Luk 15

Rɛkanɔ ra ɛrɔd nyi ɛlɨmɔ

(Mat 18:10-14)

1Faŋandi, atama ntubatuba gɔmɛn akɨla asia obia wara wa tugalanɛ wa dimɔ Jisɔs. 2Gbɔ Farɛsi ra Akɔga Ibina wa mɨmini na, “Odumini nwu ɔtama asia obia mɨnɛ ojia kɔjɛ rabɛ.”

3Kadi Jisɔs ɔkani bɛ rɛkanɔ ndifa: 4“Maa oni ra kɛdɔŋ kewun mɔ abɔ ɔfɔnɔ irɔd ɛtɨn ɛtan, gbɔ yinɛ ɛlɨmɔ. Ɔra gbia irɔd ɛtɨn ɛnaa asɛ rokurɔ ra inaa (99) nyika akɛ ra ifa, odulɔ ɔkadug nyi ɛlɨmɔlɨm tata ɔchɛ yɛ-ɛ? 5Ɔbɔ chɛ yɛ, ra kɛdɔmetimɔ origa yɛ ra kɛfɛgɔ, 6mɨnɛ ɔkɨlɛ rɛtɔ. Kadi otugɛlɛ achɛmɔ abɛn akɨla ani mba wa tuma wa kula mɔ ɔkani na, ‘Ritɔmɔ rami; kum nchɛ ɛrɔd ɛyɨm nyi ɛlɨmɔ.’ ” 7Jisɔs ɔkani bɛ na, “Irigirigɔ dɛ kɛdɔmetimɔ kɛra ra kayu, abaŋa osia obia wunɛ nwu osii ɛfɔrafɔra etimɔ, esiŋɛ ani ɛtɨn ɛnaa asɛ rokurɔ ra inaa (99) mba wa bikɨlo dug ɛfɔrafɔra etimɔ.”

Rɛkanɔ ra ogbuga nwu ɔlɨmɔ

8Jisɔs ɔkani bɛ rɛkanɔ redudu na, “Abɔ ɔwani ɔfɔnɔ akɔrama juu, Gbɔ wunɛ ɔlɨmɔ. Ɔra kaga ɛra, kadi ɔtaŋɔ ɛtɔ ndɨmdɨm, odugɔ tata ɔchɛ mɔ? 9Mɨnɛ ɔbɔ chɛ mɔ, otugala achɛmɔ abɛn akɨla ani mba wa tuma wa kula mɔ ɔkani bɛ na, ‘Ritɔmɔ rami, kum nchɛ ɔkɔrɛma owum nwu ɔlɨmɔ.’ 10Nkani wun, irigirigɔ dɛ ayilarotumɔ Ɛbɨrɔkpabi wa tɔma ra kɛdɔmetimɔ kɛgbɔ nchi osia obia wunɛ ɔbɔ fɔranɛ.”

Rɛkanɔ ra wɔn odumini nwu ɔlɨmɔ

11Jisɔs ɔkani bɛ rɛkanɔ redudu na, “Odumini wunɛ ɔfɔnɔ bɔnadumini afaa. 12Nwua nwiwɔn ɔkani mitɛ ɔwɛn na, ‘Mitɛ, nyɛ mɛ konemi kokum ra ifɔnɔ iyi.’ Rɛfɔ adifɛ, mitɛ ɔbɛ onemi ifɔnɔ iyɛn ɔnyɛ bɛ afaa.”

13“Ra rayi giriri, nwua nwiwɔn otugɛlɛ ifɔnɔ iyɛn, ɔlɛnɛ odulɔ ɔfɨrɛtɨma kɛfɨrɔ ɔka binɛ yɛ, mɨnɛ ojia rokpin ra kebia kɛtɨma. 14Ndi ɔkɨlo binɛ birɛ mbɛn fɛb, mŋbɔ minɔlɔ kɛfɨrɔ achi ndɨmdɨm, obikɨlɔ fɔn bumbu ojia. 15Rɛfɔ adi, ɔka yara ɛkpaju ɛyɛn ɔnyɛ oni kɛfɨrɔ achi, na ɔlɔmɔ osi rotumɔ ramɔ, ɔkɔ kɛkɔ otigɛ mɔ ɔka lɛɛ akug abɛn. 16Oduga na nla ɔjɛ kɔjɛ ka akug, gbɔ wabi nyɛɛ mɔ tumbum.”

17“Gbɔ Ndi ɔkɨlɔ chɛŋa ɛkpaju ɛyɛn, ɔlamɔ na, ‘Ani rotumɔ a mitɛ owum amɛɛ bɛ wa fɔnɔ kɔjɛ esii nku wa jia akɛ ta ko kemakɛma bɛ, ndi nra nfa mba ra mŋbɔ! 18Ami kɨn ntɨmɔnɛ, mɨnɛ ndulɔ nyimɔ mitɛ owum, mɨnɛ kɨn kani mɔ na, Mitɛ, nsi kebia nyɛ kayu arigɛ awu. 19Mbikɨlo liu na ayinɔ mɛ wɔn odumini owu; timɔ mɛ kɛmaka oni rotumɔ owu wunɛ nwu alagɔ rotumɔ.’ 20Mɨnɛ ɔtɨmɔnɛ odulɔ ɛkpa mitɛ ɔwɛn.”

Gbɔ ndi ɔbɛlɛ ɔfɨrɛtɨma, mitɛ ɔwɛn ɔchɛ mɔ, mɨnɛ mafɨbɔ masi mɔ ra wɔnɔwɛn; ɔtɨlɛ odulɔ ɔka bami ramɔ, mɨnɛ ɔrɔ mɔ kama.

21“Wɔnɔwɛn ɔkani mɔ na, ‘Mitɛ, ami nsi kebia nyɛ kayu arigɛ awu. Mbifuu na ayinɔmɛ wɔn odumini owu.’

22“Gbɔ Mitɛ ɔwɛn ɔkani arin abɛn na, ‘Samana! Ri timɔ ewuri nyi eliwɔ esiŋɔ fɛb riwa rɔmɔ. Rirɔ mɔ nkpaŋandɨra ra eninɔ mɨnɛ rirɔ mɔ birɛ ikad ra ikad iyɛn. 23Ri timɔ wɔn ɛfɔm nyi ribɔlɛ egbuga riwa wuu. Rɛfɔnɔ kɛtɔmɔ, rɛjɛ rɛtɔmɔ. 24Kum wɔn odumini owum nwufa ɔbaba, gbɔ omulɛnɛ ofilɛ ɔkɨla, ɔlɨmɔlɨm gbɔ wa chɛ mɔ.’ Rɛfɔ adifɛ wa bɨnɛ wa tɔma.”

25“Ndi mbi fɛb wɛ jaga, wɔn ɔwɛn nwu onintɨmini ɔrakɛ osia rotumɔ ra kɛkɔ. Ndi ɔkɨla ɔwɔŋa ra ɛtɔ, odimɔ ɛchɛrɔ ɛkɔnɛlɛ ra etugɛlɛ. 26Mɨnɛ oyinɔ orin wunɛ ɔbɨbɔ mɔ bumbu wɔ jaga. 27Ofini mɔ na, ‘Ɔmalɔ owu ɔwɔ, mɨnɛ mitɛ owu, owu wɔn ɛfɔm nyi rɛbɔ lɛ egbuga, kum ɔmalɔ owu ɔkɨlɛ obin ra kɛjani ɛkpa.’

28“Etimɔ ɛra ɔmalɔ nwu onintɨmini, obi yilɛ ɔnɔlɔ rikalɔ ra ɛtɔ. Rɛfɔ adifɛ, mitɛ ɔwɛn odulɔ ɔka dɛ mɔ akɛ rɔfa. 29Gbɔ ofini mitɛ ɔwɛn na, ‘Chɛ! Nsi rotumɔ nye wu jɛɛ ndi fɛb, mbi kpɛnɔ ibina iyi tum yinɛ. Gbɔ abinyɛɛ mɛ tum wɔn ebuu, ntɔmɔ ra achɛmɔ abam. 30Gbɔ ndi wɔnowu nwu obo binɛ ifɔnɔ iyi ra awani asasa ɔkɨlɛ ɔwɔ ra ɛtɔ, awu wɔn ɛfɔm nyi rɛbɔ lɛɛ egbuga anyɛ mɔ!’

31“Mitɛ ɔwɛn ofini mɔ na, ‘Wɔnowum, awu aranka rami kɛgbɔ ranchinɛ, mɨnɛ mbum rambunɛ mbu nfɔnɔ wɔ lɔmɛ wɔ nye wu. 32Gbɔ ɛlɔmɛnyɛ na rɛtɔmɔ, rɛdɔmɛnɛ etimɔ, kum ɔmalɔ odumini owu nwufa ɔbaba gbɔ omulɛnɛ rokpin ɔkɨla; ɔlɨmɔlɨm gbɔ wa chɛ mɔ.’ ”

Currently Selected:

Luk 15: Olulumo-Ikom

Highlight

Copy