekonekon, nsinju eyi ting ajog nggom ebi feb ake mingban awun arɔ amɔnag. 45Ka ebu mingban awua atɔn lɔ arɔ, ‘Nsinju ema animag eken erab ka we abug,’ we ato okwud bagban bawag, banine yi bakani, we ali ayɔ abum, 46nyining nsinju eyi aba ba wa epo yi we akan siging ekpo yi wa nten yu mingban awun amang. Nsinju ajag we bebad bebad ake we ekpen yi bane ba chang akamag.

47“Mingban wu aji yi nsinju eyi akeng arɔ we alem, ka we aloning beke bi alemag yi, ting amib we besongag bi botuag. 48Ka mingban wu akan ji yi nsinju eyi akeng, ka we alem nyum yi ekan nɔbing yi ekɔning yi badu, akwudag we yi mbɔnɔ otuag. We wu aken beti akeag bi betin wa babɔ ami, ka mine wu aken beti gbɔg wa nkeri akeag bi betin gbɔg wa babɔ ami.

Barebi ma Jisɔs ting aba yi nkeni wa erɔng yi Bane

(Mat 10:34-36)

49“Me mban mba fugi minkod wa nggon, ebu wa nted ama ka oto ɔyegi! 50Me nkwe opoga wu bayig wu nting nrami. Me nhɔwe lɔ tata bayig ama aman! 51Nyɔ ɔkering ɔrɔ me mban ndɔ mba ke nyɔ ekunakuna wa nggon a? Ee-ee, me nsidi nyɔ ndɔ, me mban nyɔ yi nkeni yi ekunakuna asid. 52To fafa chog boso enudi nju yi bane barɔn ting ekeni, bara anɔngɔ nɔg yi bafai bafai erɔng anɔngɔ kpɛdi anɔg yi bara. 53Bansi anɔgag yi mbɔn abibɔ ba banine, ka mbɔn ba banine erɔng ting anɔg yi bansi abibɔ. Banyen ting anɔg yi mbɔn abibɔ ba bakani, ka mbɔn ba bakani erɔng ting anɔg yi banyen abibɔ. Banyen ba balom ba mbɔn ting anɔg yi bakai ba mbɔn abibɔ, bakai ba mbɔn abibɔ erɔng ting anɔg yi banyen ba balom abibɔ.”

Emang Nten

(Mat 16:2-3)

54Jisɔs erɔng atɔ ekakab yi bane arɔ, “Ebu nyɔ ɔla rɔ esɔ ebad yi ɔbɔ kai eji, ebuyid nyɔ ɔrɔ, ‘Mmbuta anɔngɔ bɔna,’ ka ana. 55Erɔng ebu nyɔ ala rɔ mpep yu arun ebad eboi afugag, nyɔ ɔrɔ nfom anɔngɔ bɔsɔng ka etɛb ala. 56Nyɔ bane ba baso afai! Nyɔ ɔmanag ɔmɔn nsisi yi esɔ nyɔ osidi yi enɔngɔ bɔtɛb. Ye, nyining, ka nyɔ oji osidi eri yi nten yu fafa?

Kai Ndɛm

(Mat 5:25-26)

57“Ye ka nyɔ ɔhɔ reng lɔ nyɔ ɔmai yi enɔbing elemang? 58Ebu mine alayen we mpem wa esug atu we nyɔ olo esug, nɔg nkeri nyɔ ɔkɔnag yi bolom ka nyɔ osi wa esug. Efefa, bɔ ting atu we asi awa boso bu minrebag bɔpem, wu ting ajog we ake mine bokwu, wu anɔngɔ lang we eteng yi mgbakɔbɔ 59Me nsidi nyɔ, we ɔhɔtɛb tata ɔkai bakpoga feb osi nkuri.”

Currently Selected:

Luk 12: NBB

Highlight

Copy