Luk 5

Atɔra Jisɔs kɛrɨŋɛtɨma

(Mat 8:1-4; Mak 1:16-20)

1Reyi dinɛ ndi Jisɔs ɔbarɔ ra kɛdɛga mani ma Gɛnasarɛd#5:1 mani ma Gɛnasarɛd Wa yina mani mɨnɛ mayaa ma Galili., ra ani esii mba wa fu mɔ, wa dima kɛlam ka Ɛbɨrɔkpabi. 2Ɔchɛ rakug rafaa rɔfaŋɔ kɛdɛga mani mmɛn, gbɔ arara itin mbɛn wa jag wa gbɛ dɛ, wa ka ruu miyiri mibɛ. 3Ɔnɔlɔ kokug kunɛ, nku ka Saimɔn, ɔdɛ mɔ ofirɔ ɔnɔlɔ rikalɔ giriri ɔgbɛ kekul. Fɛkadi otumetumɛ ra kokug ɔkɔgɛ ani.

4Ndi ɔkɨlɔ lam fɛb, ɔkani Saimɔn na, “Firɔ kokug nɔlɔ ra kumka ka tugamatugama, tu iyiri ifi arara itin.”

5Saimɔn ofini na, “ƆKƆKƆ, awul re yibanɛ jɔ ndɨm, gbɔ rebi rara tumbum! Gbɔ ra kɛmanchi kɛlam kechi kɛtagɔ, ami kɨntu iyiri nfɛn.”

6Wa kɨlo si ɛduayi, wa rara itin esii, kpata miyiri mibɨnɛ misaranɛ. 7Wa kugɔ achɛmɔ abɛ ra kokug kodudu wawa tɔbɛ, mɨnɛ wa wɔ, ra egbigbɛd kɛgbɔ, itin iyugɔ rakug rafaa rafaa, tata rabɨnɛ ra sɨba.

8Ggɔ ndi Saimɔn Pita ɔkɨlɔ chɛ birɛ mbi, ɔkpɔgɛlɛ ra idu a Jisɔs ɔlamɔ na, “Otutu dɔŋ gbɛ mɛ Ɛbɨrɔkpabi ƆKƆKƆ, kum ami nra osia obia.” 9Amɔ ra achɛmɔ mba wara ramɔ, ɛkpa ɛbabɛ ra ɛdɔɔ itin nyi abɛ wa rara. 10Irigirigɔ dɛ achɛmɔ abɛn Jems arigɛ Jɔn bɔna Sɛbɛdi ɛkpa ɛwɛbɛ.

Jisɔs kadi ɔkani Saimɔn na, “Ɛrau enisii wu, bɨnɛ faŋandi ata rara ani.” 11Kadi wa firɔ rakug rabɛ wawɔ rɔfaŋɔ, wa kɨlɔ maŋ ra kekul, wa gbɛ mbum rambunɛ wa tɔrɛ Jisɔs.

Jisɔs ɔgbanɔ odumini nwu ɔfɔnɔ richɛriwur

(Mat 8:1-4; Mak 1:40-45)

12Ndi Jisɔs ɔra rikalɔ kɛfɨrɔ chinɛ, ɔkɔga odumini wunɛ, nwu ɔfɔnɔ richɛriwur ɛkpaju ndɨmdɨm. Ɔkɨlɔ chɛ Jisɔs, ɔkpɔgɛlɛ ɔkɨbɛ roisɔ rɔchɛ odia mɔ na, “Ɛbɨrɔkpabi ɔkɔkɔ, otutu abɔ kɨn ɛda wu ruu mɛ nwanɛ.”

13Jisɔs ɔnawɛ kɔbɔ kɔkɛn ɔkpɨmɔ mɔ, ɔlamɔ na, “Ami ɛdada mɛ, nru wu, awu wanɛ.” Ɔmɔmɛɔmɔmɛ richɛriwur ri gbɛ mɔ.

14Jisɔs ɔkani mɔ na, “Ka kani oni tum wunɛ, gbɔ dɔŋ ka kɔgɛlɛ nɛ ɛkpaju eyi, ɛkpa osiakɔya, ogumi wu. Mɨnɛ nyɛ kɔya ka eruɛlɛ kɛmanchi ibina Mosis ikani, kɛmaka otumɔchɛ ɛgbanɛlɛ richɛriwur anyɛ bɛ.”

15Tum ndi ɔkani mɔ ɛduayi, ikani abaŋa Jisɔs iyanɛ. Idɔŋ ani esii iwɔ iwa dim mɔ, mɨnɛ itama ɛgbanɛlɛ rifɛn ribɛ. 16Gbɔ Jisɔs omulɛnɛ odulɔ rɔchɛ ra ifɨrifɨr ɔka rɔ nyɔm.

Jisɔs ɔgbanɔ kɛkpɔg

(Mat 9:1-8; Mak 2:1-12)

17Reyi dinɛ, ndi Jisɔs ɔra ɔkɔga, Farɛsi akɨla Akɔga Ibina, mba wa si ɔfɨrɔ a Galili, Judia arigɛ Jɛrusɛlɛm wa tumɛ afɛ. Mɨnɛ nsɨm Ɛbɨrɔkpabi ƆKƆKƆ ɔrafɛ ramɔ, nwu ɔyɨba ɔgbana rifɛn. 18Adumini banɛ wa si wawɔ, wa tamɔ odumini kɛkpɔg ra kɛlɔɔ, wa buma wa timɔ mɔ wa nɔlɔ rikalɔ ra ɛtɔ, wa ka lɔɔ mɔ ɛkparoisɔ a Jisɔs. 19Ndi wa bi chɛ ɛtɨma, rɛfɔ rɛkau, wa dulɔ ra eful ɛtɔ, wa ka saŋ ikpaka#5:19 ikpaka Akɛ Isɨrɛl reyadi, wa tima ratɔwɔ nda wa fɔfɔ wa kɨba itɔ kɛmanchi awul rɛ yɨba maka arigɛ aŋbaŋ ra kɔkantɔ . Kadi wa rɛ mɔ ra kɔkpa, wa nɔlɔ rikalɔ ɛkparoisɔ a Jisɔs ra matii rɛkau.

20Jisɔs ɔkɨlɔ chɛ kɛsɨmɛkpa kɛbɛ, ɔkani odumini nwɛn na, “Ayi, nfɔrɛ obia obu.”

21Farɛsi akɨla Akɔga Ibina wa bɨnɛ wa bɨba ra kɛdɔŋ kɛbɛ na, “Nfa moni mɔnla, nwu ɔkana ikani ɛja? Moni mɔ ɔnɨŋɔ yɛ ɔfɔrɛ obia ebisiŋɛ Ɛbɨrɔkpabi ayayɛ?”

22Jisɔs ɔgbɛra mbu nkatir ɔbɛ ɔra, kadi ɔbɨbɔ bɛ, “Igbɛ rifɔna ɛdɔɔ etimɔ nyifa? 23Mambum bɛ wɔ ra wɔrɔwɔrɔ ɛlamɛlɛ, ‘Nfɔrɛ obia obu, akɨla tɨmɔnɛ chɛŋɛ?’ 24Gbɔ fɛɛ rigbɛra na Wɔna Oni ɔfɔnɔ nsɨm ra rɔchɛ nwu ɔnɨŋɔ yɛ ɔfɔrɛ obia.” Jisɔs ɔkani oni kɛkpɔg nwɛn na, “Barɔbar, timɔ kɔkpa koku kɨlɛ rɛtɔ.” 25Ɔmɔmɛɔmɔmɛ, ɔbarɔ ɛkparoisɔ ɛbɛ, ɔtamɔ kɔkpa kɔkɛn ɔkɨlɛ, ɔnyɛ ɛkalɛlɛ. 26Oniranwunɛ ɛkpa ɛba mɔ, wanyɛ Ɛbɨrɔkpabi ɛkalɛlɛ. Abɛ fɛb wa yugɔ ra ɛrau, mɨnɛ wa lamɔ na, “Rɛ chɛ birɛ kɛbɛkpa ɛdɛndifa!”

Jisɔs oyinɔ Lifai

(Mat 9:9-13; Mak 2:13-17)

27Mbi fɛb wekɨlo siŋ, Jisɔs ɔjagɔ, ɔchɛ ɔtama ntubatuba gɔmɛn, nwu wa yinɔ ridɨnɔ na Lifai, ketuu ra ɛtɔ nyi wa tama ntubatuba gɔmɛn wa sia rotumɔ. Ɔkani mɔ na, “Tɔrɛ mɛ.” 28Lifai ɔtɨmɔnɛ, ɔgbɛ mbumrambunɛ mɨnɛ ɔtɔrɛ mɔ.

29Lifai ɔyɨba ɔkɨmkɨm kɛtɔmɔ ɔnyɛ Jisɔs ra ɛtɔ ɛyɛn. Atama ntubatuba gɔmɛn esii mɨnɛ wa wɔ, akɨla ani adudu. 30Gbɔ Farɛsi, akɨla Akɔga Ibina mba wa rara kɛdɔŋ kɛbɛ wa mɨmini wanyɛ atɔra Jisɔs na, “Rɛfɔ nnan dɛ ajia aŋua ra atama ntubatuba gɔmɛn akɨla asia obia mba?”

31Jisɔs ofini bɛ na, “Ani mba wa rara kɛjani ɛkpa, wara duga ɔgbanagbana, ebisiŋɛ ani mba wa jɔlajɔla ababɛ. 32Ami mbi wɔ nwa yin ani mba wa wanɛwanɛ, gbɔ nwɔ nwa yin asia obia wa wɔ ɛfɔrafɔra.”

Rɛbɨb abaŋa mŋbɔ metumɛlɛ

(Mat 9:14-17; Mak 2:18-22)

33Reyi dɨnɛ, ani adudu wa kani Jisɔs na, “Atɔra Jɔn wayɔ sia mgbɔ metumɛlɛ mɨnɛ wa rua nyɔm fɛb kɛgbɔ, mɨnɛ atɔra Farɛsi wa sia irigirigɔ. Gbɔ atɔra Jisɔs wa jia, wa ŋua fɛb kɛgbɔ?”

34Jisɔs ofini bɛ na, “Kɨn ayɛ asi ani mba wa lagɔ bɛ ra ɛtɔ rɛbalɔ wa si mgbɔ metumɛlɛ ndi ɔkɔ rɛbalɔ ɔra ra kɛdɔŋ kɛbɛɛ? 35Gbɔ kɛgbɔ kɨn kɛwɔ nchi wa nɨŋɔ saŋ ɔkɔ rɛbalɔ ra kɛdɔŋ kɛbɛ, ɛdɔɔ kɛgbɔ achifɛ, kɨn wa si mgbɔ metumɛlɛ.”

36Ɔkani bɛ rɛkanɔ ndi fafa: “Oni ɔda nwu ɔkɨba ɔchɛn a sad ka ɛbɔwɛ, ɔka nyɨm ra ɔtɨmɔ ɛbɔwɛ. Ɛdɔɔ ayi alɛ, kɨn asari ɔchɛn ɛbɔwɛ nyɛn, mɨnɛ ɔchɛn ɛbɔwɛ nyɛn ebiyaa ɛchɛŋɛ ra ɔtɨmɔ. 37Mɨnɛ oni ɔda nwu orua ɔchɛn matug ra ɔtɨmɔ edugɔ matug#5:37 idugɔ Ra rɛmalɛ ra ania Jus, wa yɨba ikpa itin wa sia Idugɔ.. Ɔchɛn matug mmɛn kɨn ma kpulɔ idugɔ nyɛn, matug mawa. 38Gbɔ ɔchɛn matug ɛlɔmɛnyɛ na wa rɔ mɛ ra ɔchɛn edugɔ matug. 39Mɨnɛ oni ɔda nwu oduga ɔŋɔ ɔchɛn matug, ndi ɔbɔ rɨŋɛtɨma ɔŋɔ kefuŋɔ matug. Ɔkanana, ‘Mma kefuŋɔ mɛ ma liwɔ.’ ”

Currently Selected:

Luk 5: Olulumo-Ikom

Highlight

Copy