Luk 18

Rɛkanɔ ra ɔkɨba ɔlam akɨla ɔwani ekur

1Kadi Jisɔs ɔkani atɔramɔ rɛkanɔ, fɛɛ ɔkɔgɛlɛ bɛ na wa rua nyɔm fɛb kɛgbɔ, wa ni chɛr wa fuɛnɛ. 2Ɔkani bɛ na, “Ra kɛfɨrɔ chinɛ, ɛfɔnɔ ɔkɨba ɔlam wunɛ nwu obifɔnɔ reju ɔnyɛ ani mɨnɛ Ɛbɨrɔkpabi ɔra wɔla. 3Mɨnɛ ɛfɔnɔ ɔwani ekur wunɛ ra kɛfɨrɔ achi, nwu ɔyɔ ya rɛkpɛm ɛkpɛyɛn na, ‘Otutu nani mɛ, onianjɨŋ owum ɔra nyɛga mɛ, nani mɛ.

4“Ɛgbɔ esii, ɔkɨba ɔlam nwu obi saŋɔ mɔ remu. Gbɔ rayi rakɨlɔ sii, ɔkani ɛkpaju ɛyɛn na, ‘Tum ndi nra wɔla Ɛbɨrɔkpabi, mɨnɛ mbi fɔnɔ reju nyɛ ani, 5kum ɔwani nwufa ojuŋa mɛ nla kɛgbɔ ranchinɛ, kɨn rɨŋɔ nyɛ mɔ. Abɔ alɛkɛ, ndi ɔwɔŋanla kɛgbɔ ranchinɛ kɨn owoŋa mɛ mba.’ ”

6ƆKƆKƆ kadi ɔlamɔ na, “Dimɔ bumbu kebia ka ɔkɨba ɔlam nwufa ɔlamɔ. 7Nnan dɛ Ɛbɨrɔkpabi ebiyaa ɛrɨŋɔ ɛnyɛ aniabɛn mba ɛraŋɔraŋ, mba wa sua kefin ra jɔ wanyaŋa yɛ-ɛ? Kɨn ebinɛ kɛgbɔ efini bɛ-ɛ? 8Nkani wun na kɨn ɛrɨŋɔ ɛnyɛ bɛ, efini bɛ samana. Ndi ɛralɛ, kɛgbɔ nchi Wɔna Oni ɔnɨŋɔ wɔ, kɨn ɔchɛ kɛsɨmɛkpa ra rɔchɛ-ɛ?”

Farɛsi ra atama ntubatuba gɔmɛn

9Jisɔs ɔkani rɛkanɔ ndifa ɔbaŋa ani mba wa fɔnɔ kerigɛjɛnɔ na abɛ wa wanɛwanɛ, wa nɨŋa ani adudu keful. 10Adumini afaa wa dulɔ ra ɛtɔa Ɛbɨrɔkpabi wa ka rɔ nyɔm, wunɛ Olua Ibina, nwuka ɔtama ntubatuba gɔmɛn. 11Olua Ibina ɔbarɔbar ɔrɔ nyɔm ɛdɔnyi, “Nsame wu Ɛbɨrɔkpabi, kum ami nda amɔm ani mba wabi lɔɔ raikpɛ, ayɨbakayɨb, asia obia, atura odugɔ, nda amɔm ɔtama ntubatuba gɔmɛn nwufa. 12Ntuma mŋbɔ ɛgbɔ ɛfaa ra karɛ mɨnɛ nyaŋa kɔfaam.”

13“Gbɔ ɔtama ntubatuba gɔmɛn ɔbarɔ ɔfɨrɛtɨma, obi yɛ ɔlɛ retu ɔnɨŋɔ kayu, gbɔ odua ngaŋ ɔwɛn na, ‘Ɛbɨrɔkpabi, fɔnɔ mafɨbɔ rami osia obia!’

14“Jisɔs kadi ɔlamɔ na, ndi adumini mbɛn wa kɨlɛ ra itɔ ibɛ, etimɔ ɛdɔmɛ Ɛbɨrɔkpabi ra ɔtama ntubatuba gɔmɛn, ɛgbɛ Olua Ibina. Kum oniranwunɛ nwu ɔtamɔnɛ ɛkpa, kɨn wa tɔlɛmɔ ketuu, gbɔ oni nwu ɔtɔlɛnɛ ɛkpa kɨn wa lɛmɔ mbira.”

Jisɔs ɔmɔlɛ mbibɔn

(Mat 19:13-15; Mak 10:13-16)

15Reyi dinɛ, ani wa ra wa tima bɔnabɛ waya ɛkpa Jisɔs ɔkpɨmɔ bɛ mɨnɛ ɔmɔlɛ bɛ. Gbɔ ndi atɔramɔ wa chɛ birɛ mbi, wa tɛmakɛsɨb wanyɛ akɔ bɔnbɛn. 16Gbɔ Jisɔs oyinɔ bɔnbɛn wa dulɔ wa yimɔ mɔ, ɔlamɔ na, “Ri lɔɔ egbigbɛd a mbibɔn wa wɔwa yimɔ mɛ, rika kpanɔ bɛ, kum rɛkɨm ra Ɛbɨrɔkpabi rɛlɔmɛ rɛnyɛ bɛ. 17Nkani wun raikpɛ, oniranwunɛ nwu obi tama rɛkɨm ra Ɛbɨrɔkpabi amɔm nwiwɔn, obi yaa ɔnɔlɔ dɛ.”

Ifaŋanɛ arigɛ rɛkɨm ra Ɛbɨrɔkpabi

(Mat 19:16-30; Mak 10:17-31)

18Reyi dinɛ, oniretu wunɛ ɔbɨbɔ Jisɔs na, “Bɨrika Ɔkɔgakɔga, mambum bɛ ɛlɔmɛnyɛ na nsi fɛɛ nfɔnɔ rokpin rajɛrajɛ?”

19Jisɔs ofini mɔ na, “Igbɛ ayina mɛ bɨrika oni? Oni ɔda nwu oliwoliu ebisiŋɛ Ɛbɨrɔkpabi ayayɛ. 20Agbɛra ibina, ‘Ka tumɛ otura odugɔ, ka wulɔ oni, kayɨbɔ kayɨb, kabarɔ ntɛnsɛ ɛja, nyɛɛ mitɛ ra mika owu reju.#Ɛja 20:12-16; Diut 5:16.’ ”

21Ofini na, “Nlɔ mbi fɛb bɨnɛ ndi nra oririn.”

22Ndi Jisɔs ɔkɨlɔ dim birɛ mbi ɔlamɔ, ɔkani mɔ na, “Ɛgbɔ mbum bunɛ mbu ɛlɔmɛnyɛ na asi. Kulɛ birɛ mbi afɔnɔ fɛb mɨnɛ timɔ agbuga mbɛn nyɛ rikpag, fɛɛ afɔnɔ ɛfaŋ ra kayu; fɛkadi awɔ awa tɔrɛ mɛ.”

23Odumini awu okɨlo dim mbu Jisɔs ɔlamɔ, etimɔ ɛra mɔ ebiebi, kum ɔfɔnɔ ɛfaŋ esii. 24Jisɔs ɔkɨlɔ chɛ na etimɔ ɛra mɔ, ɔlamɔ na, “Kɨn ɛjani fɛɛ ani mba wa fɔnɔ ɛfaŋ wa nɔlɔ rɛkɨm ra Ɛbɨrɔkpabi! 25Raikpɛ, ɛra wɔrɔwɔrɔ ɔkɨmkɨm ɛfɔm, nyi ɛfɔnɔ ɔfɨrɔ rɛkɔlɔ arigɛ afɨrɔ ikad esiŋɔ rɛma ra aga, ra ndi ɛfaŋanɛ ɛnɔla rɛkɨm ra Ɛbɨrɔkpabi!”

26Ani mba wa dimɔ birɛ mbi wa bɨbɔ na, “Moni kadi mɔ ɔnɨŋɔ yɛ ɔfɔnɔ ɛnaninani?”

27Jisɔs ofini bɛ na, “Bumbu wɔ janijani ra ani, wɔ ra wɔrɔwɔrɔ ra Ɛbɨrɔkpabi.”

28Pita ɔkani mɔ na, “Tilɛnɛ na rɛgbɛ mbum rambunɛ mbu rɛfɔnɔ rɛwa tɔrɛ wu!”

29Jisɔs ɔkani bɛ na, “Nkani wun raikpɛ,” “Oni ɔda nwu ɔgbɛ ɛtɔ, din ɔwa din amalɔ adumini ra awani, din mitɛ ra mika, din mbɔn ra rɛfɔ rɛkɨm ra Ɛbɨrɔkpabi, 30nwu obi yaa ɔfɔnɔ birɛ mbi fɛb osiŋɔ, ɛgbɔ esii ra kɛsɛ nchi akɨla ra rokpin rajɛrajɛ.”

Jisɔs ɔlamɔ ɔbaŋa rɔbɔ rɔdɛn ɔkɨla

(Mat 20:17-19; Mak 10:32-34)

31Jisɔs oyinɔ atɔramɔ juu rafaa (12) kɔkaŋ mɨnɛ ɔkani bɛ na, “Renɨŋɔ du mbira Jɛrusɛlɛm, mɨnɛ mbum rambunɛ mbu alamaremu ra Ɛbɨrɔkpabi wa chɛrɛ wa baŋa Wɔna Oni kɨn wɔwa jag. 32Kɨn wa tɛmɔ ibɔ wanyɛ ani mba wabi lɔɔ raikpɛ. Kɨn wa yɔgɔ mɔ, wa tumɔ itu, wa fɨmɔ mɔ rabɨŋɔ, wa du mɔ, wa wulɔ mɔ. 33Ra rayi ratal kɨn omulɛnɛ ofilɛ.”

34Gbɔ kɛlam nchi kebi talɛ atɔramɔ, kum ɛra bɛ amɔm otua rakɔnɔ.

Jisɔs ɔgbanɔ ɔkpɛmarɛkpɛm nwu ɔsɨlɔ jɛnɔ

(Mat 20:29-34; Mak 10:46-52)

35Reyi redudu, ndi Jisɔs ɔnɔla Jɛriko, ɔkɔga odumini nwu ɔsɨlɔ jɛnɔ rɔfaŋɔ rɛtɨma ketuu ɔkpɛma rɛkpɛm. 36Ɔkɨlo dim ɛjɔg ani esii wa siŋa, ɔbibɔ ani mba wa kula mɔ bumbu wɔ jaga. 37Wa kani mɔ na, “Jisɔs a Nasarɛd mosiŋalɛ.”

38Odumini nwɛn okugɔ na, “Jisɔs, Wɔna Defid, fɔnɔ mafɨbɔ rami!”

39Ani mba wara wa tɔra Jisɔs wa tɛmakɛsɨb wanyɛ mɔ na ɔkɨbɛ kama, gbɔ osokug ɔkɨlakɨla, “Wɔna Defid, fɔnɔ mafɨbɔ rami!”

40Jisɔs ɔbarɔ, ɔkani na wa timɔ odumini nwɛn wawa nyi mɔ. Ɔkɨlɔ wɔ, Jisɔs ɔbibɔ mɔ na, 41“Mambum bɛ aduga mɛ nsi nye wu?”

Ofini na, “ƆKƆKƆ, sii mɛ nchɛ ɛtɨma nkɨla.”

42Jisɔs ɔkani mɔ na, “Chɛ ɛtɨma; kɛsɨmɛkpa kechi kɛ nani wu.” 43Ɔmɔmɛɔmɔmɛ ɔchɛ ɛtɨma, mɨnɛ ɔtɔrɛ Jisɔs, ɔnyaŋa Ɛbɨrɔkpabi ɛkalɛlɛ! Ndi ani fɛb wa chɛ bumbu wɔ jagɔ, wa tɔrɛ wanyɛ Ɛbɨrɔkpabi reju.

Currently Selected:

Luk 18: Olulumo-Ikom

Highlight

Copy