Luk 17
17
Kebia arigɛ ɛfɔrɛfɔrɛ
(Mat 18:6-7; 21-22; Mak 9:42)
1Jisɔs ɔkani atɔramɔ na, “Ilumɛ kɨn iwɔ, gbɔ kobiwɔ kɔnyɛ oni nwu ilumɛ ayi isia iwɔŋa. 2Kɨn eliwɔ esiŋɔ abɔ nla wa kɨnɛ mɔ rɛta ra arikpana rɛkɔlɔ, wa fumɔ mɔ ra Mayaa, ra ndi nla onɨŋo si nbibɔn mba wa tɔ ra ilumɛ. 3Rɛfɔ ndifa, bagɛlɛnɛ ɛkpa.
“Ɔmalɔ owu obo si wu kebia, tɛmakɛsɨb nyɛ mɔ, ɔbɔ fɔranɛ, fɔrɛ mɔ. 4Abɔ osii wu kebia ɛgbɔ ɛnɛtal (7) ra reyi, omulɛnɛ ɔwɔ oyimo wu ɛgbɔ ɛnɛtal (7) ɔwa kani na, ‘Nfɔranɛ, fɔrɛ mɛ,’ ɛlɔmɛnyɛ na afɔrɛ mɔ.”
5Atɔra Jisɔs asaŋɛsaŋɛ wa kani mɔ na, ƆKƆKƆ, “Kɨla wul kɛsɨmɛkpa!” 6ƆKƆKƆ ofini bɛ na, “Ribɔ fɔn egbigbɛd kɛsɨmɛkpa amɔm emuu-a ndug, kɨn riyɛ rikani ɔkɨmkɨm keti nchi na, ‘Lɛnɛ nfa dɔŋ ka baŋ nɛ ra ɔkɨmkɨm Mayaa,’ mɨnɛ kɨn kɛ lɔ remu redi.”
Rotumɔ ra orin
7Jisɔs ɔkani bɛ rɛkanɔ redudu na, “Abɔ oni wunɛ ra kɛdɔŋ kewun ɔfɔnɔ orin nwu osia rotumɔ ra kɛkɔ din ɔbagala mɔ irɔd. Kɨn ɔkani mɔ abɔ ɔkɨlɛ kɛkɔ na, ‘Wɔwa tumetumɛ jɛ kɔjɛ-ɛ’? 8Nɛɛ ɔkana mɔ na, ‘Yɨbɔ mɛ kɔjɛ, yunɛ olili wa sii orin nyɛ mɛ kɔjɛ nkɛn, adimini mɛ njɛ nŋɔ, mbɔ wɛ, awu kadi ayaya dulɔ aka jɛ aŋɔ.’ 9Kɨn ɔnyɛ orin awu rɛsamɛ ndi osii rotumɔ rɔdɛn-ɛ? 10Irigirigɔ mɨnɛ dɛ ɛra rawun, ribo si bumbu ɛlɔmɛnyɛ na risi kɛmanchi nkani wun, rikani na, ‘Awul rɛralɛ arin mba wa bi fuu ra reju, rɛjani resi rotumɔ rodul.’ ”
Jisɔs ogbanɔ ani richɛriwur juu
11Ndi Jisɔs ɔra ɔya Jɛrusɛlɛm, osiŋɔ matii ma ɛgbɔa Galili ra Sameria. 12Ndi ɔnɨŋɔ nɔ keifɨrɔ chinɛ, ani richɛriwur juu (10), adumini, wawɔ wa yimɔ mɔ. Wa barɔ ɔfɨrɛtɨma, 13mɨnɛ wa kuga ra ɔkɨmkɨm remu na, “Jisɔs, ƆKƆKƆ, fɔnɔ mafɨbɔ rawul, gbano wul!”
14Jisɔs ɔkɨlɔ chɛ bɛ, ɔkani bɛ na, “Ridɔŋ rika kɔgɛlɛ asia kɔya ikpaju iwun.” Mɨnɛ ndi wa gbɛ kumaka, ikpaju ibɛ iru nɛ iwanɛ.
15Ndi wunɛ ɔchɛ na ɛkpa ɛjani mɔ, omulɛnɛ ɔwɔ, ɔkɔna ra ɔkɨmkɨm remu ɔnyaŋa Ɛbɨrɔkpabi ɛkalɛlɛ. 16Ɔka kpɔgɛlɛ ɛkparoisɔ a Jisɔs, ɔsamɛ mɔ. Oni nwufa onia Sameria.
17Jisɔs ɔbɨbɔ mɔ na, “Nɛɛ ani juu fɛb bɛ wa fɔnɔ eruɛnɛlɛ? Atan anaa (9) mbaka fɛɛ? 18Oni tum wunɛ obi yɛ omulɛnɛ ɔwa nyi Ɛbɨrɔkpabi reju ebisiŋɛ ɔchɛŋɛchɛŋɛ nwufa-a?” 19Kadi ɔkani mɔ na, “Tɨmɔnɛ dɔŋ, kɛsɨmɛkpa kechi kɛ nani wu.”
Ɛwɔɛlɛ rɛkɨm ra Ɛbɨrɔkpabi
(Mat 24:23-28,36-41)
20Reyi dɨnɛ, ndi Farɛsi wa bɨba Jisɔs kɛgbɔ nchi rɛkɨm ra Ɛbɨrɔkpabi rɛnɨŋɔ wɔ. Ofini bɛ na, “Kɛgbɔ nchi rɛkɨm ra Ɛbɨrɔkpabi rɛnɨŋɔ bɨnɛ rira chia, 21din ani wa bɔ kani na, ‘Cha dɛ nfa,’ din na, ‘Cha dɛ nkɨlɛ,’ kum rɛkɨm ra Ɛbɨrɔkpabi rɛra nfa ra kɛdɔŋ kewun.”
22Kadi Jisɔs ɔkani atɔramɔ na, “Kɛgbɔ kɛtawɔ nchi rinɨŋɔ dug na ri chɛ reyi ra Wɔna Oni dinɛ nka ra kekul, gbɔ ribiyaa ri chɛ dɛ. 23Ani kɨn wa kani wun na, ‘Chɛ Wɔna Oni nkɨlɛ,’ din ‘Chiamɔ nka!’ Gbɔ rika tɔrɛ bɛ. 24Kum kɛmanchi gbaŋgbaŋ ɔkaganɛ ra kayu bɨnɛ sad chinɛ ajagɔ sad keidu, afɛ kɛmanchi enɨŋo tumɛ reyi ndi Wɔna Oni ɔnɨŋɔ wɔ. 25Gbɔ ɛlɔmɛnyɛ na ɔrɨŋɛtɨma ɔchɛ esinisini ra birɛ esii, kɛsɛ nchi mɨnɛ kɨn ke fumɔ mɔ.
26“Irigirigɔ kɛmanchi etumɛ kɛgbɔ ka Nua, afɛ kɛmanchi enɨŋo tumɛ ra kɛgbɔ nchi Wɔna Oni ɔnɨŋɔ wɔ. 27Ani wara wa jia, wa ŋua, wa tima rabalɔ, waya rabalɔ, tata reyi ndi Nua ɔnɔlɔ kokug, mɨnɛ mani mawɔ mawa binɛ bɛ fɛb.
28“Irigirigɔ dɛ etumɛ kɛgbɔ ka Lɔt. Ani wa ra wa jia, wa ŋua, wa dɛwa irɛ wa kula, wa sia ɔkɔ mɨnɛ wa ria itɔ. 29Gbɔ reyi ndi Lɔt ɔgbɛ Sɔdɔm. Reyi adifɛ, Ɛbɨrɔkpabi etigɛ rokun arigɛ rata rokun ra kayu, ndu rowulɔ bɛ fɛb.
30“Nnan dɛ enɨŋo tumɛ reyi ndi Wɔna Oni ɔnɨŋɔ yaŋinɛ. 31Reyi adifɛ, oni nwu ɔmaŋɔ ra eful ɛtɔ nwu ɔfɔnɔ ifɔnɔ iyɛn rikalɔ rɛtɔ, oni binɛnɛ kɛgbɔ na ɔrɛ ɔka tim yɛ. Mɨnɛ oni nwu ɔra ra kɛkɔ oni binɛnɛ kɛgbɔ ɔkɨlɛ. 32Ri tilɛnɛ bumbu wɔ jagɔ wɔnyɛ ɔwaa Lɔt! 33Oniranwunɛ nwu obuma owulɛ rokpin rɔdɛn, kɨn ɔlɨmɛ dɛ, gbɔ oni nwu ɔlɨmɛ rokpin rɔdɛn, kɨn owulɛ dɛ. 34Nkani wun, ra jɔ adifɛ, ani afaa (2) kɨn wa lɔmɛ ra kɛlɔɔ chinɛ; kɨn wa timɔ wunɛ wa dulɔ, nwuka ɔgbɔ. 35Awani afaa (2) kɨn wa kɔga birɛ kɛdɔŋ; kɨn wa timɔ wunɛ, nwuka ɔgbɔ.”
36[Adumini afaa (2) kɨn wa tumɛ ra kɛkɔ, kɨn wa timɔ wunɛ, nwuka ɔgbɔ.#17:36 Rachɛrɛ radudu ra bi fɔnɔ kɛkpɛna nchi, wa kɨla chɛ ɔkɨla.]
37Wa bɨbɔ mɔ na, “ƆKƆKƆ, nfan dɛ mbi fɛb wɛnɨŋɔ jag?” Jisɔs ofini bɛ na, “Kumka ɛkpaju obuburɛ etin ɛra, afɛ dɛ utɛrɛ wa tugala nɛ.”
Currently Selected:
Luk 17: Olulumo-Ikom
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
